2 Wersa yom mi tsictiyel xucꞌulʌch miꞌ chaꞌlen troñel jini ajtroñelob.

3 Pero joñon c bajñel maꞌix mucꞌon ti pensal cheꞌ mi laꞌ wʌleꞌ mi wen o mi mach wen tic chaꞌle c troñel o mi yañoꞌ bʌ mi yʌleꞌ mi wen o mi mach wen tic chaꞌle. Mi jinic joñon maꞌix mic lolon al mi wen tic chaꞌle.

4 Aunque maꞌix chʌ bʌ mi saj al c pusicꞌal como wen tic chaꞌle mi cubin pero mach jinic mi yʌl mi weñʌch tic chaꞌle cheꞌ maꞌix chʌ bʌ mi yʌl c pusicꞌal. Lac Yum jach yujil isujm mi wen tic chaꞌle.

5 Jin chaꞌan max tyo laꞌ wʌ aleꞌ mi wen o mi mach wen tiꞌ chaꞌlibe i troñel Dios yambʌ quixtyañu cheꞌ max tyo i yorojlel. Pijtyan jintyo mi tyʌlel lac Yum. Lac Yum mi quejel i tsictisan chʌ bʌ an ti lojon c pusicꞌal. Cheꞌ jini mi quejel i luꞌ ñaꞌtyañob chʌ bʌ och ti lojon c chaꞌlibe i troñel Dios ti pejtyelel lojon c pusicꞌal. Cheꞌ jini mi quejel i subentyel i ñuclel ti jujuntiquilonla ti Dios chaꞌan bajcheꞌ ti lac chaꞌlibe i troñel Dios.

6 Hermañujob, chaꞌan laꞌ wenlel chʌꞌʌch chʌncox c tyaj c bʌ ti tꞌan yicꞌot Apolos ti lajoñel chaꞌan laꞌ ñaꞌtyan bajcheꞌ yom mi laꞌ wajñel cheꞌ bajcheꞌ tsꞌijbubil tiꞌ tꞌan Dios. Chaꞌan machꞌan majch miꞌ más qꞌuel ti ñuc juntiquil ajtroñel i chaꞌan bʌ Dios cheꞌ miꞌ pꞌajeꞌ yambʌ.

7 ¿Majchqui parte ti yʌqꞌueyet a cꞌʌjnibal? ¿Am ba a cꞌʌjnibal machꞌʌ baꞌan ti yʌqꞌueyetla Dios? Mi ti aqꞌuentiyetla, ¿chucoch, cheꞌ jini, mi laꞌ chan isan laꞌ bʌ cheꞌ bajcheꞌ ti laꞌ bajñel ti laꞌ tyaja laꞌ cꞌʌjnibal mi laꞌ chaꞌlen?

8 Cheꞌ bajcheꞌ anix laꞌ chaꞌan pejtyelel chʌ bʌ laꞌ wom ti jini chʌncol bʌ laꞌ chꞌujbin. Machꞌan chʌ bʌ yambʌ laꞌ wom yubil. Chʌncox laꞌ waꞌ chaꞌlen yumʌl yubil. Cʌyʌlon lojon yubil. Melelic yumʌletla chaꞌan mi lojon c motin chaꞌlen yumʌl quicꞌotyetla.

9 Yajcʌbilon bʌ ajsubtꞌañon lojon ñumel. Cheꞌ bajcheꞌ Dios ti yʌqꞌueyon lojon c ñusan wocol cheꞌ bajcheꞌ maꞌix lojon j cꞌʌjnibal mi cubin. Ti yʌqꞌueyon lojon baꞌ chꞌujbi i luꞌ qꞌuelon lojon pejtyel quixtyañu yicꞌot ajtroñel i chaꞌan Dios chꞌoyol bʌ ti panchan. Acꞌʌlonix lojon ti tsʌntsʌntyel yubil.

10 Cheꞌ bajcheꞌ tonto añon lojon miꞌ qꞌueloñob quixtyañu chaꞌan ti caj Cristo pero jatyetla wen an laꞌ ñaꞌtyʌbal mi laꞌ wʌl chaꞌan ti Cristo. Cꞌuñon lojon pero jatyetla pꞌʌtyʌletla mi laꞌ wʌl yubil. Mi laꞌ qꞌuejlel ti ñuc pero joñon lojon mi lojon c pꞌajtyʌl.

11 Cꞌʌlʌ wale iliyi tsaꞌix lojon c ñusʌ wiꞌñal yicꞌot tyʌquin tiꞌ. Maꞌix jasʌl lojon c pislel. Mi lojon cajtsꞌel. Maꞌix lojon cotyot.

12 Mi lojon c lujbꞌan cheꞌ mi lojon c chaꞌlen troñel tij cꞌʌb. Cheꞌ mi lojon cʌlꞌentyel mi lojon caqꞌueꞌ ti wen bʌ tꞌan. Cheꞌ mi lojon quilan wocol mi lojon j cucheꞌ ti wen.

13 Cheꞌ miꞌ contrajiñon lojon tiꞌ tꞌañob mi lojon c chaꞌ pejcan ti uts bʌ tꞌan. Miꞌ qꞌueloñob cheꞌ bajcheꞌ misejelʌlon lojon am bʌ ti lum. Cꞌʌlʌ wale iliyi miꞌ qꞌuelon lojon cheꞌ bajcheꞌ jini más bibajax bʌ wʌꞌ ti mulawil.

14 Machꞌanix mic tsꞌijbun ili tꞌan chaꞌan j quisñiñetla pero chaꞌan c tyumbiñetla cheꞌ bajcheꞌ pꞌuntyʌbilet bʌ la calobil.

15 Como aunque an diez mil ajcʌntisa tsaꞌ bʌ i cʌntisʌyetla chaꞌan Cristo pero maꞌix cabʌl laꞌ tyat. Como cheꞌ bajcheꞌ laꞌ tyatyon yubil chaꞌan ti laꞌ chꞌujbi Cristo Jesús cheꞌ ñac tic subeyetla jini tꞌan chaꞌan laj cotyʌntyel.

16 Jin chaꞌan mic subeñetla: Chaꞌlenla bajcheꞌ tij cʌntisʌyetla.

17 Jin chaꞌan tsaꞌix c chocbeyetla tyʌlel Timoteo. Mic pꞌuntyan Timoteo xucꞌul bʌ calobil yubil chaꞌan ti lac Yum. Timoteo mi quejel i cꞌajtisʌbeñetla bajcheꞌ mi cajñel chaꞌan chʌncol c chꞌujbin Cristo. Mi quejel i cꞌajtisʌbeñetla bajcheꞌ mij cʌntisañob jeꞌel jini ochemoꞌ bʌ tiꞌ tꞌan Dios baꞌical jach mic ñumel ti cʌntisa.

18 Chaꞌtiquil uxtiquiletla chʌncox laꞌ chan isan laꞌ bʌ. Mi laꞌ lolon ñaꞌtyan maꞌix mi quejel c tyʌlel ti julaꞌ yaꞌ baꞌ añetla.

19 Pero mi cheꞌ yom lac Yum maꞌix jal mi quejel j cꞌotyel j qꞌueletla. Cheꞌ jini mi quejel j qꞌueleꞌ mi yoque an i pꞌʌtyʌlel Dios yicꞌot jini chʌncol bʌ i chan isan i bʌ o mi ti i tiꞌ jach mi lolon al mi chʌncol i chꞌujbin.

20 Mach tiꞌ tꞌan jach quixtyañu mi tsictiyel mi chʌncol i yumin Dios tiꞌ pusicꞌal. Pero chaꞌan bajcheꞌ miꞌ chaꞌlen miꞌ tsictisan mi an i pꞌʌtyʌlel Dios yicꞌot.

21 ¿Baqui bʌ laꞌ wom cheꞌ mic chaꞌ tyʌlel culaꞌ añetla? ¿Laꞌ wom ba mi cʌqꞌueñetla laꞌ xotꞌ laꞌ mul chaꞌan maꞌan ti laꞌ tyojꞌisʌ laꞌ bʌ? ¿O laꞌ wom ba mic pꞌuntyañetla yicꞌot mic pejcañetla ti uts bʌ tꞌan chaꞌan tsaꞌix laꞌ wʌ tyojꞌisʌ laꞌ bʌ? ¿Baqui bʌ laꞌ wom cheꞌ jini?