2 Ti yilʌ jeꞌel juntiquil mebaꞌ ꞌixic machꞌʌ baꞌan chʌ bʌ an i chaꞌan. Ti yotsʌ chaꞌwejch tyaqꞌuin i saj jach bʌ.

3 Jesús ti yʌlʌ: Ubinla mic subeñetla, ili pꞌumpꞌun bʌ mebaꞌ ꞌixic más on ti yotsʌ yubil bajcheꞌ ti pejtyelel jini yañoꞌ bʌ.

4 Como jini yañoꞌ bʌ yoñel chʌ bʌ an i chaꞌan ti cʌyle. Pero jini xꞌixic maꞌix chʌ bʌ an i chaꞌan ti cʌyle chaꞌan chʌ bʌ yom, cheꞌ ti yʌlʌ Jesús.

5 Chaꞌtiquil uxtiquil ti quejiyob ti tꞌan chaꞌan jini colem templo i chaꞌan bʌ israelob. Ti yʌlʌyob chaꞌan cꞌotyajax yicꞌot chaꞌan cꞌotyajax jini tyun tyac yicꞌot chaꞌan i majtyan tsaꞌ bʌ ajqꞌui tyac chaꞌan i chꞌʌjlil. Cheꞌ jini Jesús ti yʌlʌ:

6 Tyal i yorojlel mi quejel i jisʌntyel ti pejtyelel iliyi chʌncol bʌ laꞌ wilan wale iliyi. Maꞌix mi quejel i saj cʌytyʌl mi jumpꞌejlic tyun ti pam yambʌ.

7 Cheꞌ jini tiꞌ cꞌajtibeyob Jesús: Maestro, ¿jalajqui mi quejel i yujtyel pejtyelel jijini? ¿Chuquiyes i señʌjlel cheꞌ mi quejel i luꞌ tsꞌʌctiyel pejtyelel jijini? cheꞌob.

8 Jesús tiꞌ subeyob: Yom wen xucꞌuletla chaꞌan machꞌan majch chꞌujbi i lotiñetla. Como mi quejelob i tyʌlel muꞌ bʌ quejel i cꞌʌmbeñon j cꞌabaꞌ. Mi quejel i yʌlob: Joñon Cristojon, cheꞌen. Wale iliyi lʌcꞌʌlix mach tyal Cristo, cheꞌen. Pero maꞌ mi laꞌ lolon tsʌcleñob, cheꞌ ti yʌlʌ Jesús.

9 Cheꞌ mi laꞌ wubin an cabʌl guerra yicꞌot contrajiya mach yom mi laꞌ chaꞌlen bʌqꞌuen. Como chʌꞌʌch mi quejel i luꞌ yujtyel iliyi pero max tyo jinic i yujtibal mulawil.

10 Cheꞌ jini ti bej alʌ Jesús: Junmujchꞌ quixtyañu mi quejel i contrajin yambʌ junmujchꞌ quixtyañujob. Yumʌlob yicꞌot añoꞌ bʌ ti i wenta mi quejel i chaꞌlen guerra ti i contra yambʌ yumʌl.

11 Mi quejel ñoj bʌqꞌuentic bʌ yujquel lum tyac. Mi quejel wiꞌñal yicꞌot cꞌamꞌan tyac ti cabʌl pañimil tyac. Mi quejel i yilan bʌqꞌuentic bʌ seña tyac ti chan yicꞌot yan tyac bʌ ñuc bʌ seña tyac.

12 Pero ñaxan tyo cheꞌ max tyo mi luꞌ yujtyel tyac ili mi quejel i chuquetla. Mi quejel i tyʌcꞌlañetla. Mi quejel i pʌyetla ti melojel ti i templo israelob. Mi quejel laꞌ cʌjchel. Mi quejel i pʌyetla majlel baꞌan ñuc bʌ yumʌlob yicꞌot yambʌ ñucoꞌ bʌ i yeꞌtyel chaꞌan tij caj.

13 Mi quejel laꞌ wʌcꞌon ti wen cʌjñel chaꞌan ti ili laꞌ wocol tyac.

14 Wʌ ñaꞌtyanla chaꞌan maꞌix mi quejel laꞌ chajpan bajcheꞌ mi quejel laꞌ jaqꞌueꞌ chaꞌan laꞌ cotyan laꞌ bʌ cheꞌ ti i yorojlel melojel.

15 Como mi quejel cʌqꞌueñetla tꞌan yicꞌot laꞌ ñaꞌtyʌbal bajcheꞌ chꞌujbi laꞌ jaqꞌueꞌ. Mi jinic laꞌ contrajob mach mej i jacꞌob.

16 Pero mi quejel laꞌ wʌjqꞌuel ti i cꞌʌb laꞌ contra. Jinic tyo laꞌ tyat laꞌ ñaꞌ, laꞌ wʌscuñob, laꞌ chichob, laꞌ wijtsꞌiñob, laꞌ piꞌʌlob yicꞌot cʌñʌloꞌ bʌ laꞌ chaꞌan mi yʌqꞌuetla ti i cꞌʌb laꞌ contrajob. An juntiquil chaꞌtiquiletla mi quejel laꞌ tsʌnsʌntyel.

17 Pejtyelel quixtyañu mi quejel i tsꞌaꞌleñetla chaꞌan tij caj.

18 Pero maꞌix mi quejel i sajtyel mi juntꞌumic i tsutsel laꞌ jol.

19 Mi bej xucꞌuletla cheꞌ mi laꞌ ñusan wocol mi quejel laꞌ cotyʌntyel.

20 Cheꞌ mi quejel laꞌ wilan joyol ti soldadojob jini lum Jerusalén bʌ i cꞌabaꞌ, ñaꞌtyanla, cheꞌ jini, maꞌix jal mi quejel i jisʌntyel.

21 Cheꞌ jini, jini añoꞌ bʌ ti pañimil Judea bʌ i cꞌabaꞌ yom putsꞌic majlel ti wits. Jini añoꞌ bʌ ti lum Jerusalén bʌ i cꞌabaꞌ yom loqꞌuicob majlel. Jini machꞌʌ baꞌan añob ti lum mach yom i chaꞌ sujtyel majlel ti lum.

22 Como tyal wen wocol tyac bʌ qꞌuin tyac chaꞌan ti caj i mul quixtyañujob. Mi quejel i tsꞌʌctiyel pejtyelel jini tsꞌijbubil tyac bʌ.

23 Pꞌumpꞌuñob bajcheꞌ mi quejel i ñusan wocol jini xꞌixicob chʌncol tyo bʌ i cʌñʌtyan i yalobil yicꞌot chʌncol tyo bʌ i tsuꞌsañob i yalobil. Como mi quejel wen wocol bʌ wʌꞌ ti mulawil chaꞌan ti michꞌlel Dios mi quejel i yʌqꞌuentyel i xotꞌob i mul.

24 Juntiquil chaꞌtiquil mi quejel i tsʌnsʌntyelob ti guerra, yañoꞌ bʌ mi quejel i pʌyob majlel ti cʌchol ti yambʌ pañimil tyac. Jini ñajt bʌ tyʌlemob mi quejel i chꞌʌmben ti i wenta jini lum Jerusalén bʌ i cꞌabaꞌ cꞌʌlʌ jintyo mi tsꞌʌctiyel i yorojlel i chaꞌleñob jijini. Cheꞌ ti yʌlʌ Jesús.

25 Cheꞌ jini mi quejel i tsictiyel i seña tyac ti qꞌuin, ti uw yicꞌot ti ecꞌ tyac. Wʌꞌ ti mulawil quixtyañujob mi quejel i lolon chaꞌlen cabʌl pensal yicꞌot miꞌ chaꞌlen bʌqꞌuen chaꞌan wen bʌbʌqꞌuen bʌ pujucña bʌ ti colem jaꞌ yicꞌot chaꞌan jini witsꞌlaw bʌ jaꞌ.

26 Jini quixtyañujob mi quejel i sajtyel ti bʌqꞌuen cheꞌ miꞌ pensalin chʌ bʌ mi quejel i yujtyel. Mi jinic tyo chan mi quejel i ñijcʌyel.

27 Cheꞌ jini mi quejel i yilan mic tyʌlel Joñon i Piꞌʌlon Quixtyañujob ti tyocal tic pꞌʌtyʌlel yicꞌot ti ñoj cꞌotyajax bʌ c ñuclel.

28 Cheꞌ mi quejel i yujtyel pejtyel ili, tijicnisan laꞌ bʌ. Ñuc isan laꞌ pusicꞌal como lʌcꞌʌlix i yorojlel laꞌ cotyʌntyel.

29 Cheꞌ jeꞌel tiꞌ subeyob ti lajoñel: Ñaꞌtyanla jini higuera bʌ tyeꞌ o mi baꞌic jach bʌ yambʌ tyeꞌ.

30 Cheꞌ mi laꞌ wilan mi chꞌoc an i yopol tyeꞌ mi laꞌ wʌ ñaꞌtyan lʌcꞌʌlix i yorojlel qꞌuin tyunil.

31 Cheꞌ jeꞌel cheꞌ mi laꞌ wilan chʌncolix i luꞌ ujtyel tyac iliyi ñaꞌtyanla lʌcꞌʌlix i yorojlel i chaꞌ tyʌlel lac Yum i chaꞌlen yumʌl.

32 Melel mic subeñetla mi quejel i yujtyel tyac ti pejtyelel iliyi cheꞌ max tyo ti sajtiyob ili quixtyañujob am bʌ ili ora.

33 Mi quejl i sʌc jilel majlel jini chani yicꞌot mulawil pero c tꞌan bʌ mach saj jil, cheꞌ ti yʌlʌ Jesús.

34 Xucꞌuletla chaꞌan machꞌan mi laꞌ wʌcꞌ ti tsʌtsꞌ an laꞌ pusicꞌal chaꞌan ti caj laꞌ woꞌ yicꞌot chaꞌan ti caj laꞌ qꞌuixñejel yicꞌot cabʌl pensal chaꞌan cabʌl chʌ bʌ tyac an ti mulawil. Ame mi waꞌ cꞌotyel i yorojlel cheꞌ mach an mi laꞌ saj pensalin.

35 Cheꞌ ora jach mi tyʌlel jim bʌ qꞌuin i tyajeꞌ pejtyelel quixtyañu ti petyelel mulawil cheꞌ bajcheꞌ mi waꞌ ñujpꞌel yac cheꞌ machꞌan mi ñaꞌtyʌntyel.

36 Yom chajpʌbiletla. Yom mi laꞌ chʌc chaꞌlen oración ti pejtyelel ora chaꞌan mi mejlel laꞌ putsꞌtyan pejtyelel jini wocol tyac bʌ muꞌ bʌ quejel i yujtyel. Yicꞌot chaꞌan mi laꞌ cꞌotyel tic tyojlel Joñon i Piꞌʌlon Quixtyañujob, cheꞌ ti yʌlʌ Jesús.

37 Ti qꞌuinil tiꞌ chaꞌle cʌntisa Jesús ti templo. Ti acꞌbʌlel ti majli i ñusan acꞌbʌlel yaꞌ ti wits Olivajol bʌ i cꞌabaꞌ.

38 Ti wen sʌcꞌan tyac ti jujumpꞌej qꞌuin ti cꞌoti pejtyelel quixtyañujob ti templo chaꞌan i ñʌchꞌtyʌben i tꞌan Jesús.