2 Jini muꞌ bʌ i lolon ñaꞌtyan wen yujil, max tyo miꞌ ñaꞌtyan bajcheꞌ yom i wen ñaꞌtyan.

3 Pero Dios miꞌ cʌñeꞌ jini quixtyañu muꞌ bʌ i pꞌuntyan Dios.

4 Cheꞌ jini, chaꞌan i cꞌuxol jini weꞌel tsaꞌ bʌ ajqꞌui baꞌan jini melel jach bʌ dios tyac, la cujilʌch maꞌix i cꞌʌjnibal melel jach bʌ dios tyac. Como la cujil an juntiquil jach Dios.

5 An cabʌl muꞌ bʌ i pejcʌntyel ti dios tyac ti chan yicꞌot wʌꞌ ti mulawil. Cheꞌ jini, an cabʌl dios tyac yubil yicꞌot cabʌl yumʌlob.

6 Aunque an cabʌl diosob yubil pero chaꞌañonla an juntiquil jach Dios. Jiñʌch Dios lac Tyat. Lac Tyat tiꞌ mele pejtyel chʌ bʌ tyac an. Dios ti yʌcꞌonla chaꞌan mi la cajñel yicꞌot. An juntiquil jach lac Yum. Jiñʌch Jesucristo. Chaꞌan ti Jesucristo an pejtyel chʌ bʌ an ti mulawil. Chaꞌan ti Jesucristo an laj cuxtyʌlel jeꞌel.

7 Pero mach ti pejtyelel hermañujob yujil isujm mach bʌ baꞌan cuxul jini melel jach bʌ dios tyac. An jini ñʌmʌl bʌ i chꞌujutisan dios tyac ti yambʌ ora. Cꞌʌlʌl wale miꞌ lolon pensalin yoque i chaꞌañʌch dios tyac miꞌ lolon cꞌuxob cheꞌ miꞌ cꞌuxob jini aqꞌuebil baꞌan melel jach bʌ dios tyac. Mi quejel tiꞌ bajñel tꞌan i pusicꞌal cheꞌ bajcheꞌ mi añʌch i mul mi lolon yubin mi tiꞌ cꞌuxu weꞌel aqꞌuebil bʌ baꞌan melel jach dios tyac. Como machꞌan xucꞌul i pusicꞌal.

8 Tsiquilʌch maꞌix miꞌ qꞌuelonla Dios ti wen chaꞌan ti caj chʌ bʌ mi laj cꞌuxeꞌ. Maꞌix más wen miꞌ qꞌuelonla chaꞌan ti chʌ bʌ mi laj cꞌuxeꞌ. Maꞌix miꞌ qꞌuelonla ti mach wen mi machꞌan ti laj cꞌuxu.

9 Yom jach a qꞌuel a bʌ chaꞌan mach a wʌqꞌuen i yotsan i mul juntiquil hermañu mach bʌ baꞌan xucꞌul tiꞌ tꞌan Dios chaꞌan ti caj libre añet a cꞌuxeꞌ chʌ bʌ jach maꞌ cꞌuxeꞌ.

10 Laꞌ lac poj al: Jatyet muꞌ bʌ a chꞌʌmꞌen isujm maꞌix chʌ bʌ miꞌ chaꞌlen cheꞌ maꞌ cꞌuxeꞌ weꞌel aqꞌuebil bʌ baꞌan melel jach bʌ dios tyac. Maꞌ buchtyʌl ti uchꞌel ti mesa baꞌ miꞌ cꞌuxob jini tsaꞌ bʌ ajqꞌui baꞌan i dios tyacob. Cheꞌ jini juntiquil hermañu mach bʌ baꞌan xucꞌul tiꞌ tꞌan Dios mi yilañet. Cꞌoꞌojl mi quejel i cꞌuxeꞌ jini weꞌel jeꞌel aunque chʌncol tyo i ñaꞌtyan i chaꞌañʌch melel jach bʌ dios tyac.

11 Cheꞌ jini jatyet muꞌ bʌ a chꞌʌmꞌen isujm maꞌ wʌqꞌuen i chaꞌlen mulil juntiquil hermañu mach bʌ baꞌan xucꞌul tiꞌ tꞌan Dios chaꞌan ti caj ti a cꞌuxu jini weꞌel. Cristo ti sajti chaꞌan jini hermañu jeꞌel.

12 Cheꞌ maꞌ wʌqꞌuen i chaꞌlen tꞌan i pusicꞌal chaꞌan ti caj tiꞌ pensali mach yom laj cꞌuxeꞌ jini weꞌel mi yubin jini mach bʌ baꞌan xucꞌul bʌ hermañujob chʌncox a chaꞌlen mulil tiꞌ contra Cristo cheꞌ jini.

13 Jin chaꞌan mi chʌncox cʌcꞌ i yotsan i mul juntiquil quermañu chaꞌan ti caj jini muꞌ bʌ j cꞌuxeꞌ más wen maꞌix baꞌ bʌ ora mic chaꞌ cꞌuxeꞌ weꞌel chaꞌan maꞌix mi cʌqꞌuen i chaꞌlen mulil.