2 Laꞌ ajniquetla ti yutslel i pusicꞌal Dios yicꞌot i ñʌchꞌtyʌlel laꞌ pusicꞌal tyʌlem bʌ ti Dios lac Tyat yicꞌot ti lac Yum Jesucristo.

3 Laꞌ lac sub i ñuclel Dios i Tyat lac Yum Jesucristo. Jiñʌch lac Tyat muꞌ bʌ i pꞌuntyañonla. Jiñʌch Dios muꞌ bʌ i bej ñuc isʌbeñonla lac pusicꞌal.

4 Dios miꞌ ñuc isʌbeñonla lac pusicꞌal ti pejtyelel lac wocol cheꞌ mi la quilan wocol chaꞌan joñonla jeꞌel chꞌujbi lac ñuc isʌbeñob i pusicꞌal jini yañoꞌ bʌ chʌncol bʌ i yilan wocol. Cheꞌ jini mi lac ñuc isʌbeñob i pusicꞌal jini añoꞌ bʌ i wocol cheꞌ bajcheꞌ tiꞌ ñuc isʌbeyonla lac pusicꞌal Dios jeꞌel.

5 Como chʌncol lojon c wen ilan wocol jeꞌel cheꞌ bajcheꞌ ti yilʌ wocol Cristo. Chʌꞌʌch jeꞌel chaꞌan ti Cristo mi lac wen ñuc isʌbentyel lac pusicꞌal.

6 Jin chaꞌan mi chʌncol lojon quilan wocol, mi lojon quilan chaꞌan i ñuc isʌntyel laꞌ pusicꞌal yicꞌot chaꞌan laꞌ cotyʌntyel. Cheꞌ miꞌ ñuc isʌbeñon lojon c pusicꞌal Dios mi lojon ñuc isʌbentyel lojon c pusicꞌal chaꞌan jatyetla jeꞌel mi laꞌ ñuc isʌbentyel laꞌ pusicꞌal. Cheꞌ jini chꞌujbi laꞌ cucheꞌ ti wen jini wocol cheꞌ bajcheꞌ mi lojon cucheꞌ jeꞌel.

7 Como cujil lojon isujm ti xucꞌtyʌlel lojon c pusicꞌal cheꞌ bajcheꞌ mi quejel laꞌ wilan wocol chʌꞌʌch mi lojon quilan wocol jeꞌel. Pero cujil lojon isujm mi quejel laꞌ tyajeꞌ i ñuc isʌntyel laꞌ pusicꞌal ti Dios jeꞌel cheꞌ bajcheꞌ mi lojon c ñuc isʌbentyel lojon c pusicꞌal.

8 Hermañujob, com lojon mi laꞌ ñaꞌtyan bajcheꞌ ti lojon c ñusʌ wocol yaꞌ ti pañimil Asia bʌ i cꞌabaꞌ. Ñoj wocol ti lojon c ñusʌ jintyo mach chꞌujbi lojon c bej cuch ti lojon cubi. Maꞌix mi quejel lojon j colel ti cubi.

9 Ti lojon cubi cheꞌ bajcheꞌ jini muꞌ bʌ quejel i yʌjqꞌuel ti tsʌnsʌntyel. Pero chʌꞌʌch ti aqꞌuentiyon lojon c ñusʌ wocol chaꞌan maꞌix mi lojon c pensalin mi an lojon c bajñel c pꞌʌtyʌlel pero chaꞌan mi lojon c xucꞌchocon c pusicꞌal ti Dios muꞌ bʌ i tyejchisan loqꞌuel sajtyemoꞌ bʌ.

10-11 Dios ti yʌcꞌʌyon lojon ti cojlel. Chʌncol tyo i bej colon lojon baꞌ bʌbʌqꞌuen mi lojon c sajtyel. Cujil lojon isujm tic pusicꞌal muꞌ tyo i quejel i bej acꞌon lojon ti colel Dios cheꞌ mi laꞌ bej tyajon lojon ti oración cheꞌ cabʌlob miꞌ tyajon lojon ti oración. Chaꞌan ti yoración cabʌlob, cabʌlob tyo mi quejel i suben Dios wocox i yʌlʌ chaꞌan ti pejtyelel i yutslel muꞌ bʌ i yʌqꞌueñon lojon Dios.

12 Cꞌajacña lojon coj como machꞌan chʌ bʌ mi yʌleꞌ lojon c pusicꞌal. Como ti ajniyon lojon ti sʌc yicꞌot ti wen bajcheꞌ miꞌ mulan Dios wʌꞌ ti mulawil. Más tyo chʌꞌʌch ti ajniyon ti wen yaꞌ baꞌ añetla. Pero mach cheꞌic jach ti ajniyon ti wen chaꞌan ti lojon c bajñel c ñaꞌtyʌbal jach. Chʌꞌʌch tiꞌ cotyʌyon lojon cajñel Dios ti i yutslel.

13 Jini muꞌ bʌ lojon c tsꞌijbubeñetla tij carta junlajal i sujmlel yicꞌot muꞌ bʌ lojon c pensalin. Chʌꞌʌch bajcheꞌ mi lojon c tsꞌijbun chʌꞌʌch jeꞌel mi lojon cʌleꞌ. Maꞌix chaꞌchajp lojon c pensal. Com mi laꞌ wen chꞌʌmꞌen i sujmlel j carta.

14 Chʌncol laꞌ tsꞌityaꞌ chꞌʌmꞌen isujm yajcʌbilon bʌ ajsubtꞌan ñumel yaꞌ baꞌ añetla. Tijicña mi quejel laꞌ wubin chaꞌañon chaꞌan tic subeyetla i tꞌan Dios. Chʌꞌʌch bajcheꞌ tijicña mi quejel lojon cubin jeꞌel chaꞌan ti jatyetla ti jim bʌ qꞌuin cheꞌ mi tyʌlel lac Yum Jesús.

15 Chaꞌan mic ñaꞌtyan cꞌajacña laꞌ woj chaꞌan yajcʌbilon bʌ ajsubtꞌan ñumel laꞌ chaꞌan, tic wʌ ñaꞌtyʌ chaꞌyajlel mi quejel c ñumel ti julaꞌ yaꞌ baꞌ añetla. Junyajlel mij cꞌotyel cheꞌ chʌncol c ñumel majlel ti julaꞌ. Ti chaꞌyajlel cheꞌ chʌncol c chaꞌ ñumel c julaꞌ añetla tic sujtyel chaꞌan chaꞌyajlel cꞌajacña laꞌ woj mi quejel laꞌ wubin.

16 Tic pensali c julaꞌ añetla cheꞌ chʌncol tyo c ñumel majlel ti julaꞌ ti pañimil Macedonia bʌ i cꞌabaꞌ. Tic pensali c chaꞌ julaꞌ añetla cheꞌ mic chaꞌ ñumel tic sujtyel ti Macedonia. Cheꞌ jini chꞌujbi laꞌ majlel laꞌ wʌcꞌon cheꞌ mic majlel ti pañimil Judea bʌ i cꞌabaꞌ.

17 ¿Chaꞌchajp ba c pensal mi laꞌ wʌl cheꞌ chʌꞌʌch ti cʌlʌ? Mach cheꞌiqui. Maꞌix mi cʌleꞌ mi mux c tyʌlel cheꞌ maꞌix mic pensalin c majlel cheꞌ bajcheꞌ yañoꞌ bʌ muꞌ bʌ i lolon alob ti chaꞌchajp.

18 Pero Dios yujil machꞌan mi lojon c lolon subeñetla: Mucꞌʌch c chaꞌlen, choꞌon lojon, cheꞌ maꞌix mi lojon c pensalin c chaꞌlen.

19 Como machꞌan chaꞌchajp i pensal Cristo Jesús i Yalobil bʌ Dios. Melelʌch i tꞌan Cristo tsaꞌ bʌ lojon c subeyetla quicꞌot Silvano quicꞌot Timoteo.

20 Ti Cristo chʌncol i luꞌ tsꞌʌctiyel jini tsaꞌ bʌ i wʌ alʌ Dios. Jin chaꞌan ti Cristo mi lac suben i ñuclel Dios cheꞌ mi la cʌleꞌ: Amén, choꞌonla, chaꞌan cheꞌʌch yom.

21 Diosʌch tsaꞌ bʌ i xucꞌchocobeyon lojon c pusicꞌal ti Cristo tsaꞌ bʌ i xucꞌchocobeyetla laꞌ pusicꞌal jeꞌel. Tiꞌ pʌyʌyonla chaꞌan mi lac chaꞌliben i troñel.

22 Dios ti yʌcꞌonla i wentyʌlel lac sellojlel chaꞌan tsiquil i chaꞌañonla. Ti yotsʌ Chꞌujul bʌ i Chꞌujlel ti lac pusicꞌal. I señʌjlel chaꞌan tsiquilʌch an tyo yambʌ muꞌ tyo bʌ quejel la cʌqꞌuentyel.

23 Max tyo baꞌan tic ñaxan julaꞌ añetla cheꞌ ñac tsajniyon ti Macedonia cheꞌ bajcheꞌ tic wʌ pensali como mach com cotsan laꞌ chꞌʌjyemlel cheꞌ mic wersa tyoj isañetla chaꞌan ti caj jini tsaꞌ bʌ laꞌ chaꞌle. Yujil isujm Dios melelʌch c tꞌan.

24 Mach chaꞌan com lojon c wersa xiqꞌuetla bajcheꞌ yom mi laꞌ chꞌujbin. Como xucꞌuletixla. Pero com lojon j cotyañetla laꞌ más ubin cꞌajacña bʌ laꞌ woj.