2 Pero chaꞌan maꞌix miꞌ chaꞌlen i tsuculel yom jujuntiquil i pʌyeꞌ yoque yijñam bʌ. Jujuntiquil xꞌixic yoque i ñoxiꞌal bʌ.

3 I ñoxiꞌal jini xꞌixic, i yijñam jini winic yom i chꞌujbibeñob i bʌ chaꞌan mi yajñel bajcheꞌ yom chaꞌan i ñoxiꞌalʌch chaꞌan i yijñamʌch.

4 I yijñam mach i yumic i bajñel bʌ i bʌcꞌtyal como i chaꞌañʌch jeꞌel i ñoxiꞌal. Chʌꞌʌch jeꞌel i ñoxiꞌal mach i bajñel yumic i bʌcꞌtyal pero i chaꞌañʌch yijñam jeꞌel.

5 Mach yom i cʌy i chꞌujbibeñob i bʌ. Jini jach mi ti poj bajñel lajayob i tꞌan chaꞌan puro oración miꞌ chaꞌleñob. Ti wiꞌil miꞌ chaꞌ chꞌujbibeñob i bʌ chaꞌan maꞌix mi yʌqꞌuen i yotsañob i mul Satanás cheꞌ mach chꞌujbi i bajñel ticꞌob i bajñel i bʌ.

6 Machꞌan mi cʌleꞌ mi wersa yom mi laꞌ pʌyeꞌ laꞌ wijñam pero chꞌujbiyʌch mi laꞌ wom.

7 Joñon com añeticla muꞌ bʌ la wajñel cheꞌ bajcheꞌ añon. Pero ti chajb ti chajb bajcheꞌ ti yʌqꞌueyonla la cajñel Dios.

8 Mic subeñob jini max tyo bʌ baꞌan i yijñam i ñoxiꞌal yicꞌot mebaꞌ ꞌixicob: Más wen mi machꞌan tiꞌ pʌyʌ yijñam, mi machꞌan mi pʌjyel ti winic. Cheꞌ bajcheꞌ añon.

9 Pero mi mach chꞌujbi i ticꞌ i bʌ, laꞌ i pʌyeꞌ yijñam, laꞌ pʌjyic tiꞌ ñoxiꞌal jini xꞌixic, cheꞌ jini. Como más wen mi ti pʌyʌ yijñam mi ti pʌjyi tiꞌ ñoxiꞌal jini xꞌixic. Mach wen cheꞌ mucꞌ jach i wersa mulan tiꞌ pusicꞌal i chaꞌlen i tsuculel.

10 Pero mic xiqꞌueꞌ jini tsaꞌix bʌ i tyajayob i bʌ chaꞌan mach i cʌyeꞌ i ñoxiꞌal jini xꞌixic. Mach c chaꞌanic ili mandar. Lac Yumʌch ti yʌlʌ cheꞌ ñac bʌ tsajni wʌꞌ ti mulawil.

11 Pero mi tiꞌ cʌyʌ i ñoxiꞌal jini xꞌixic yom i bajñel ajñel o yom i chaꞌ majlel baꞌan i ñoxiꞌal. Chʌꞌʌch jeꞌel jini winic mach yom i cʌy i yijñam.

12 Jini yañoꞌ bʌ mic subeñob bajcheꞌ mic bajñel pensalin mi chʌꞌʌch yom lac Yum. Como machꞌan ti yʌlʌ lac Yum cheꞌ ñac wʌꞌ an ti mulawil. Mi anix yijñam juntiquil winic cheꞌ ti queji i chꞌujbin i tꞌan Dios, mi maꞌix miꞌ chꞌujbin i tꞌan Dios i yijñam, pero mi yom bej ajnic jini xꞌixic yicꞌot i ñoxiꞌal mach yom i cʌyeꞌ yijñam chaꞌan ti caj machꞌan ochem tiꞌ tꞌan Dios.

13 Mi an i ñoxiꞌal juntiquil xꞌixic cheꞌ ti queji i chꞌujbin i tꞌan Dios, mi maꞌix miꞌ chꞌujbin i tꞌan Dios i ñoxiꞌal, pero mi yom bej ajnic jini winic yicꞌot i yijñam mach yom i cʌyeꞌ i ñoxiꞌal chaꞌan ti caj machꞌan ochem tiꞌ tꞌan Dios.

14 Cꞌoꞌojl muꞌ tyo quejel i chꞌujbin Dios i ñoxiꞌal cheꞌ mi yajñel yicꞌot yijñam ochem bʌ tiꞌ tꞌan Dios. Cꞌoꞌojl muꞌ tyo quejel i chꞌujbin Dios i yijñam cheꞌ mi yajñel yicꞌot i ñoxiꞌal ochem bʌ tiꞌ tꞌan Dios. Mi tiꞌ cʌyʌyob i bʌ ame maꞌix mi quejel i chꞌujbin i tꞌan Dios i yalobilob.

15 Pero mi wersa yom i loqꞌuel jini mach bʌ baꞌan ochem tiꞌ tꞌan Dios baꞌan jini ochem bʌ mi yijñam o mi i ñoxiꞌal, laꞌ loqꞌuic.

16 Hermana xꞌixic, ¿bajcheꞌqui maꞌ ñaꞌtyan jixcu mi muꞌ tyo quejel i chꞌujbin i tꞌan Dios a ñoxiꞌal jeꞌel cheꞌ mi yajñel awicꞌot? Hermano, ¿bajcheꞌqui maꞌ ñaꞌtyan jixcu mi muꞌ tyo quejel i chꞌujbin i tꞌan Dios a wijñam jeꞌel cheꞌ mi yajñel awicꞌot? Cꞌoꞌojl muꞌ tyo quejel i chꞌujbin.

17 Laꞌ bej ajnic ti jujuntiquil cheꞌ bajcheꞌ an cheꞌ ñac max tyo tiꞌ pʌyʌ Dios chaꞌan i chꞌujbin. Cheꞌ bajcheꞌ lac Yum ti yʌqꞌue i yajñel cheꞌ yom tyo bej ajnic. Chʌꞌʌch mic tyumbiñob pejtyel ochemoꞌ bʌ tiꞌ tꞌan Dios baꞌical jach añob.

18 Mi Dios tiꞌ pʌyʌ juntiquil chaꞌan i chꞌujbin Dios cheꞌ wʌ tsepelix i pʌchʌlel chʌꞌʌch yom mi yajñel. Mi Dios tiꞌ pʌyʌ cheꞌ max tyo tsepelic i pʌchʌlel mach yom i yʌcꞌ ti tsepol i pʌchʌlel.

19 Maꞌix chʌ bʌ miꞌ chaꞌlen cheꞌ tsepel o mi mach tsepel lac pʌchʌlel. Pero jini yom bʌ mi lac chaꞌlen jiñʌch chʌ bʌ yom Dios.

20 Ti jujuntiquil hermano yom i bej ajñel bajcheꞌ an cheꞌ ñac max tyo tiꞌ pʌyʌ Dios chaꞌan i chꞌujbin.

21 Mi añet ti a yum ti lolon troñel jach cheꞌ ñac tiꞌ pʌyʌyet chaꞌan a chꞌujbin Dios, mach a pensalin. Pero mi añʌch bajcheꞌ maꞌ loqꞌuel ti lolon troñel jach, loqꞌuen, cheꞌ jini.

22 Jini lolon ajtroñel jach bʌ cheꞌ ñac tiꞌ pʌjyi chaꞌan i chꞌujbin lac Yum, wale librejix an chaꞌan ti lac Yum aunque chucul tyo ti troñel i chaꞌan bʌ mulawil. Chʌꞌʌch jeꞌel jini libre am bʌ quixtyañu cheꞌ ñac ti pʌjyi wale lolon ajtroñel jach i chaꞌan bʌ Cristo yubil.

23 Dios tiꞌ mʌñʌyetla ti ñoj lets bʌ i tyojol. Mach laꞌ wʌcꞌ laꞌ bʌ laꞌ yumin quixtyañu. Jini jach mi laꞌ yumin Dios.

24 Jini chaꞌan hermañujob bej ajñenla cheꞌ bajcheꞌ añetla cheꞌ max tyo tiꞌ pʌyʌyetla Dios.

25 Maꞌix aqꞌuebilon mandar ti lac Yum chaꞌan jini max tyo bʌ tiꞌ pʌyʌ yijñam. Pero mi cʌleꞌ bajcheꞌ mic ñaꞌtyan como tsaꞌix i pꞌuntyʌyon lac Yum. Chꞌujbi laꞌ chꞌujbibeñon c tꞌan.

26 Mic ñaꞌtyan wen mi yajñel quixtyañu cheꞌ bajcheꞌ an cheꞌ maꞌix yijñam cheꞌ maꞌix i ñoxiꞌal jini xꞌixic. Como chʌncol lac ñusan wocol wale iliyi.

27 Mi añʌch a wijñam mach a cʌyeꞌ. Mi maꞌix a wijñam mach a jopꞌ a pʌy.

28 Pero mach mulilic mi ti a pʌyʌ a wijñam. Mi tiꞌ jacꞌʌ i pʌyol xcꞌalʌl, maꞌix i mul. Pero mi quejel i más ñusañob wocol wʌꞌ ti mulawil jini am bʌ yijñam am bʌ i ñoxiꞌal. Com cheꞌ maꞌix mi laꞌ más ñusan wocol.

29 Hermañujob, jini com bʌ cʌl jiñʌch iliyi: Maꞌix jal mach aqꞌuebilonla tiempolel. Jini am bʌ yijñam mach yom jini jach miꞌ chʌc pensalin i yijñam pero yom jeꞌel i chʌc pensalin i chaꞌan bʌ Dios.

30 Jini am bʌ i chꞌʌjyemlel chaꞌan ajsajtyel yom mi yajñel cheꞌ bajcheꞌ mi maꞌix i chꞌʌjyemlel. Jini mucꞌob bʌ ti qꞌuinijel yom mi yajñel cheꞌ bajcheꞌ mi maꞌix cꞌajacña yoj mi yubin. Jini muꞌ bʌ i chaꞌlen mʌñoñel yom i chaꞌlen cheꞌ bajcheꞌ mi machꞌanix chʌ bʌ tiꞌ mʌñʌ. Yomix tyo laꞌ cꞌajtisan Dios jeꞌel.

31 Jini am bʌ troñel ti mʌñoñel choñoñel chaꞌan ganar mach yom jini jach miꞌ chʌc pensalin. Yom mi yajñel cheꞌ bajcheꞌ maꞌix chʌ bʌ miꞌ tyajeꞌ. Yom i pensalin i chaꞌan bʌ Dios. Como chʌncox i bej lʌqꞌueꞌ tyʌlel yujtibal mulawil.

32 Com cheꞌ maꞌix cabʌl chʌ bʌ mi laꞌ pensalin. Cheꞌ maꞌix i yijñam winic, miꞌ pensalin jini yom bʌ lac Yum chaꞌan i meleꞌ chʌ bʌ miꞌ mulan lac Yum.

33 Pero cheꞌ anix yijñam, miꞌ más pensalin i troñel wʌꞌ ti mulawil yicꞌot miꞌ pensalin i meleꞌ chʌ bʌ miꞌ mulan i yijñam chaꞌan tijicña mi yubin yijñam.

34 Cheꞌ jeꞌel mach lajal jini xꞌixic am bʌ i ñoxiꞌal yicꞌot jini mach bʌ baꞌan i ñoxiꞌal. Jini mach bʌ baꞌan i ñoxiꞌal miꞌ pensalin i chaꞌan bʌ lac Yum chaꞌan i yʌcꞌ i bʌ ti Dios chaꞌan i chaꞌliben i troñel Dios ti pejtyelel i bʌcꞌtyal yicꞌot ti pejtyel i pusicꞌal. Pero jini am bʌ i ñoxiꞌal miꞌ pensalin jini am bʌ ti mulawil yicꞌot chaꞌan i meleꞌ chʌ bʌ miꞌ mulan i ñoxiꞌal chaꞌan tijicña mi yubin i ñoxiꞌal.

35 Mic subeñetla iliyi chaꞌan laꞌ wenlel, mach chaꞌanic mic tiqꞌuetla. Mic subeñetla ili chaꞌan mi laꞌ wajñel ti wen chaꞌan laꞌ chaꞌliben i troñel lac Yum jeꞌel ti pejtyel laꞌ pusicꞌal.

36 Pero mi an juntiquil miꞌ ñaꞌtyan más wen miꞌ tyajeꞌ i ñoxiꞌal i yalobil como chʌncox i ñejpꞌan, mi jiñʌch más wen mi yubin chꞌujbi i yʌqꞌuen i tyajeꞌ i ñoxiꞌal. Maꞌix miꞌ chaꞌlen mulil.

37 Pero mi an yambʌ mi maꞌix mi wersa aqꞌuen i tyajeꞌ i ñoxiꞌal i yalobil mi yubin, mi libre an mi yubin i meleꞌ chʌ bʌ yom, mi chʌncox i pensalin mach i yʌcꞌʌ i yalobil, weñʌch jeꞌel miꞌ chaꞌlen.

38 Cheꞌ jini, jini muꞌ bʌ i yʌcꞌ i yalobil chaꞌan mi yajñel yicꞌot i ñoxiꞌal wen miꞌ chaꞌlen. Jini mach bʌ baꞌan mi yʌcꞌ i yalobil más wen miꞌ chaꞌlen.

39 Jini xꞌixic am bʌ i ñoxiꞌal cꞌʌlʌl añʌch tiꞌ wenta i yajñel yicꞌot i ñoxiꞌal cheꞌ cuxul tyo i ñoxiꞌal. Chʌꞌʌch an ti mandar. Mi ti sajti i ñoxiꞌal libre an jini xꞌixic chaꞌan i tyajeꞌ yambʌ winic. Pero yom ochem bʌ tiꞌ tꞌan Dios.

40 Pero joñon mic pensalin más cꞌajacña yoj mi yajñel mi machꞌan mi chaꞌ tyajeꞌ yambʌ winic. Mic ñaꞌtyan chaꞌan chʌꞌʌch yom i yʌleꞌ Chꞌujul bʌ i Chꞌujlel Dios jeꞌel.