2 Mi mach yajcʌbilon bʌ ajsubtꞌañon ñumel miꞌ qꞌuelon yañoꞌ bʌ, pero jatyetla wersa mi laꞌ qꞌuelon ti yajcʌbilon bʌ ajsubtꞌañon ñumel. Tsiquilʌch ti laꞌ chꞌujbi lac Yum chaꞌan tic subeyetla i tꞌan Dios.

3 Chʌꞌʌch mic subeñob cheꞌ miꞌ contrajiñoñob ti tꞌan yañoꞌ bʌ:

4 Chꞌujbi cʌqꞌuentyel cuchꞌel chaꞌan ti jini troñel muꞌ bʌ c chaꞌlen.

5 Cheꞌ bajcheꞌ anic quijñam mi ochem tiꞌ tꞌan Dios, chꞌujbi c pʌyeꞌ majlel quicꞌot tic troñel jeꞌel cheꞌ bajcheꞌ miꞌ chaꞌleñob yañoꞌ bʌ yajcʌbiloꞌ bʌ ajsubtꞌañob ñumel, bajcheꞌ miꞌ chaꞌlen i yijtsꞌiñob lac Yum yicꞌot jeꞌel Pedro.

6 ¿O muꞌ ba laꞌ lolon ñaꞌtyan c bajñel jach quicꞌot Bernabé mach chꞌujbi lojon c subeꞌ ñumel i tꞌan Dios cheꞌ machꞌan mi lojon c chaꞌlen troñel ti lojon j cꞌʌb?

7 Laꞌ wujil isujm jini soldado machꞌan miꞌ bajñel tyojeꞌ i troñel i cꞌʌb. Jini muꞌ bʌ pʌqueꞌ tsꞌujsub mi quejel i cꞌuxꞌen i wut jeꞌel. Jini muꞌ bʌ i cosan tiñʌmeꞌ miꞌ japeꞌ i yaꞌlel i chuꞌ tiñʌmeꞌ.

8 Mach laꞌ lolon pensalin c bajñel pensal jini. Como chʌꞌʌch jeꞌel mi yʌleꞌ i mandar Moisés.

9 Tsꞌijbubil ti mandar Moisés: Maꞌ maꞌ mʌcben i tiꞌ tyat wacax cheꞌ chʌncol i pechic tyecꞌ loqꞌuel i wut trigo. Tsiquil mach wacaxic jach miꞌ pensalin Dios cheꞌ chʌꞌʌch ti yʌlʌ.

10 Pero chʌncol i ñaꞌtyañonla. Tiꞌ tsꞌijbunti jini mandar chaꞌan lac wenlel. Jini muꞌ bʌ i piqueꞌ lum yicꞌot jini muꞌ bʌ i xʌñicꞌ tyecꞌ loqꞌuel i wut trigo junlajal miꞌ pijtyʌben i wut muꞌ bʌ quejel i tyajtyʌl.

11 ¿Bajcheꞌ maꞌ wʌleꞌ cheꞌ jini? ¿Mach ba yomic mi lojon cʌqꞌuentyel lojon j cotyʌntyel ti chʌ bʌ yom bʌ lojon c chaꞌan cheꞌ tsaꞌix lojon c chaꞌle pacꞌ yubil cheꞌ ñac tic subeyetla i tꞌan Dios?

12 ¿Mi yañoꞌ bʌ mi chꞌujbi i yʌqꞌuentyel i cotyʌntyel mach ba más tyo yom mi lojon cʌqꞌuentyel j cotyʌntyel mi laꞌ wʌleꞌ? Pero machꞌan ti lojon c chꞌʌmʌ lojon j cotyʌntyel yaꞌ baꞌ añetla. Ti lojon c ñusʌ wocol ti troñel chaꞌan machꞌan mi lojon c mʌctyʌbeñetla laꞌ chꞌujbin jini wen bʌ tꞌan chaꞌan Cristo.

13 Laꞌ wujil isujm jini mucꞌob bʌ ti troñel ti templo ti aqꞌuentiyob i yuchꞌel chaꞌan ti i chaꞌleyob troñel ti templo ti ñoj oniyix. Jini tsaꞌ bʌ i pulbeyob i majtyan Dios yaꞌ ti i yajnib yaꞌ ti templo ti aqꞌuentiyob i cꞌux lamital jini weꞌel tsaꞌ bʌ aqꞌuenti chaꞌan i majtyan Dios.

14 Chʌꞌʌch jeꞌel lac Yum tiꞌ xiqꞌui chaꞌan mi yʌqꞌuentyel chʌ bʌ jach yom bʌ i chaꞌañob ajsubtꞌañob chaꞌan tiꞌ subol jini wen bʌ tꞌan chaꞌan laj cotyʌntyel.

15 Pero maꞌan baꞌ bʌ ora tij cꞌajti chʌ bʌ jach yom bʌ c chaꞌan yaꞌ baꞌ añetla aunque chꞌujbi j cꞌajtin cheꞌ ñac tic subeyetla i tꞌan Dios. Machꞌan mic tsꞌijbubeñetla ili tꞌan chaꞌan mic xiqꞌuetla chaꞌan cʌqꞌuentyel chʌ bʌ yom c chaꞌan. Cꞌajacña coj mi cubin cheꞌ ti majtyan jach mic subeñetla i tꞌan Dios. Mux c chilbentyel cꞌajacña bʌ coj muꞌ bʌ cubin mi ti tyojleyon. Más wem mi ti sajtiyon mi cubin cheꞌ jini.

16 Machꞌan mic subeꞌ jini wen bʌ tꞌan chaꞌan laj cotyʌntyel chaꞌan jach com c chan isan c bʌ. Como an tic wenta c subeꞌ majlel. Como pꞌumpꞌuñon mi machꞌan mic subeꞌ majlel i tꞌan Dios.

17 Jin chaꞌan cheꞌ mic subeꞌ majlel i tꞌan Dios chaꞌan chʌꞌʌch com, añʌch c tyojol cheꞌ jini. Pero mi wersa mic xijqꞌuel c subeꞌ majlel tsaꞌix i yʌcꞌon tic wenta Dios c subeꞌ majlel i tꞌan.

18 Cheꞌ jini cꞌajacña coj mi cubin cheꞌ maꞌix mij cꞌajtin i tyojol cheꞌ mic subeꞌ majlel i tꞌan Dios chaꞌan laj cotyʌntyel. Aunque chꞌujbi c chꞌʌmeꞌ i tyojol cheꞌ mic subeꞌ i tꞌan Dios chaꞌan chʌ bʌ jach yom c chaꞌan, maꞌix mij cꞌajtin.

19 Aunque machꞌañonix tiꞌ wenta yambʌ quixtyañu pero tsaꞌix cotsʌ c bʌ tiꞌ wenta yubil chaꞌan más miꞌ tyajob i cotyʌntyelob ti Cristo.

20 Cheꞌ yaꞌ añon baꞌ añob lojon c piꞌʌlob jini israeloꞌ bʌ mi cajñel bajcheꞌ israelon chaꞌan mij cotyañob i tyajob i cotyʌntyelob. Aunque mach wersajic mic chꞌujbiben jini mandar i chaꞌan Moisés pero mic chꞌujbiben chaꞌan mi quejel i cotyʌntyelob jeꞌel lojon c piꞌʌlob.

21 Pero cheꞌ añon yaꞌ baꞌan jini mach bʌ baꞌan miꞌ chꞌujbiben i mandar Moisés mi cajñel bajcheꞌ mi yajñelob chaꞌan mi quejel i cotyʌntyelob jeꞌel, aunque an tic wenta c chꞌujbiben i mandar Dios como wale añon tic wenta i mandar Cristo.

22 Cheꞌ yaꞌ añon yaꞌ baꞌan jini mach bʌ baꞌan xucꞌul ti tꞌan Dios machꞌan mi cajñel cheꞌ bajcheꞌ mi wen xucꞌulon chaꞌan mij cotyan i tyajob i cotyʌntyel jeꞌel. Baꞌic jach añon junlajal mi cajñel bajcheꞌ añob chaꞌan an jini muꞌ bʌ i tyajob i cotyʌntyel baꞌic jach añob.

23 Mi cajñel bajcheꞌ añob chaꞌan mi chꞌujbintyel jini wen bʌ tꞌan chaꞌan laj cotyʌntyel yicꞌot chaꞌan mic tyaj pejtyelel chʌ bʌ jach wen chaꞌan tiꞌ subol i tꞌan Dios.

24 Laꞌ wujil cheꞌ miꞌ chaꞌleñob ajñel, ti pejtyelelob miꞌ chaꞌleñob ajñel chaꞌan miꞌ tyajob i majtyan. Pero juntiquil jach miꞌ tyajeꞌ i majtyan chaꞌan tiꞌ ganari. Chaꞌlenla wersa chaꞌan laꞌ tyajeꞌ laꞌ majtyan tyʌlem bʌ ti lac Yum.

25 Pejtyel jini xꞌalas yom bʌ i chajpan i bʌ i ganarin ti alas miꞌ cʌyob jini muꞌ bʌ i mʌctyʌbeñob i pꞌʌtyʌlel i ganarin. Jini xꞌalas miꞌ chaꞌlen wersa chaꞌan miꞌ chꞌʌmeꞌ i majtyan yujil bʌ i jilel. Pero joñonla mi lac chaꞌlen wersa chaꞌan lac tyajeꞌ lac majtyan mach bʌ yujil jilel.

26 Pero joñon mach lolomic jach mic chaꞌlen ajñel yubil. Mic chaꞌlen ajñel cheꞌ bajcheꞌ juntiquil yujil bʌ baꞌ mi quejel i majlel. Mach cheꞌic jach mucꞌon bajcheꞌ mic lolon sʌcʌ jatsꞌ icꞌ pero mucꞌon ti wersa jatsꞌ yubil cheꞌ mucꞌon ti wersa ti i troñel lac Yum.

27 Pero joñon mic ticꞌ c bʌ chaꞌan maꞌix mic chaꞌlen mulil ame maꞌix mic ganarin c majtyan aunque tsaꞌix cʌntisʌyob yañoꞌ bʌ.