2 Wen laꞌ wujil isujm cheꞌ max tyo ochemetla tiꞌ tꞌan Dios bajcheꞌ ti pʌjyiyetla majlel baꞌic jach chaꞌan laꞌ chꞌujutisan xꞌumaꞌ bʌ dios tyac.

3 Jin chaꞌan wale com laꞌ chꞌʌmꞌen isujm chaꞌan mach Chꞌujulic bʌ i Chꞌujlel Dios mi yʌqꞌuen i niqꞌui subentyel Jesús ti quixtyañu. Maꞌan majch chꞌujbi i yʌleꞌ ti pejtyel i pusicꞌal mi i Yumʌch Jesús, jini jach cheꞌ an Chꞌujul bʌ i Chꞌujlel Dios yicꞌot.

4 Ti yila ti yilal an laj cꞌʌjnibal muꞌ bʌ la cʌqꞌuentyel. Pero mismo juntiquil jach bʌ Chꞌujul bʌ i Chꞌujlel Dios muꞌ bʌ i luꞌ aqꞌueñonla.

5 Ti yila ti yilal an lac troñel. An cabʌl jini troñel tyac pero mismo juntiquil jach bʌ lac Yum muꞌ bʌ lac chaꞌliben i troñel.

6 An cabʌl bajcheꞌ chꞌujbi lac chaꞌlen lac troñel pero mismo jiñʌch bʌ Dios chʌncol bʌ i nijcʌbeñonla lac chaꞌlen jini troñel ti jujuntiquilonla.

7 Añʌch bajcheꞌ miꞌ tsictisʌbeñonla Dios ti jujuntiquilonla chaꞌan an Chꞌujul bʌ i Chꞌujlel la quicꞌot chaꞌan lac wenlel ti lac pejtyelel.

8 An jini muꞌ bʌ yʌqꞌuentyel i cꞌʌjnibal i chaꞌlen tꞌan ti cabʌl i ñaꞌtyʌbal tyʌlem ti Dios chaꞌan tiꞌ Chꞌujul bʌ i Chꞌujlel Dios. Yambʌ mi yʌqꞌuentyel cabʌl i ñaꞌtyʌbal chaꞌan miꞌ chaꞌlen cʌntisa chaꞌan ti mismo jini jach bʌ Chꞌujul bʌ i Chꞌujlel Dios.

9 Yañoꞌ bʌ mi yʌqꞌuentyel i wen chꞌujbin chaꞌan i mel chʌ bʌ tsʌts tyac chaꞌan ti mismo jini jach bʌ Chꞌujul bʌ i Chꞌujlel. Yambʌ mi yʌqꞌuentyel i cꞌʌjnibal chaꞌan i lajmisan xcꞌamꞌañob.

10 An jini muꞌ bʌ i yʌqꞌuentyel i pʌs ñuc bʌ i melbal Dios. Yañoꞌ bʌ mi yʌqꞌuentyel i cꞌʌjnibal i subeꞌ tꞌan aqꞌuebil ti Dios. Dios mi yʌqꞌuen yañoꞌ bʌ i ñaꞌtyan mi tyʌlem tꞌan ti xibajob o mi tyʌlem ti Chꞌujul bʌ i Chꞌujlel Dios chʌncox bʌ i yʌjlel. Yañoꞌ bʌ mi yʌqꞌuentyel i chaꞌlen tꞌan ti tꞌan mach bʌ baꞌan miꞌ cʌñeꞌ. Yambʌ mi yʌqꞌuentyel i ñusan i sujmlel jini tꞌan mach bʌ baꞌan miꞌ cʌñob.

11 Mismo jini jach bʌ Chꞌujul bʌ i Chꞌujlel Dios mi yʌqꞌueñonla i pꞌʌtyʌlel chaꞌan pejtyelel tyac ili muꞌ bʌ lac chaꞌlen. Ti yila ti yilal mi yʌqꞌueñonla laj cꞌʌjnibal bajcheꞌ jach mi yajcan i yʌqꞌueñonla.

12 Jumpꞌej jach lac bʌcꞌtyal aunque an cabʌl baꞌ chuculonla ti lac bʌcꞌtyal. Chʌꞌʌch jeꞌel tiꞌ bʌcꞌtyal Cristo yubil.

13 Jin chaꞌan tsaꞌix luꞌ otsʌntiyonla ti jumpꞌej jach bʌcꞌtyalʌl yubil chaꞌan ti jini jach bʌ Chꞌujul bʌ i Chꞌujlel Dios cheꞌ ti lac chꞌujbi Dios mi israelonla, mi mach israelonla, mi añonla tiꞌ wenta lac yum wʌꞌ ti mulawil o mi mach añonla tiꞌ wenta lac yum. Ti luꞌ aqꞌuentiyonla mismo jini jach bʌ Chꞌujul bʌ i Chꞌujlel Dios.

14 Como mach junchajp jach chʌ bʌ chucul ti lac bʌcꞌtyal. Pero cabʌlʌch. An cabʌl baꞌ chucul chʌ bʌ tsꞌuyul ti jumpꞌej bʌcꞌtyalʌl. Mach jumpꞌej jach jini baꞌ chucul.

15 Muqꞌuic i yʌl la coc: Maꞌix cꞌʌjnibal como mach cꞌʌbʌlonic, cheꞌen. Jin chaꞌan mach añonic tiꞌ bʌcꞌtyal, lolon cheꞌen. Pero an tyo ti lac bʌcꞌtyal cheꞌ jini, aunque cheꞌicʌch miꞌ lolon al.

16 Muqꞌuic i yʌl lac chiquin: Maꞌix j cꞌʌjnibal como mach wutyʌlonic, cheꞌen. Jin chaꞌan mach añonic tiꞌ bʌcꞌtyal, lolon cheꞌen. Aunque cheꞌicʌch miꞌ lolon al pero tyʌcꞌʌlʌch ti lac bʌcꞌtyal.

17 Wutyʌliqui pejtyelel lac bʌcꞌtyal, ¿bajcheꞌqui mi la cubin tꞌan, cheꞌ jini? Lac chiquinic pejtyelel lac bʌcꞌtyal, ¿bajcheꞌqui mi lac cujtsꞌin, cheꞌ jini?

18 Pero Dios ti yotsʌbeyonla ti yila ti yilal i cꞌʌjnibal jini am bʌ ti lac bʌcꞌtyal baꞌ ti yajcʌ Dios. Chʌꞌʌch an laj cꞌʌjnibal chaꞌan Dios.

19 Mi ti pejtyelel baꞌ chucul tyac junchajpic jach ti lac bʌcꞌtyal mach tsꞌʌcʌlic an lac bʌcꞌtyal, cheꞌ jini.

20 Aunque añʌch cabʌl chʌ bʌ tyac chucul ti lac bʌcꞌtyal pero jumpꞌej jach lac bʌcꞌtyal.

21 Mach wen muqꞌuic i suben laj cꞌʌb jini lac wut: Maꞌix a cꞌʌjnibal chaꞌañon, cheꞌ lac wut. Mi la col mach chꞌujbi i suben la coc: Maꞌix a cꞌʌjnibal chaꞌañon, cheꞌen.

22 Pero jini más cꞌun bʌ yubil ti lac bʌcꞌtyal más an i cꞌʌjnibal.

23 Jini maꞌix bʌ mi laj qꞌuel ti ñuc ti lac bʌcꞌtyal mi lac moseꞌ. Jini mach bʌ yom mi la cʌcꞌ ti qꞌuelol mi lac más moseꞌ ti pisil.

24 Machꞌan mi lac moseꞌ jini wen bʌ ti qꞌuelol. Chʌꞌʌch tiꞌ mele lac bʌcꞌtyal Dios. Dios ti yʌqꞌue más i cꞌʌjnibal jini mach bʌ baꞌan mi laj qꞌuel ti wen

25 chaꞌan maꞌix miꞌ contrajin i bʌ jini chucul tyac bʌ ti lac bʌcꞌtyal. Ti jujunchajp miꞌ motin cʌñʌtyan i bʌ.

26 Mi ti yilʌ wocol junchajp chucul bʌ ti lac bʌcꞌtyal mi yilan wocol pejtyel yan tyac bʌ am bʌ ti lac bʌcꞌtyal jeꞌel. Mi tijicña mi yubin junchajp, luꞌ tijicña mi yubin jini chucul bʌ am bʌ ti lac bʌcꞌtyal.

27 Jatyetla i bʌcꞌtyaletla Cristo yubil. Ti jujuntiquiletla junchajp jini chucul tyac bʌ tiꞌ bʌcꞌtyal Cristo yubil.

28 Cheꞌ jini Dios ti yʌqꞌue ochemoꞌ bʌ tiꞌ tꞌan Dios ti yila ti yilal i cꞌʌjnibalob. Ñaxan an jini yajcʌbiloꞌ bʌ ajsubtꞌañob ñumel. Ti wiꞌil an jini muꞌ bʌ i subeꞌ tꞌan tsaꞌ bʌ aqꞌuenti ti Dios. Ti wiꞌil an jini ajcʌntisajob. Ti wiꞌil an jini muꞌ bʌ i pʌsꞌe ñuc tyac bʌ i melbal Dios. Ti wiꞌil an jini muꞌ bʌ i lajmisan xcꞌamꞌañob, Jini muꞌ bʌ i chaꞌlen cotya, jini am bʌ yeꞌtyel i chaꞌlen yumʌl yicꞌot jini muꞌ bʌ yʌqꞌuentyel i pꞌʌtyʌlel i chaꞌlen tꞌan mach bʌ baꞌan miꞌ cʌñeꞌ.

29 Mach ti pejtyelelobic ti yajcʌntiyob ti ajsubtꞌañob ñumel, mi ti jini muꞌ bʌ i subeꞌ tꞌan tsaꞌ bʌ aqꞌuenti ti Dios, mi ti ajcʌntisajob. Mach ti pejtyelelobic ti yajcʌnti chaꞌan i pʌsꞌeꞌ ñuc tyac bʌ i melbal Dios.

30 Mach ti pejtyelelobic chꞌujbi i lajmisan xꞌcꞌamꞌañob. Mach ti pejtyelelobic chꞌujbi i chaꞌlen tꞌan ti tꞌan mach bʌ baꞌan miꞌ cʌñob. Mach ti pejtyelelobic chꞌujbi i ñusan i sujmlel jini tꞌan mach bʌ baꞌan miꞌ cʌñob.

31 Jopꞌoxla cheꞌ jini laꞌ wʌqꞌuentyel ti Dios jini más wen bʌ laꞌ cꞌʌjnibal. Pero mi quejel c subeñetla jini más wen tyo bʌ.