2 Jini ajcʌntisajob chaꞌan i mandar israelob yicꞌot jini fariseojob wen yujilob pejtyelel i sujmlel tsꞌijbubil ti i mandar Moisés.

3 Yom mi laꞌ jacꞌben i tꞌan. Yom mi laꞌ chaꞌlen bajcheꞌ miꞌ subeñetla chaꞌan jini mandar tyac. Pero mach yom laꞌ lolon chaꞌlen bajcheꞌ mi laꞌ wilan miꞌ chaꞌleñob. Como miꞌ bajñel ñusan i chaꞌlen bajcheꞌ miꞌ cʌntisañetla laꞌ chaꞌlen.

4 Maꞌan majch chꞌujbi i luꞌ tsꞌʌctisan ti pejtyelel bajcheꞌ miꞌ cʌntisañob quixtyañujob i yajñelob. Como tiꞌ lolon ocꞌ isʌ jini mandar tsaꞌ bʌ yʌqꞌue Moisés. Cheꞌ bajcheꞌ chʌncol i yʌqꞌuen i cucheꞌ ñoj al bʌ i cuch quixtyañujob yubil. Pero i bajñelob machꞌan miꞌ saj cotyañob i cucheꞌ tsaꞌ bʌ i bajñel ocꞌʌsʌyob mi yicꞌot juntsꞌijtic i yal cꞌʌb miꞌ cotyañob, yubil.

5 Ti pejtyelel chʌ bʌ jach miꞌ chaꞌleñob cheꞌ jach miꞌ chaꞌlen chaꞌan miꞌ qꞌuejlel ti wen ti quixtyañujob. Jini fariseojob yicꞌot ajcʌntisajob miꞌ cʌchob tiꞌ pam yicꞌot ti cꞌʌb tsꞌityaꞌ colem bʌ jun baꞌ tsꞌijbubil i tꞌan Dios. Más on i chꞌʌjlil i yoc i bujc cheꞌ bajcheꞌ i tyʌlel miꞌ xojob yambʌ quixtyañujob.

6 Miꞌ mulañob jini más wen tyac bʌ buchlibʌl yaꞌ ti qꞌuiñejel tyac. Yicꞌot ti i templo israelob yom i buchtyʌl yaꞌ baꞌ mi buchtyʌl jini quixtyañujob muꞌ bʌ i qꞌuejlel ti ñuc.

7 Yomob chaꞌan quixtyañujob miꞌ saludaliñob ti calle tyac cheꞌ bajcheꞌ mi an i ñuclel. Cheꞌ tiꞌ tyaja ti tꞌan fariseojob yicꞌot ajcʌntisajob chaꞌan mandar i chaꞌan israelob Jesús.

8 Pero jatyetla, mach yom mi laꞌ chan isan laꞌ bʌ chaꞌan mi laꞌ wʌqꞌuen quixtyañujob i pejcañetla ti maestro. Como ti laꞌ pejtyel laꞌ wermañujob laꞌ bʌ. An juntiquil jach laꞌ maestrojon.

9 Mach laꞌ pejcan ti laꞌ tyat yambʌ winicob wʌꞌ ti mulawil. Como an juntiquil jach bʌ laꞌ tyat, jiñʌch jini am bʌ ti panchan.

10 Yicꞌot mach laꞌ wʌqꞌuen quixtyañujob i pejcañetla ti i yum, como an juntiquil jach laꞌ yumon, Cristojon yajcʌbil bʌ i chaꞌan Dios.

11 Jini muꞌ bʌ i qꞌuejlel ti más ñuc yaꞌ tiꞌ tyojlel Dios, jiñʌch jini muꞌ bʌ i chaꞌlen cotyaj ti tyojlel i piꞌʌlob.

12 Como majchical jach miꞌ lolon pʌt i bʌ ti ñuc mi quejel i juꞌsʌntyel. Pero jini pecꞌoꞌ bʌ i pusicꞌal mi quejel i qꞌuejlel ti ñuc.

13 Pꞌumpꞌuñetla cheꞌ bajcheꞌ mi quejel laꞌ ñusan wocol jatyetla fariseojet bʌ la yicꞌot ajcʌntisajet bʌ la chaꞌan mandar. Chaꞌchajp laꞌ pensal. Como cheꞌ bajcheꞌ mi laꞌ cʌntisan quixtyañujob chʌncol laꞌ mʌctyʌbeñob i yumiñob Dios. Jatyetla jeꞌel maꞌix mi laꞌ yumin Dios yicꞌot maꞌix mi laꞌ wʌcꞌob i yumiñob Dios jini yomoꞌ bʌ.

14 Pꞌumpꞌuñetla cheꞌ bajcheꞌ mi quejel laꞌ ñusan wocol jatyetla fariseojet bʌ la yicꞌot ajcʌntisajet bʌ la chaꞌan mandar. Chaꞌchajp laꞌ pensal. Como mi laꞌ lolon chilbeñob i yotyot tyac xmebaꞌ ixicob chaꞌan bajcheꞌ mi laꞌ lotiñob. Mi laꞌ lolon meleꞌ tyam bʌ oración chaꞌan mi laꞌ mʌctyʌbeñob quixtyañujob i ñaꞌtyan bajcheꞌ mi laꞌ chaꞌlen. Chaꞌan chʌꞌʌch mi laꞌ chaꞌlen más tyo wocol mi quejel laꞌ wʌqꞌuentyel laꞌ xotꞌe laꞌ mul.

15 Pꞌumpꞌuñetla cheꞌ bajcheꞌ mi quejel laꞌ ñusan wocol jatyetla fariseojet bʌ la yicꞌot ajcʌntisajet bʌ la chaꞌan mandar. Chaꞌchajp laꞌ pensal. Mi laꞌ majlel ti ñajt tyac bʌ pañimil. Mi laꞌ cꞌaxel ti junxejlel colem jaꞌ chaꞌan laꞌ sajcan juntiquil muꞌ bʌ laꞌ wʌqꞌuen i qꞌuextyan i pusicꞌal chaꞌan bajcheꞌ miꞌ chꞌujbin Dios chaꞌan miꞌ chꞌujbin bajcheꞌ mi laꞌ lolon cʌntisañob. Pero cheꞌ tsaꞌix i sutqui i bʌ quixtyañu chaꞌan ti laꞌ caj, más leco bajcheꞌetla mi quejel i yajñelob. Ti pejtyeleletla mi quejel laꞌ ñusan wocol ti xotꞌmulil ti cꞌajc.

16 Pꞌumpꞌuñetla cheꞌ bajcheꞌ mi quejel laꞌ ñusan wocol jatyetla ajcʌntisajetla, como cheꞌ bajcheꞌ mutsꞌul laꞌ wut bʌ ajpʌs bijetla yubil. Mi laꞌ lolon aleꞌ mi an majch miꞌ tyajeꞌ ti tꞌan templo chaꞌan miꞌ waꞌchocon i tꞌan, mach wersa miꞌ chaꞌlen jini tsaꞌ bʌ yʌlʌ. Pero mi tiꞌ tyaja ti tꞌan jini oro am bʌ ti templo wersa miꞌ chaꞌlen chʌ bʌ yes ti yʌlʌ, lolon cheꞌetla.

17 Machꞌan mi laꞌ ñaꞌtyan. Mutsꞌul laꞌ wut. ¿Baqui bʌ más ñuc mi laꞌ wʌl? ¿Jim ba jini oro? ¿Machꞌa ba jini templo baꞌ miꞌ tyaj i cꞌʌjnibal oro chaꞌan Dios?

18 Yicꞌot jeꞌel mi laꞌ wʌleꞌ: Mi an majch miꞌ tyajeꞌ ti tꞌan i yajñib i majtyan Dios chaꞌan miꞌ waꞌchocon i tꞌan, mach wersa miꞌ chaꞌlen jini tsaꞌ bʌ yʌlʌ. Pero mi tiꞌ tyaja ti tꞌan i majtyan Dios am bʌ ti yajnib i majtyan Dios, mi laꞌ wʌleꞌ chaꞌan wersa miꞌ chaꞌlen jini tsaꞌ bʌ yʌlʌ, lolon cheꞌetla.

19 Machꞌan mi laꞌ ñaꞌtyan. Mutsꞌul laꞌ wut. ¿Baqui bʌ más ñuc? ¿Jim ba i majtyan Dios o machꞌa ba i yajnib i majtyan Dios baꞌ miꞌ tyaj i cꞌʌjnibal i majtyan Dios?

20 Como jini muꞌ bʌ i tyajeꞌ ti tꞌan i yajnib i majtyan Dios chaꞌan miꞌ waꞌchocon i tꞌan, mach jinic jach jini i yajnib i majtyan Dios miꞌ tyajeꞌ ti tꞌan pero miꞌ tyaj ti tꞌan jeꞌel ti pejtyelel chʌ bʌ tyac an ti pam i yajnib.

21 Jini muꞌ bʌ i tyaj ti tꞌan templo chaꞌan i waꞌchocon i tꞌan mach jinic jach jini templo miꞌ tyajeꞌ ti tꞌan pero miꞌ tyaj ti tꞌan Dios jeꞌel muꞌ bʌ i yajñel yaꞌ ti templo.

22 Yicꞌot jeꞌel muꞌ bʌ i tyajeꞌ ti tꞌan jini panchan chaꞌan miꞌ waꞌchocon i tꞌan mach jinic jach panchan miꞌ tyaj ti tꞌan pero miꞌ tyajeꞌ ti tꞌan jeꞌel jini ñuc bʌ i buchlib Dios yicꞌot jini am bʌ tiꞌ buchlib.

23 Pꞌumpꞌuñetla cheꞌ bajcheꞌ mi quejel laꞌ ñusan wocol jatyetla fariseojet bʌ la yicꞌot ajcʌntisajet bʌ la chaꞌan mandar. Chaꞌchajp laꞌ pensal. Mi laꞌ wʌqꞌuen Dios junchajp loqꞌuem bʌ ti diez tyac jini pimel tyac menta bʌ i cꞌabaꞌ yicꞌot anís yicꞌot comino. Pero machꞌan mi laꞌ jacꞌ laꞌ chaꞌlen jini más ñuc bʌ cʌntisa tsꞌijbubil bʌ ti mandar tyac. Jini más ñuc bʌ jiñʌch jini tyoj bʌ melojel, yicꞌot pꞌuntyaya chaꞌan laꞌ wom laꞌ cotyan laꞌ piꞌʌlob yicꞌot i xucꞌtyʌlel laꞌ pusicꞌal tiꞌ tyojlel Dios. Yom mi laꞌ wʌqꞌuen jujunchajp loqꞌuem ti diez tyac ofrenda pero yom mi laꞌ chaꞌlen jini yambʌ wen tyac bʌ jeꞌel.

24 Mutsꞌul laꞌ wut bʌ ajpʌs bij yubil. Chaꞌan machꞌan mi laꞌ ñaꞌtyan i sujmlel jini chʌncol bʌ laꞌ cʌntisan mi laꞌ pʌseꞌ cheꞌ bajcheꞌ ñoj ñuc jini machꞌʌ baꞌan ñoj ñuc i sujmlel tyac. Pero mi laꞌ lolon ñusan laꞌ cʌntisan jini ñoj ñuc bʌ i sujmlel tyac. Cheꞌ bajcheꞌ muqꞌuic laꞌ chic loqꞌuel jini us yubil ti jini muꞌ bʌ laꞌ japeꞌ, pero mi laꞌ buqꞌue más colem bʌ animal camello bʌ i cꞌabaꞌ yubil.

25 Pꞌumpꞌuñetla chaꞌan bajcheꞌ mi quejel laꞌ ñusan wocol jatyetla fariseojet bʌ la yicꞌot ajcʌntisajet bʌ la chaꞌan mandar. Chaꞌchajp laꞌ pensal. Ti qꞌuelol cheꞌ bajcheꞌ wen bʌ quixtyañujet bʌ la, pero ti laꞌ pusicꞌal beleꞌ laꞌ wom xujchꞌ yicꞌot mi laꞌ niqꞌui mulan chʌ bʌ an i chaꞌan laꞌ piꞌʌlob. Cheꞌʌch bajcheꞌ mi laꞌ wen poqueꞌ i pat vaso yicꞌot chꞌejew pero yaꞌ ti mal butꞌul ti xujchꞌ yicꞌot yambʌ machꞌʌ wen bʌ.

26 Mutsꞌul laꞌ wut bʌ fariseojet bʌ la yubil. Jini yom bʌ jiñʌch chaꞌan mi laꞌ ñaxan sʌc isan laꞌ pusicꞌal. Cheꞌ jini sʌquetixla ti mal yicꞌot ti qꞌuelol. Cheꞌ bajcheꞌ mi laꞌ ñaxan poc i mal vaso yicꞌot chꞌejew yubil. Cheꞌ jini sʌquix ti mal yicꞌot ti pat.

27 Pꞌumpꞌuñetla cheꞌ bajcheꞌ mi quejel laꞌ ñusan wocol jatyetla fariseojet bʌ la yicꞌot ajcʌntisajet bʌ la chaꞌan mandar. Chaꞌchajp laꞌ pensal. Como lajaletla cheꞌ bajcheꞌ tyun bʌ i yotyotlel tyac chꞌujlelʌl. Cꞌotyajax sʌsʌc chaꞌan boñolix ti tyan, pero yaꞌ ti mal bibajax chaꞌan butꞌul ti bʌquel tyac yicꞌot chʌ bʌ jach pʌcꞌbenix.

28 Chʌꞌʌch añetla yubil. Tyoj mi laꞌ pʌs laꞌ bʌ tiꞌ wut quixtyañujob. Pero butꞌul laꞌ pusicꞌal ti lot yicꞌot simaronlel.

29 Pꞌumpꞌuñet bʌ la chaꞌan bajcheꞌ mi quejel laꞌ ñusan wocol jatyetla fariseojet bʌ la yicꞌot ajcʌntisajet bʌ la chaꞌan mandar. Chaꞌchajp laꞌ pensal. Mi laꞌ meleꞌ tyun bʌ i yotyotlel ti pam baꞌ ti mujqui chꞌujlelʌl chaꞌan laꞌ cꞌajtisan jini tsaꞌ bʌ i xiqꞌue yʌleꞌ Dios ti ñoj oniyix. Mi laꞌ chꞌʌleꞌ i crusil i wentyʌlel yaꞌ baꞌ ti chꞌujñʌntiyob jini quixtyañujob tsaꞌ bʌ ajniyob ti tyoj ti ñoj oniyix.

30 Mi laꞌ wʌleꞌ: Mi wʌꞌic añon lojon wʌꞌ ti mulawil cheꞌ wʌꞌ ti ajniyob jini lac yumob ti ñoj oniyix maꞌan ti lojon cotyʌyob i tsʌnsan jini tsaꞌ bʌ i xiqꞌui yʌleꞌ Dios ti ñoj oniyix, lolon cheꞌetla.

31 Pero chaꞌan chʌꞌʌch mi laꞌ wʌleꞌ chʌncox laꞌ wʌcꞌ ti tsictiyel chaꞌan i jiñʌjleletla jini tsaꞌ bʌ i tsʌnsʌyob jini tsaꞌ bʌ i xiqꞌui yʌleꞌ Dios ti ñoj oniyix.

32 Tsꞌʌctisan, cheꞌ jini, jini tsaꞌ bʌ tyejchi i chaꞌlen jini laꞌ yumob ti ñoj oniyix. Chʌꞌʌch ti subeyob chaꞌan Jesús tiꞌ wʌ ñaꞌtyʌ chaꞌan mi quejel i tsʌnsʌntyel.

33 Jesús ti yʌlʌ jeꞌel: Jatyetla lajaletla bajcheꞌ lucum tyac. ¿Bajcheꞌ mi quejel laꞌ putsꞌtyan xotꞌmulil ti cꞌajc mi laꞌ wʌl? Mach saj chꞌujbi.

34 Mi quej c xiqꞌueꞌ tyʌlel wʌꞌ baꞌ añetla jini muꞌ bʌ i xiqꞌueꞌ yʌleꞌ Dios, yicꞌot winicob am bʌ cabʌl i ñaꞌtyʌbal yicꞌot ajcʌntisajob. Pero an muꞌ bʌ quejel laꞌ tsʌnsañob. An muꞌ bʌ quejel laꞌ jocꞌtyʌl ti cruz chaꞌan laꞌ tsʌnsañob. An mu bʌ quejel laꞌ jatsꞌ ti pʌchi yaꞌ ti templo tyac. An muꞌ bʌ quejel laꞌ wen tyʌcꞌlan. Cheꞌ mi majlelob ti yambʌ lum yaꞌ mi quejel laꞌ majlel laꞌ tsʌclañob majlel chaꞌan laꞌ bej tyʌcꞌlañob.

35 Jin chaꞌan Dios mi quejel i yotsan ti laꞌ wenta cheꞌ bajcheꞌ mi ti laꞌ tsʌnsʌyob yubil ti pejtyelelob jini tyoj bʌ quixtyañujob tsaꞌ bʌ tsʌnsʌntiyob cꞌʌlʌ ti tsʌnsʌnti jini tyoj bʌ Abel ti ñoj oniyix, cꞌʌlʌ ti tsʌnsʌnti Zacarías i yalobil bʌ Berequías tsaꞌ bʌ tsʌnsʌyob yaꞌ ti jajp templo yaꞌ ti tꞌejl baꞌ ti puluyob i majtyan Dios ti ñoj oniyix.

36 Melelʌch mic subeñetla chaꞌan ti caj pejtyelel jini tsaꞌ bʌ ujti cꞌʌlʌ ti ñoj oniyix mi quejel i yʌqꞌuentyel i xotꞌeꞌ cheꞌ bajcheꞌ mi i mulobʌch ili quixtyañujob añoꞌ bʌ ti mulawil wale iliyi. Cheꞌ tiꞌ yʌlʌ Jesús como mi quejel i tsʌnsañob.

37 Jatyetla añet bʌ la ti Jerusalén muꞌ bʌ laꞌ tsʌnsan jini tsaꞌ bʌ i xiqꞌui yʌleꞌ Dios, muꞌ bʌ laꞌ juleꞌ ti tyun jintyo ti tsʌnsʌnti jini ajsubtꞌañob tsaꞌ bʌ i choco tyʌlel Dios. Jayyajlel com c muchꞌquiñetla yubil cheꞌ bajcheꞌ ñaꞌ mut mi luts i yal. Pero mach laꞌ wom.

38 Qꞌuele a wilan laꞌ colem templo mi quejel i joch cʌytyʌl.

39 Maꞌix mi quejel laꞌ chaꞌ ilañon jintyo ti yorojlel mi quejel laꞌ wʌl: Laꞌ sujbic a ñuclel jatyet muꞌ bʌ a tyʌlel chaꞌan cheꞌ yom Dios. Chʌꞌʌch mi quejel laꞌ wʌleꞌ. Cheꞌ ti yʌlʌ Jesús.