Chaꞌan pꞌuntyaya
13
Muqꞌuic c chaꞌlen tꞌan ti cabʌl yan tyac bʌ tꞌan mach bʌ baꞌan mic ñaꞌtyan o muqꞌuic c ñaꞌtyan i tꞌan ajtroñelob i chaꞌan Dios chꞌoyoloꞌ bʌ ti panchan pero mi machꞌan mic chaꞌlen pꞌuntyaya lajalon jach bajcheꞌ lajtyeꞌ muꞌ bʌ ti lon tintiniyel o lajalon jach bajcheꞌ muꞌ bʌ i lon sub i bʌ chꞌejew.2 Mi tic subeyob tꞌan aqꞌuebilon ti Dios yicꞌot mi tij cʌñʌ jini max tyo bʌ tsictiyem tyac bʌ yicꞌot mi an pejtyelel chʌ bʌ tyac jach bʌ c ñaꞌtyʌbal yicꞌot mi jasʌl mic chꞌujbin chaꞌan i chꞌuyeꞌ loqꞌuel i bʌ wits, pero maꞌix sajlic an j cꞌʌjnibal mi maꞌix mic chaꞌlen pꞌuntyaya.
3 Mi tic tꞌoxbeyob pꞌumpꞌuñoꞌ bʌ pejtyelel chʌ bʌ yes an c chaꞌan, jinic tyo ti cʌcꞌʌ ti pulel c bʌcꞌtyal pero mi machꞌan mic chaꞌlen pꞌuntyaya maꞌix chʌ bʌ j cꞌʌjnibal.
4 Jini muꞌ bʌ i yoque chaꞌlen pꞌuntyaya miꞌ cucheꞌ ti wen i simaronlel yañoꞌ bʌ. Uts yicꞌot yañoꞌ bʌ. Machꞌan miꞌ michꞌqꞌuel chʌ bʌ an i chaꞌan yañoꞌ bʌ. Machꞌan miꞌ bajñel subeꞌ i ñuclel. Machꞌan miꞌ chan isan i bʌ.
5 Jini muꞌ bʌ i yoque chaꞌlen pꞌuntyaya mach lecojic miꞌ chaꞌlen. Machꞌan miꞌ bajñel pensalin i wenlel. Machꞌan miꞌ waꞌ michꞌan. Machꞌan miꞌ pensalin i sutquiben i simaronlel yañoꞌ bʌ.
6 Jini muꞌ bʌ i chaꞌlen pꞌuntyaya machꞌan cꞌajacña i yoj mi yubin cheꞌ an i mul yañoꞌ bʌ. Pero cꞌajacña i yoj mi yubin chaꞌan jini yoque melel bʌ.
7 Jini muꞌ bʌ i chaꞌlen pꞌuntyaya miꞌ luꞌ cucheꞌ ti jal chʌ bʌ mi yujtyel cheꞌ chʌncol tyo i bej chꞌujbin, cheꞌ miꞌ chʌc pijtyan, cheꞌ miꞌ luꞌ cucheꞌ ti wen jini wocol.
8 Machꞌan mi quejel i jilel pꞌuntyaya. Pero tyal i yorojlel mi quejel i jilel i cꞌʌjnibal i sujbel tꞌan tsaꞌ bʌ aqꞌuenti ti Dios. Tyal i yorojlel mi lajmel i chaꞌlentyel tꞌan ti cabʌl tꞌan tyac. Tyal i yorojlel cheꞌ maꞌix chʌc an i cꞌʌjnibal cabʌl ñaꞌtyʌbal tyac.
9 Wale iliyi max tyo tsꞌʌcʌl mi lac ñaꞌtyan. Max tyo tsꞌʌcʌl mi lac subeꞌ i tꞌan Dios.
10 Pero cheꞌ mi quejel laj cʌñeꞌ ti tsꞌʌcʌl, cheꞌ jini mi quejel i luꞌ jilel i cꞌʌjnibal jini max tyo bʌ tsꞌʌcʌl.
11 Laꞌ lac poj al. Cheꞌ bajcheꞌ cheꞌ ñac bʌ alʌlon tyo tic chaꞌle tꞌan cheꞌ bajcheꞌ alʌlob. Tic chꞌʌmeꞌ isujm cheꞌ bajcheꞌ alpꞌeñalob. Tic pensali cheꞌ bajcheꞌ alpꞌeñalob. Cheꞌ colem quixtyañujon tij cʌyʌ jini muꞌ bʌ i chaꞌlen alpꞌeñalob.
12 Chʌꞌʌch jeꞌel wale iliyi mi laj yʌxñʌ qꞌueleꞌ cheꞌ bajcheꞌ ti espejo cheꞌ bajcheꞌ i yʌxñal jax tyo. Pero muꞌ tyo quejel laj qꞌueleꞌ ti tsꞌʌcʌl. Wale iliyi max tyo tsꞌʌcʌl mic yoque cʌñeꞌ cheꞌ bajcheꞌ yoque an tyac pero muꞌ tyo quejel j cʌñeꞌ cheꞌ bajcheꞌ Dios miꞌ cʌñon.
13 Cheꞌ jini ti beleꞌ ora mi jalejel jini xucꞌtyʌlel muꞌ bʌ lac chꞌujbin ti lac pusicꞌal, pijtyaya yicꞌot pꞌuntyaya. Pero jini más wen bʌ ti jini uxchajb jiñʌch pꞌuntyaya.