2 Tic subeyetla cꞌun jach bʌ cʌntisa cheꞌ bajcheꞌ laꞌ chuꞌ. Como cheꞌ bajcheꞌ chꞌoc alʌlet tyo la yubil. Max tyo baꞌan tic subeyetla jini tsʌts bʌ cʌntisa i wenta bʌ weꞌel. Como max tyo chꞌujbi laꞌ chꞌʌmeꞌ yubil. Como cꞌʌlʌ wale iliyi max tyo chꞌujbi laꞌ chꞌʌmꞌen isujm.

3 Como chʌncol tyo laꞌ chaꞌlen chʌ bʌ yom tsucul bʌ laꞌ pusicꞌal. Cheꞌ mi laꞌ michꞌqꞌuel laꞌ bʌ yicꞌot periyal yicꞌot cheꞌ mach junlajal laꞌ pensal, ¿mach ba chʌncol tyo laꞌ meleꞌ chʌ bʌ yom tsucul bʌ laꞌ pusicꞌal, cheꞌ jini? Chʌncol jach tyo laꞌ wajñel bajcheꞌ pejtyel yañoꞌ bʌ quixtyañu machꞌʌ baꞌan miꞌ chꞌujbiñob Dios.

4 Como cheꞌ juntiquil mi yʌleꞌ: Joñon mic tsʌclen Pablo, cheꞌen, yambʌ mi yʌleꞌ: Joñon mic tsʌclen Apolos, cheꞌen, ¿mach ba lajalet tyo la bajcheꞌ yañoꞌ bʌ quixtyañujob muꞌ bʌ i chaꞌlen chʌ bʌ yom tsucul bʌ i pusicꞌal?

5 ¿Majchonqui? ¿Majchqui jini Apolos? Ajtroñelon lojon jach i chaꞌañoꞌ bʌ Dios. Ti laꞌ chꞌujbi chaꞌan tic subeyetla i tꞌan Dios. Jujuntiquilon lojon ti lojon c chaꞌle jini troñel tsaꞌ bʌ i yʌcꞌon lojon c chaꞌlen lac Yum.

6 Joñon cheꞌ bajcheꞌ tic chaꞌle pacꞌ yubil. Apolos cheꞌ bajcheꞌ tiꞌ mul jaꞌle yubil. Pero Dios ti yʌcꞌʌ ti colel.

7 Cheꞌ jini, maꞌix ñuc mi jinic tsaꞌ bʌ i chaꞌle pacꞌ mi jinic tsaꞌ bʌ mul jaꞌle yubil. Jini jach ñuc Dios muꞌ bʌ i yʌcꞌ ti colel jini pacꞌ.

8 Junlajal ñuc jini tsaꞌ bʌ i chaꞌle pacꞌ yicꞌot jini tsaꞌ bʌ i mul jaꞌle yubil. Dios mi quejel i tyojeꞌ ti jujuntiquil. Jiñʌch bajcheꞌ tiꞌ chaꞌlibe i troñel mi wen o mi mach wen tiꞌ chaꞌle.

9 Como motin ajtroñelon lojon i chaꞌan bʌ Dios. Jatyetla i choletla baꞌ muꞌ ti troñel Dios yubil. Cheꞌ jeꞌel i yotyotyetla yubil chʌncol bʌ i meleꞌ Dios.

10 Cheꞌ bajcheꞌ mi wen bʌ xmel otyotyon yubil. Ti yutslel Dios ti yʌqꞌueyon j cꞌʌcchocon i tsꞌajquil i yebal otyot yubil. Yañoꞌ bʌ mi quejel ti troñel tiꞌ pam yubil. Pero jujuntiquil yom i wen qꞌueleꞌ bajcheꞌ miꞌ meleꞌ i troñel tiꞌ pam i yebal bʌ otyot.

11 Cheꞌ tsaꞌix cꞌʌcchoconti i tsꞌajquil i yebal jumpꞌej otyot maꞌix majch chꞌujbi i cꞌʌcchocon yambʌ. Jesucristo cheꞌ bajcheꞌ i tsꞌajquil i yebal otyot. Jiñʌch tsaꞌ bʌ laꞌ chꞌujbi.

12 An cabʌl chʌ bʌ chꞌujbi i cꞌʌñeꞌ quixtyañu chaꞌan i meleꞌ i yotyot tiꞌ pam i cꞌʌclib. Jujuntiquil quixtyañu miꞌ cꞌʌñeꞌ mi oro, plata, yicꞌot ñoj wen bʌ tyun, mi tyeꞌ, jam yicꞌot jalʌl yubil chaꞌan miꞌ meleꞌ i yotyot.

13 Como ti yorojlel melojel mi quejel i tsictiyel i troñel jujuntiquil quixtyañu mi wen mi mach wen tiꞌ chaꞌle. Como ti yorojlel melojel mi quejel i ñumel ti cꞌajc jini tsaꞌ bʌ i cꞌʌñʌ i meleꞌ i yotyot yubil. Yaꞌi mi tsictiyel chʌ bʌ tiꞌ cꞌʌñʌ i mel i yotyot yubil.

14 Mi machꞌan ti puli jini tsaꞌ bʌ i mele tiꞌ pam i cꞌʌcꞌlib cheꞌ mi ñumel ti cꞌajc mi quejel i yʌqꞌuentyel i tyojol i troñel.

15 Pero mi ti puli jini tsaꞌ bʌ i cꞌʌñʌ ti troñel yubil miꞌ sʌt pejtyel i troñel. Pero mi quejel i cotyʌntyel jini quixtyañu pero cheꞌ bajcheꞌ coleꞌ i pulel ti cꞌajc.

16 ¿Mach ba laꞌ wujil isujm jumpꞌej i templojetla yubil baꞌ miꞌ chaꞌlen chumtyʌl Chꞌujul bʌ i Chꞌujlel Dios?

17 Cheꞌ bajcheꞌ mi an majch mi tyecheꞌ contrajiya muꞌ bʌ i yʌqꞌueñet laꞌ tꞌoxeꞌ laꞌ bʌ chʌncox i jemeꞌ i templo Dios yubil. Dios mi quejel i jisan jini quixtyañu jeꞌel como chꞌujul i templo Dios. I templojetixla Dios.

18 Maꞌ mi laꞌ lotin laꞌ bʌ. Mi an majch mi lolon al wen yujil, laꞌ i yajñel cheꞌ bajcheꞌ maꞌix chʌ bʌ yujil chaꞌan mi yoque tyaj i ñaꞌtyʌbal tyʌlem bʌ ti Dios.

19 Como i tontojlel jach miꞌ qꞌueleꞌ Dios jini i bajñel ñaꞌtyʌbal jach bʌ quixtyañujob. Jini Tsꞌijbubil bʌ i Tꞌan Dios mi yʌl: Dios mi yʌcꞌ ti yajlel chaꞌan ti mismo i ñaꞌtyʌbal jini muꞌ bʌ i lolon ñaꞌtyan wen yujil.

20 Mi yʌleꞌ jeꞌel ti Tsꞌijbubil bʌ i Tꞌan Dios: Yujil isujm lac Yum maꞌix i cꞌʌjnibal jini muꞌ bʌ i lolon al wen yujil.

21 Jin chaꞌan maꞌan majch chꞌujbi i pʌt i bʌ ti ñuc chaꞌan chʌncox i lolon tsʌclen majlel yambʌ quixtyañu como luꞌ laꞌ chaꞌañʌch pejtyel chʌ bʌ yes an.

22 Luꞌ laꞌ chaꞌañʌch ti pejtyel mi joñoñʌch mi Apolos mi Pedro mi ili mulawil, mi laj cuxtyʌlel. Laꞌ chaꞌañʌch cheꞌ mi lac sajtyel. Laꞌ chaꞌañʌch ili ora wale iliyi yicꞌot jini tyal tyo bʌ ora. Pejtyel luꞌ laꞌ chaꞌañʌch.

23 Cheꞌ jeꞌel jatyetla i chaꞌañetla Cristo. Cristo i chaꞌañʌch Dios.