2 Jin chaꞌan cheꞌ maꞌ cotyan pꞌumpꞌuñoꞌ bʌ mach yom maꞌ sub a bʌ baꞌan quixtyañujob chaꞌan i luꞌ ubiñob bajcheꞌ chʌncol a chaꞌlen. Como chʌꞌʌch miꞌ lolon chaꞌleñob chaꞌchajpoꞌ bʌ i pensal cheꞌ miꞌ cotyañob jini muꞌ bʌ i tyajob yaꞌ ti i templo israelob yicꞌot yaꞌ ti bij tyac. Chʌꞌʌch miꞌ chaꞌleñob chaꞌan mi yʌjlel ti wen tiꞌ tyojlel quixtyañujob. Pero melel mic subeñetla chaꞌan cheꞌ jach yom i yʌcꞌob i bʌ ti qꞌuejlel ti wen baꞌan quixtyañujob machꞌan chʌ bʌ mi quejel i yʌqꞌuentyel ti Dios chaꞌan i tyojol yubil.

3 Pero jatyetla cheꞌ mi laꞌ wʌqꞌuen chʌ bʌ mi laꞌ wʌqꞌuen chaꞌan i cotyʌntyel pꞌumpꞌuñoꞌ bʌ, aqꞌueñob cheꞌ maꞌ majch mi yilan chʌ bʌ ti a chaꞌle, mi jinic más uts bʌ a wicꞌot.

4 Cheꞌ mi laꞌ cotyañob pꞌumpꞌuñoꞌ bʌ, mucu aqꞌueñob jini muꞌ bʌ a wʌqꞌueñob. Cheꞌ jini, lac Tyat am bʌ ti panchan chʌncol bʌ i luꞌ qꞌuel chʌ bʌ miꞌ mucu chaꞌlen quixtyañujob mi quejel i yʌqꞌueñetla i tyojol laꞌ chaꞌlibal. Cheꞌ ti yʌlʌ Jesús.

5 Jesús tiꞌ bej chaꞌle cʌntisa. Ti yʌlʌ: Cheꞌ mi laꞌ chaꞌlen oración mach yom laꞌ chaꞌlen bajcheꞌ chaꞌchajpoꞌ bʌ i pensal. Como jini miꞌ mulan i chaꞌleñob oración cheꞌ waꞌalob ti i templo israelob yicꞌot ti xujc tyac calle chaꞌan jach mi qꞌuejlelob ti quixtyañujob. Pero melel mic subeñetla chaꞌan chʌꞌʌch mi yʌcꞌob i bʌ ti qꞌuejlel ti wen baꞌan quixtyañujob tsaꞌix aqꞌuentiyob i tyojol yubil, cheꞌen.

6 Pero jatyetla, cheꞌ mi laꞌ chaꞌlen oración, ochen ti mal a wotyot. Ñupꞌu i tiꞌ a wotyot. Pejcan lac Tyat am bʌ ti panchan como yaꞌix an a wicꞌot ti a pusicꞌal. Lac Tyat am bʌ ti panchan chʌncol bʌ i luꞌ qꞌuel chʌ bʌ miꞌ mucu chaꞌlen quixtyañujob mi quejel i yʌqꞌueñetla i tyojol laꞌ chaꞌlibal, yubil.

7 Cheꞌ mi laꞌ chaꞌlen oración, mach yom laꞌ chʌc tyaj lajal bʌ tꞌan chaꞌan jach mi laꞌ bajñel tyamꞌisan laꞌ woración cheꞌ bajcheꞌ miꞌ lolon chaꞌleñob jini machꞌʌ baꞌan miꞌ chꞌujbiñob Dios. Como miꞌ lolon ñaꞌtyañob mi yubintyel i yoración chaꞌan cabʌl i tꞌan.

8 Pero mach cheꞌic yom laꞌ chaꞌlen. Como jini lac Tyat am bʌ ti panchan yujil isujm chʌ bʌ yes yom laꞌ chaꞌan cheꞌ max tyo laꞌ cꞌajtiben.

9 Jin chaꞌan chʌꞌʌch yom mi laꞌ chaꞌlen oración. Yom mi laꞌ wʌl:

14 Como cheꞌ mi laꞌ ñusʌbeñob i mul laꞌ piꞌʌlob, lac Tyat am bʌ ti panchan mi quejel i ñusʌbeñetla laꞌ mul jeꞌel.

15 Pero mi machꞌan mi laꞌ ñusʌbeñob i mul laꞌ piꞌʌlob, machꞌan mi quejel i ñusʌbeñetla laꞌ mul lac Tyat am bʌ ti panchan. Cheꞌ tiꞌ chaꞌle cʌntisa Jesús.

16 Cheꞌ mi laꞌ poj chꞌajban ti pejtyelel muꞌ bʌ laꞌ cꞌux, muꞌ bʌ laꞌ jap chaꞌan laꞌ wom laꞌ pꞌuntyan Dios, mach yom laꞌ pʌs ti chꞌʌjyem i ñiꞌ laꞌ wut cheꞌ bajcheꞌ miꞌ chaꞌleñob jini chaꞌchajpoꞌ bʌ i pensal. Como miꞌ pʌsob chꞌʌjyem bʌ i ñiꞌ i wut chaꞌan jach yom i tsictisʌbeñob quixtyañu chaꞌan mucꞌob ti chꞌajb. Pero melel mic subeñetla cheꞌ jach miꞌ chaꞌleñob chaꞌan miꞌ pʌsob i bʌ ti wen ti quixtyañujob. Cheꞌ jini, tsaꞌix aqꞌuentiyob i tyojol yubil.

17 Pero jatyetla, cheꞌ mi laꞌ poj chaꞌlen chꞌajb, mach yom laꞌ pʌs laꞌ bʌ cheꞌ bajcheꞌ chꞌʌjyemetla. Pero poco laꞌ wut, xiban laꞌ jol,

18 chaꞌan machꞌan miꞌ ñaꞌtyan quixtyañujob chaꞌan muqꞌuet ti chꞌajb. Jin jach lac Tyat am bʌ ti panchan mi quejel i ñaꞌtyan, como yaꞌix an a wicꞌot ti a pusicꞌal. Mi quejel i yʌqꞌueñet a tyojol yubil.

19 Mach yom laꞌ muchꞌquin cabʌl chʌ bʌ an laꞌ chaꞌan wʌꞌ ti mulawil. Como an muꞌ bʌ quejel ti jochꞌ. An muꞌ bʌ quejel ti tsuculiyel. An muꞌ bʌ quejel i yochel ajxujchꞌ i xujchꞌibeñetla.

20 Yom bʌ yi, muchꞌquin laꞌ ricojlel yaꞌ ti panchan baꞌ maꞌ mi jochꞌiñel, baꞌ maꞌ mi tsuculiyel, baꞌ maꞌ mi yochel ajxujchꞌ i xujchꞌibeñetla.

21 Como jini muꞌ bʌ a qꞌuel ti más ñuc, mi jini am bʌ ti panchan mi jini am bʌ ti mulawil, jiñʌch jini muꞌ bʌ a bej pensalin.

22 Cheꞌ wen laꞌ wut mi laꞌ wen qꞌueleꞌ i sʌclel mulawil. Cheꞌ bajcheꞌ jini, cheꞌ wen laꞌ pusicꞌal chaꞌan ti laꞌ chꞌujbi i tꞌan Dios, mux laꞌ ñaꞌtyan bajcheꞌ yom mi laꞌ wajñel ti wen ti mulawil.

23 Pero mi maꞌ mi laꞌ saj chꞌujbin i tꞌan Dios chaꞌan mi laꞌ ñaꞌtyan bajcheꞌ yom mi laꞌ wajñel, añet tyo la ti icꞌtꞌojñal yubil. Ñoj icꞌjowan jini icꞌtꞌojñal. Wocol añetla. Cheꞌ ti yʌlʌ Jesús.

24 Machꞌan ajtroñel chꞌujbi bʌ i yumin chaꞌtiquil i yum wʌꞌ ti mulawil. Mi quejel i tsꞌaꞌqꞌuel juntiquil. Mi quejel i pꞌuntyan jini yambʌ. Xucꞌul miꞌ chaꞌliben i troñel juntiquil. Miꞌ luꞌ ñusʌben i tꞌan jini yambʌ. Chʌꞌʌch an lac pusicꞌal jeꞌel. Mach chꞌujbi laꞌ yumin Dios cheꞌ chʌncol laꞌ yumin tyaqꞌuin. Cheꞌ tiꞌ chaꞌle cʌntisa Jesús.

25 Jesús tiꞌ bej chaꞌle cʌntisa. Ti yʌlʌ: Mic subeñetla mach yom laꞌ lolon cabʌl pensalin chʌ bʌ mi quejel laꞌ cꞌuxeꞌ, laꞌ japeꞌ, mi chaꞌan laꞌ pislel muꞌ bʌ quejel laꞌ xojeꞌ. Dios ti yʌqꞌueyetla chaꞌan cuxul mi laꞌ wajñel. Cheꞌ jini, ¿machꞌa baꞌan mi quejel i yʌqꞌueñetla i bʌl laꞌ ñʌc jeꞌel? Mucꞌʌch. Dios ti yʌqꞌueyetla laꞌ bʌcꞌtyal. ¿Machꞌa baꞌan mi quejel i yʌqꞌueñetla laꞌ pislel mi laꞌ wʌl? Mucꞌʌch.

26 Ñaꞌtyanla jini xmaꞌtyeꞌmut muꞌ bʌ ti wejlel ti chan. Machꞌan miꞌ chaꞌlen pacꞌ. Machꞌan miꞌ chaꞌlen cꞌajbal. Maꞌ mi yotsan i bucꞌbal tiꞌ yotyotlel chaꞌan miꞌ cʌñʌtyan ti jal. Pero lac Tyat am bʌ ti panchan mi yʌqꞌueñob chʌ bʌ yes yom i bucꞌob. Más ñuc miꞌ qꞌuelonla Dios cheꞌ bajcheꞌ xmaꞌtyeꞌmut.

27 ¿Am ba mi junticlec chꞌujbi bʌ i colel xinil metro aunque miꞌ bej chaꞌlen cabʌl pensal chaꞌan wersa yom chanꞌac? Machꞌan.

28 ¿Chucoch mi laꞌ lolon chaꞌlen cabʌl pensal chaꞌan laꞌ pislel? Ñaꞌtyanla bajcheꞌ mi colel nichꞌ pimel ti maꞌtyeꞌel. Maꞌ miꞌ chaꞌlen toñel. Machꞌan miꞌ jaleꞌ i pislel.

29 Pero mic subeñetla: Mi jinic jini yumʌl ñoj cabʌl bʌ i ricojlel Salomón bʌ i cꞌabaꞌ mach i tyaja i cꞌotyajlel jini ñoj wen bʌ i pislel cheꞌ bajcheꞌ nichꞌ pimel tyac.

30 Jiñʌch Dios mi yʌqꞌuen i cꞌotyajlel pimel tyac muꞌ bʌ i colel wale iliyi pero ijcꞌʌl jach miꞌ pulelob ti yajnib cꞌajc. Pero Dios miꞌ más pensalin i yʌqꞌueñetla chʌ bʌ yom laꞌ chaꞌan cheꞌ bajcheꞌ miꞌ pensalin pimel tyac. Pero tsꞌityaꞌ jach chʌncol laꞌ chꞌujbin Dios cheꞌ bej an cabʌl laꞌ pensal chaꞌan i bʌl laꞌ ñʌcꞌ yicꞌot laꞌ pislel.

31 Jin chaꞌan mach yom laꞌ chaꞌlen cabʌl pensal. Mach yom laꞌ wʌleꞌ: ¿Chuquiyes mi quejel laj cꞌuxeꞌ? ¿Chuquiyes mi quejel la capeꞌ? ¿Chuquiyes mi quejel lac xojeꞌ? cheꞌetla.

32 Como quixtyañujob wʌꞌ ti mulawil cheꞌ jach miꞌ bej pensalin chʌ bʌ yes miꞌ cꞌux, chʌ bʌ yes miꞌ xoj. Pero jatyetla mach cheꞌic yom mi laꞌ chaꞌlen. Como añʌch laꞌ Tyat am bʌ ti panchan yujil isujm pejtyel chʌ bʌ yes yom laꞌ chaꞌan.

33 Bej pensalinla chʌ bʌ yom Dios. Cheꞌ jini mi quejel laꞌ wʌqꞌuentyel pejtyelel chʌ bʌ tyac yom chaꞌañetla.

34 Mach yom laꞌ lolon chaꞌlen cabʌl pensal chaꞌan jini muꞌ tyo bʌ quejel i yujtyel ijcꞌʌl. Como ti jujumpꞌej qꞌuin an wocol tyac muꞌ bʌ lac wersa cuch. Jasʌl jach mi laꞌ ñaꞌtyan bajcheꞌ mi laꞌ cucheꞌ laꞌ wocol ti jin jach bʌ qꞌuin. Cheꞌ tiꞌ chaꞌle cʌntisa Jesús.