2 Como mi chʌncol cʌqꞌueñetla laꞌ wubin laꞌ chꞌʌjyemlel, ¿majch tyoqui mi quejel i ñuc isʌbeñon c pusicꞌal cheꞌ jini? Jatyetyʌchla. Pero tsaꞌix cotsʌbeyetla laꞌ chꞌʌjyemlel mi tic waꞌ tyoj isʌyetla.

3 Jin chaꞌan tic tsꞌijbubeyetla jun chaꞌan c tyoj isañetla. Como mach com tyʌlel yaꞌ baꞌ añetla chaꞌan laꞌ wʌqꞌueñon c chꞌʌjyemlel cheꞌ max tyo ti laꞌ tyoj isʌ laꞌ bʌ. Pero jatyetyʌchla yom mi laꞌ wʌqꞌueñon c tijicñʌyel. Como tic ñaꞌtyʌ cheꞌ cꞌajacña coj mi cubin ti pejtyeleletla cꞌajacña laꞌ woj mi quejlel laꞌ wubin jeꞌel.

4 Pero cheꞌ ñac tic tsꞌijbubeyetla jini jun tic chaꞌle pensal. Chꞌʌjyemon. Jinic tyo tic chaꞌle uqꞌuel. Pero machꞌan tic tsꞌijbubeyetla chaꞌan jach com lolon cʌqꞌueñetla laꞌ chꞌʌjyemlel pero chaꞌan mi laꞌ ñaꞌtyan mic wen pꞌuntyañetla.

5 Pero mi an majch ti yʌcꞌon c chꞌʌjyemlel, mach c bajñelic ti yʌcꞌon c chꞌʌjyemlel pero tsaꞌix i yʌqꞌuetla laꞌ chꞌʌjyemlel ti laꞌ pejtyelel jeꞌel. Maꞌix mi cʌl chaꞌan yoque ti pejtyeleletla ti yʌqꞌueyetla laꞌ chꞌʌjyemlel.

6 Jasʌl wale tsaꞌix laꞌ motin aqꞌue i ñusan wocol chaꞌan ti caj i mul jini quixtyañu. Wale tsaꞌix i tyoj isʌ i bʌ.

7 Pero wale iliyi yom mi laꞌ ñusʌben i mul. Yom mi laꞌ ñuc isʌben i pusicꞌal chaꞌan maꞌix ñoj chꞌʌjyem mi yubin ame machic cujch i chꞌʌjyemlel mi yubin.

8 Jin chaꞌan mic subeñetla ti wocol tꞌan chaꞌan mi laꞌ chaꞌ pʌsꞌen chʌncol laꞌ pꞌuntyan.

9 Jin chaꞌan tic ñaxan tsꞌijbubeyetla bajcheꞌ yom mi laꞌ wʌqꞌuen i ñusan wocol chaꞌan ti caj i mul jini quixtyañu chaꞌan mij qꞌueleꞌ mi mux laꞌ luꞌ chꞌujbibeñon chʌ bʌ mic subeñetla.

10 Wale iliyi cheꞌ tsaꞌix laꞌ ñusʌbe i mul mic ñusʌben i mul jeꞌel. Como cheꞌ tic ñusʌbe i mul, mi anic chʌ bʌ yom bʌ mic ñusʌben, tsaꞌix c ñusʌbe cheꞌ bajcheꞌ yom tiꞌ tyojlel Cristo chaꞌan laꞌ wenlel.

11 Yom mi lac ñusʌben i mul chaꞌan mach chꞌujbi i más yʌsañonla ti mulil Satanás. Como wen la cujil isujm miꞌ bej sʌclan bajcheꞌ miꞌ lotiñonla chaꞌan i yʌsañonla ti mulil.

12 Cheꞌ ñac ti cꞌotiyon yaꞌ ti lum Troas bʌ i cꞌabaꞌ chaꞌan c subeꞌ i tꞌan Cristo, an cabʌl c troñel como cabʌl yom i yubiñob i tꞌan lac Yum.

13 Pero maꞌix tijicñayon como machꞌan tic tyaja la quermano Tito. Jin chaꞌan tic subeyob mux c majlel. Ti bej majliyon ti pañimil Macedonia bʌ i cꞌabaꞌ.

14 Pero wocox i yʌlʌ Dios miꞌ bej cotyañonla lac ganarin i pꞌʌtyʌlel laj contra chaꞌan ti Cristo Jesús. Dios mi yʌqꞌueñob i cʌñob i tꞌan Dios chaꞌan ti joñon lojon. Cheꞌ bajcheꞌ yowocña bʌ pom i cʌñol i tꞌan Dios muꞌ bʌ i pam pujquel.

15 Como cheꞌ bajcheꞌ yowocniyonla bʌ pom muꞌ bʌ i yʌqꞌuentyel Dios ti Cristo. Miꞌ pam puc i bʌ jini yujtsꞌil yubil baꞌan jini muꞌ bʌ i cotyʌntyel yicꞌot baꞌan jini muꞌ bʌ i majlel baꞌ miꞌ ñusan wocol chaꞌan ti caj i mul.

16 Pero i tꞌan Dios mi yʌcꞌ ti sajtyel jini mach bʌ baꞌan miꞌ mulʌben i yujtsꞌil i tꞌan Dios. Pero mi yʌqꞌueñob i cuxtyʌlel jini muꞌ bʌ i cotyʌntyel muꞌ bʌ i mulʌben i yujtsꞌil yubil. Maꞌan majch i bajñel jasʌl i cꞌʌjnibal chaꞌan jini ñuc bʌ troñel.

17 Maꞌix mi lojon c lolon c subeꞌ ñumel i tꞌan Dios chaꞌan jach com lojon ganarin tyaqꞌuin. Maꞌix mi lojon xʌcꞌtyun ti yambʌ tꞌan cheꞌ bajcheꞌ miꞌ chaꞌlen cabʌl quixtyañujob. Pero mi lojon c subeꞌ i tꞌan Dios ti jumpꞌej lojon c pusicꞌal. Como chocolon lojon tyʌlel ti Dios. Mi lojon c chaꞌlen tꞌan cheꞌ bajcheꞌ miꞌ mulan Dios. Como cujil lojon isujm miꞌ qꞌuelon lojon Dios como ajtroñelon lojon i chaꞌan Cristo.