2 Cinco maꞌ tiꞌ ñoj wen chajpʌyob i bʌ. Jini yambʌ cinco tiꞌ wen chajpʌyob i bʌ.

3 Jini machꞌʌ baꞌan tiꞌ ñoj wen chajpʌyob i bʌ tiꞌ chꞌʌmʌyob majlel i cas pero maꞌ tiꞌ chꞌʌmʌyob majlel yambʌ i yaꞌlel i cas chaꞌan i chaꞌ butꞌob i pat cas.

4 Pero jini tsaꞌ bʌ wen chajpʌyob i bʌ tiꞌ chꞌʌmʌyob majlel i pat cas yicꞌot yambʌ i yaꞌlel cas.

5 Chaꞌan maꞌ ti seꞌ cꞌoti ajñujpuñel wersa yomob wʌyel jini xcꞌalʌlob. Cheꞌ jini ti luꞌ ochiyob i wʌyel.

6 Cheꞌ jini ti xin acꞌbʌlel ti queji i yubiñob cꞌam bʌ ajtꞌan. Ti yʌlʌ: Tyalix jini ajñujpuñel. Con lac tyajob tyʌlel. Cheꞌ ti yʌlʌ jini ajtꞌan.

7 Cheꞌ jini, jini xcꞌalʌlob ti luꞌ tyejchiyob i tsꞌʌbob i cas.

8 Cheꞌ jini, jini machꞌʌ baꞌan wen chajpʌbilob tiꞌ subeyob jini chajpʌbiloꞌ bʌ: Aqꞌueñon lojon i sajlic i yaꞌlel a cas como chʌncox i yʌjpel lojon j cꞌajc, cheꞌob.

9 Pero jini xcꞌalʌlob wen chajpʌbiloꞌ bʌ tiꞌ jacꞌʌyob: Mach chꞌujbi. Como mach jasʌl lojon c chaꞌan mi ti lojon cʌqꞌuetla. Yom bʌ yi, mi laꞌ majlel laꞌ mʌn laꞌ chaꞌan yaꞌ baꞌ miꞌ chojñel, cheꞌob.

10 Pero cheꞌ ñac bʌ majlemob i mʌn cas, ti cꞌoti ajñujpuñel. Jini wen chajpʌbilob cinco xcꞌalʌlob ti ochiyob ti qꞌuiñejel chaꞌan ñujpuñel. Cheꞌ jini ti ñujpꞌi i tiꞌ otyot.

11 Cheꞌ ti cꞌotiyob jini yambʌ cinco xcꞌalʌlob tsajniyoꞌ bʌ ti mʌn cas ti yʌlʌyob: C yum, jambeñon lojon i tiꞌ otyot, cheꞌob.

12 Pero jini ajñujpuñel tiꞌ jacꞌʌ: Melel, mach j cʌñʌyetla, cheꞌen. Cheꞌ tiꞌ chaꞌle lajoñel Jesús.

13 Cheꞌ jini, ti yʌlʌ Jesús: Jin chaꞌan yom bej chajpʌbiletla como maꞌan mi laꞌ saj ñaꞌtyan baqui bʌ qꞌuin baqui bʌ ora mi quejel c chaꞌ tyʌlel Joñon i Piꞌʌlon bʌ Quixtyañujob, cheꞌen.

14 Jesús ti yʌlʌ ti lajoñel: Chꞌujbi lac lajeꞌ i yumintyel Dios bajcheꞌ juntiquil winic muꞌ bʌ quejel i majlel ti julaꞌ ti ñajt bʌ pañimil. Cheꞌ jini tiꞌ pʌyʌ tyʌlel i yajtroñelob chaꞌan mi yʌqꞌuen tiꞌ wenta i tyaqꞌuin.

15 Ti jujuntiquil ti aqꞌuentiyob cheꞌ bajcheꞌ añob i cꞌʌjnibal. An juntiquil tsaꞌ bʌ yʌqꞌue cheꞌ bajcheꞌ jopꞌej mil pesos. Yambʌ ti yʌqꞌue cheꞌ bajcheꞌ chaꞌpꞌej mil, yambʌ ti yʌqꞌue jumpꞌej mil. Cheꞌ jini ti majli ti xʌmbal ti ñajt jini i yum.

16 Jini juntiquil yajtoñel tsaꞌ bʌ yʌqꞌue joꞌpꞌej mil pesos tiꞌ cꞌʌñʌ ti toñel jini tyaqꞌuin. Tiꞌ ganari yambʌ jopꞌej mil pesos.

17 Junlajal tiꞌ chaꞌle jini tsaꞌ bʌ yʌqꞌue chaꞌpꞌej mil. Tiꞌ cꞌʌñʌ ti toñel jini tyaqꞌuin. Tiꞌ ganari yambʌ chaꞌpꞌej mil pesos.

18 Pero jini yambʌ tsaꞌ bʌ aqꞌuenti jumpꞌej mil tsaꞌ jach i mucu jini tyaqꞌuin ti mal lum.

19 On qꞌuin ti majli. Ti chaꞌ cꞌoti jini i yum. Tiꞌ pʌyʌ tyʌlel i yajtoñelob i subob i bʌ bajcheꞌ tiꞌ chaꞌleyob.

20 Ñaxan ti cꞌoti jini tsaꞌ bʌ aqꞌuenti joꞌpꞌej mil pesos. Ti yʌqꞌue i yum yambʌ joꞌpꞌej mil pesos. Ti yʌlʌ: Ti a wʌcꞌon joꞌpꞌej mil. Umbaꞌan yambʌ joꞌpꞌej mil pesos tsaꞌ bʌ c ganari, cheꞌen.

21 Jini i yum tiꞌ sube: Weñʌch bajcheꞌ ti a chaꞌle. Wen xucꞌulet bʌ ajtoñel c chaꞌan. Chaꞌan xucꞌulet ti a chaꞌle toñel yicꞌot tsꞌityaꞌ tyaqꞌuin, más i yonlel mi quej cʌqꞌueñet ti a wenta. Ochen. Tijicnisan a bʌ a wicꞌotyon. Cheꞌ ti yʌlʌ i yum.

22 Cheꞌ jini ti cꞌoti yambʌ yajtoñel tsaꞌ bʌ aqꞌuenti chaꞌpꞌej mil pesos. Tiꞌ sube i yum: C yum, ti a wʌcꞌon chaꞌpꞌej mil. Umbaꞌan yambʌ chaꞌpꞌej mil tsaꞌ bʌ c ganari, cheꞌen.

23 Jini i yum tiꞌ sube: Weñʌch bajcheꞌ ti a chaꞌle. Wen xucꞌulet bʌ ajtoñel c chaꞌan. Chaꞌan xucꞌulet ti a chaꞌle toñel yicꞌot tsꞌityaꞌ tyaqꞌuin, más i yonlel mi quej cʌqꞌueñet ti a wenta. Ochen. Tijicnisan a bʌ a wicꞌotyon. Cheꞌ ti yʌlʌ jini i yum.

24 Cheꞌ ñac ti cꞌoti i sub i bʌ baꞌan i yum jini yajtoñel tsaꞌ bʌ aqꞌuenti jumpꞌej mil pesos ti yʌlʌ: Tsaꞌix c wʌ ñaꞌtyʌ tsʌts a pusicꞌal bʌ winic muꞌ bʌ a mulan a beleꞌ chꞌʌmeꞌ machꞌʌ yoque a chaꞌan. Maꞌ chꞌʌm machꞌʌ baꞌan ti a ganari. Cheꞌ ti yʌlʌ.

25 Jin chaꞌan tic bʌcꞌñʌ cꞌʌñeꞌ jini a tyaqꞌuin tsaꞌ bʌ a wʌcꞌon. Tsaꞌ jach c mucu ti mal lum. Pero umbaꞌan a chaꞌan bʌ, cheꞌen.

26 Pero jini i yum tiꞌ jacꞌʌ: Mach weñet bʌ ajtoñel. Tiꞌ a lolon ñaꞌtyʌ chaꞌan mic chꞌʌm machꞌʌ baꞌan tic ganari.

27 Jin chaꞌan tsaꞌic a wotsʌ ti banco c tyaqꞌuin chaꞌan mic chꞌʌmben i jol chaꞌan i yoqꞌuijib chaꞌan mic más ganarin, cheꞌen.

28 Cheꞌ jini tiꞌ subeyob jini yaꞌ bʌ añob: Chilbenixla jini jumpꞌej mil peso. Aqꞌuenla jini tsaꞌ bʌ aqꞌuenti diez mil pesos, cheꞌen.

29 Como jini am bʌ i chaꞌan mi quejel i más aqꞌuentyel. Mi quejel i colojbʌyel. Pero jini machꞌʌ baꞌan i chaꞌan mi quejel i chilbentyel jinic tyo tsꞌityaꞌ jach bʌ an i chaꞌan.

30 Iliyi machꞌʌ baꞌan i cꞌʌjnibal bʌ quixtyañu, chucula. Chocola majlel baꞌ icꞌjowan baꞌ mi quejel i chaꞌlen cꞌam bʌ uqꞌuel, baꞌ mi quejel i cꞌuxeꞌ i yej, cheꞌen. Cheꞌ tiꞌ chaꞌle lajoñel Jesús.

31 Jesús tiꞌ bej chaꞌle tꞌan. Ti yʌlʌ: Cheꞌ mic tyʌlel chaꞌan mic chaꞌlen yumʌl Joñon i Piꞌʌlon bʌ Quixtyañujob, tic joytyʌlel mi quejel i tyʌlel quicꞌot ti pejtyelel ajtoñelob c chaꞌan chꞌoyoloꞌ bʌ ti panchan. Yaꞌ mi quejel c tyʌlel ti buchtyʌl ti cꞌotyajax bʌ c buchlib.

32 Yaꞌ tic tyojlel mi quejel i muchꞌquiñob i bʌ ti pejtyelel quixtyañujob tyʌlemoꞌ bʌ ti pejtyelel mulawil. Mi quejel c tꞌox acꞌ ti chaꞌmujchꞌ cheꞌ bajcheꞌ juntiquil ajcʌñʌtya tiñʌmeꞌ mi tꞌox acꞌ tiñʌmeꞌ ti junwejl yicꞌot chibu yaꞌ ti yambʌ junwejl. [Tiñʌmeꞌ yom i yʌleꞌ oveja.]

33 Yaꞌ mi quejel cʌcꞌ jini tiñʌmeꞌ yubi tic ñoj yicꞌot jini chibu bʌ yubi tic tsꞌej.

34 Cheꞌ jini joñon ñuc bʌ yumʌlon mi quejel c suben quixtyañujob añoꞌ bʌ tic ñoj: Laꞌixla jatyetla tsaꞌix bʌ aqꞌuentiyetla i yutslel i tꞌan c Tyat. Ochenla baꞌ mi quejel c chaꞌlen yumʌl. Tsaꞌix chajpʌbentiyetla chaꞌan laꞌ wajñel yaꞌi cꞌʌlʌ ñoj oniyix cheꞌ ñac tiꞌ mele Dios ili mulawil.

35 Como cheꞌ ñac ti cubi wiꞌñal ti laꞌ wʌcꞌon cuchꞌel. Cheꞌ ñac tyʌquin c tiꞌ ti laꞌ wʌcꞌon chʌ bʌ ti capʌ. Cheꞌ ñac yaꞌ añon baꞌ maꞌ majch tiꞌ cʌñʌyon ti laꞌ pʌyʌyon ochel ti laꞌ wotyot.

36 Cheꞌ ñac maꞌix c pislel ti laꞌ wʌcꞌon. Cheꞌ ñac cꞌamꞌon ti laꞌ julaꞌayon. Cheꞌ ñac añon ti cʌchol ti tyʌli laꞌ qꞌuelon laꞌ cotyañon, cheꞌen.

37 Cheꞌ jini, jini tyoj bʌ i pusicꞌal bʌ quixtyañujob mi quejel i yʌlob: C Yum, ¿baqui ora ti lojon quilʌyet cheꞌ wiꞌñayet cheꞌ ti lojon cʌqꞌueyet a wuchꞌel? ¿Baqui ora ti lojon quilʌyet cheꞌ an a tyʌquin tiꞌ cheꞌ ti lojon cʌqꞌueyet chʌ bʌ ti a japʌ?

38 ¿Baqui ora ti lojon quilʌyet cheꞌ maꞌan majch ti cʌñʌyet cheꞌ ti lojon cʌqꞌueyet ochel ti lojon cotyot o cheꞌ machꞌan a pislel ti lojon cʌqꞌueyet?

39 ¿Baqui bʌ ora ti lojon quilʌyet cheꞌ cꞌamet o cheꞌ añet ti cʌchol cheꞌ tsajniyon lojon j qꞌuelet chaꞌan lojon j cotyañet? cheꞌob.

40 Cheꞌ jini, joñon ñuc bʌ yumʌlon mi quejel c subeñob: Melel mic subeñetla, cheꞌ chʌ bʌ jach yes ti laꞌ chaꞌle chaꞌan laꞌ cotyan juntiquil tsaꞌ bʌ i chꞌujbiyon aunque maꞌ ti qꞌuejli ti ñuc, ti laꞌ cotyʌyon yubil cheꞌ ti laꞌ cotyʌ jini quixtyañu.

41 Cheꞌ jini, joñon ñuc bʌ yumʌlon mi quejel c subeñob jini añoꞌ bʌ tic tsꞌej: Loqꞌuenla wʌꞌ baꞌañon, jatyetla chojquemetla loqꞌuel ti Dios. Cucuxla yaꞌ ti cꞌajc machꞌʌ baꞌan mi yajpel chajpʌbil chaꞌan xiba yicꞌot yajtroñelob.

42 Cheꞌ ñac ti cubi wiꞌñal, machꞌan ti laꞌ wʌcꞌon cuchꞌel. Cheꞌ ñac ti cubi tyʌquin tiꞌ machꞌan ti laꞌ wʌcꞌon chʌ bʌ mi cap.

43 Cheꞌ ñac yaꞌ añon baꞌ maꞌan majch i cʌñʌyon, machꞌan ti laꞌ pʌyʌyon ochel ti laꞌ wotyot. Cheꞌ ñac machꞌan c pislel, maꞌan chʌ bʌ ti laꞌ wʌcꞌon. Cheꞌ ñac cꞌamꞌon, cheꞌ ñac añon ti cʌchol machꞌan tsajniyetla laꞌ julaꞌañon, cheꞌen.

44 Cheꞌ jini, mi quejel i yʌlob: ¿Baqui ora ti lojon quilʌyet cheꞌ wiꞌñayet yicꞌot cheꞌ tyʌquin a tiꞌ, mi cheꞌ yaꞌ añet baꞌ maꞌan majch tiꞌ cʌñʌyet, mi cheꞌ maꞌix a pislel, mi cheꞌ cꞌamet, mi cheꞌ añet ti cʌchol cheꞌ machꞌan ti lojon j cotyʌyet? cheꞌob.

45 Cheꞌ jini, joñon ñuc bʌ yumʌlon, mi quejel c subeñob: Melel mic subeñetla, cheꞌ machꞌan ti laꞌ cotyʌ juntiquil jini wʌꞌ bʌ an machꞌʌ baꞌan mi qꞌuejlel ti ñuc, machꞌan ti laꞌ cotyʌyon yubil, cheꞌen.

46 Cheꞌ jini, jini machꞌʌ baꞌan tiꞌ cotyʌyob i piꞌʌlob mi quejel i majlelob ti xotꞌmulil machꞌʌ baꞌan mi saj jilel. Jini tyoj bʌ i pusicꞌal bʌ quixtyañujob mi quejel i majlelob baꞌ mi yʌqꞌuentyelob i cuxtyʌlel machꞌʌ yujil jilel. Cheꞌ ti yʌlʌ Jesús.