Lajoñel chaꞌan i qꞌuiñejel ñujpuñel
22
Jesús ti queji i suben quixtyañujob yambʌ lajoñel. Ti yʌlʌ:2 Chꞌujbi lac lajeꞌ i yumintyel Dios yicꞌot juntiquil ñuc bʌ yumʌl tsaꞌ bʌ i mele i qꞌuiñejel ñujpuñel chaꞌan aloꞌ bʌ i yalobil.
3 Tiꞌ xiqꞌui majlel ajtroñelob i chaꞌan chaꞌan mi majlel i pʌyob tyʌlel pejtyelel tsaꞌ bʌ wʌ subeyob tyʌlel. Pero mach yomobix tyʌlel.
4 Cheꞌ jini tiꞌ xiqꞌui majlel yambʌ ajtroñelob. Ti yʌlʌ: Subeñob jini tsaꞌ bʌ wʌ subentiyob tyʌlel chaꞌan tsaꞌix c chajpʌ uchꞌel. Tsaꞌix c xiqꞌui ti tsʌnsʌntyel tyat wacax yicꞌot jujpꞌem bʌ alʌqꞌuil. Luꞌ chajpʌbilix. Yom tyʌlicob chaꞌan mi lac meleꞌ i qꞌuiñejel ñujpuñel, cheꞌetla maꞌ subeñob, cheꞌen jini ñuc bʌ yumʌl.
5 Pero machꞌan tiꞌ jacꞌʌyob jini tsaꞌ bʌ wʌ subentiyob. Juntiquil ti majli yaꞌ tiꞌ chol, yambʌ ti majli ti choñoñel.
6 Yañoꞌ bʌ tiꞌ chucuyob jini ajtroñelob tsaꞌ bʌ xiqꞌui majlel jini ñuc bʌ yumʌl. Tiꞌ wen tyʌcꞌlʌyob jinic tyo tiꞌ tsʌnsʌyob.
7 Cheꞌ jini, ti wen michꞌʌ jini ñuc bʌ yumʌl. Tiꞌ xiqꞌui majlel soldadojob chaꞌan i tsʌnsañob jini ajtsʌnsajob yicꞌot chaꞌan i pulbeñob i lum.
8 Cheꞌ jini, jini ñuc bʌ yumʌl tiꞌ sube jini ajtroñelob: Luꞌ chajpʌbil i qꞌuiñejel ñujpuñel pero mach saj weñob chaꞌan mi tyʌlelob jini wʌ subebilobix bʌ.
9 Cucu yaꞌ ti colem bij tyac. Subenla tyʌlel majchical jach mi laꞌ tyaj yaꞌ ti bij, cheꞌen.
10 Jini ajtroñelob ti majliyob yaꞌ ti colem bij tyac. Tiꞌ pʌyʌyob majlel tiꞌ qꞌuiñejel ñujpuñel ti pejtyelelob tsaꞌ bʌ i tyajayob, mi simaroñoꞌ bʌ mi utsoꞌ bʌ. Chʌꞌʌch ti luꞌ bujtꞌi i yotyot jini ñuc bʌ yumʌl chʌncol bʌ i meleꞌ qꞌuiñejel.
11 Cheꞌ jini ti ochi ñuc bʌ yumʌl i qꞌuel jini pʌyʌlob bʌ ti qꞌuin. Tiꞌ qꞌuele yaꞌ an juntiquil winic machꞌʌ baꞌan xojol bʌ i bujc cheꞌ bajcheꞌ i tyʌlel tiꞌ xojoyob cheꞌ yorojlel qꞌuiñejel.
12 Tiꞌ sube: Piꞌʌl, ¿bajcheꞌqui isujm ti ochiyet wʌꞌi cheꞌ machꞌan xojol a chaꞌan a bujc cheꞌ bajcheꞌ i tyʌlel miꞌ xojob cheꞌ chʌncol qꞌuiñejel? cheꞌen. Pero machꞌan tiꞌ jacꞌʌ jini winic.
13 Cheꞌ jini, jini ñuc bʌ yumʌl tiꞌ sube yajtroñelob chʌncol bʌ i ñusan waj yaꞌ ti mesa tyac: Cʌchʌla ti yoc tiꞌ cꞌʌb. Chocola yaꞌ baꞌ icꞌjowan, baꞌ mi quejel ti uqꞌuel yicꞌot tsʌts mi quejel i cꞌuxob i yej chaꞌan tiꞌ cꞌuxel, cheꞌen. Chʌꞌʌch ti yʌlʌ ti lajoñel Jesús.
14 Ti yʌlʌ jeꞌel: Cheꞌ bajcheꞌ an cabʌl pʌyʌloꞌ bʌ chaꞌan mi yochelob yaꞌ baꞌ muꞌ ti yumʌl Dios pero machꞌan cabʌl yajcʌbilob ti Dios chaꞌan mi yochelob, cheꞌen.
Tꞌan chaꞌan tyojoñel
15 Ti majli fariseojob. Tiꞌ lajayob i tꞌan chaꞌan i jopꞌ i yʌqꞌuen i yʌleꞌ Jesús chʌ bʌ jach bʌ tꞌan chꞌujbi bʌ i contrajiñob chaꞌan i yʌcꞌ ti melol Jesús.
16 Cheꞌ jini, jini fariseojob tiꞌ choco majlel chaꞌtiquil uxtiquil i piꞌʌlob yicꞌot chaꞌtiquil uxtiquil loqꞌuemoꞌ bʌ ti junmujchꞌ quixtyañu herodianojoꞌ bʌ i cꞌabaꞌ chaꞌan mi motin majlelob i pejcan Jesús. Tiꞌ subeyob: Maestro, cujil lojon isujm chaꞌan melelʌch chʌ bʌ maꞌ wʌleꞌ yicꞌot tyojʌch maꞌ cʌntisan quixtyañu i tꞌan Dios ti ñoj melel bʌ tꞌan. Maꞌ majch maꞌ bʌcꞌñan. Junlajal jach maꞌ qꞌuel winicob mi an i yeꞌtyel mi maꞌan i yeꞌtyel, cheꞌob.
17 Jin chaꞌan subeñon lojon: ¿Bajcheꞌ maꞌ wʌl? ¿Yom ba mi la cʌqꞌuen tyojoñel ñoj ñuc bʌ yumʌl, o mach yom? cheꞌob.
18 Pero Jesús yujil isujm chaꞌan yom jach i jopꞌben i mul. Tiꞌ subeyob: Chaꞌchajp laꞌ pensal. ¿Chucoch mi laꞌ jopꞌ laꞌ wʌcꞌon ti melojel?
19 Pʌsꞌeñon jini tyaqꞌuin muꞌ bʌ laꞌ cꞌʌn laꞌ tyojeꞌ tyojoñel, cheꞌen. Cheꞌ jini tiꞌ chꞌʌmʌ tyʌlel junwejch tyaqꞌuin denario bʌ i cꞌabaꞌ.
20 Cheꞌ ñac tiꞌ qꞌuele Jesús jini tyaqꞌuin tiꞌ cꞌajtibeyob: ¿Majchqui i locꞌom wʌꞌ bʌ an ti tyaqꞌuin? ¿Majchqui i cꞌabaꞌ wʌꞌ tsꞌijbubil? cheꞌen.
21 Tiꞌ jacꞌʌyob: I chaꞌan jini ñoj ñuc bʌ yumʌl, cheꞌob. Cheꞌ jini Jesús tiꞌ subeyob: Aqꞌuenla ñoj ñuc bʌ yumʌl i chaꞌan bʌ yumʌl, aqꞌuenla Dios i chaꞌan bʌ Dios. Cheꞌ ti yʌlʌ Jesús.
22 Cheꞌ ñac ti yubi bajcheꞌ tiꞌ jacꞌʌ Jesús, tyoj bʌcꞌñʌjel ti yubiyob. Maꞌ chʌ bʌ yambʌ ti yʌlʌyob. Ti chaꞌ sujtiyob.
Cꞌajtibal chaꞌan bajcheꞌ mi tyejchel loqꞌuel baꞌan sajtyemoꞌ bʌ
23 Ti jin jach bʌ qꞌuin ti cꞌotiyob chaꞌtiquil uxtiquil saduceo yaꞌ baꞌan Jesús. Jiñʌch muꞌ bʌ i yʌlob chaꞌan machꞌan mi lac chaꞌ tyejchel loqꞌuel baꞌan sajtyemoꞌ bʌ. Tiꞌ subeyob Jesús.
24 Maestro, Moisés tiꞌ cʌybeyonla tsꞌijbubil bʌ mandar chaꞌan bajcheꞌ miꞌ chaꞌlen mi ti sajti juntiquil winic mi ti bajñel cʌyle i yijñam cheꞌ max tyo baꞌan i yalobil. Ti yʌlʌ yom i wersa pʌyben i yijñam i yʌscun jini ijtsꞌiñʌl bʌ chaꞌan i yalobil miꞌ tyejchben i jiñʌjlel jini tsaꞌ bʌ sajti. Cheꞌ ti yʌlʌ Moisés, cheꞌob.
25 Cheꞌ jini, wʌꞌ baꞌañonla an siete winicob yoque i yijtsꞌiñob i bʌ. Tiꞌ pʌyʌ i yijñam jini ascuñʌl bʌ. Ti sajti. Chaꞌan maꞌ tiꞌ cʌyʌ yalobil, jini ijtsꞌiñʌl bʌ tiꞌ pʌybe i yijñam i yʌscun.
26 Chʌꞌʌch ti luꞌ ujti. Ti sajti jini chaꞌticlel bʌ yicꞌot uxticlel cꞌʌlʌ jintyo ti sajti sietyejlel hermano.
27 Ti wiꞌil cheꞌ tsaꞌix sajti ti sietejlel ti sajti jeꞌel jini xꞌixic.
28 Cheꞌ jini, ti yorojlel i chaꞌ tyejchelob jini sajtyemoꞌ bʌ, ¿majchqui i ñoxiꞌal jini xꞌixic mi a wʌl como ti sietejlelob tiꞌ pʌyʌyob chaꞌan i yijñam? Cheꞌ ti yʌlʌyob.
29 Jesús tiꞌ subeyob: An laꞌ ñajayel tyac como machꞌan mi laꞌ chꞌʌmben isujm jini Tsꞌijbubil bʌ i Tꞌan Dios, mi i pꞌʌtyʌlelic Dios.
30 Como cheꞌ miꞌ chaꞌ tyejchelob loqꞌuel baꞌan sajtyemoꞌ bʌ, maꞌix miꞌ pʌyob i yijñamob, maꞌix miꞌ sijintyelob jeꞌel. Mi quejel i yajñelob cheꞌ bajcheꞌ mi yajñel ajtroñelob i chaꞌan Dios yaꞌ bʌ añob ti panchan.
31 Jiñʌch i sujmlel chaꞌan melelʌch mi chaꞌ tyejchel sajtyemoꞌ bʌ. ¿Machꞌa baꞌan qꞌuelel laꞌ chaꞌan tsaꞌ bʌ i sube Dios lac piꞌʌlob israeloꞌ bʌ? Dios ti yʌlʌ:
32 Joñon i Dioson Abraham, i Dioson Isaac, i Dioson Jacob, cheꞌen. Dios mach i Diosic sajtyemoꞌ bʌ. I Diosʌch jini cuxuloꞌ bʌ. Cheꞌ ti yʌlʌ Jesús. Como aunque sajtyem i bʌcꞌtyal pero cuxul i chꞌujlel.
33 Cheꞌ ñac ti yubiyob bajcheꞌ tiꞌ jacꞌʌ Jesús, tyoj bʌcꞌñʌjelob quixtyañu chaꞌan i cʌntisa.
Jini más ñuc bʌ mandar
34 Cheꞌ ñac jini fariseojob ti yubi bajcheꞌ tiꞌ ñʌchꞌchoco Jesús jini saduceojob, tiꞌ muchꞌquiyob i bʌ chaꞌan i pensalin chʌ bʌ miꞌ chaꞌleñob.
35 Juntiquil ajcʌntisa chaꞌan mandar ti queji i pejcan Jesús chaꞌan jach yom i yilpusicꞌlen chaꞌan yom i contrajin tiꞌ tꞌan. Ti yʌlʌ:
36 Maestro, ¿baqui bʌ más ñuc ti pejtyelel mandar tyac? cheꞌen.
37 Jesús tiꞌ jacꞌʌ: Pꞌuntyan laꞌ Yum laꞌ Dios ti pejtyelel laꞌ pusicꞌal, ti pejtyelel laꞌ chꞌujlel yicꞌot ti pejtyelel laꞌ ñaꞌtyʌbal, cheꞌen.
38 Jiñʌch jini más ñuc bʌ mandar.
39 Lʌcꞌʌl lajal bʌ yicꞌot chaꞌpꞌejlel mandar. Mi yʌl: Pꞌuntyan a piꞌʌlob ti chumtyʌl lajal bajcheꞌ mi a bajñel pꞌuntyan laꞌ bʌ, cheꞌen.
40 Chaꞌan ti jini chaꞌpꞌej mandar ti mejli ti pejtyelel i mandar tyac Moisés yicꞌot i cʌntisa tsaꞌ bʌ i xiqꞌui yʌleꞌ Dios ti ñoj oniyix. Cheꞌ ti yʌlʌ Jesús.
¿Majchqui jini Cristo?
41 Cheꞌ ñac yaꞌ tyo muchꞌquibilob fariseojob Jesús tiꞌ cꞌajtibeyob:
42 ¿Bajcheꞌ mi laꞌ wʌleꞌ jatyetla? ¿Majchqui jini Cristo? cheꞌen. Tiꞌ jacꞌʌyob: Cristo i jiñʌjlelʌch David, cheꞌob.
43 Cheꞌ jini Jesús tiꞌ subeyob: ¿Bajcheꞌ isujm cheꞌ Chꞌujul bʌ i Chꞌujlel Dios ti yʌqꞌue i yʌleꞌ David Cristo ti yumʌl i chaꞌan? Como David ti yʌlʌ:
44 Jini lac Yum tiꞌ sube jini c Yum:
Buchi tic ñoj chaꞌan tsiquilʌch a ñuclel
jintyo mic cʌqꞌueñet chaꞌan a jisʌben i pꞌʌtyʌlel a contrajob.
Cheꞌ ti subenti Cristo ti Dios cheꞌ tiꞌ tyaja ti tꞌan jini David.
45 Cheꞌ jini Jesús tiꞌ cꞌajtibeyob: ¿Bajcheꞌ isujm chaꞌan jini yajcʌbil bʌ i chaꞌan Dios i jiñʌjlel David cheꞌ jeꞌel yumʌl i chaꞌan? cheꞌen.
46 Maꞌ majch ti mejli i chaꞌ jacꞌben i tꞌan Jesús. Ti jim bʌ qꞌuin ti tyejchi i bʌcꞌñañob i jopꞌ i chaꞌ cꞌajtibeñob Jesús yan tyac bʌ.