2 Jini muꞌ bʌ i chaꞌlen tꞌan ti yambʌ tꞌan mach bʌ baꞌan miꞌ ñaꞌtyan, miꞌ pejcan Dios. Mach i piꞌʌlobic miꞌ pejcan, como machꞌan miꞌ chꞌʌmꞌeñob isujm. Como chaꞌan ti Chꞌujul bʌ i Chꞌujlel Dios mi yʌleꞌ tꞌan mach bʌ baꞌan tsictiyem.

3 Pero jini muꞌ bʌ i subeꞌ tꞌan tsaꞌ bʌ aqꞌuenti ti Dios miꞌ pejcan quixtyañujob chaꞌan mi más xucꞌtyʌl tiꞌ tꞌan Dios, chaꞌan miꞌ ñuc isʌbeñob i pusicꞌal yicꞌot chaꞌan mi ñʌchꞌtyʌl i pusicꞌal.

4 Jini muꞌ bʌ i chaꞌlen tꞌan mach bʌ baꞌan miꞌ ñaꞌtyan mi bajñel más xucꞌtyʌl tiꞌ tꞌan Dios. Pero jini muꞌ bʌ i subeꞌ tꞌan tsaꞌ bʌ aqꞌuenti ti Dios miꞌ cotyan ochemoꞌ bʌ tiꞌ tꞌan Dios i más xucꞌtyʌl tiꞌ tꞌan Dios.

5 Com luꞌ anic laꞌ cꞌʌjnibal laꞌ chaꞌlen tꞌan mach bʌ baꞌan mi laꞌ ñaꞌtyan. Pero más com chꞌujbiyic laꞌ luꞌ subeꞌ tꞌan tsaꞌ bʌ aqꞌuentiyetla ti Dios. Como más an i cꞌʌjnibal laꞌ subeꞌ tꞌan tsaꞌ bʌ aqꞌuentiyetla ti Dios bajcheꞌ mi laꞌ chaꞌlen tꞌan mach bʌ baꞌan mi laꞌ ñaꞌtyan. Jini jach wen mi laꞌ chaꞌlen tꞌan mach bʌ baꞌan mi laꞌ ñaꞌtyan cheꞌ an jini muꞌ bʌ i ñusan i sujmlel chaꞌan mi más xucꞌtyʌl tiꞌ tꞌan Dios jini ochemoꞌ bʌ tiꞌ tꞌan Dios.

6 Jin chaꞌan hermañujob, mi tic julaꞌayetla mi tic pejcʌyetla ti tꞌan tyac mach bʌ baꞌan mi lac ñaꞌtyan maꞌan i cꞌʌjnibal laꞌ chaꞌan. Jini jach an i cꞌʌjnibal laꞌ chaꞌan mi tic subetla tꞌan ti lac tꞌan bʌ chʌncol bʌ i yʌqꞌueñonla lac chꞌʌmꞌen isujm Dios o mi chaꞌan lac más ñaꞌtyan i sujmlel o cheꞌ mi tic subeꞌ tꞌan tsaꞌ bʌ aqꞌuentiyon ti Dios o mi chaꞌan laj cʌntisʌntyel.

7 Laꞌ lac poj al cheꞌ bajcheꞌ miꞌ chaꞌlen uqꞌuel jini música tyac mach bʌ baꞌan cuxul cheꞌ bajcheꞌ guitarra mi jalʌl. Mi mach wen mi wustyʌl jalʌl maꞌix mi lac ñaꞌtyʌben i sujmlel chʌ bʌ mi locꞌsan, cheꞌ jini.

8 Mi mach tyoj mi wustyʌl trompeta muꞌ bʌ i cꞌʌñob i pʌyob i bʌ ti guerra machꞌan mi quejel i chajpañob i bʌ soldadojob chaꞌan mi majlel ti guerra.

9 Chʌꞌʌch jeꞌel cheꞌ mi laꞌ chaꞌlen tꞌan mach bʌ baꞌan mi laꞌ ñaꞌtyan. Mi maꞌix tsiquil i sujmlel muꞌ bʌ laꞌ wʌleꞌ machꞌan majch mi quejel i chꞌʌmꞌen isujm chʌ bʌ chʌncol laꞌ wʌleꞌ cheꞌ jini. Lolon tꞌan jachix muqꞌuetla cheꞌ jini.

10 Melelʌch an cabʌl tꞌan tyac ti mulawil. Ti jujunchajb an i sujmlel.

11 Pero cheꞌ bajcheꞌ ñajt tyʌlemon mi yubin juntiquil muꞌ bʌ i pejcañon mi machꞌan mic chꞌʌmꞌen isujm i tꞌan. Cheꞌ jeꞌel cheꞌ bajcheꞌ tyʌlem ti yambʌ lum yubil mi cubin juntiquil mach bʌ baꞌan mic chꞌʌmꞌen isujm i tꞌan.

12 Wen cheꞌ laꞌ wom laꞌ cꞌʌjnibal muꞌ bʌ i yʌqꞌueñonla Chꞌujul bʌ i Chꞌujlel Dios. Jin chaꞌan jopꞌoxla laꞌ más chꞌʌmeꞌ laꞌ cꞌʌjnibal muꞌ bʌ i cotyan chaꞌan mi más xucꞌtyʌl jini ochemoꞌ bʌ tiꞌ tꞌan Dios.

13 Cheꞌ jini, jini muꞌ bʌ i chaꞌlen tꞌan mach bʌ baꞌan miꞌ ñaꞌtyan, yom i cꞌajtiben Dios chaꞌan mi yʌqꞌuentyel i cꞌʌjnibal i suben i sujmlel tsaꞌ bʌ i yʌlʌ chaꞌan i luꞌ yubiñob.

14 Mi tic chaꞌle oración ti tꞌan mach bʌ baꞌan mic ñaꞌtyan, cheꞌ jini lolon jach yubil cheꞌ mic chaꞌlen oración como machꞌanix miꞌ cotyañon como maꞌix mic chꞌʌmeꞌ isujm tic pusicꞌal.

15 ¿Chʌ bʌ yom mic chaꞌlen cheꞌ jini? Yom mic pejcan Dios tic pusicꞌal pero yom mic chꞌʌmꞌen isujm jeꞌel. Yom mic chaꞌlen cꞌay tic pusicꞌal pero yom c chꞌʌmꞌen isujm jeꞌel.

16 Como mi chʌncox a subeꞌ i ñuclel Dios ti oración ti tꞌan mach bʌ maꞌ ñaꞌtyan, jini quixtyañu mach bʌ baꞌan miꞌ chꞌʌmꞌen isujm mach chꞌujbi i motin suben Dios wocox i yʌlʌ awicꞌot cheꞌ chʌncox a pejcan Dios. Como machꞌan miꞌ chꞌʌmꞌen isujm a tꞌan.

17 Cꞌoꞌojl weñʌch bajcheꞌ chʌncox a suben Dios wocox i yʌlʌ. Pero jini yambʌ mach chꞌujbi i xucꞌtyʌl cheꞌ mi yubin a woración.

18 Mic suben Dios wocox i yʌlʌ chaꞌan más chꞌujbi c chaꞌlen yan tyac bʌ tꞌan mach bʌ baꞌan mic ñaꞌtyan bajcheꞌ pejtyeleletla.

19 Pero cheꞌ muchꞌquibilob ochemoꞌ bʌ tiꞌ tꞌan Dios más cꞌʌjnibal cʌleꞌ joꞌpꞌej tꞌan ti yoque lac tꞌan bʌ muꞌ bʌ i luꞌ yubiñob chaꞌan mi cʌntisʌntyelob. Maꞌix i cꞌʌjnibal mi ti cʌlʌ diez mil tꞌan ti yambʌ tꞌan mach bʌ baꞌan miꞌ chꞌʌmꞌeñob isujm.

20 Hermañujob, mach laꞌ pensalin cheꞌ bajcheꞌ alʌlob. Pero yom mi laꞌ wajñel cheꞌ bajcheꞌ chꞌoc alʌl max tyo bʌ yujil simaronlel. Pero ti laꞌ pensal ajñenla cheꞌ bajcheꞌ ñuqui quixtyañu.

21 Tiꞌ tsꞌijbubil bʌ i mandar Dios mi yʌl: Mi quejel c pejcan ili quixtyañujob ti yan tyac bʌ tꞌan. Mi quejel cꞌʌmben i tiꞌ tyʌlemoꞌ bʌ ti ñajt. Pero machꞌan mi quejel i chꞌujbiñob c tꞌan, cheꞌen. Cheꞌ mi yʌl lac Yum.

22 Dios mi yʌqꞌueñonla i pꞌʌtyʌlel lac chaꞌlen tꞌan mach bʌ baꞌan mi lac ñaꞌtyan chaꞌan mi tsictiyel i pꞌʌtyʌlel Dios tiꞌ tyojlel jini mach bʌ baꞌan ochem tiꞌ tꞌan Dios. Pero machꞌan mi yʌqꞌueñonla i pꞌʌtyʌlel lac chaꞌlen tꞌan mach bʌ baꞌan mi lac ñaꞌtyan chaꞌan mi xucꞌtyʌl ochemoꞌ bʌ. Pero cheꞌ an majch miꞌ subeꞌ tꞌan tsaꞌ bʌ aqꞌuenti ti Dios chaꞌan bajcheꞌ yom mi yajñel, i cꞌʌjnibal chaꞌan jini ochemoꞌ bʌ tiꞌ tꞌan Dios. Machꞌan i cꞌʌjnibal chaꞌan jini mach bʌ baꞌan ochem tiꞌ tꞌan Dios como max tyo baꞌan miꞌ ñaꞌtyañob.

23 Cheꞌ jini, cheꞌ muchꞌquibilob ochemoꞌ bʌ tiꞌ tꞌan Dios mi ti pejtyelel ti queji i chaꞌlen tꞌan ti tꞌan mach bʌ baꞌan miꞌ ñaꞌtyañob, mi ti ochi juntiquil mach bʌ baꞌan miꞌ cʌñetla o mach ochem tiꞌ tꞌan Dios, mi quejel i yʌleꞌ: Tontojetla, cheꞌ mi quej i yʌleꞌ.

24 Pero mi ti pejtyelel chʌncox i subeꞌ tꞌan tsaꞌ bʌ aqꞌuenti ti Dios, mi ti ochi juntiquil mach bʌ baꞌan ochem tiꞌ tꞌan Dios o mi mach cʌñʌl laꞌ chaꞌan mi quejel i pensalin i mul. Mi quejel ti tꞌan i pusicꞌal chaꞌan ti chʌ bʌ mi la wʌleꞌ ti pejtyeleletla cheꞌ mi yubin laꞌ tꞌan.

25 Mi quejel i bajñel ñaꞌtyan i simaronlel. Mi quejel i ñocchocon i bʌ chaꞌan miꞌ chꞌujutisan Dios. Mi quejel i yʌleꞌ: Melelʌch wʌꞌan Dios laꞌ wicꞌot, cheꞌen.

26 Jin chaꞌan hermañujob, ¿chuqui yom mi laꞌ chaꞌlen, cheꞌ jini? Cheꞌ mi laꞌ muchꞌquin laꞌ bʌ añʌch laꞌ cꞌʌjnibal tyac: Juntiquil miꞌ cꞌʌyeꞌ i ñuclel Dios. Yambʌ miꞌ chaꞌlen cʌntisa. Yambʌ miꞌ subeꞌ chʌ bʌ tsaꞌ pʌsꞌenti ti Dios. Yambʌ miꞌ chaꞌlen tꞌan mach bʌ baꞌan baꞌ ora mi yʌleꞌ o miꞌ ñusan i sujmlel jini tꞌan mach bʌ baꞌan miꞌ ñaꞌtyan. Weñʌch cheꞌ mi laꞌ chaꞌlen bajcheꞌ jini pero pejtyel yom mi laꞌ chaꞌlen chaꞌan mi xucꞌtyʌl ochemoꞌ bʌ tiꞌ tꞌan Dios.

27 Cheꞌ miꞌ chaꞌleñob tꞌan mach bʌ baꞌan miꞌ ñaꞌtyañob, yom jach chaꞌtiquil o mi uxtiquil miꞌ chaꞌleñob jini tꞌan mach bʌ baꞌan miꞌ ñaꞌtyañob. Pero belecña yom i chaꞌleñob tꞌan. Yom jeꞌel juntiquil muꞌ bʌ i ñusan i sujmlel jini tꞌan.

28 Pero cheꞌ muchꞌquibil ochemoꞌ bʌ tiꞌ tꞌan Dios mi maꞌan majch chꞌujbi i ñusan i sujmlel jini tꞌan más wen mi machꞌan miꞌ chaꞌleñob tꞌan ti tꞌan mach bʌ baꞌan miꞌ ñaꞌtyañob. Laꞌ i bajñel pejcan Dios cheꞌ i bajñel ti tꞌan mach bʌ baꞌan miꞌ ñaꞌtyan.

29 Cheꞌ jeꞌel laꞌ i chaꞌlen subtꞌan chaꞌtiquil mi uxtiquil tsaꞌ bʌ aqꞌuenti tꞌan ti Dios. Laꞌ i pensaliñob jini yañoꞌ bʌ ajsubtꞌañob mi weñʌch chʌ bʌ ti ajli.

30 Pero mi an juntiquil buchul bʌ mi yʌqꞌuentyel ti Dios chʌ bʌ mi quejel i subeꞌ, laꞌ i cʌy i tꞌan jini chʌncol bʌ i subeꞌ tꞌan.

31 Cheꞌ jini pejtyeletla belecña chꞌujbi laꞌ chaꞌlen tꞌan muꞌ bʌ laꞌ wʌqꞌuentyel ti Dios laꞌ subeꞌ chaꞌan miꞌ luꞌ tyajob i cʌntisʌntyel, chaꞌan mi ñuc isʌbentyelob i pusicꞌal ti pejtyelelob.

32 Jini muꞌ bʌ i subeꞌ tꞌan tsaꞌ bʌ aqꞌuenti ti Dios yom i bajñel tiqꞌueꞌ i pusicꞌal chaꞌan i yʌqꞌuen i chaꞌlen tꞌan yambʌ ajsubtꞌan jeꞌel.

33 Machꞌan miꞌ mulan Dios cheꞌ juꞌupolaw mi yujtyel. Como Dios yom cheꞌ ñʌchꞌʌl mi yujtyel culto. Chʌꞌʌch ñʌmʌlob i chaꞌlen ti pejtyel baꞌic jach miꞌ muchꞌquiñob i bʌ ochemoꞌ bʌ tiꞌ tꞌan Dios.

34 Mach yom i chaꞌlen tꞌan ti culto xꞌixicob cheꞌ miꞌ muchꞌquiñob i bʌ ochemoꞌ bʌ tiꞌ tꞌan Dios. Machꞌan aqꞌuebilob i chaꞌleñob tꞌan. Yom i chꞌujbiñob tꞌan bajcheꞌ mi xijqꞌuel ti i mandar Dios.

35 Cheꞌ an chʌ bʌ yom i cꞌajtin chaꞌan i chꞌʌmꞌen isujm yom i cꞌajtiben i ñoxiꞌal ti yotyot. Como mach wen cheꞌ miꞌ chaꞌleñob tꞌan ti culto xꞌixicob.

36 Yom mi laꞌ chꞌʌmꞌen isujm mach yaꞌic tyʌlem i tꞌan Dios yaꞌ baꞌ añetla. Mach laꞌ bajñel jach ti aqꞌuentiyetla laꞌ wubin i tꞌan Dios.

37 Mi an majch miꞌ ñaꞌtyan añʌch i cꞌʌjnibal chaꞌan i subeꞌ i tꞌan Dios o miꞌ ñaꞌtyan ti aqꞌuenti tꞌan ti jini Chꞌujul bʌ i Chꞌujlel Dios, yom i ñaꞌtyan jini xicꞌojel chʌncox bʌ c tsꞌijbubeñetla tyʌlemʌch ti lac Yum jeꞌel.

38 Pero mi machꞌan miꞌ chꞌujbin ili tꞌan, cheꞌ jini mach yom mi chꞌujbibentyel i tꞌan jeꞌel.

39 Cheꞌ jini quermañujob, chaꞌlenla wersa laꞌ tyajeꞌ laꞌ cꞌʌjnibal chaꞌan laꞌ subeꞌ i tꞌan Dios. Maꞌ mi laꞌ tiqꞌueꞌ jini muꞌ bʌ i chaꞌlen tꞌan ti tꞌan mach bʌ baꞌan miꞌ ñaꞌtyan.

40 Pero chaꞌlenla pejtyel bajcheꞌ yom yicꞌot bajcheꞌ mi laꞌ xijqꞌuel.