Yom miꞌ qꞌuexob i pensal i cʌyob i mul
13
Ti jim bʌ ora ti cꞌoti chaꞌtiquil uxtiquil yaꞌ baꞌan Jesús. Tiꞌ subeyob Jesús bajcheꞌ jini yumʌl Pilato bʌ i cꞌabaꞌ ti yʌcꞌʌ ti tsʌnsʌntyel winicob yaꞌ ti pañimil Galilea bʌ i cꞌabaꞌ. Pilato ti yʌcꞌʌ ti xʌcꞌtyuntyel i chꞌichꞌel jini quixtyañujob yicꞌot i chꞌichꞌel animal tyac tsaꞌ bʌ i tsʌnsʌyob chaꞌan i majtyan Dios.2 Jesús tiꞌ subeyob: ¿Chʌncol ba laꞌ lolon pensalin chʌꞌʌch tiꞌ tyʌcꞌlʌntiyob jini winicob loqꞌuem bʌ ti Galilea chaꞌan más an i mul bajcheꞌ yañoꞌ bʌ ti lumal?
3 Mic subeñetla: Mach cheꞌiqui pero mi machꞌan mi laꞌ qꞌuextyan laꞌ pensal laꞌ cʌyeꞌ laꞌ mul mi quejel laꞌ jilel jeꞌel, cheꞌen.
4 ¿O muꞌ ba laꞌ lolon pensalin más añob i mul jini dieciocho tsaꞌ bʌ jiliyob cheꞌ ñac ti yajli jini chan bʌ tsꞌajc yaꞌ ti Siloé bajcheꞌ jini yañoꞌ bʌ chumuloꞌ bʌ ti Jerusalén?
5 Mic subeñetla: Mach cheꞌiqui. Mi machꞌan mi laꞌ qꞌuextyan laꞌ pensal laꞌ cʌyeꞌ laꞌ mul, ti pejtyeleletla mi quejel laꞌ jilel jeꞌel, cheꞌ ti yʌlʌ Jesús.
Chaꞌan higuera bʌ tyeꞌ machꞌʌ baꞌan i wut
6 Jesús tiꞌ subeyob ili lajoñel: An juntiquil winic am bʌ i higuera tyeꞌ tsaꞌ bʌ i pʌcꞌʌ yaꞌ ti i lum. Ti majli i qꞌuel mi an i wut. Pero machꞌan tiꞌ tyajbe i wut.
7 Cheꞌ jini tiꞌ sube jini ajtroñel i chaꞌan chʌncol bʌ i cʌñʌtyʌben i lum. Qꞌuele awilan uxpꞌej jab chʌncol c bebebijin. Pero machꞌan mic saj tyajben i wut. Seqꞌue, ¿chucoch tyo miꞌ bej lolon mʌctyan lum? cheꞌen.
8 Pero jini ajtroñel i chaꞌan tiꞌ sube: C yum, laꞌ tyo colic jumpꞌej tyo jab. Muꞌ tyo c wen joy picben i yebal. Mi quejel cotsan i tyaꞌ alʌqꞌuil chaꞌan i yʌcꞌ i wut.
9 Cꞌoꞌojl muꞌ tyo quejel i yʌcꞌ i wut, cheꞌ jini. Pero mi machꞌan mi yʌcꞌ i wut muꞌ tyo c seqꞌueꞌ jubel, cheꞌ ti yʌlʌ jini ajtroñel.
Jesús tiꞌ lajmisʌ juntiquil cotcotña bʌ xꞌixic cheꞌ ti qꞌuinilel cꞌaj oj
10 Ti jumpꞌej i qꞌuinilel cꞌaj oj Jesús tiꞌ chaꞌle cʌntisa ti i templo israelob.
11 Yaꞌan juntiquil xꞌixic. Anix bʌ dieciocho jabil i quejel ti cꞌamꞌan. Tyʌcꞌlʌbil ti xiba. Xiba ti yʌcꞌʌ ti cotcot xʌmbal. Mach chꞌujbi i saj tyoj isan i bʌ jini xꞌixic.
12 Cheꞌ ñac Jesús ti yilʌ, tiꞌ pʌyʌ tyʌlel. Tiꞌ sube: Xꞌixic, lajmeñetix ti a cꞌamꞌan, cheꞌen.
13 Cheꞌ jini Jesús ti yʌcꞌʌ i cꞌʌb ti jini xꞌixic. Ti jim bʌ ora tiꞌ waꞌ tyoj isʌ i bʌ. Ti queji i suben i ñuclel Dios.
14 Pero i yum i templo israelob ti michꞌʌ como Jesús tiꞌ lajmisʌ ti qꞌuinilel cꞌaj oj. Tiꞌ sube quixtyañujob: An wʌcpꞌej qꞌuin chaꞌan lac chaꞌlen troñel. Yom laꞌ tyʌlel ti joch qꞌuin tyac chaꞌan mi laꞌ lajmel. Mach yom ti i qꞌuinilel cꞌaj oj, cheꞌen.
15 Cheꞌ jini lac Yum tiꞌ jacꞌbe: Chaꞌchajp laꞌ pensal. ¿An ba majch machꞌʌ baꞌan mi tileꞌ i tyat wacax o mi i burro chaꞌan i yʌqꞌuen jaꞌ cheꞌ ti qꞌuinilel cꞌaj oj?
16 Jixcu ili xꞌixic i jiñʌjlel bʌ Abraham cʌchʌl yubil ti i pꞌʌtyʌlel xiba jini Satanás cꞌʌlʌ dieciocho jabil. ¿Mach ba yom mic tiqueꞌ yubil cheꞌ ti yorojlel cꞌaj oj maꞌ wʌl? Cheꞌ ti yʌlʌ Jesús.
17 Cheꞌ ñac ti yʌlʌ Jesús jini, pejtyelel i contrajob quisintic ti yubiyob. Pero ti pejtyelel yambʌ quixtyañujob cꞌajacña i yoj ti yubiyob cheꞌ ñac ti yilʌ chʌ bʌ ñuc tyac tiꞌ chaꞌle Jesús.
Sanación en el Sabbat
Lajoñel chaꞌan i bʌcꞌ mostaza
18 Cheꞌ jini, Jesús ti yʌlʌ: ¿Bajcheꞌ yilal i yumintyel Dios? ¿Bajcheꞌ chꞌujbi lac lajeꞌ i yumintyel Dios? cheꞌen.
19 Chꞌujbi lac lajeꞌ i yumintyel Dios bajcheꞌ i bʌcꞌ mostaza tsaꞌ bʌ i pꞌujpꞌu juntiquil winic ti i lum. Colem mi colel jintyo chanix bajcheꞌ juntyejc tyeꞌ yubil. Yaꞌ miꞌ mel i cꞌuꞌ xmaꞌtyeꞌmut yaꞌ tiꞌ cꞌʌb tyac. Cheꞌ tiꞌ chaꞌle lajoñel Jesús.
El Reino de Dios como una Semilla de Mostaza
Lajoñel chaꞌan levadura
20 Jesús ti yʌlʌ jeꞌel: ¿Chuquiyes yicꞌot mic lajeꞌ i yumintyel Dios? cheꞌen.
21 Chꞌujbi lac lajeꞌ i yumintyel Dios bajcheꞌ levadura muꞌ bʌ i yʌqꞌuen i wos i bʌ caxlan waj muꞌ bʌ i xʌcꞌtyun juntiquil xꞌixic ti uxpꞌis harina muꞌ bʌ i cꞌʌñob i mel caxlan waj. Jini mi yʌcꞌ i luꞌ woseꞌ i bʌ caxlan waj, cheꞌen.
Jini saj jach bʌ i tiꞌ otyot yubil
(Mt. 7.13-14, 21-23)
22 Jesús ti bej majli chaꞌan mi cꞌotyel ti Jerusalén. Tiꞌ chaꞌle cʌntisa yaꞌ ti lum tyac yicꞌot saj xchumtyʌl tyac baꞌ ti ñumi majlel.
23 An majch tiꞌ cꞌajtibe Jesús: C Yum, ¿chaꞌtiquil uxtiquil jach ba muꞌ bʌ quejel i cotyʌntyel? cheꞌen. Jesús tiꞌ jacꞌbe:
24 Jopꞌox laꞌ wochel ti jini saj bʌ i tiꞌ otyot yubil como mic subeñetla cabʌl yom ochel ti tyal tyo bʌ ora pero mach chꞌujbi.
25 Cheꞌ mi tyejchel i yum otyot mi quej i ñupeꞌ i tiꞌ otyot. Jatyetla añet bʌ la ti pañimil mi quej laꞌ jatsꞌeꞌ i tiꞌ otyot. Mi quej laꞌ wʌleꞌ: C Yum, jambeñon lojon i tiꞌ a wotyot. Pero mi quej laꞌ subentyel: Mach cujil isujm baqui chꞌoyoletla jatyetla, cheꞌen.
26 Cheꞌ jini mi quejel laꞌ wʌleꞌ: Tic chaꞌle lojon uchꞌel a wicꞌot. Ti a cʌntisʌyon lojon ti bij tyac. Cheꞌ mi quejel laꞌ wʌleꞌ,
27 pero jini mi quejel i jacꞌbeñetla: Tsaꞌix cʌlʌ mach j cʌñʌ baqui chꞌoyoletla. Loqꞌuenixla pejtyeletla machꞌʌ wen ti laꞌ chaꞌle. Cheꞌ mi quejel i jaqꞌueꞌ.
28 Yaꞌi mi quejel laꞌ chaꞌlen uqꞌuel yicꞌot tsʌts mi quejel laꞌ cꞌuxeꞌ laꞌ wej cheꞌ mi laꞌ qꞌueleꞌ yaꞌ baꞌ miꞌ chaꞌlen yumʌl Dios yaꞌan Abraham, Isaac, Jacob yicꞌot ti pejtyelel jini tsaꞌ bʌ i xiqꞌui i yʌleꞌ Dios. Pero jatyetla machꞌan ti otsʌntiyetla.
29 Como mi quejel i cꞌotyel quixtyañujob chꞌoyoloꞌ bʌ ti pasoꞌ qꞌuin yicꞌot baꞌ mi pꞌʌjquel qꞌuin yicꞌot ti norte yicꞌot ti sur. Mi quejel i buchtyʌl ti uchꞌel yaꞌ baꞌ miꞌ chaꞌlen yumʌl Dios.
30 Cheꞌ jini an jini muꞌ bʌ i qꞌuejlel ti machꞌʌ ñuc wale iliyi mi quejel i qꞌuejlel ti ñuc yicꞌot an jini muꞌ bʌ i qꞌuejlel ti ñuc wale mi quejel i qꞌuejlel ti machꞌʌ ñuc baꞌ miꞌ chaꞌlen yumʌl Dios. Cheꞌ tiꞌ chaꞌle cʌntisa Jesús.
Jesús tiꞌ chaꞌle uqꞌuel yaꞌ ti tꞌejl Jerusalén
31 Ti jim bʌ qꞌuin ti cꞌoti chaꞌtiquil uxtiquil israelob muꞌ bʌ i pejcʌntyel ti fariseojob chaꞌan ti caj bajcheꞌ miꞌ chꞌujbin. Tiꞌ subeyob Jesús: Loqꞌuen wʌꞌwʌꞌi como Herodes yom i tsʌnsañet, cheꞌob.
32 Pero Jesús tiꞌ jacꞌbeyob: Cucu suben jini simaron bʌ yumʌl: Qꞌuele awilan, wale iliyi yicꞌot ijcꞌʌl mic choqueꞌ loqꞌuel xibajob. Mic lajmisan xcꞌamꞌan. Uxi tyo mic jolontisan c troñel, cheꞌen.
33 Pero wersa mic bej majlel wale iliyi, ijcꞌʌl, chaꞌbi, jinto mij cꞌotyel ti Jerusalén como mach chꞌujbi i tsʌnsʌntyel jini tsaꞌ bʌ i xiqꞌui i yʌleꞌ Dios ti yambʌ lum. Jin jach ti Jerusalén mi tsʌnsʌntyel. Cheꞌ ti yʌlʌ Jesús.
34 Jatyetla añet bʌ la ti Jerusalén muꞌ bʌ laꞌ tsʌnsan jini tsaꞌ bʌ i xiqꞌui i yʌleꞌ Dios muꞌ bʌ laꞌ jul ti tyun jintyo mi laꞌ tsʌnsan jini ajsubtꞌan tsaꞌ bʌ i choco tyʌlel Dios. Jayyajlel com c muchꞌquiñetla yubil cheꞌ bajcheꞌ ñaꞌ mut mi luts i yal. Pero mach laꞌ wom.
35 Qꞌuele awilan laꞌ colem templo mi quejel i joch cʌytyʌl. Maꞌix mi quejel laꞌ chaꞌ ilañon jintyo ti yorojlel mi quejel laꞌ wʌleꞌ: Tijicñayet jatyet Yumʌlet muꞌ bʌ a tyʌlel chaꞌan cheꞌ yom Dios. Chʌꞌʌch mi quejel laꞌ wʌleꞌ, cheꞌ ti yʌlʌ Jesús.