Tꞌan chaꞌan tiꞌ bajle ti cruz Cristo
2
Pero hermañujob cheꞌ ñac ti ñaxan cꞌotiyon yaꞌ baꞌañetla chaꞌan c subeñetla jini melel bʌ i tꞌan Dios machꞌan tij cabʌl cꞌʌñʌ tsʌts tyac bʌ tꞌan. Machꞌan tic pʌsʌ c bʌ cheꞌ bajcheꞌ wen cujil.2 Pero cheꞌ ñac yaꞌ añon laꞌ wicꞌot tic bajñel pensali chaꞌan machꞌan yambʌ mic subeñetla. Jini jach mic subeñetla chaꞌan Jesucristo tsaꞌ bʌ jocꞌle ti cruz.
3 Cheꞌ ñac ti tyʌliyon yaꞌ baꞌ añetla cꞌuñon. Tsitsiñayon ti bʌqꞌuen.
4 Mach com c wersa xiqꞌuetla laꞌ chꞌujbin jini i tꞌan Dios. Machꞌan tic tsʌtsʌ subetla cheꞌ bajcheꞌ wen cujil cheꞌ ñac tic chaꞌle tꞌan, cheꞌ ñac tic subu i tꞌan Dios yaꞌ baꞌ añetla. Pero tic subeyetla i tꞌan Dios chaꞌan ti pꞌʌtyʌl bʌ i troñel Chꞌujul bʌ i Chꞌujlel Dios ti laꞌ pusicꞌal.
5 Chaꞌan ti pꞌʌtyʌl bʌ i troñel Dios ti laꞌ pusicꞌal mi laꞌ chꞌujbin Dios. Mach chaꞌanic jach mi laꞌ chꞌujbin i pensal jach quixtyañujob.
Mi laj cʌn Dios chaꞌan ti Chꞌujul bʌ i Chꞌujlel
6 Pero mucꞌʌch lojon cʌleꞌ más tsʌts bʌ tꞌan cheꞌ chʌncox lojon c pejcan jini xucꞌul bʌ mi yajñel ti Cristo. Pero ili ñaꞌtyʌbalʌl muꞌ bʌ lojon cʌleꞌ mach i chaꞌanic ili mulawil mi i chaꞌanic jini muꞌ bʌ i chaꞌlen yumʌl wʌꞌ ti mulawil. Como jini mi quejel i jilelob.
7 Pero mi lojon c subeꞌ i ñaꞌtyʌbal Dios machꞌʌ baꞌan tsictiyem ti yambʌ ora. Jiñʌch tsaꞌix bʌ i wʌ ñaꞌtyʌ i chaꞌlen Dios cheꞌ max tyo tiꞌ mele ili mulawil chaꞌan laj cotyʌntyel machꞌʌ yujil jilel. Mi quejel la cʌqꞌuentyel lac ñuclel.
8 Machꞌan mi junticlec jini yumʌlob wʌꞌ ti ili mulawil tiꞌ chꞌʌmbeyob isujm bajcheꞌ tiꞌ pensali Dios chaꞌan laj cotyʌntyel. Tsaꞌic i chꞌʌmbeyob isujm, machꞌan tiꞌ tsʌnsʌyob lac Yum am bʌ i ñuclel.
9 Pero chʌꞌʌch bajcheꞌ tsꞌijbubilix tiꞌ tꞌan Dios mi yʌl:
Machꞌan mi junticlec quixtyañu tsaꞌ bʌ i yubi, tsaꞌ bʌ i yilʌ,
mi tsaꞌic i pensali
jini ñoj wen bʌ tsaꞌ bʌ i chajpʌ Dios chaꞌan jini muꞌ bʌ i pꞌuntyan Dios.
Cheꞌ tsꞌijbubil.
10 Dios ti yʌcꞌonla lac chꞌʌmben isujm jini ñoj wen bʌ tsaꞌ bʌ i chajpʌ Dios chaꞌan ti Chꞌujul bʌ i Chꞌujlel. Jini Chꞌujul bʌ i Chꞌujlel Dios luꞌ yujil isujm chʌ bʌ an tiꞌ pusicꞌal Dios, jinic tyo jini más tsʌts tyac bʌ i sujmlel tiꞌ pusicꞌal Dios.
11 Machꞌan majch chꞌujbi i ñaꞌtyan chʌ bʌ yes miꞌ pensalin yambʌ quixtyañu. Sólo jini jach jini quixtyañu yujil isujm chʌ bʌ miꞌ pensalin. Chʌꞌʌch jeꞌel sólo jini jach Chꞌujul bʌ i Chꞌujlel Dios chꞌujbi i ñaꞌtyan chʌ bʌ miꞌ pensalin Dios.
12 Mach chaꞌanic ti i ñaꞌtyʌbal mulawil pero chaꞌan ti Chꞌujul bʌ i Chꞌujlel Dios tsaꞌ bʌ aqꞌuentiyonla mi lac ñaꞌtyan jini tsaꞌ bʌ i yʌqꞌueyonla Dios chaꞌan ti yutslel.
13 Mi lojon c subeꞌ jini muꞌ bʌ lojon j cʌn, mach chaꞌan ti lojon c bajñel ñaꞌtyʌbal pero chaꞌan tiꞌ ñaꞌtyʌbal muꞌ bʌ i cʌntisañonla Chꞌujul bʌ i Chꞌujlel Dios. Mi lojon c subeñob i sujmlel chaꞌan ti Chꞌujul bʌ i Chꞌujlel am bʌ yicꞌot muꞌ bʌ yajñel bajcheꞌ yom jini Chꞌujul bʌ i Chꞌujlel Dios.
14 Jini machꞌʌ baꞌan Chꞌujul bʌ i Chꞌujlel Dios tiꞌ pusicꞌal machꞌan miꞌ chꞌʌmꞌen isujm jini cʌntisa i chaꞌan bʌ Chꞌujul bʌ i Chꞌujlel Dios. Como cheꞌ bajcheꞌ tonto tꞌan jach mi yubin i tꞌan Dios. Mach chꞌujbi i chꞌʌmꞌen isujm i cʌntisa i chaꞌan bʌ Chꞌujul bʌ i Chꞌujlel Dios como jini jach am bʌ Chꞌujul bʌ i Chꞌujlel Dios yicꞌot miꞌ chꞌʌmꞌen isujm.
15 Pero joñonla am bʌ Chꞌujul bʌ i Chꞌujlel Dios ti lac pusicꞌal chꞌujbi lac luꞌ chꞌʌmꞌen isujm i chaꞌan bʌ Dios. Jini machꞌʌ baꞌan Chꞌujul bʌ i Chꞌujlel Dios yicꞌot mach chꞌujbi i ñaꞌtyañob bajcheꞌ mi lac chꞌʌmꞌen isujm.
16 Tsꞌijbubil tiꞌ tꞌan Dios mi yʌl: Maꞌan majch miꞌ ñaꞌtyan chʌ bʌ an tiꞌ pusicꞌal lac Yum. Machꞌan yambʌ yajcʌntisa Dios. Pero joñonla am bʌ Chꞌujul bʌ i Chꞌujlel Dios la quicꞌot mi lac pensalin cheꞌ bajcheꞌ miꞌ pensalin Cristo.