11
Tꞌuñu majlel bajcheꞌ mic chaꞌlen cheꞌ bajcheꞌ mic tꞌun majlel Cristo jeꞌel.Jiñʌch bajcheꞌ yom mi yajñel xꞌixicob ti culto
2 Hermañujob, weñʌch chʌncox laꞌ chaꞌlen como chʌncox laꞌ chʌc cꞌajtisañon. Mi laꞌ luꞌ chꞌujbiben jini mandar tsaꞌ bʌ j cʌntisʌyetla.
3 Pero com mi laꞌ chꞌʌmꞌen isujm Cristo i yumʌch jujuntiquil winic. I ñoxiꞌal i yumʌch xꞌixic. Cheꞌ bajcheꞌ jeꞌel Dios i Yumʌch Cristo.
4 Maꞌix miꞌ qꞌuel ti ñuc i yum yubil mi tiꞌ moso i jol winic cheꞌ miꞌ chaꞌlen oración ti culto o cheꞌ miꞌ subeꞌ tꞌan tsaꞌ bʌ ajqꞌui ti Dios.
5 Pero mi maꞌix miꞌ moseꞌ i jol xꞌixic cheꞌ miꞌ chaꞌlen oración o cheꞌ miꞌ subeꞌ tꞌan tsaꞌ bʌ ajqꞌui ti Dios maꞌix miꞌ qꞌuel ti ñuc i yum yubil. Lajal quisintic bajcheꞌ mi luꞌ seꞌtꞌelix i jol.
6 Mi machꞌan miꞌ moseꞌ i jol xꞌixic más wen mi luꞌ setꞌel i jol. Pero mi quisintic mi yubin xꞌixic cheꞌ luꞌ setꞌelix i jol o mi josibilix cheꞌ jini yom i moseꞌ i jol.
7 Mach yom i moseꞌ i jol winic como ti ajqꞌui winic cheꞌ bajcheꞌ an Dios. Miꞌ tsictisan i ñuclel Dios. Pero jini xꞌixic miꞌ tsictisan i ñuclel winic.
8 Cheꞌ ñac Dios ti yʌcꞌʌ winic machꞌan loqꞌuem winic ti xꞌixic tiꞌ mele. Pero loqꞌuem xꞌixic ti winic.
9 Dios machꞌan ti yʌcꞌʌ winic chaꞌan i wenlel xꞌixic pero ti yʌcꞌʌ xꞌixic chaꞌan i wenlel winic.
10 Jin chaꞌan yom i moseꞌ i jol xꞌixic. I señʌjlel chaꞌan tsiquil añʌch tiꞌ wenta winic. Chaꞌan jeꞌel weñʌch miꞌ qꞌueleꞌ ajtroñelob i chaꞌan Dios chꞌoyoloꞌ bʌ ti panchan.
11 Pero cheꞌ ochemonla ti lac Yum mi lac ñaꞌtyan junlajal i cꞌʌjnibal winic xꞌixic. Como mach bajñel ajn winic cheꞌ maꞌan xꞌixic. Mach bajñel ajn xꞌixic cheꞌ maꞌan winic.
12 Como melelʌch loqꞌuem xꞌixic ti winic. Pero melelʌch jeꞌel mi chꞌoc an winic chaꞌan ti xꞌixic.
13 Jatyetla mi laꞌ bajñel pensalin mi weñʌch cheꞌ miꞌ pejcan Dios ti oración cheꞌ maꞌix i mosil i jol xꞌixic.
14 Mi lac bajñel ñaꞌtyan jeꞌel quisintic cheꞌ tyam i jol winic.
15 Cꞌotyajax cheꞌ tyam i jol xꞌixic. Como aqꞌuebil tyam bʌ i jol chaꞌan i mosil i jol.
16 Pero mi an majch yom i chaꞌlen tꞌan tiꞌ contra ili tꞌan yom i ñaꞌtyan mi joñonic lojon mi jini ochemoꞌ bʌ tiꞌ tꞌan Dios mi lojon j cʌñeꞌ yambʌ costumbre.
Machꞌʌ wen tsaꞌ bʌ i chaꞌleyob ti chꞌujul bʌ uchꞌel i chaꞌan lac Yum
17 Pero chaꞌan jini muꞌ bʌ quejel c tsꞌijbubeñetla: Mach chꞌujbi cʌleꞌ tijicñayon chaꞌan bajcheꞌ mi laꞌ chaꞌlen. Como mach wen chʌncol laꞌ chaꞌlen cheꞌ mi laꞌ muchꞌquin laꞌ bʌ. Maꞌix mi laꞌ más wenꞌan. Mach wen mi laꞌ wajñel cheꞌ mi laꞌ muchꞌquin laꞌ bʌ.
18 Cheꞌ jeꞌel miꞌ subeñoñob cheꞌ mi laꞌ muchꞌquin laꞌ bʌ chaꞌan laꞌ meleꞌ culto mach junlajal laꞌ pensal mi laꞌ wajñel. Mic ñaꞌtyan lamital melelʌch bajcheꞌ mic subentyel.
19 Melelʌch yom cheꞌ mach junlajal laꞌ pensal mi laꞌ wajñel chaꞌan mi tsictiyel majchqui yoque ochem tiꞌ tꞌan Dios yaꞌ baꞌ añetla.
20 Cheꞌ mach junlajal laꞌ pensal mi laꞌ wajñel mach yoque chꞌujul bʌ uchꞌel i chaꞌan bʌ lac Yum mi laꞌ cꞌuxeꞌ cheꞌ mi laꞌ muchꞌquin laꞌ bʌ ti uchꞌel.
21 Como ti yorojlel uchꞌel an jini muꞌ bʌ i waꞌ bajñel cꞌuxeꞌ tsaꞌ bʌ i bajñel chꞌʌmʌ tyʌlel. An yambʌ machꞌʌ jasʌl mi tyajtyʌl. Jinic tyo an jini wiꞌñal bʌ ti cʌyle. Yambʌ miꞌ qꞌuixñan.
22 ¿Machꞌa baꞌan laꞌ wotyot baꞌ yom mi laꞌ chaꞌlen uchꞌel? Cheꞌ mi laꞌ chaꞌlen jini mach bʌ wen maꞌan mi laꞌ saj qꞌuel ti ñuc ochemoꞌ bʌ tiꞌ tꞌan Dios, cheꞌ jini. Mi laꞌ wʌcꞌ ti quisnil jini pꞌumpꞌuñoꞌ bʌ. ¿Chʌ bʌ yom mic subeñetla? ¿Yom ba mic subeñetla wen chʌncox laꞌ meleꞌ? Machꞌan mi quejel cʌleꞌ weñʌch bajcheꞌ mi laꞌ chaꞌlen.
Chꞌujul bʌ i yuchꞌel lac Yum
23 Como lac Yum ti yʌqꞌueyon c ñaꞌtyan i sujmlel tsaꞌ bʌ j cʌntisʌyetla. Ti jim bʌ acꞌbʌlel cheꞌ ñac mi quejel i yʌjqꞌuel lac Yum Jesús tiꞌ cꞌʌb i contrajob tiꞌ chꞌʌmʌ waj tiꞌ cꞌʌb.
24 Cheꞌ ti ujti i suben Dios wocox i yʌlʌ, Jesús tiꞌ xetꞌe jini waj. Ti yʌlʌ: Cꞌuxula. Jiñʌch c bʌcꞌtyal chʌncox bʌ i tꞌoxtyʌl chaꞌañetla. Chaꞌlenla jini chaꞌan laꞌ cꞌajtisañon. Cheꞌ ti yʌlʌ Jesús.
25 Chʌꞌʌch jeꞌel cheꞌ ujti i chaꞌleñob uchꞌel tiꞌ chꞌʌmʌ vaso tiꞌ cꞌʌb. Ti yʌlʌ: Ili vaso i señʌjlel jini tsijiꞌ bʌ trato tsaꞌix bʌ xucꞌle chaꞌan tic chꞌichꞌel. Jujunyajlel cheꞌ mi laꞌ japeꞌ, japʌla chaꞌan mi laꞌ cꞌajtisañon. Cheꞌ ti yʌlʌ Jesús.
26 Jujunyajlel cheꞌ mi laꞌ cꞌuxeꞌ ili waj, cheꞌ mi laꞌ japeꞌ jini am bʌ ti ili vaso chʌncox laꞌ subeꞌ yubil chaꞌan ti sajti Jesús. Chʌꞌʌch yom mi laꞌ chaꞌlen cꞌʌlʌ jintyo mi chaꞌ tyʌlel lac Yum.
Jiñʌch bajcheꞌ yom mi lac chaꞌlen jini chꞌujul bʌ uchꞌel i chaꞌan bʌ lac Yum
27 Jin chaꞌan majchical jach miꞌ cꞌuxeꞌ jini waj o miꞌ japeꞌ jini am bʌ ti vaso i chaꞌan bʌ lac Yum cheꞌ machꞌan miꞌ qꞌueleꞌ ti ñuc Dios miꞌ chaꞌlen mulil tiꞌ contra i bʌcꞌtyal i chꞌichꞌel lac Yum.
28 Jin chaꞌan jujuntiquil yom miꞌ bajñel ñaꞌtyan chʌ bʌ mi yʌleꞌ i pusicꞌal mi an i mul mi machꞌan i mul cheꞌ max tyo tiꞌ cꞌuxu jini waj cheꞌ max tyo tiꞌ japʌ jini am bʌ ti vaso.
29 Como mi machꞌan miꞌ cꞌajtisan i wocol lac Yum cheꞌ mi quejel i cꞌuxeꞌ jini waj mi quejel i japeꞌ jini am bʌ ti vaso, mi yotsan i mul. Mi quejel i xotꞌ i mul.
30 Jin chaꞌan cabʌl cꞌametla ti caj machꞌan mi laꞌ cꞌajtisan i wocol lac Yum cheꞌ ti laꞌ chꞌʌmʌ jini chꞌujul bʌ uchꞌel. Cꞌuñetla. Cheꞌ jeꞌel añʌch jini tsaꞌ bʌ sajtiyob.
31 Pero mi ti lac ñaxan cꞌajtisʌ lac mul, cheꞌ an lac mul yom mi lac ñaxan tyoj isan lac bʌ cheꞌ mi quejel lac chꞌʌmeꞌ jini chꞌujul bʌ uchꞌel. Cheꞌ jini machꞌan mi quejel i melonla lac Yum.
32 Pero cheꞌ miꞌ melonla lac Yum, miꞌ tyoj isañonla chaꞌan machꞌan mi quejel lac xotꞌ lac mul yicꞌot jini mach bʌ baꞌan tiꞌ chꞌujbiyob Dios.
33 Jin chaꞌan quermañujob, cheꞌ mi laꞌ muchꞌquin laꞌ bʌ ti chꞌujul bʌ uchꞌel, pijtyan laꞌ bʌ ti uchꞌel.
34 Mi an majch an i wiꞌñal laꞌ i chaꞌlen uchꞌel ti bajñel otyot ame mi yʌqꞌueñetla laꞌ ñusan wocol Dios chaꞌan ti caj bajcheꞌ mi laꞌ chaꞌlen cheꞌ mi laꞌ muchꞌquin laꞌ bʌ. Muꞌ tyo cʌleꞌ jini yan tyac bʌ cheꞌ mij cꞌotyel yaꞌ baꞌ añetla.