2 Lajalʌch bajcheꞌ mi laꞌ lolon aleꞌ an i mul laꞌ piꞌʌlob, chʌꞌʌch jeꞌel mi quejel i yʌletla an laꞌ mul.

3 ¿Bajcheꞌqui isujm cheꞌ chꞌujbi a wilan i tsꞌubil tyeꞌ tiꞌ wut a wermañu cheꞌ machꞌan maꞌ pensalin mi an colem xujcꞌuꞌ tyeꞌ ti a wut, yubil?

4 Cheꞌ an xujcꞌuꞌ tyeꞌ ti a wut yubil, ¿bajcheꞌqui chꞌujbi a suben a wermañu: Aqꞌueñon c locꞌsʌbeñet i tsꞌubil tyeꞌ ti a wut? cheꞌet.

5 Chaꞌchajp laꞌ pensal. Jini yom bʌ yi, maꞌ ñaxan locꞌsan jini colem xujcꞌuꞌ tyeꞌ am bʌ ti a wut, yubil. Cheꞌ jini, chꞌujbi a wen qꞌuel chaꞌan maꞌ locꞌsʌben i tsꞌubil tyeꞌ am bʌ tiꞌ wut a wermañu. Chʌꞌʌch tiꞌ chaꞌle cʌntisa Jesús chaꞌan jini más an bʌ i mul muꞌ bʌ i lolon aleꞌ an i mul i piꞌʌl.

6 Mach yom laꞌ wʌqꞌuen tsꞌiꞌ chʌ bʌ chꞌujul. Cheꞌ michꞌ jini tsꞌiꞌ miꞌ cꞌuxetla. Mach yom mi laꞌ wʌqꞌuen chityam chʌ bʌ ñoj lets bʌ i tyojol. Como cheꞌ jach miꞌ tyejqꞌueꞌ ti lum. Cheꞌ bajcheꞌ jini, mach yom laꞌ suben i tꞌan Dios muꞌ bʌ laj qꞌuel ti chꞌujul jini muꞌ bʌ i junyajlel wajlen i tꞌan Dios.

7 Bej cꞌajtibenla Dios chʌ bʌ yom laꞌ chaꞌan. Mi quejel i yʌqꞌueñetla. Bej sʌclanla. Mi quejel laꞌ tyajeꞌ. Cꞌajtibenla Dios, cheꞌ bajcheꞌ chʌncol laꞌ jatsꞌeꞌ i tiꞌ otyot yubil. Mi quejel i jambeñetla.

8 Como jini muꞌ bʌ i cꞌajtin mi quejel i yʌqꞌuentyel. Jini muꞌ bʌ i sʌclan mi quejel i tyajeꞌ. Jini muꞌ bʌ i jatsꞌeꞌ i tiꞌ otyot mi quejel i jambentyel.

9 ¿Am ba juntiquiletla tyatyʌlet bʌ la muꞌ bʌ quejel laꞌ wʌqꞌuen laꞌ walobil tyun cheꞌ mi cꞌajtin waj?

10 ¿Muꞌ ba quejel laꞌ wʌqꞌuen lucum cheꞌ miꞌ cꞌajtin chʌy?

11 Cheꞌ jini, jatyetla, aunque simaroñetla, a wujila laꞌ wʌqꞌuen laꞌ walobil wen tyac bʌ. Lac Tyat am bʌ ti panchan más tyo mi quejel i yʌqꞌuen wen tyac bʌ jini muꞌ bʌ i cꞌajtin.

12 Beleꞌ chaꞌlibenla wen bʌ laꞌ piꞌʌlob cheꞌ bajcheꞌ mi laꞌ mulan i chaꞌlibeñetla jeꞌel. Como jiñʌch muꞌ bʌ i xicꞌonla lac chaꞌlen i mandar Moisés yicꞌot tsaꞌ bʌ i tsꞌijbuyob jini tsaꞌ bʌ i xiqꞌui yʌleꞌ Dios ti ñoj oniyix.

13 Cheꞌ wʌꞌ tyo añetla ti mulawil chaꞌlenla xʌmbal ti bij saj bʌ i tiꞌ yubil. Colem i pochtyʌlel, ñuc i tiꞌ jini bij baꞌ miꞌ majlelob ti xotꞌmulil. An cabʌl muꞌ bʌ i yochelob yaꞌi.

14 Pero saj i tiꞌ jini saj bʌ bij baꞌ mi yochelob muꞌ bʌ i yʌqꞌuentyelob tsijiꞌ bʌ i cuxtyʌlel. Machꞌan cabʌl muꞌ bʌ i yochelob yaꞌi.

15 Cʌñʌtyan laꞌ bʌ chaꞌan jini xlot bʌ ajcʌntisajob muꞌ bʌ i lolon alob chaꞌan i tꞌañʌch Dios chʌncol i puc majlel. Miꞌ lolon pʌsob i bʌ cheꞌ bajcheꞌ ñoj uts bʌ tiñʌmeꞌ miꞌ lolon chaꞌlen, pero tiꞌ pusicꞌal an i simaronlel cheꞌ bajcheꞌ ñoj simaron bʌ maꞌtyeꞌlel tsꞌiꞌ yubil. [Tiñʌmeꞌ yom i yʌleꞌ oveja.]

16 Pero chꞌujbi laꞌ cʌn jini quixtyañujob chʌ bʌ miꞌ chaꞌleñob cheꞌ bajcheꞌ mi laꞌ cʌñeꞌ tyeꞌ ti i wut. Como machꞌan mi laꞌ tyuqꞌueꞌ i wut tsꞌujsub baꞌ chꞌix jach mi colel, mi higo bʌ i wut tyeꞌ baꞌ tsꞌujsub jach mi colel.

17 Jini wen bʌ tyeꞌ mi yʌcꞌ wen bʌ i wut. Jini machꞌʌ wen bʌ tyeꞌ mi yʌcꞌ machꞌʌ wen bʌ i wut.

18 Jini wen bʌ tyeꞌ mach chꞌujbi i yʌqꞌueꞌ machꞌʌ wen bʌ i wut. Jini machꞌʌ wen bʌ tyeꞌ mach chꞌujbi i yʌqꞌueꞌ wen bʌ i wut.

19 Pejtyelel tyeꞌ tyac machꞌʌ baꞌan mi yʌcꞌ wen bʌ i wut mi sejqꞌuel. Mi pulel ti cꞌajc.

20 Cheꞌ bajcheꞌ mi laꞌ cʌñeꞌ tyeꞌ ti i wut, cheꞌ jeꞌel mi laꞌ cʌñeꞌ xlot bʌ ajcʌntisa chaꞌan tiꞌ chaꞌlibal. Cheꞌ tiꞌ chaꞌle cʌntisa Jesús.

21 Tiꞌ bej chaꞌle cʌntisa Jesús. Ti yʌlʌ: Mach ti pejtyelelob muꞌ bʌ i pejcañon ti i yum mi quejel i yochel ti panchan baꞌ miꞌ chaꞌlen yumʌl Dios. Jin jach muꞌ bʌ i chaꞌleñob bajcheꞌ yom i pusicꞌal c Tyat am bʌ ti panchan.

22 Cheꞌ mi quejel i cꞌotyel i yorojlel melojel yaꞌ baꞌan Dios ti panchan cabʌlob mi quejel i subeñob: C Yum, joñon lojon ti lojon c subu majlel a tꞌan. Ti lojon j cꞌʌñʌ a cꞌabaꞌ chaꞌan ti lojon c choco loqꞌuel xiba tiꞌ pusicꞌal quixtyañujob yicꞌot ti a cꞌabaꞌ ti lojon c pʌsʌ cabʌl ñuc tyac bʌ a pꞌʌtyʌlel. Chʌꞌʌch cabʌl mi quejel i yʌlob.

23 Cheꞌ jini, mi quejel c subeñob: Machꞌan baꞌ bʌ ora tij cʌñʌyetla. Mach c chaꞌañeticla. Loqꞌuenla wʌꞌ baꞌañon ti pejtyeletla tsaꞌ bʌ laꞌ chaꞌle machꞌʌ wen. Chʌꞌʌch mi quej c subeñob, cheꞌ Jesús.

24 Jesús tiꞌ bej chaꞌle cʌntisa. Ti yʌlʌ: Jini muꞌ bʌ i yubin c tꞌan, muꞌ bʌ i chꞌujbin bajcheꞌ mi cʌleꞌ jiñʌch cheꞌ bajcheꞌ juntiquil winic am bʌ i ñaꞌtyʌbal muꞌ bʌ meleꞌ i yotyot. Pero ñaxan tyam miꞌ piqueꞌ lum chaꞌan miꞌ tyajeꞌ tyun baꞌ miꞌ waꞌchocon i tsꞌajquil i yeꞌbal otyot.

25 Ti tyʌli jaꞌal. Ti wen tyamꞌʌ jaꞌ. Pꞌʌtyʌl bʌ icꞌ tiꞌ wen jatsꞌʌ i yotyot. Pero machꞌan ti bujchi como tsʌts chucul ti tyun.

26 Pero jini muꞌ bʌ i yubin c tꞌan pero machꞌan miꞌ chꞌujbin muꞌ bʌ i subentyel, jiñʌch cheꞌ bajcheꞌ juntiquil winic machꞌʌ baꞌan i ñaꞌtyʌbal muꞌ bʌ i meleꞌ i yotyot ti pam jiꞌ. Machꞌan tyam bʌ i tsꞌajquil i yebal otyot.

27 Ti tyʌli jaꞌal. Ti wen tyamꞌʌ jaꞌ. Ti ñumi pꞌʌtyʌl bʌ icꞌ. Ti bujchi i yotyot. Ñoj pꞌumpꞌun bajcheꞌ ti jili i yotyot. Chʌꞌʌch tiꞌ chaꞌle lajoñel Jesús.

28 Cheꞌ ñac ti ujti i subeꞌ Jesús jini tꞌan, tyoj bʌcꞌñʌjel ti yubiyob quixtyañujob chaꞌan i cʌntisa.

29 Jesús machꞌan tiꞌ cʌntisʌyob bajcheꞌ yambʌ ajcʌntisajob. Como tsiquil an i pꞌʌtyʌlel i tꞌan Jesús.