2 Jini ñuc bʌ curajob i chaꞌan israelob yicꞌot ajcʌntisajob i chaꞌan i mandar israelob chʌncol i pejcañob i bʌ chaꞌan miꞌ sʌclan bajcheꞌ mi quejel i tsʌnsan Jesús. Como miꞌ bʌcꞌñan quixtyañujob.

3 Cheꞌ jini, Satanás ti ochi tiꞌ pusicꞌal Judas muꞌ bʌ i pejcʌntyel ti Iscariote. Jiñʌch i piꞌʌlob jini yambʌ oncejob yajcʌbiloꞌ bʌ ajsubtꞌañob ñumel.

4 Ti majli Judas baꞌan ñuc bʌ curajob i chaꞌan israelob yicꞌot baꞌan am bʌ i yeꞌtyel ti colem templo i chaꞌan israelob. Tiꞌ pejcʌyob chaꞌan bajcheꞌ chꞌujbi i yʌcꞌ ti cʌchol Jesús.

5 Cꞌajacñayob i yoj cheꞌ ñac ti yubiyob i tꞌan Judas. Ti yʌcꞌʌyob i tꞌan chaꞌan mi yʌqꞌueñob tyaqꞌuin jini Judas.

6 Judas ti yʌcꞌʌ i tꞌan chaꞌan i yʌqꞌueñob ti i cꞌʌb jini añoꞌ bʌ i yeꞌtyel. Ti queji i sʌclan bajcheꞌ mi yʌcꞌ ti chucol Jesús cheꞌ machꞌan tsiquil cabʌl quixtyañujob.

7 Ti cꞌoti i yorojlel i qꞌuiñejel cheꞌ miꞌ cꞌuxob jini caxlan waj machꞌʌ baꞌan yicꞌot levadura cheꞌ miꞌ wersa tsʌnsañob tiñʌmeꞌ cheꞌ ti pascua.

8 Jesús tiꞌ xiqꞌui majlel Pedro yicꞌot Juan. Tiꞌ subeyob: Cucula. Chajpan la cuchꞌel chaꞌan qꞌuin pascua, cheꞌen.

9 Tiꞌ jacꞌʌyob: ¿Baqui awom mi lojon c chajpan la cuchꞌel? cheꞌ tiꞌ yʌlʌyob.

10 Jesús tiꞌ jacꞌʌ: Cheꞌ ochel muqꞌuetla ti lum mi quejel laꞌ tyajeꞌ juntiquil winic chʌncol bʌ i qꞌuecheꞌ majlel jumpꞌej ucꞌun jaꞌ. Tsʌclenla majlel jintyo mi laꞌ cꞌotyel ti yotyot baꞌ mi quejel i yochel.

11 Yaꞌi mi laꞌ suben i yum otyot: Jini lojon c Maestro mi yʌl: ¿Baqui an jini saj mal baꞌ chꞌujbi lojon cuchꞌel quicꞌotyob ajcʌntꞌañoꞌ bʌ c chaꞌan? cheꞌetla, mi laꞌ suben.

12 Cheꞌ jini mi quejl i pʌsbeñetla saj mal yaꞌ ti chaꞌlajmlel otyot. Colem, chajpʌbil i mal. Yaꞌi yom laꞌ chajpan muꞌ bʌ quejel laj cꞌuxe, cheꞌ ti yʌlʌ Jesús.

13 Ti majliyob jini ajcʌntꞌañob. Tiꞌ tyajayob cheꞌ bajcheꞌ ti yʌlʌ Jesús. Tiꞌ chajpʌyob uchꞌel chaꞌan pascua.

14 Cheꞌ ti cꞌoti i yorojlel, Jesús yicꞌot jini yajcʌbil bʌ ajsubtꞌañob ñumel ti cꞌoti. Ti buchleyob yaꞌ ti mesa.

15 Cheꞌ jini Jesús tiꞌ subeyob: Ti pejtyelel c pusicꞌal wersa com j cꞌux jini uchꞌel chaꞌan pascua laꞌ wicꞌot cheꞌ max tyo mic sajtyel.

16 Como mic subeñetla machꞌan mi quejel c chaꞌ cꞌux jini uchꞌel chaꞌan pascua laꞌ wicꞌot jintyo baꞌ bʌ ora mi yujtyel baꞌ miꞌ chaꞌlen yumʌl Dios, cheꞌen.

17 Cheꞌ jini tiꞌ chꞌʌmʌ vaso ti i cꞌʌb. Tiꞌ sube Dios wocox i yʌlʌ. Tiꞌ subeyob ajcʌntꞌañob i chaꞌan: Japʌla iliyi. Aqꞌuen laꞌ bʌ.

18 Como mic subeñetla machꞌanix mi quejel c chaꞌ japeꞌ i yaꞌlel uva jintyo ti tyal bʌ ora cheꞌ miꞌ chaꞌlen yumʌl Dios, cheꞌen.

19 Ti wiꞌil tiꞌ chꞌʌmʌ waj. Tiꞌ chaꞌle oración. Cheꞌ jini tiꞌ xetꞌe. Ti yʌqꞌueyob. Ti yʌlʌ: Jiñʌch c bʌcꞌtyal muꞌ bʌ quejel cʌcꞌ chaꞌañetla. Cꞌajtisañon cheꞌ mi laꞌ chaꞌlen jini uchꞌel, cheꞌen.

20 Chʌꞌʌch tiꞌ chaꞌle jeꞌel yicꞌot jini vaso cheꞌ ujtyel i chaꞌleñob uchꞌel. Jesús tiꞌ subeyob: Ili am bʌ ti vaso jiñʌch i seña tsijib trato bʌ tꞌan muꞌ bʌ i waꞌchocontyel chaꞌan tic chꞌichꞌel muꞌ bʌ quejel c bequeꞌ chaꞌañetla, cheꞌen.

21 Pero wale iliyi wʌꞌan i cꞌʌb ti pam mesa quicꞌot muꞌ bʌ i quejel i yʌcꞌon ti cʌchol.

22 Joñon i Piꞌʌlon Quixtyañujob wersa mic sajtyel cheꞌ bajcheꞌ wʌ ñaꞌtyʌbil. Pero pꞌumpꞌun cheꞌ bajcheꞌ mi quej i ñusan wocol jini quixtyañu muꞌ bʌ quejel i yʌcꞌon ti cʌchol. Wen wocol mi quejel i yubin.

23 Cheꞌ jini ti queji i cꞌajtibeñob i bʌ majchqui jini muꞌ bʌ quejel i yʌcꞌ ti cʌchol Jesús.

24 Ti wiꞌil jini ajcʌntꞌañob ti queji i cʌlʌx pejcañob i bʌ chaꞌan majchqui mi quejel i qꞌuejlel ti más ñuc.

25 Pero Jesús tiꞌ subeyob: Jini ñuc bʌ yumʌlob ti pañimil miꞌ chaꞌlen yumʌl cheꞌ bajcheꞌ mi wen ñuc. Jini am bʌ i yeꞌtyel mi pejcʌntyel ti wen bʌ ajcʌñʌtyayajob.

26 Pero jatyetla mach cheꞌic yom mi laꞌ chaꞌlen. Pero jini más ñuc bʌ ti laꞌ tyojel yom i meleꞌ cheꞌ bajcheꞌ más alob tyo. Jini muꞌ bʌ ti xicꞌ yom i chaꞌlen cheꞌ bajcheꞌ yajtroñel jach.

27 Jesús ti bej yʌlʌ: ¿Majchqui jini más ñuc bʌ yubil, jim ba jini buchul bʌ ti mesa ti uchꞌel o jim ba jini ajtroñel muꞌ bʌ i ñusan waj? ¿Mach ba más ñuc jini buchul bʌ ti uchꞌel? Pero wʌꞌ añon ti laꞌ tyojel cheꞌ bajcheꞌ ajtroñelon laꞌ chaꞌan, cheꞌ ti yʌlʌ Jesús.

28 Jatyetla ti bej ajniyetla quicꞌot tic wocol.

29 Jin chaꞌan mi cʌqꞌueñetla laꞌ chaꞌlen yumʌl cheꞌ bajcheꞌ c Tyat jeꞌel ti yʌcꞌon c chaꞌlen yumʌl

30 chaꞌan mi laꞌ chaꞌlen uchꞌel tic mesa yaꞌ baꞌ mic chaꞌlen yumʌl. Mi quejel laꞌ buchtyʌl ti ñuc bʌ buchlibʌl chaꞌan laꞌ meleꞌ jini docemojt i jiñʌjlel Israel. Cheꞌ ti yʌlʌ Jesús.

31 Lac Yum ti yʌlʌ jeꞌel: Simón, ubin tsaꞌix i cꞌajtibon chaꞌan cʌqꞌuetla ti i cꞌʌb Satanás chaꞌan i nijcʌbeñetla laꞌ pusicꞌal cheꞌ bajcheꞌ mi chijcuntyel trigo chaꞌan mi loqꞌuel i sujl.

32 Pero tsaꞌix c tyajayet ti oración chaꞌan machꞌan mi quejel a cʌy a chꞌujbiñon. Jixcu cheꞌ tsaꞌix a chaꞌ tyoj isʌ a bʌ, cotyan a wermañujob chaꞌan i pꞌʌtyʌliyel. Cheꞌ ti subenti Simón.

33 Simón tiꞌ sube: C Yum, chajpʌbilonix chaꞌan mic majlel quicꞌotyet ti cʌchol aunque mic sajtyel quicꞌotyet, cheꞌ ti yʌlʌ Simón.

34 Jesús tiꞌ sube: Pedro, mic subeñet wale cheꞌ max tyo chaꞌle uqꞌuel tyat mut uxyaj mi quejel a wʌleꞌ mach a cʌñʌyon, cheꞌ ti yʌlʌ Jesús.

35 Cheꞌ jini Jesús tiꞌ cꞌajtibeyob: Cheꞌ ñac tic xiqꞌuiyetla majlel ti subtꞌan cheꞌ ñac machꞌan ti laꞌ chꞌʌmʌ majlel laꞌ morral mi yajnibic laꞌ tyaqꞌuin mi yanic bʌ laꞌ zapatos, ¿an tyo ba chʌ bʌ yom laꞌ chaꞌan ti laꞌ wubi? cheꞌ ti yʌlʌ Jesús. Tiꞌ jacꞌʌyob: Maꞌix, cheꞌob.

36 Cheꞌ jini Jesús tiꞌ subeyob: Pero wale iliyi mi an laꞌ morral, chꞌʌmʌxla majlel yicꞌot i yajnib laꞌ tyaqꞌuin. Yicꞌot jini machꞌʌ baꞌan i machit, laꞌ i choñeꞌ i bujc chaꞌan i mʌñeꞌ juntsꞌijt i machit.

37 Como mic subeñetla: Mi wersa quejel i tsꞌʌctiyel jini wʌ Tsꞌijbubil bʌ i Tꞌan Dios baꞌ miꞌ tyajon ti tꞌan. Mi yʌl: Mi quejel i tsijquel yicꞌot simaroñoꞌ bʌ, cheꞌ mi yʌl. Como pejtyelel tsꞌijbubuil bʌ chaꞌañon mi quejel i wersa tsꞌʌctiyel, cheꞌ ti yʌlʌ Jesús.

38 Cheꞌ jini ti yʌlʌyob: C Yum, umbaꞌan chaꞌtsꞌijt machit, cheꞌob. Jesús tiꞌ jacꞌʌ: Jasʌlix jini, cheꞌen.

39 Cheꞌ jini Jesús ti loqꞌui majlel. Ti majli ti wits Olivajol bʌ i cꞌabaꞌ cheꞌ bajcheꞌ i tyʌlel miꞌ chaꞌlen. Jini ajcʌntꞌañob i chaꞌan tiꞌ tsʌcleyob majlel.

40 Cheꞌ ñac ti cꞌoti yaꞌi Jesús tiꞌ subeyob: Pejcanla Dios ti oración chaꞌan machꞌan mi laꞌ yajlel ti mulil, cheꞌen.

41 Cheꞌ jini, Jesús ti bej majli cheꞌ ñajtyʌl bajcheꞌ mi chojquel jumpꞌej tyun. Ti ñocle chaꞌan i chaꞌlen oración.

42 Ti oración Jesús ti yʌlʌ: C Tyat, mach a wʌcꞌon ti ochel ti ili wocol muꞌ bʌ quejel c ñusan. Pero mele mach jinic bajcheꞌ com joñon pero mele bajcheꞌ awom, cheꞌ ti yʌlʌ Jesús.

43 Cheꞌ jini ti tsictiyi juntiquil ajtroñel i chaꞌan Dios chꞌoyol bʌ ti panchan chaꞌan i yʌqꞌuen i pꞌʌtyʌlel.

44 Cheꞌ chʌncox i wen yilan wocol Jesús más wersa tiꞌ pejcʌ Dios ti oración. Ti loqꞌui i bulꞌich cheꞌ bajcheꞌ chꞌichꞌ miꞌ tꞌuytꞌuy yajlel ti lum.

45 Cheꞌ ñac ti tyejchi ti oración, ti chaꞌ majli baꞌan ajcʌntꞌañob i chaꞌan. Wʌyʌlobix tiꞌ tyaja chaꞌan i chꞌʌjyemlelob i pusicꞌal.

46 Cheꞌ jini Jesús tiꞌ subeyob: ¿Chucoch muqꞌuetla ti wʌyel? Tyejchenla. Chaꞌlenla oración chaꞌan machꞌan mi laꞌ yajlel ti mulil, cheꞌen.

47 Cheꞌ chʌncol tyo ti tꞌan Jesús ti cꞌoti cabʌl quixtyañu. Ñaxan tyʌlel Judas. Judas jiñʌch i piꞌʌl jini yambʌ once ajcʌntꞌañob i chaꞌan Jesús. Tiꞌ lʌcꞌʌ Jesús chaꞌan i ñupeꞌ.

48 Cheꞌ jini Jesús tiꞌ sube: Judas, ¿muꞌ baꞌ a wʌcꞌon tiꞌ cꞌʌbob, Joñon i Piꞌʌlon bʌ Quixtyañujob chaꞌan maꞌ ñupon? cheꞌen.

49 Jini yaꞌ bʌ añob yicꞌot Jesús cheꞌ ñac tiꞌ ñaꞌtyʌyob chʌ bʌ chʌncol i yujtyel, tiꞌ cꞌajtibeyob Jesús: C Yum, ¿muꞌ ba lojon j cꞌʌmben machit? cheꞌob.

50 Juntiquil ajcʌntꞌan i chaꞌan Jesús tiꞌ lowo ajtroñel i chaꞌan jini ñoj ñuc bʌ cura i chaꞌan israelob. Tiꞌ tsepbe loqꞌuel i ñoj bʌ chiquin.

51 Pero Jesús ti yʌlʌ: Laꞌ ajnic. Cʌyʌxla, cheꞌen. Cheꞌ jini Jesús tiꞌ tyʌlbe i chiquin jini ajtroñel. Ti lajmi.

52 Cheꞌ jini Jesús tiꞌ subeyob jini ñuc bʌ curajob i chaꞌan israelob yicꞌot jini añoꞌ bʌ i yeꞌtyel ti i templo israelob yicꞌot xñoxob añoꞌ bʌ i yeꞌtyel tsaꞌ bʌ cꞌoti i chucob majlel Jesús: ¿Tsaꞌix ba tyʌliyetla awicꞌot laꞌ machit laꞌ tyeꞌ cheꞌ bajcheꞌ ajxuchꞌon? cheꞌen.

53 Cheꞌ ñac yaꞌ añon quicꞌotyetla yaꞌ ti templo ti jujumpꞌej qꞌuin machꞌan ti laꞌ saj chucuyon. Pero wale iliyi jiñʌch i yorojlel ti laꞌ yajcʌ. I yorojlelix mi tsictiyel i pꞌʌtyʌlel jini am bʌ ti icꞌjowan bʌ pañimil, cheꞌ ti yʌlʌ Jesús.

54 Cheꞌ jini tiꞌ cʌchʌyob Jesús. Tiꞌ pʌyʌyob majlel ti yotyot jini ñoj ñuc bʌ cura i chaꞌan israelob. Pedro tiꞌ ñajtyʌ tsʌcle majlel.

55 Yaꞌi tiꞌ tsꞌʌbʌyob cꞌajc ti pat otyot. Yaꞌ joy buchulob. Pedro ti buchle yicꞌotyob jeꞌel.

56 Cheꞌ jini juntiquil ajtroñel bʌ xꞌixic ti yilʌ yaꞌ buchul Pedro jeꞌel. Tiꞌ chꞌuj qꞌuele. Ti yʌlʌ: Ili winic jiñʌch juntiquil i piꞌʌlob Jesús jeꞌel, cheꞌen.

57 Pedro ti yʌlʌ mach jiniqui. Ti yʌlʌ: Pero ubin, xꞌixic, mach j cʌñʌ jini winiqui, cheꞌen.

58 Cheꞌ jini ti ñajtyʌ jumucꞌ yambʌ ti yilʌ. Tiꞌ sube Pedro: Jatyet jeꞌel i piꞌʌlet jini winic, cheꞌen. Pero Pedro ti yʌlʌ: Ubin, mach joñonic, cheꞌen.

59 Cheꞌ jini, ti ñumi jumpꞌej ora yambʌ ti yilʌ. Tiꞌ sube: Melel, ili winic i piꞌʌlobʌch Jesús como loqꞌuem ti Galilea jeꞌel, cheꞌen.

60 Cheꞌ jini Pedro ti yʌlʌ: Ubin, mach cujil isujm chʌ bʌ yes chʌncol a wʌleꞌ, cheꞌen. Ti jim bʌ ora cheꞌ chʌncol tyo ti tꞌan Pedro, tiꞌ waꞌ chaꞌle uqꞌuel tyat mut.

61 Lac Yum tiꞌ sutqui i bʌ i qꞌuel Pedro. Pedro tiꞌ cꞌajtiyi i chaꞌan tsaꞌ bʌ i yʌlʌ Jesús cheꞌ ñac tiꞌ sube: Cheꞌ max tyo i chaꞌle uqꞌuel tyat mut uxyajlel mi quejel a wʌl mach a cʌñʌyon, cheꞌen.

62 Cheꞌ jini Pedro ti loqꞌui majlel. Ti wen queji ti uqꞌuel.

63 Jini winicob tsaꞌ bʌ i cʌñʌtyʌyob Jesús tiꞌ wajleyob. Tiꞌ jatsꞌʌyob.

64 Tiꞌ mʌcbeyob i wut. Tiꞌ tyum jajtsꞌiyob. Tiꞌ subeyob: Subeñon lojon majchqui tiꞌ jatsꞌʌyet, cheꞌob.

65 An tyo cabʌl yan tyac tsaꞌ bʌ i yʌlʌyob chaꞌan i wajleñob.

66 Cheꞌ sʌquix tiꞌ muchꞌquiyob i bʌ jini xñoxob añoꞌ bʌ i yeꞌtyel chaꞌan israelob, jini ñuc bʌ curajob yicꞌot ajcʌntisajob chaꞌan mandar. Tiꞌ pʌyʌyob majlel Jesús yaꞌ baꞌan ñucoꞌ bʌ i yeꞌtyel ti Comité Junta Suprema bʌ i cꞌabaꞌ muꞌ bʌ i chaꞌlen melojel. Yaꞌi tiꞌ cꞌajtibeyob:

67 Subeñon lojon mi jatyetyʌch jini Cristo yajcʌbil bʌ i chaꞌan Dios. Jesús tiꞌ jacꞌʌ: Mi tic subeyetla mi chʌꞌʌchi, machꞌan mi quejel laꞌ chꞌujbin chaꞌan melel c tꞌan.

68 Mi an chʌ bʌ tij cꞌajtibeyetla machꞌan mi quejel laꞌ jacꞌbeñon. Maꞌix mi quejel laꞌ colon, cheꞌen.

69 Pero wale cꞌʌlʌ ti beleꞌ ora Joñon i Piꞌʌlon bʌ Quixtyañujob mi quejel c buchtyʌl tiꞌ ñoj jini Dios machꞌʌ baꞌan i pꞌisol i pꞌʌtyʌlel, cheꞌ ti yʌlʌ Jesús.

70 Cheꞌ jini, tiꞌ luꞌ cꞌajtibeyob Jesús: ¿Jatyet ba i Yalobil Dios, cheꞌ jini? cheꞌob. Jesús tiꞌ jacꞌbeyob: Joñoñʌch cheꞌ bajcheꞌ ti laꞌ wʌlʌ, cheꞌ ti yʌlʌ Jesús.

71 Cheꞌ jini ti yʌlʌyob: ¿Chutyoqui cꞌʌjnibal yambʌ testigo? Joñonla lac bajñel tsaꞌix la cubi ti lac chiquin tsaꞌ bʌ i yʌlʌ ti tiꞌ, cheꞌob.