2 Ti pejtyelelob ti motin ajniyob ti junmujchꞌ yicꞌot Moisés tsaꞌ bʌ i pʌyʌyob majlel cheꞌ ñac tiꞌ pʌsꞌeyob majlel i bijlel tyocal cheꞌ ñac ti motin cꞌaxiyob ti xiñil jini jaꞌ.

3 Chʌꞌʌch jeꞌel junlajal tiꞌ cꞌuxuyob jini tsaꞌ bʌ aqꞌuentiyob ti Dios chaꞌan i cꞌuxob.

4 Ti pejtyelelob junlajal tiꞌ japʌyob jini jach bʌ jaꞌ aqꞌuebil bʌ ti Dios. Como tiꞌ japʌyob jini jaꞌ tsaꞌ bʌ i loqꞌui tyʌlel ti mal tyun. Jini tyun tsaꞌ bʌ i piꞌle majlel ti bij jiñʌch Cristo yubil.

5 Aunque cabʌl tiꞌ pʌsꞌenti i señʌjlel i pꞌʌtyʌlel Dios pero casi ti pejtyelelob tiꞌ chaꞌleyob mach bʌ baꞌan miꞌ mulan Dios. Jin chaꞌan ti sajtiyob yaꞌ ti jochol bʌ lum.

6 Pejtyel jini ti tsꞌijbunti chaꞌan laj cʌntisʌntyel chaꞌan machꞌan mi lac lolon chaꞌlen simaronlel bajcheꞌ tiꞌ chaꞌleyob lac yumob ti ñoj oniyix.

7 Jin chaꞌan maꞌ mi laꞌ chꞌujutisan melel jach bʌ dios tyac cheꞌ bajcheꞌ tiꞌ chaꞌleyob cabʌlob. Cheꞌ bajcheꞌ mi yʌl Tsꞌijbubil bʌ i Tꞌan Dios: Jini quixtyañujob tiꞌ buchleyob ti uchꞌel. Cheꞌ jini ti queji i melob qꞌuiñejel chaꞌan melel jach bʌ i dios.

8 Mach yom mi lac chaꞌlen tsuculel cheꞌ bajcheꞌ tiꞌ chaꞌleyob cabʌlob. Ti caj i tsuculelob chaꞌan tiꞌ pejcʌyob yambʌ xꞌixic ti sajtiyob veintitrés milob ti jumpꞌej jach qꞌuin.

9 Maꞌ mi laꞌ chꞌʌm ti laꞌ wʌlas lac Yum cheꞌ bajcheꞌ tiꞌ chaꞌleyob cabʌlob ti ñoj oniyix. Ti caj jini, yonlel ti sajtiyob cheꞌ ñac tiꞌ cꞌuxleyob ti lucum.

10 Maꞌ mi laꞌ chaꞌlen tꞌan tiꞌ contra Dios cheꞌ bajcheꞌ tiꞌ chaꞌleyob cabʌlob ti ñoj oniyix. Ti caj tꞌan tiꞌ contra Dios, ti tsʌnsʌntiyob ti ajtroñel i chaꞌan Dios chꞌoyol bʌ ti panchan tsaꞌ bʌ xijqꞌui i tsʌnsañob.

11 Pejtyel tyac iliyi ti ujti tiꞌ tyojlelob lac yumob ti ñoj oniyix chaꞌan i señʌjlel mach cheꞌic yom i bej chaꞌleñob i piꞌʌlob. Tiꞌ tsꞌijbunti tiꞌ Tsꞌijbubil bʌ i Tꞌan Dios chaꞌan laj cʌntisʌntyel añon bʌ la ti jini yujtibal bʌ qꞌuin tyac majlel chaꞌan machꞌan mi lac chaꞌlen cheꞌ bajcheꞌ tiꞌ chaꞌleyob.

12 Jin chaꞌan cʌñʌtyan a bʌ muꞌ bʌ a ñaꞌtyan xucꞌulet maꞌ wajñel ame maꞌ wotsan a mul.

13 Jini pʌjyel ti mulil muꞌ bʌ laꞌ wilan lajal bajcheꞌ miꞌ ñusan yañoꞌ bʌ jeꞌel. Pero xucꞌulʌch i pusicꞌal Dios. Chꞌujbi lac chꞌujbin Dios chaꞌan machꞌan mi yʌqꞌueñonla lac ñusan más pꞌʌtyʌl bʌ lac xicꞌol ti mulil cheꞌ bajcheꞌ chꞌujbi laj cucheꞌ. Pero cheꞌ mi lac pʌjyel ti mulil Dios mi quejel i yʌqꞌueñonla lac ñaꞌtyan bajcheꞌ chꞌujbi lac loqꞌuel chaꞌan weñʌch mi la cajñel.

14 Jin chaꞌan pꞌuntyʌbil bʌ hermañujob, maꞌ mi laꞌ chꞌujutisan melel jach bʌ dios tyac.

15 Mic pejcañetla bajcheꞌ quixtyañujob muꞌ bʌ i ñaꞌtyan. Bajñel pensalinla i sujmlel chʌncox bʌ c subeñetla.

16 Cheꞌ muchꞌquibilonla mi lac suben Dios wocox i yʌlʌ chaꞌan jini muꞌ bʌ quejel la capeꞌ ti yorojlel chꞌujul bʌ uchꞌel. I señʌjlel cheꞌ mi la capeꞌ chaꞌan mi lac motin ajñel la quicꞌot Cristo chaꞌan tiꞌ chꞌichꞌel Cristo tsaꞌ bʌ i beque cheꞌ ñac ti jocꞌle ti cruz. Jini waj muꞌ bʌ lac xetꞌeꞌ chaꞌan laj cꞌuxeꞌ, i señʌjlel mi lac motin ajñel la quicꞌot Cristo chaꞌan tiꞌ bʌcꞌtyal Cristo tsaꞌ bʌ i yʌcꞌʌ chaꞌan laj cotyʌntyel.

17 Aunque cabʌlonla pero mi lac luꞌ cꞌuxeꞌ ti mismo jini jach bʌ waj. Junqꞌuej jach jini waj. Jin chaꞌan, chaꞌan ti laj cꞌuxu junqꞌuej jach bʌ waj juntiquilon jach la yubil.

18 Laꞌ lac poj ñaꞌtyan jini lojon c piꞌʌlob israeloꞌ bʌ. Jini tiꞌ cꞌuxuyob jini weꞌel aqꞌuebil bʌ Dios ti yajnib pulem bʌ i majtyan. Junlajalob i pensal chaꞌan lajal tiꞌ chꞌujutisayob Dios.

19 Mach com cʌl an i cꞌʌjnibal melel jach bʌ dios tyac. Maꞌix más an i cꞌʌjnibal weꞌel aqꞌuebil dios tyac cheꞌ bajcheꞌ baꞌical jach bʌ yambʌ weꞌel.

20 Chʌncol cʌleꞌ jini mach bʌ baꞌan miꞌ cʌñeꞌ Dios cheꞌ mi yʌqꞌuen weꞌel chaꞌan i majtyan i dios mi yʌqꞌuen i majtyan xibajob. Mach Diosic mi yʌqꞌuen. Mach com mi laꞌ motin cꞌuxeꞌ yicꞌotyob i chaꞌan bʌ xibajob.

21 Mach chꞌujbi lac japeꞌ i chaꞌan bʌ lac Yum cheꞌ yicꞌot i chaꞌan bʌ xiba. Mach chꞌujbi laꞌ chaꞌlen uchꞌel chaꞌan i ñaꞌtyʌntyel lac Yum cheꞌ chʌncol laꞌ chaꞌlen uchꞌel chaꞌan i ñaꞌtyʌntyel i chaꞌan bʌ xiba.

22 Mach yom mi la cʌcꞌ ti michꞌan lac Yum. Como maꞌix más pꞌʌtyʌlonla bajcheꞌ lac Yum.

23 Melelʌch cheꞌ bajcheꞌ mi yʌlob: Librejix añonla lac meleꞌ chʌ bʌ jach la com, cheꞌen. Pero maꞌix luꞌ an i cꞌʌjnibal. Librejix añonla lac meleꞌ chʌ bʌ jach la com pero maꞌix miꞌ luꞌ cotyañob i yajñel ti más wen ti lac Yum.

24 Mach yom mi lac pensalin i bajñel jach lac bajñel wenlel. Pero yom mi lac ñaꞌtyan jeꞌel i wenlel yañoꞌ bʌ.

25 Libre añetla a cꞌuxeꞌ chʌ bʌ jach miꞌ chaꞌ choñob ti mercado cheꞌ maꞌan mi laꞌ ñaxan cꞌajtin mi tsaꞌix aqꞌuenti melel jach bʌ dios tyac chaꞌan machꞌan chʌ bʌ mi quejel i yʌleꞌ a pusicꞌal.

26 Como ili mulawil yicꞌot pejtyel i bʌl jeꞌel luꞌ i chaꞌañʌch lac Yum.

27 Mi juntiquil mach bʌ baꞌan ochem tiꞌ tꞌan Dios miꞌ pʌyetla ti qꞌuin mi laꞌ wom majlel cꞌuxula chʌ bʌ jach miꞌ pʌsꞌeñetla. Maꞌ maꞌ cꞌajtin mi aqꞌuebil dios tyac chaꞌan maꞌix chʌ bʌ mi yʌleꞌ a pusicꞌal.

28 Anqui majch tiꞌ subetla: Ili weꞌel tsaꞌix ajqꞌui baꞌan melel jach bʌ dios tyac, cheꞌen, mach a cꞌuxeꞌ, cheꞌ jini. Chaꞌan mach a wʌqꞌuen i chꞌʌjyemlel i pusicꞌal jini tsaꞌ bʌ i subeyet chaꞌan maꞌix chʌ bʌ mi quejel i yʌleꞌ i pusicꞌal.

29 Chʌncol cʌleꞌ chaꞌan mi quejel ti tꞌan i pusicꞌal jini tsaꞌ bʌ i subeyet. Mach a pusicꞌalic como maꞌan chʌ bʌ miꞌ chaꞌlen. Cꞌoꞌojl an majchqui mi quejel i cꞌajtibeñet: ¿Chucoch mi qꞌuejlel ti mulil jini muꞌ bʌ c mel ti pejtyel c pusicꞌal chaꞌan jach tiꞌ tꞌan i pusicꞌal yambʌ?

30 Mi tij cꞌuxu ti yutslel c pusicꞌal, ¿chucoch mi cʌjlel ti xmulil chaꞌan jini tsaꞌ bʌ j cꞌuxu cheꞌ ñac tic sube Dios wocox yʌlʌ?

31 Jin chaꞌan mi an chʌ bʌ mi laꞌ japeꞌ mi an chʌ bʌ mi laꞌ cꞌuxeꞌ o chʌ bʌ jach mi laꞌ chaꞌlen, luꞌ chaꞌlenixla chaꞌan mi sujbel i ñuclel Dios.

32 Maꞌ maꞌ wʌqꞌuen i yotsan i mul yambʌ chaꞌan ti caj chʌ bʌ jach maꞌ chaꞌlen, mi jinic lojon c piꞌʌlob jini israeloꞌ bʌ, mi jinic laꞌ piꞌʌlob jini machꞌʌ israel bʌ o mi jinic ochem bʌ tiꞌ tꞌan Dios.

33 Chʌꞌʌch mic chaꞌlen. Mic jopꞌ c meleꞌ muꞌ bʌ i mulañob pejtyelelob ti chʌ bʌ jach mic meleꞌ. Mach c bajñel c wenlel mic pensalin pero i chaꞌañʌch yañoꞌ bʌ chaꞌan mi cotyʌntyelob.