2 Pero Jesús ti yʌlʌ: Qꞌuele bajcheꞌ yilal. Pero melel mic subeñetla maꞌix mi quejel i saj cʌytyʌl mi jumpꞌejlic tyun ti pam yambʌ. Mi quejel i luꞌ jisʌntyel. Cheꞌ ti wʌ alʌ Jesús.

3 Ti majliyob ti jumpꞌej wits Olivajol bʌ i cꞌabaꞌ. Cheꞌ ñac yaꞌ buchul Jesús ti cꞌotiyob ajcʌntꞌañob i chaꞌan, chaꞌan i bajñel pejcan. Ti yʌlʌyob: Com a subeñon lojon jalajqui mi quejel i tsꞌʌctiyel pejtyelel jini. ¿Chuqui ti seña mi quejel i pʌstyʌl cheꞌ i yorojlel mi quejel a chaꞌ tyʌlel, cheꞌ i yorojlel mi quejel i jilel mulawil? cheꞌob.

4 Cheꞌ jini, Jesús tiꞌ subeyob: Yom wen xucꞌuletla chaꞌan maꞌ majch chꞌujbi i lotiñetla.

5 Como cabʌlob mi quejel i tyʌlelob muꞌ bʌ i quejel i cꞌʌmbeñon j cꞌabaꞌ. Mi quejel i lolon alob: Joñon Cristojon, yajcʌbilon bʌ i chaꞌan Dios, cheꞌob mi quejel i yʌlob. Cabʌl mi quejel i lotintyelob.

6 Mi quejel laꞌ wubin ti alol an guerra wʌꞌi mi yaꞌi mi baꞌical. Pero mach yom mi laꞌ chaꞌlen bʌqꞌuen. Chʌꞌʌch mi quejel i wersa yujtyel. Pero max tyo jinic i yujtibal mulawil.

7 Junmujchꞌ quixtyañu mi quejel i contrajin yambʌ junmujchꞌ. Yumʌlob yicꞌot añoꞌ bʌ tiꞌ wenta mi quejel i chaꞌlen guerra ti i contra yambʌ yumʌl. Ti cabʌl pañimil tyac mi quejel wiꞌñal yicꞌot cꞌamꞌan tyac yicꞌot yujquel lum tyac.

8 Pejtyelel iliyi i tyejchibal jax tyo wocol muꞌ bʌ quejel i ñusañob quixtyañujob.

9 Cheꞌ jini mi quejel i chuquetla chaꞌan i yʌqꞌuetla ti tyʌcꞌlʌntyel. Mi quejel i tsʌnsañetla. Ti pejtyelelob añoꞌ bʌ ti mulawil mi quejel i tsꞌaꞌqꞌueletla chaꞌan tij caj.

10 Ti jim bʌ ora cabʌl mi quejel i cʌy i chꞌujbiñon. Mi quejel i tsꞌaꞌqꞌuelob yicꞌot mi quejel i yʌcꞌob tiꞌ cꞌʌb i contrajob jini yañoꞌ bʌ machꞌʌ baꞌan tiꞌ cʌyʌ i chꞌujbiñon.

11 Mi quejel i tyʌlel cabʌl xlotyob muꞌ bʌ i lolon yʌlob chaꞌan xiqꞌuilob tyʌlel i chaꞌan Dios. Cabʌlob mi quejel i lolon chꞌujbiñob.

12 Mi quejel i ñoj ocꞌan simaronlel. Chaꞌan ti caj i simaronlel, cabʌl mi quejel i cʌyob i pꞌuntyañob i piꞌʌlob.

13 Pero majchical jach bej xucꞌul miꞌ cucheꞌ i wocol cꞌʌlʌ ti yujtibal wocol tyac mi quejel i cotyʌntyel.

14 Mi quejel i sujbel ti pejtyelel pañimil tyac jini wen bʌ tꞌan chaꞌan i yumintyel Dios chaꞌan mi luꞌ ubiñob ti pejtyelel quixtyañujob. Cheꞌ jini mi quejel i tyʌlel i yorojlel mi jilel mulawil.

15 Mi quejel laꞌ wilan mi yujtyel bajcheꞌ ti wʌ alʌ tsaꞌ bʌ xiqꞌui yʌleꞌ Dios Daniel bʌ i cꞌabaꞌ. Tiꞌ tsꞌijbu chaꞌan mi quejel laꞌ wilan jini ñoj bibajax bʌ muꞌ bʌ i jisan cabʌl chʌ bʌ yes tyac yaꞌix waꞌal yaꞌ baꞌ mach yom ochic ti chꞌujul bʌ ajnibʌl ti colem templo yaꞌ ti Jerusalén. Jini muꞌ bʌ i qꞌueleꞌ ili jun yom i chꞌʌmben isujm cheꞌ mi yilan bajcheꞌ jini, chaꞌan jiñʌch jini tsaꞌ bʌ wʌ ajli.

16 Cheꞌ jini, jini añoꞌ bʌ ti Judea cheꞌ miꞌ qꞌueleꞌ bajcheꞌ mi yujtyel yom putsꞌicob majlel ti wits.

17 Ti jim bʌ ora jini am bʌ tiꞌ pat i yotyot mach yom jalec chaꞌan i yochel i chꞌʌmeꞌ loqꞌuel chʌ bʌ an i chaꞌan ti i yotyot.

18 Jini am bʌ ti cholel mach yom chaꞌ sujtic ti yotyot mi chaꞌanic i locꞌsan i pislel.

19 Ñoj pꞌumpꞌuñob cheꞌ bajcheꞌ mi quejel i ñusañob wocol jini xꞌixicob cʌñʌtyʌbil tyo bʌ i chaꞌan i yalobil yicꞌot jini chʌncol tyo bʌ i tsuꞌsan i yalobil.

20 Cꞌajtibenla Dios ti oración chaꞌan mach ti yorojlel tsʌñal mi laꞌ wersa majlel ti putsꞌel, mi ti i qꞌuiñelel cꞌaj oj, cheꞌen.

21 Ñoj wocol mi quejel i yujtyel ti ili bʌ qꞌuin tyac. Más wocol cheꞌ bajcheꞌ ti pejtyelel wocol tyac cꞌʌlʌ ti tyejchibal mulawil cꞌʌlʌ ti yujtibal mulawil. Machꞌan baꞌ bʌ ora lajal bʌ wocol mi quejel i ñumel.

22 Mi machꞌan miꞌ com isan ili qꞌuin tyac Dios, machꞌan majch i cuchu. Pero mi quejel i com isʌntyel chaꞌan ti caj miꞌ pꞌuntyan Dios jini tsaꞌ bʌ i wʌ yajcʌ chaꞌan i yajñel ti i chaꞌañʌch.

23 Cheꞌ jini mi an majch miꞌ subeñetla: Qꞌuele wʌꞌ an wʌꞌi jini Cristo, yajcʌbil bʌ i chaꞌan Dios, cheꞌen, o yambʌ mi yʌleꞌ: Qꞌuele yaꞌan jini yajcʌbil bʌ i chaꞌan Dios yaꞌi, cheꞌen, mach yom mi laꞌ chꞌujbin.

24 Como mi quejel i tyʌlel cabʌl xlotyob muꞌ bʌ i lolon subob i bʌ ti Cristo, jini yajcʌbil bʌ i chaꞌan Dios. An muꞌ bʌ i lolon yʌlob chaꞌan xiqꞌuilob tyʌlel i chaꞌan Dios. Mi quejel i pʌsob seña tyac yicꞌot ñuc tyac bʌ i pꞌʌtyʌlel chaꞌan yom i lotiñob mi jinic yajcʌbiloꞌ bʌ i chaꞌan Dios mi ti mejliyob.

25 Pero tsaꞌix c wʌ subetla bajcheꞌ mi quejel i yujtyel.

26 Jin chaꞌan mi tiꞌ subeyetla: Qꞌuele yaꞌan Cristo yaꞌ ti tyʌquin bʌ joch lum, cheꞌob, mach yom majliquetla. O mi ti subeyetla: Qꞌuele wʌꞌan Cristo ti mali ili otyot, cheꞌob, mach yom laꞌ chꞌujbin.

27 Como cheꞌ lajal bajcheꞌ mi tsictiyel i cꞌʌcꞌal chajc cꞌʌlʌ yaꞌ baꞌ miꞌ pasel qꞌuin cꞌʌlʌ yaꞌ baꞌ miꞌ pꞌʌjquel qꞌuin chʌꞌʌch jeꞌel mi quejel c tsictiyel tiꞌ wut pejtyelel quixtyañujob cheꞌ mic chaꞌ tyʌlel Joñon i Piꞌʌlon bʌ Quixtyañujob.

28 Baꞌical jach an chʌ bʌ chʌmen yaꞌ mi quejel i muchꞌquiñob i bʌ xtyaꞌjol. Cheꞌ ti yʌlʌ Jesús. Ti lajoñel yom i yʌleꞌ cheꞌ butꞌul mulawil ti i simaronlel quixtyañujob Jesús mi quejel i tyʌlel i melob.

29 Jesús tiꞌ bej chaꞌle cʌntisa. Ti yʌlʌ: Cheꞌ ti jin jach bʌ ora cheꞌ ñumeñix i yorojlel wocol muꞌ bʌ i wersa ñumel, mi quejel i yicꞌan jini qꞌuin. Machꞌan mi quejel i lejmel i cꞌʌcꞌal uw. Mi quejel i yajlel tyac jubel ecꞌ. Jinic tyo chʌ bʌ an ti chan mi quejel i nijcʌyel.

30 Cheꞌ jini yaꞌ ti chan mi quejel i yilañob seña cheꞌ mic tyʌlel Joñon i Piꞌʌlon bʌ Quixtyañujob. Ti pejtyelelob añoꞌ bʌ ti mulawil mi quejel i luꞌ chaꞌleñob uqꞌuel. Mi quejel i yilañoñob Joñon i Piꞌʌlon bʌ Quixtyañujob cheꞌ mi quejel c tyʌlel ti tyocal tic pꞌʌtyʌlel yicꞌot ti ñoj cꞌotyajax bʌ c ñuclel.

31 Ti cꞌam bʌ i tꞌan trompeta muꞌ bʌ i yuctisʌntyel mi quejel c xicꞌ tyʌlel ajtroñelob i chaꞌan bʌ Dios chꞌoyoloꞌ bʌ ti panchan. Mi quejel i muchꞌquiñob jini yajcʌbiloꞌ bʌ i chaꞌan Dios ti chʌnwejlel mulawil cꞌʌlʌ baꞌical jach añob.

32 Cʌñʌla jini lajoñel chaꞌan jini higuera tyeꞌ. Cheꞌ an i buts, cheꞌ chʌncol chꞌoquiñejel i yopol cheꞌ jini mi laꞌ ñaꞌtyan lʌcꞌʌlix i yorojlel qꞌuin tyunil.

33 Cheꞌ jeꞌel cheꞌ mi laꞌ qꞌuel chʌncol i yujtyel tyac iliyi, lʌcꞌʌlix i yorojlel mi quejel c chaꞌ tyʌlel. Mero más lʌcꞌʌlix mach tyalon, yubil.

34 Melel mic subeñetla mi quejel i yujtyel tyac ti pejtyelel iliyi cheꞌ max tyo ti sajtiyob ili quixtyañujob añoꞌ bʌ ti ili ora.

35 Mi quejel i sʌc jilel majlel ti pejtyelel jini chan yicꞌot mulawil, pero c tꞌan mach saj jil.

36 Machꞌan majch yujil baqui bʌ qꞌuin o baqui bʌ ora mi quejel i yujtyel jini, mi ajtroñelobic i chaꞌan Dios chꞌoyoloꞌ bʌ ti panchan. Jini jach c Tyat am bʌ ti panchan yujil isujm. Mi jinic joñon i yalobilon mach cujil isujm.

37 Cheꞌ lajal cheꞌ bajcheꞌ ti ujti cheꞌ ñac wʌꞌ an ti mulawil Noé bʌ i cꞌabaꞌ chʌꞌʌch jeꞌel mi quejel i yujtyel ti yorojlel cheꞌ mic chaꞌ tyʌlel Joñon i Piꞌʌlon bʌ Quixtyañujob.

38 Cheꞌ ñac wʌꞌ an ti mulawil Noé, cheꞌ max tyo ti tyʌli jini butꞌ jaꞌ, quixtyañujob tiꞌ chaꞌleyob uchꞌel, tiꞌ chaꞌleyob ñujpuñel, tiꞌ sijiyob i yalobilob cꞌʌlʌ ti jim bʌ qꞌuin cheꞌ ñac ti ochi Noé ti barco bʌ otyot.

39 Machꞌan tiꞌ ñaꞌtyʌyob mi an chʌ bʌ yes mi quejel i yujtyel jintyo ti tyʌli butꞌ jaꞌ. Ti luꞌ jiliyob. Chʌꞌʌch bajcheꞌ jini mi quejel i yujtyel cheꞌ mic chaꞌ tyʌlel Joñon i Piꞌʌlon bʌ Quixtyañujob.

40 Ti jim bʌ ora añob chaꞌtiquil winic ti jumpejt cholel. Juntiquil mi quejel i pʌjyel majlel. Yambʌ mi quejel i cʌytyʌl.

41 Chaꞌtiquil xꞌixicob chʌncolob ti motin juchꞌbal. Juntiquil mi quejel i pʌjyel majlel. Yambʌ mi quejel i cʌytyʌl.

42 Yom bej chajpʌbiletla como machꞌan mi laꞌ ñaꞌtyan baqui bʌ ora mi quejel i chaꞌ tyʌlel laꞌ Yum.

43 Ñaꞌtyanla jini. Mi tsaꞌic i ñaꞌtyʌ i yum otyot bajcheꞌ ora ti acꞌbʌlel mi quejel i cꞌotyel ajxuchꞌ, pꞌixilʌch cheꞌ jini chaꞌan maꞌan mi yʌcꞌ ochel ti yotyot i chꞌʌmeꞌ chʌ bʌ an i chaꞌan.

44 Jini chaꞌan yom bej chajpʌbiletla. Como cheꞌ maꞌix chʌncol laꞌ saj pensalin chaꞌan mi quej c tyʌlel, Joñon i Piꞌʌlon bʌ Quixtyañujob mi quejel c tyʌlel. Cheꞌ ti yʌlʌ Jesús.

45 Jesús tiꞌ chaꞌle lajoñel bʌ tꞌan. Ti yʌlʌ: Mic subeñetla majchqui jini xucꞌul bʌ ajcʌñʌtya troñel muꞌ bʌ i wen ñaꞌtyan bajcheꞌ miꞌ chaꞌlen i troñel i yum. I yum miꞌ cʌyeꞌ tiꞌ wenta ti pejtyelel am bʌ ti yotyot chaꞌan i luꞌ aqꞌueñob i yuchꞌel ti yorojlel.

46 Cꞌajacña i yoj jini ajcʌñʌtya troñel cheꞌ mi quejel i cꞌotyel i yum i qꞌueleꞌ tsꞌʌcʌl chʌncol i chaꞌlen jini tsaꞌ bʌ subenti i chaꞌlen.

47 Melel mic subeñetla: I yum mi quejel i yotsan tiꞌ wenta jini xucꞌul bʌ ajcʌñʌtya troñel ti pejtyelel chʌ bʌ tyac yes an i chaꞌan.

48 Pero mi simaron jini ajcʌñʌtya troñel, mi ti queji i bajñel pensalin chaꞌan mach waꞌ cꞌot i yum,

49 mi ti queji i jatsꞌob jini yambʌ ajtroñelob i piꞌʌlob ti troñel, mi ti queji ti uchꞌel yicꞌot ti jap lembal yicꞌot xqꞌuixñijelob,

50 cheꞌ jini mi quejel i cꞌotyel i yum ti jumpꞌej qꞌuin cheꞌ maꞌan chʌncol i saj pijtyan i cꞌotyel, cheꞌ ti yorojlel cheꞌ mach yʌxʌl i yoj.

51 Mi quejel i yʌqꞌuen i ñusan jini más wocol bʌ xotꞌmulil. Cheꞌ jini mi quejel i choqueꞌ loqꞌuel chaꞌan yaꞌ mi yajñel yicꞌot jini chaꞌchajpoꞌ bʌ i pensal. Yaꞌi mi quejelob ti uqꞌuel yicꞌot tsʌts mi quejel i cꞌuxob i yej. Cheꞌ ti yʌlʌ Jesús.