2 Pero jatyetla chʌncol tyo laꞌ lolon chan isan laꞌ bʌ. Yom mi laꞌ wucꞌtyʌben i mul. Laꞌ chojquic loqꞌuel ti laꞌ tyojlel jini tsaꞌ bʌ i chaꞌle i tsuculel.

3 Aunque mach yaꞌic añon pero tic pusicꞌal yaꞌ añon yubil. Cheꞌ bajcheꞌ yaꞌic añon tsaꞌix c wʌ ñaꞌtyʌ bajcheꞌ yom mi laꞌ tyojꞌisan.

4 Muchꞌquin laꞌ bʌ cheꞌ bajcheꞌ yom lac Yum Jesucristo. Yaꞌ añon yaꞌ baꞌ añetla tic pusicꞌal jeꞌel. Yaꞌan i pꞌʌtyʌlel lac Yum laꞌ wicꞌot chaꞌan i cotyañetla.

5 Yom mi laꞌ wʌcꞌ tiꞌ wenta Satanás chaꞌan i yubin wocol tiꞌ bʌcꞌtyal chaꞌan mi jisʌntyel chʌ bʌ yom i bajñel tsucul pusicꞌal chaꞌan mi cotyʌntyel i chꞌujlel cheꞌ mi chaꞌ tyʌlel lac Yum Jesús.

6 Mach yom mi laꞌ chan isan laꞌ bʌ chaꞌan jini chʌncol bʌ laꞌ chaꞌlen. ¿Mach ba laꞌ wujil isujm jini wʌ albil bʌ tꞌan baꞌ mi yʌl: Chaꞌan ti tsꞌityaꞌ jach levadura muꞌ bʌ yʌqꞌuen i wos i bʌ caxlan waj mi luꞌ woseꞌ i bʌ jini caxlan waj? cheꞌen.

7 Locꞌsanla jini mulil yaꞌ baꞌ añetla cheꞌ bʌ bajcheꞌ levadura muꞌ bʌ i yʌqꞌuen i wos i bʌ caxlan waj chaꞌan mi laꞌ wajñel ti sʌc. Como sʌquetla. Cheꞌ jini añetla cheꞌ bajcheꞌ tsijiꞌ bʌ wajetla machꞌʌ baꞌan yicꞌot jini muꞌ bʌ yʌqꞌuen i wos i bʌ caxlan waj. Jiñʌch cheꞌ bajcheꞌ tiꞌ cꞌuxuyob ti pascua bʌ qꞌuin ti ñoj oniyix. Chajpʌbilix pascua bʌ qꞌuin yubil. Como tsaꞌix i yʌcꞌʌ i bʌ ti sajtyel Cristo chaꞌan laj cotyʌntyel cheꞌ bajcheꞌ tsʌnsʌbil bʌ tiñʌmeꞌ tsaꞌ bʌ i tsʌnsʌyob ti pascua bʌ qꞌuin ti ñoj oniyix.

8 Cheꞌ jini yom mi la cajñel cheꞌ bajcheꞌ tsijibonla ti jumpꞌej lac pusicꞌal ti wen bʌ lac pensal. Añonla cheꞌ bajcheꞌ jini waj mach bʌ baꞌan yicꞌot jini muꞌ bʌ i yʌqꞌuen i wos i bʌ caxlan waj. Mach yom mi la cajñel cheꞌ an tyo lac tsuculel cheꞌ an tyo lac mul. Cheꞌ bajcheꞌ an tyo la quicꞌot jini muꞌ bʌ yʌqꞌuen i wos i bʌ caxlan waj cheꞌ an tyo lac mul.

9 Tic tsꞌijbubetla ti yambʌ jun chaꞌan mach yom mi laꞌ wajñel yicꞌot jini muꞌ bʌ i chaꞌlen i tsuculel.

10 Mach yom mi laꞌ junyajlel loqꞌuel baꞌan jini mach bʌ baꞌan miꞌ ñaꞌtyañob, jini muꞌ bʌ i chaꞌlen i tsuculel, mi jinic muꞌ bʌ i michꞌqꞌuel chʌ bʌ an i chaꞌan bʌ i piꞌʌl, jini muꞌ bʌ i chaꞌlen xujchꞌ, mi jinic muꞌ bʌ i chꞌujutisan jini melel jach bʌ dios tyac. Como mi maꞌ mi laꞌ wajñel yicꞌotyob cheꞌ jini, wersa yom mi laꞌ loqꞌuel ti ili mulawil yubil.

11 Pero tic tsꞌijbubeyetla chaꞌan mach yom mi laꞌ wajñel yicꞌot jini muꞌ bʌ i lolon al i bʌ ti ochem bʌ tiꞌ tꞌan Dios mi chʌncol tyo i chaꞌlen i tsuculel, mi chʌncox i michꞌqꞌuel chʌ bʌ an i chaꞌan i piꞌʌl mi chʌncox i chꞌujutisan melel jach bʌ dios, mi chʌncox i chaꞌlen tsucul tꞌan o mi chʌncox ti qꞌuixnijel. Mach yom mi jinic mi laꞌ chaꞌlen uchꞌel yicꞌot.

12-13 Como mach c wenta c mel jini mach bʌ baꞌan ochem tiꞌ tꞌan Dios. Dios mi quejel i melob. Pero jatyetla añʌch ti laꞌ wenta laꞌ meleꞌ ochemoꞌ bʌ tiꞌ tꞌan Dios. Jini chaꞌan chocoxla loqꞌuel ti laꞌ tyojlel jini tsaꞌ bʌ i chaꞌle mulil.