2 ¿Mach ba laꞌ wujil isujm ti jini tyal tyo bʌ ora jini ochemoꞌ bʌ tiꞌ tꞌan Dios mi quejel i meleꞌ jini mach bʌ baꞌan ochem tiꞌ tꞌan Dios? Jixcu mi muꞌ tyo quejel lac mel jini mach bʌ baꞌan ochem tiꞌ tꞌan Dios, ¿mach ba chꞌujbi laꞌ meleꞌ jini saj tyac jach bʌ laꞌ contrajiya?

3 ¿Mach ba laꞌ wujil isujm muꞌ tyo quejel lac mel ajtroñel i chaꞌan bʌ Dios chꞌoyoloꞌ bʌ ti panchan? ¿Mach ba más chꞌujbi lac meleꞌ hermañujob chaꞌan chʌ bʌ tyac jach wʌꞌ bʌ an ti mulawil, cheꞌ jini?

4 Mi an contrajiya baꞌan hermañujob, ¿chucoch mi laꞌ majlel ti melojel baꞌan jini mach bʌ baꞌan ochem tiꞌ tꞌan Dios cheꞌ jini?

5 Chʌncol cʌleꞌ jini chaꞌan quisintic mi laꞌ wubin. ¿Machꞌa baꞌan mi junticlec jasʌl bʌ i ñaꞌtyʌbal baꞌ añetla chaꞌan i tyojꞌisan cheꞌ miꞌ contrajiñob i bʌ hermañujob?

6 ¿Jixcu cꞌʌñʌl ba mi waꞌ pʌyeꞌ majlel ti melojel yambʌ hermañu baꞌan jini mach bʌ baꞌan ochem tiꞌ tꞌan Dios? Mach yom.

7 Cheꞌ mi laꞌ meleꞌ laꞌ bʌ tsiquilʌch mach xucꞌuleticla, cheꞌ jini. ¿Chucoch maꞌan mi laꞌ cuchꞌen i mul laꞌ piꞌʌl? Mejor mi laꞌ cucheꞌ cheꞌ an chʌ bʌ miꞌ chilbeñetla.

8 Pero jatyetla chʌncox laꞌ chaꞌlen machꞌʌ wen. Jinic tyo mi laꞌ chaꞌlen xujchꞌ. Mi laꞌ xujchꞌibeñob chʌ bʌ an i chaꞌan ochemoꞌ bʌ tiꞌ tꞌan Dios.

9 ¿Mach ba laꞌ wujil isujm mach chꞌujbi i yochel baꞌ miꞌ chaꞌlen yumʌl Dios jini machꞌʌ weñob? Maꞌ mi laꞌ lotin laꞌ bʌ. Mach chꞌujbi i yochel baꞌ miꞌ chaꞌlen yumʌl Dios mi jinic jini muꞌ bʌ i chaꞌlen i tsuculel, mi jinic jini muꞌ bʌ i chꞌujutisan melel jach bʌ dios tyac, mi jinic jini am bʌ tꞌan yicꞌot yambʌ winic yambʌ xꞌixic, mi jinic jini winicob mi xꞌixicob muꞌ bʌ laja pejcañob i bʌ.

10 Mach chꞌujbi i yochel jini ajxujchꞌob mi jinic muꞌ bʌ i michꞌqꞌuel chʌ bʌ an i chaꞌan bʌ i piꞌʌl, mi jinic jini xqꞌuixnijelob mi jinic jini xjopꞌtꞌañob, mi jinic jini muꞌ bʌ i wersa chꞌʌmben jini mach bʌ i chaꞌanic. Mach ochob baꞌ miꞌ chaꞌlen yumʌl Dios.

11 Chʌꞌʌch an lamitaletla wajali pero tsaꞌix sʌc isʌntiyetla. Tsaꞌix laꞌ wʌqꞌue laꞌ bʌ Dios chaꞌan i chaꞌañetla. Chʌncox laꞌ qꞌuejlel ti tyoj ti Dios chaꞌan ti lac Yum Jesús yicꞌot chaꞌan ti Chꞌujul bʌ i Chꞌujlel lac Dios.

12 Melelʌch bajcheꞌ mi yʌlob: Librejix añon chaꞌan c chaꞌlen chʌ bʌ jach yes com c meleꞌ, cheꞌob. Pero maꞌix luꞌ an i cꞌʌjnibal chaꞌan c meleꞌ. Pero machꞌanix mi quejel cʌcꞌ c bʌ chaꞌan c chaꞌlen ame mi quejel c bej mulan c chaꞌlen.

13 Melelʌch bajcheꞌ mi yʌlob: Ti aqꞌuenti weꞌel chaꞌan lac ñʌcꞌ chaꞌan laj cꞌuxeꞌ. Ti ajqꞌui lac ñʌcꞌ chaꞌan mi yochel lac weꞌel, cheꞌob. Pero Dios mi quejel i jisan weꞌel yicꞌot lac ñʌcꞌ cheꞌ mach bʌ baꞌan chʌc an i cꞌʌjnibal. Pero maꞌix melel lac bʌcꞌtyal chaꞌan lac chaꞌlen lac tsuculel. Ti aqꞌuentiyonla lac bʌcꞌtyal chaꞌan tsictiyic i ñuclel lac Yum. Ti ajqꞌui lac bʌcꞌtyal chaꞌan i cꞌʌn lac Yum.

14 Chʌꞌʌch bajcheꞌ Dios ti tyeche loqꞌuel lac Yum baꞌan sajtyemoꞌ bʌ chʌꞌʌch jeꞌel mi quejel i tyejchꞌisañonla loqꞌuel baꞌan sajtyemoꞌ bʌ chaꞌan ti i pꞌʌtyʌlel.

15 ¿Mach ba laꞌ wujil isujm añetla tiꞌ bʌcꞌtyal Cristo ti jujuntiquiletla? ¿Muꞌ ba cʌcꞌ c bʌcꞌtyal i chaꞌan bʌ lac Yum chaꞌan mi yajñel yicꞌot i bʌcꞌtyal xꞌixic i tsuculel bʌ miꞌ chaꞌlen muꞌ bʌ i choñeꞌ i bʌ, cheꞌ jini? Mach utsꞌatic.

16 ¿Mach ba laꞌ wujil isujm jini muꞌ bʌ i yʌcꞌ i bʌ ti pejcʌntyel ti xꞌixic muꞌ bʌ i chon i bʌ, juntiquil jach i bʌcꞌtyal mi yajñel yicꞌot? Como tsꞌijbubil tiꞌ tꞌan Dios mi yʌl: Jini chaꞌtiquil mi yajñel ti jumpꞌej jach i bʌcꞌtyal yubil.

17 Pero jini muꞌ bʌ i yʌcꞌ i bʌ ti lac Yum mi yajñel ti juntiquil jach yicꞌot lac Yum chaꞌan ti Chꞌujul bʌ i Chꞌujlel Dios.

18 Mach laꞌ saj jacꞌ laꞌ chaꞌlen laꞌ tsuculel, cheꞌ jini. Maꞌix mulil muꞌ bʌ más acꞌ ti asiyel lac bʌcꞌtyal cheꞌ bajcheꞌ jini mulil.

19 ¿Mach ba laꞌ wujil isujm laꞌ bʌcꞌtyal i templojʌch Chꞌujul bʌ i Chꞌujlel Dios tsaꞌix bʌ i yʌqꞌueyonla Dios? Mi yajñel Chꞌujul bʌ i Chꞌujlel Dios ti jatyetla. Mach laꞌ bajñel chaꞌanic laꞌ bʌcꞌtyal.

20 Como Dios tiꞌ mʌñʌyetla ti ñoj lets bʌ i tyojol. Jin chaꞌan yom mi laꞌ tsictisan i ñuclel Dios chaꞌan ti laꞌ bʌcꞌtyal yicꞌot ti laꞌ pusicꞌal. Como i chaꞌañʌch Dios lac bʌcꞌtyal yicꞌot lac pusicꞌal.