2 Cotyʌbiletla chaꞌan ti jini wen bʌ tꞌan mi chʌncol laꞌ bej chꞌujbin jini tsaꞌ bʌ c subeyetla, mi mach ti laꞌ tiꞌ jach ti laꞌ lolon alʌ ti laꞌ chꞌujbi.

3 Ñoj ñuc i cꞌʌjnibal jini tsaꞌ bʌ subentiyon chaꞌan ti sajti Cristo chaꞌan i xotꞌbeñonla lac mul cheꞌ bajcheꞌ tsꞌijbubil tiꞌ tꞌan Dios. Jiñʌch tsaꞌ bʌ c subeyetla jeꞌel.

4 Ti chꞌujñʌnti Cristo. Ti chaꞌ tyejchi loqꞌuel baꞌan sajtyemoꞌ bʌ ti yuxpꞌejlel qꞌuin cheꞌ bajcheꞌ tsꞌijbubil tiꞌ tꞌan Dios.

5 Cristo tiꞌ pʌsꞌe i bʌ Pedro. Ti wiꞌil tiꞌ pʌsꞌe i bʌ jini yañoꞌ bʌ tsaꞌ bʌ i cʌmbeyob i tꞌan Jesús.

6 Ti wiꞌil Cristo tiꞌ pʌsꞌe i bʌ ñumen ti quinientos hermañujob. Cabʌlob tsaꞌ bʌ yilʌyob wʌꞌ tyo an la quicꞌot aunque an tsaꞌix bʌ sajtiyob.

7 Ti wiꞌil tyo Cristo tiꞌ pʌsꞌe i bʌ Jacobo. Ti wiꞌil tyo tiꞌ pʌsꞌe i bʌ Cristo pejtyel jini yajcʌbiloꞌ bʌ ajsubtꞌañob ñumel.

8 Ti más wiꞌilix, cheꞌ wajalix ti yilʌyob Cristo jini yañoꞌ bʌ joñon tyo jeꞌel tic wut tiꞌ pʌsꞌon i bʌ Cristo.

9 Como maꞌix j cꞌʌjnibal mi cubin bajcheꞌ yañoꞌ bʌ yajcʌbiloꞌ bʌ ajsubtꞌañob ñumel. Mach weñon chaꞌan pejcʌnticon ti yajcʌbilon bʌ ajsubtꞌañon ñumel yubil como tic tyʌcꞌlʌyob jini ochemoꞌ bʌ tiꞌ tꞌan Dios.

10 Pero añon bajcheꞌ añon chaꞌan tiꞌ pꞌuntyʌyon Dios. Mach lolomic jach tiꞌ pꞌuntyʌyon Dios. Como más tic chaꞌle troñel bajcheꞌ yañoꞌ bʌ yajcʌbiloꞌ bʌ ajsubtꞌañob ñumel. Mach joñonic pero Diosʌch tiꞌ chaꞌle troñel quicꞌot chaꞌan ti yutslel yicꞌotyon.

11 Pero maꞌix chʌ bʌ miꞌ chaꞌlen mi joñon mi yambʌ ajsubtꞌañob ñumel pero mismo jiñʌch bʌ tꞌan tsaꞌ bʌ lojon c subeyetla. Jiñʌch jini tꞌan tsaꞌ bʌ laꞌ chꞌujbibe.

12 Pero chʌncol cʌleꞌ lojon ti lojon c subtꞌan ti tyejchi loqꞌuel Cristo baꞌan sajtyemoꞌ bʌ. ¿Bajcheꞌqui isujm cheꞌ yaꞌ baꞌañetla an jini chʌncol bʌ lolon aleꞌ machꞌan mi quejel i tyejchelob loqꞌuel sajtyemoꞌ bʌ?

13 Pero mi machꞌan mi quejel i tyejchel loqꞌuel sajtyemoꞌ bʌ mi jinic Cristo machꞌan ti tyejchi loqꞌuel baꞌan sajtyemoꞌ bʌ cheꞌ jini.

14 Machic baꞌan ti tyejchi loqꞌuel Cristo baꞌan sajtyemoꞌ bʌ lolom jachix mucꞌon lojon ti subtꞌan cheꞌ jini. Lolom jachix mi laꞌ chꞌujbin Cristo cheꞌ jini.

15 Mi machꞌan mi quejel i tyejchel loqꞌuel sajtyemoꞌ bʌ xlotyon lojon yubil cheꞌ jini. Como chʌncox lojon cʌleꞌ Dios ti tyeche loqꞌuel Cristo baꞌan sajtyemoꞌ bʌ. Mi mach melelix mi quejel i tyejchel loqꞌuel sajtyemoꞌ bʌ mach melelix Dios ti tyeche loqꞌuel Cristo baꞌan sajtyemoꞌ bʌ jeꞌel cheꞌ jini.

16 Como mi machꞌan mi quejel i tyejchelob loqꞌuel sajtyemoꞌ bʌ mi jinic Cristo ti tyejchi loqꞌuel baꞌan sajtyemoꞌ bʌ cheꞌ jini.

17 Mi machꞌan ti tyejchi loqꞌuel Cristo baꞌan sajtyemoꞌ bʌ lolom jachix mi laꞌ chꞌujbin Cristo cheꞌ jini. Añet tyo la ti laꞌ mul cheꞌ jini.

18 Machic baꞌan mi quejel i tyejchel sajtyemoꞌ bʌ, jini tsaꞌ bʌ i sajtiyob tsaꞌ bʌ i chꞌujbiyob Cristo añob ti xotꞌ mulil cheꞌ jini.

19 Mi poj wʌꞌ jach ti mulawil an laj cotyʌntyel más pꞌumpꞌuñonla bajcheꞌ pejtyel yañoꞌ bʌ quixtyañujob cheꞌ jini.

20 Pero melelʌch tsaꞌix tyejchi loqꞌuel Cristo baꞌan sajtyemoꞌ bʌ. Tsiquilʌch cheꞌ jini mi quejel i tyejchisʌntyelob loqꞌuel yañoꞌ bʌ sajtyemoꞌ bʌ jeꞌel.

21 Chaꞌan ti caj juntiquil winic Adán bʌ i cꞌabaꞌ ti queji i sajtyel quixtyañujob. Chʌꞌʌch ti caj jeꞌel yambʌ juntiquil winic Cristo bʌ i cꞌabaꞌ ti queji i tyejchelob sajtyemoꞌ bʌ.

22 Cheꞌ bajcheꞌ pejtyel quixtyañujob mi sajtyelob chaꞌan i jiñʌjlelonla Adán. Chʌꞌʌch jeꞌel pejtyel i chaꞌan bʌ Cristo mi quejel i cuxtiyelob.

23 Pero jujuntiquil tiꞌ yorojlel mi quejel i cuxtiyel. Ñaxan ti cuxtiyi Cristo. Ti wiꞌil mi quejel i cuxtiyel i chaꞌan bʌ Cristo cheꞌ mi tyʌlel.

24 Cheꞌ jini tyal i jilibal cheꞌ Cristo mi quejel i jisʌben i cꞌʌjnibal yeꞌtyel pejtyel yumʌlob, pejtyel am bʌ yeꞌtyel yicꞌot pejtyel am bʌ i pꞌʌtyʌlel. Cheꞌ jini Cristo mi quejel i yʌqꞌuen tiꞌ wenta i chaꞌlen yumʌl Dios lac Tyat.

25 Como Cristo wersa miꞌ chaꞌlen yumʌl jintyo tsaꞌix i ganari i pꞌʌtyʌlel pejtyel jini i contrajob.

26 Jini cojachix bʌ laj contra muꞌ bʌ quejel i jisʌntyel jiñʌch cheꞌ mi lac sajtyel. Como Cristo mi quejel i jisan jini sajtyel. Cheꞌ jini maꞌix majch mi quejel i chaꞌ sajtyel.

27 Como Dios ti luꞌ yotsʌbe tiꞌ wenta Cristo. Cheꞌ mi yʌleꞌ jini Tsꞌijbubil bʌ i Tꞌan Dios: Pejtyel ti otsʌnti tiꞌ wenta Cristo, cheꞌen, tsiquil mach jinic Dios ti yotsʌ i bʌ tiꞌ wenta Cristo como Diosʌch tsaꞌ bʌ luꞌ otsʌbe tiꞌ wenta Cristo pejtyel chʌ bʌ yes an.

28 Cheꞌ tsaꞌix i luꞌ ganarin Cristo, cheꞌ jini Cristo i Yalobil bʌ Dios mi quejel i yotsan i bʌ tiꞌ wenta Dios. Cheꞌ jini Dios i Yumʌch pejtyel chʌ bʌ jach an mi quejel i yajñel.

29 An yambʌ quixtyañujob muꞌ bʌ i yʌcꞌ i bʌ tiꞌ chꞌʌm jaꞌ tiꞌ qꞌuexol jini tsaꞌ bʌ sajtiyob. ¿Chucoch mi lolon chaꞌleñob maꞌ wʌl jini? Como mi machꞌan mi tyejchelob loqꞌuel sajtyemoꞌ bʌ maꞌix i cꞌʌjnibal mi yʌcꞌ i bʌ ti chꞌʌm jaꞌ chaꞌan jini tsaꞌ bʌ sajtiyob cheꞌ jini.

30 ¿Chucoch mi lojon c ñusan bʌbʌqꞌuen bʌ wocol ti beleꞌ ora?

31 Bʌqꞌuentic mic sajtyel ti beleꞌ qꞌuin. Pero tijicñayon chaꞌan xucꞌuletla chʌncol laꞌ chꞌujbin lac Yum Jesucristo.

32 ¿Chʌ bʌ tyo i cꞌʌjnibal mic lolon ñusan wocol ti jujumpꞌej qꞌuin mi machꞌan mi tyejchel loqꞌuel sajtyemoꞌ bʌ? Tiꞌ contrajiyoñob cheꞌ bajcheꞌ simaron bʌ animal tiꞌ chaꞌleyoñob yubil yaꞌ ti Efeso. Mi melelʌch machꞌan mi tyejchelob sajtyemoꞌ bʌ, laꞌ lac chaꞌlen bajcheꞌ mi lolon yʌlob: Laꞌix lac wʌ wen chaꞌlen weꞌel uchꞌel como ijcꞌʌl chaꞌbi jachix mi quejel lac sajtyel, cheꞌob, mi lolon alob.

33 Mach laꞌ wʌcꞌ laꞌ bʌ ti lotintyel. Como cheꞌ bajcheꞌ mi yʌlob: Jini machꞌʌ wen bʌ lac piꞌʌlob ti tꞌan mi yʌqꞌueñonla lac sʌtyeꞌ wen bʌ lac pensal, cheꞌob.

34 Cʌyʌ jini machꞌʌ wen chaꞌan mi laꞌ wajñel ti xucꞌul. Mach laꞌ chaꞌlen mulil. An chaꞌtiquil uxtiquiletla machꞌan mi laꞌ cʌñeꞌ Dios. Chʌꞌʌch mi cʌleꞌ chaꞌan mi laꞌ quisnin.

35 Cꞌoꞌojl an majch mi quejel i cꞌajtin: ¿Bajcheꞌqui mi quejel i tyejchelob loqꞌuel jini sajtyemoꞌ bʌ? ¿Bajcheꞌqui yilal i bʌcꞌtyal mi yʌqꞌuentyel? cheꞌ mi quejel i yʌleꞌ.

36 Leco i cꞌajtibal. Como cheꞌ miꞌ pʌcꞌob i wut chʌ bʌ tyac jach i wut mi pʌcꞌmʌl chaꞌan mi pasel.

37 Jini pimel muꞌ bʌ i pasel mach jinic ti qꞌuelol tsaꞌ bʌ i pʌjqꞌui. Jini tsaꞌ bʌ pʌjqꞌui i wut jach ixim mi chʌ bʌ tyac jachix.

38 Ti wiꞌil Dios mi yʌqꞌuen i pasel i yopol jini tsaꞌ bʌ pʌjqꞌui bajcheꞌ i chaꞌañʌch jujunchajb. Jiñʌch bajcheꞌ yilal jini tsaꞌ bʌ pʌjqꞌui.

39 Mach junlajal pejtyel bʌcꞌtyalʌl. I bʌcꞌtyal quixtyañu junchajb. Yambʌ i bʌcꞌtyal animal. Yambʌ i bʌcꞌtyal xmaꞌtyeꞌmut. Yambʌ i bʌcꞌtyal chʌy.

40 Chʌꞌʌch jeꞌel an junchajb lac bʌcꞌtyal bajcheꞌ mi quejel i yajñel ti panchan. Yambʌ lac bʌcꞌtyal chʌncol bʌ laj cꞌʌn wʌꞌ ti mulawil. Pero jini tyʌlem bʌ ti panchan partejʌch i cꞌotyajlel bajcheꞌ jini am bʌ ti mulawil.

41 Cheꞌ bajcheꞌ i cꞌʌcꞌal jini qꞌuin mach lajal yicꞌot i cꞌʌcꞌal jini uw. I cꞌʌcꞌal uw mach lajal yicꞌot i cꞌʌcꞌal ecꞌ. Mach junlajal i cꞌʌcꞌal jumpꞌej ecꞌ yicꞌot yambʌ.

42 Chʌꞌʌch jeꞌel mach junlajal lac bʌcꞌtyal wale iliyi yicꞌot jini muꞌ bʌ quejel i tyejchel loqꞌuel baꞌan sajtyemoꞌ bʌ. Jini lac bʌcꞌtyal muꞌ bʌ chꞌujñʌntyel mi pʌcꞌmʌl. Jini muꞌ bʌ tyejchel loqꞌuel baꞌan sajtyemoꞌ bʌ mach chaꞌ pʌcꞌmʌyix.

43 Miꞌ chꞌujñʌntyel machꞌʌ wen bʌ lac bʌcꞌtyal. Mi tyejchel loqꞌuel wen bʌ lac bʌcꞌtyal. Mi chꞌujñʌntyel cꞌun bʌ lac bʌcꞌtyal. Mi tyejchel loqꞌuel baꞌan sajtyemoꞌ bʌ pꞌʌtyʌl bʌ lac bʌcꞌtyal.

44 Mi chꞌujñʌntyel lac bʌcꞌtyal tsaꞌ bʌ ajni wʌꞌ ti mulawil. Mi tyejchel loqꞌuel baꞌan sajtyemoꞌ bʌ lac bʌcꞌtyal cheꞌ bajcheꞌ mi quejel yajñel ti panchan. Añʌch lac bʌcꞌtyal chʌncox bʌ yajñel ti mulawil. An jeꞌel jini muꞌ bʌ quejel yajñel ti panchan.

45 Mi yʌl Tsꞌijbubil bʌ i Tꞌan Dios: Adán, ñaxan bʌ quixtyañu ti aqꞌuenti i cuxtyʌlel. Ti wiꞌil an yambʌ quixtyañu cheꞌ bajcheꞌ Adán am bʌ i chꞌujlel muꞌ bʌ yʌqꞌueñonla laj cuxtyʌlel machꞌʌ yujil jilel. Jiñʌch Jesucristo.

46 Mach ñaxañic an lac bʌcꞌtyal muꞌ bʌ quejel yajñel ti panchan. Ñaxan an jini lac bʌcꞌtyal yujil bʌ ajñel ti mulawil. Ti wiꞌil tyo an jini muꞌ bʌ quejel yajñel ti panchan.

47 Jini ñaxan bʌ winic melel ti lum. Yujil ajñel ti mulawil. Lac Yum jini chaꞌticlel bʌ winic yubil mi yajñel ti panchan.

48 I bʌcꞌtyal quixtyañujob wʌꞌ ti mulawil lajal i bʌcꞌtyal jini tsaꞌ bʌ mejli ti lum. I bʌcꞌtyal quixtyañu muꞌ bʌ quejel yajñel ti panchan lajal i bʌcꞌtyal yicꞌot jini am bʌ ti panchan.

49 Chʌꞌʌch lajal lac bʌcꞌtyal yilal wale iliyi bajcheꞌ i chaꞌan Adán melel bʌ ti lum, chʌꞌʌch jeꞌel lajal yilal lac bʌcꞌtyal mi quejel i yajñel cheꞌ bajcheꞌ i chaꞌan Cristo.

50 Com subeñetla hermañujob, lac bʌcꞌtyal muꞌ bʌ laj cꞌʌñeꞌ wʌꞌ ti mulawil mach cꞌot baꞌ miꞌ chaꞌlen yumʌl Dios. Jini lac bʌcꞌtyal yujil bʌ jilel mach ajn baꞌ mi jalijel lac bʌcꞌtyal ti beleꞌ ora.

51 Pero com laꞌ chꞌʌmꞌen isujm jini mach bʌ tsictiyem ti yambʌ ora. Mach ti pejtyelelonla mi quejel lac sajtyel. Pero ti pejtyelelonla mi quejel laj qꞌuextiyel.

52 Mi quejel laj cuxtiyel ti saj ora jach, cheꞌ bajcheꞌ mi mujtsel lac wut cheꞌ mi yubintyel jini cojix bʌ i tꞌan trompeta. Mi quejel i wustyʌl trompeta. Cheꞌ jini mi quejel i tyejchelob loqꞌuel sajtyemoꞌ bʌ. Maꞌix mi chaꞌ sajtyelob. Joñonla mi quejel laj qꞌuextiyel.

53 Como mi quejel laj cʌyeꞌ lac bʌcꞌtyal mach bʌ baꞌan mi jalijel. Mi quejel la cʌqꞌuentyel jini mach bʌ baꞌan mi jilel. Mi quejel laj cʌyeꞌ lac bʌcꞌtyal muꞌ bʌ sajtyel. Mi quejel la cʌqꞌuentyel lac bʌcꞌtyal machꞌʌ baꞌan mi sajtyel.

54 Cheꞌ tsaꞌix qꞌuextiyi lac bʌcꞌtyal yujil bʌ pʌcꞌmʌl, cheꞌ tsaꞌix lac xojo jini machꞌʌ baꞌan mi chaꞌ jilel, cheꞌ tsaꞌix qꞌuextiyi lac bʌcꞌtyal yujil bʌ sajtyel, cheꞌ tsaꞌix lac xojo jini machꞌʌ yujil sajtyel, cheꞌ jini mi tsꞌʌctiyel jini tsꞌijbubil bʌ tiꞌ tꞌan Dios. Mi yʌl: Jilemix i pꞌʌtyʌlel sajtyel. Maꞌix mi quejel i bej ganarin tsʌnsa jini sajtyel.

55 Maꞌix mi bej sajtyelob quixtyañu. Maꞌix mi lac chaꞌlen bʌqꞌuen chaꞌan chaꞌ sajticonla.

56 Mi sajtyelob quixtyañu wale iliyi chaꞌan ti caj mulil. Jiñʌch jini oniyi bʌ mandar tiꞌ tsictisʌ mi mulilʌch muꞌ bʌ i chaꞌlen quixtyañujob.

57 Pero wocox i yʌlʌ Dios mi yʌqꞌueñonla lac pꞌʌtyʌlel lac ganarin chaꞌan ti lac Yum Jesucristo.

58 Jin chaꞌan pꞌuntyʌbilet bʌ quermañujob, bej xucꞌuletla yom chaꞌan mach nijcʌntiquetla loqꞌuel ti jini muꞌ bʌ laꞌ chꞌujbin. Chʌc chaꞌlibenla i troñel lac Yum. Como la cujil isujm mach lolomic jach mi lac chaꞌliben i troñel lac Yum cheꞌ motin la quicꞌot mi lac chaꞌlen.