2 Ti jujumpꞌej ñaxan bʌ qꞌuin ti semana jujuntiquiletla yom mi laꞌ parte lot tyaqꞌuin ti laꞌ wotyot. Jiñʌch bajcheꞌ yonlel ti laꞌ ganari tyaqꞌuin mi laꞌ locꞌsan tsꞌityaꞌ chaꞌan ofrenda. Jini on bʌ ti ganari más mero on yom i yʌcꞌ. Jini machꞌʌ on tiꞌ ganari, más tsꞌityaꞌ jach yom i yʌcꞌ. Cheꞌ jini maꞌix mi laꞌ wersa muchꞌquin baꞌ bʌ ora mij cꞌotyel.

3 Cheꞌ mij cꞌotyel mi quejel j choqueꞌ majlel ti Jerusalén jini hermañujob muꞌ bʌ laꞌ yajcan. Mi quejel cʌqꞌueñob jun chaꞌan i chꞌʌmob majlel yicꞌot jini tyaqꞌuin chʌncol bʌ laꞌ muchꞌquin chaꞌan mi yʌqꞌueñob jini hermañujob yaꞌi.

4 Chꞌujbiyic c majlel quicꞌot, mic majlel quicꞌot jini muꞌ bʌ quejel laꞌ choqueꞌ majlel.

5 Cheꞌ mic majlel culaꞌañetla, ñaxan com ñumel ti pañimil Macedonia bʌ i cꞌabaꞌ. Cheꞌ jini ti wiꞌil mij cꞌotyel yaꞌ baꞌ añetla.

6 Cꞌoꞌojl cheꞌ mij cꞌotyel yaꞌ baꞌ añetla mic jalejel o mi yaꞌ mic ñusan yorojlel tsʌñal yaꞌ baꞌ añetla. Chaꞌan cheꞌ jini chꞌujbi laꞌ tsʌcleñon majlel baqui jach mic majlel.

7 Como mach comic jach poj qꞌueletla cheꞌ mic ñumel. Com cʌytyʌl yaꞌ baꞌ añetla. Mi cheꞌ yom Dios mij cʌytyʌl yaꞌi.

8 Pero muꞌ tyo j cʌytyʌl ti lum Efeso bʌ i cꞌabaꞌ jintyo ñumenix qꞌuin Pentecostés bʌ i cꞌabaꞌ.

9 Como cabʌl yom i yubiñob i tꞌan Dios yaꞌi pero an jeꞌel cabʌl j contrajob.

10 Mi ti cꞌoti Timoteo aqꞌuen i tyaj i tijicñʌyel yaꞌ baꞌ añetla. Miꞌ chaꞌliben i troñel lac Yum jeꞌel cheꞌ lajal bajcheꞌ mic chaꞌlen.

11 Mach yom mi laꞌ pꞌajeꞌ jini Timoteo. Pero cotyanla chaꞌan mi chaꞌ loqꞌuel majlel ti ñʌchꞌtyʌlel i pusicꞌal chaꞌan mi chaꞌ julel wʌꞌ baꞌañon. Como chʌncox c pijtyan Timoteo jeꞌel cheꞌ mi julel yambʌ hermañujob.

12 Tic xiqꞌui la quermañu Apolos chaꞌan mi majlel i julaꞌ añetla jeꞌel yicꞌot jini yambʌ hermañujob. Pero max tyo yom i majlel wale iliyi. Cheꞌ chꞌujbiyiqui muꞌ tyo i cꞌotyel.

13 Yom bej pꞌixiletla. Yom bej xucꞌuletla. Ajñenla bajcheꞌ wen bʌ quixtyañu. Yom pꞌʌtyʌletla ti lac Yum.

14 Pejtyelel chʌ bʌ jach mi laꞌ chaꞌlen, chaꞌlenla ti laꞌ pꞌuntyaya.

15 Wale hermañujob, laꞌ wujil isujm chaꞌan jini añoꞌ bʌ ti yotyot Estéfanas ñaxan tiꞌ chꞌujbiyob i tꞌan Dios yaꞌ ti pañimil Acaya bʌ i cꞌabaꞌ. Tsaꞌix i yʌcꞌʌ i bʌ i chaꞌlen cotyaya chaꞌan hermañujob ti lac Yum.

16 Mic subeñetla chaꞌan yom mi laꞌ chꞌujbiben i tꞌañob yicꞌot jeꞌel majchical jach muꞌ bʌ ti troñel ti cotyaya yicꞌot jini mucꞌob ti yambʌ wen bʌ troñel.

17 Tijicñayon chaꞌan tsaꞌix juli Estéfanas, Fortunato yicꞌot Acaico wʌꞌ baꞌañon. Jini tiꞌ cotyʌyoñob como machꞌan ti mejli laꞌ cotyañon chaꞌan ñajt añetla.

18 Tsaꞌix i ñuc isʌbeyon c pusicꞌal yicꞌot laꞌ chaꞌan jeꞌel. Yom mi laꞌ qꞌuel ti ñuc quixtyañujob bajcheꞌ añob.

19 Jini ochemoꞌ bʌ tiꞌ tꞌan Dios muꞌ bʌ i muchꞌquiñob i bʌ yaꞌ ti pañimil Asia bʌ i cꞌabaꞌ miꞌ chocbeñetla tyʌlel saludos. Aquila yicꞌot yijñam Priscila bʌ i cꞌabaꞌ yicꞌot jini ochemoꞌ bʌ tiꞌ tꞌan Dios muꞌ bʌ i muchꞌquiñob i bʌ ti yotyot miꞌ wen chocbeñetla tyʌlel saludos chaꞌan ti lac Yum.

20 Chꞌʌmʌla jini saludos chʌncol bʌ i chocob tyʌlel pejtyel hermañujob. Aqꞌuen laꞌ bʌ saludos cheꞌ bajcheꞌ mi laꞌ beleꞌ chaꞌlen.

21 Pablojon, mic chocbeñetla tyʌlel ili saludo tsꞌijbubil bʌ tij cꞌʌb.

22 Mi an majch machꞌan miꞌ pꞌuntyan lac Yum Jesucristo laꞌ chojquic ti Dios. Laꞌ tyʌlic lac Yum ti ora.

23 Laꞌ i yʌqꞌueñetla i yutslel i pusicꞌal lac Yum Jesucristo.

24 Mic chocbeñetla tyʌlel tꞌan chaꞌan c subeñetla mic luꞌ pꞌuntyañetla ti Cristo Jesús. Amén.