2 Maꞌix i cꞌʌjnibal yambʌ jun como cheꞌ bajcheꞌ cuñetla yubil baꞌ mi laꞌ tsictisan ti laꞌ melbal mi weñon lojon. Como tsiquil ti jatyetla mi añʌch lojon j cꞌʌjnibal. Chꞌujbi i ñaꞌtyañob i sujmlel bajcheꞌ añon lojon chaꞌan ti jatyetla cheꞌ miꞌ luꞌ qꞌuelob lojon cun yubil cheꞌ miꞌ qꞌueletla.

3 I juñetla Cristo yubil. Tsaꞌix i majñʌbon lojon j cꞌʌb Cristo chaꞌan c tsꞌijbuben chaꞌan i luꞌ qꞌuelob yañoꞌ bʌ. Machꞌan tsꞌijbubil jini jun ti tinta pero tsꞌijbubil ti Chꞌujul bʌ i Chꞌujlel Dios. Cuxul Chꞌujul bʌ i Chꞌujlel Dios. Machꞌan tiꞌ tsꞌijbubenti jini jun ti wechel bʌ tyun cheꞌ bajcheꞌ ti cꞌʌjni ti ñoj oniyix pero ti tsꞌijbunti ti i pusicꞌal quixtyañujob yubil chaꞌan i luꞌ qꞌuelob bajcheꞌ mi laꞌ wajñel cheꞌ ochemetla tiꞌ tꞌan Dios.

4 Tsiquil yajcʌbilon bʌ i chaꞌan Dios chaꞌan ti laꞌ chꞌujbi. Como chʌncol c chꞌujbin Dios ti pejtyelel lojon c pusicꞌal chaꞌan ti Cristo. Jini miꞌ cotyañon lojon.

5 Maꞌix lojon c bajñel cꞌʌjnibal chaꞌan c chaꞌliben i troñel Dios. Pero chaꞌan tiꞌ pꞌʌtyʌlel Dios quicꞌot chꞌujbi lojon c chaꞌliben i troñel.

6 I bajñel Dios ti yʌqꞌueyon lojon j cꞌʌjnibal chaꞌan c chaꞌliben i troñel ti jini tsijiꞌ bʌ trato bʌ tꞌan i chaꞌan bʌ Dios. Mach jiniqui mi lojon c subeꞌ lojon chaꞌan lac chꞌujbiben jini tsꞌijbubil bʌ mandar tsaꞌ bʌ aqꞌuenti Moisés. Pero mi lojon c subeꞌ chaꞌan lac chꞌujbiben jini muꞌ bʌ i yʌqꞌueñonla tsijiꞌ bʌ laj cuxtyʌlel mach bʌ baꞌan mi jilel. Como jini oniyix bʌ tsꞌijbubil bʌ mandar mi yʌcꞌ ti sajtyel quixtyañu. Pero wale chaꞌan ti Chꞌujul bʌ i Chꞌujlel Dios mi la cʌqꞌuentyel laj cuxtyʌlel machꞌʌ yujil jilel.

7 Jini i mandar tsaꞌ bʌ aqꞌuenti Moisés tsaꞌ tsꞌijbunti ti wechel bʌ tyun. Jini mandar ti aqꞌuenti ti sʌcleman bʌ i cꞌʌcꞌal chaꞌan ti ñuclel jini mandar. Jin chaꞌan mach chꞌujbi i qꞌuelben i niꞌ i wut Moisés jini israelob como wen sʌcleman i niꞌ i wut. Pero xucꞌul ti queji ti lajmel i sʌclel i niꞌ i wut. Cabʌl i ñuclel jini oniyix bʌ mandar tsaꞌ bʌ aqꞌuenti Moisés. Pero aunque an i ñuclel jini mandar mi yʌqꞌuen i majlel quixtyañu baꞌ miꞌ ñusan wocol ti caj i mul.

8 Pero ñoj cabʌl i ñuclel jini tꞌan muꞌ bʌ i yʌqꞌueñonla Chꞌujul bʌ i Chꞌujlel Dios wale iliyi.

9 Aunque añʌch i ñuclel jini tꞌan muꞌ bʌ i yʌqꞌueñob i majlel quixtyañu baꞌ mi majlel i ñusan wocol chaꞌan ti caj i mul pero yoque más añʌch i ñuclel jini tꞌan muꞌ bʌ i yʌl chaꞌan Dios mi yʌqꞌueñonla laj qꞌuejlel ti tyoj ti Dios.

10 Como jini oniyix bʌ mandar am bʌ i ñuclel ti ñoj oniyix maꞌix ñoj ñuc chaꞌan ti caj más anix i ñuclel jini tsijiꞌ bʌ mandar.

11 Aunque ñuc jini mandar tsaꞌix bʌ jili i cꞌʌjnibal wale iliyi, yoque más ñuc jini am bʌ i cꞌʌjnibal cꞌʌlʌ ti beleꞌ ora.

12 Chaꞌan cujil lojon isujm machꞌan i jilibal i ñuclel jini tꞌan muꞌ bʌ lojon c subeꞌ, jin chaꞌan machꞌan mi lojon bʌcꞌñan c chaꞌlen tꞌan.

13 Maꞌix mi lojon c mʌc i ni lojon c wut cheꞌ bajcheꞌ tiꞌ chaꞌle Moisés cheꞌ ñac tiꞌ moso i niꞌ i wut chaꞌan machꞌan mi yilʌbeñob israelob cheꞌ chʌncol i yajpel majlel i sʌclel i niꞌ i wut machꞌʌ chꞌujbi jalijel.

14 Pero jini israelob machꞌan tiꞌ chꞌʌmbeyob isujm. Cꞌʌlʌ wale iliyi maꞌix miꞌ chꞌʌmꞌeñob isujm cheꞌ miꞌ qꞌuelob jini oniyix bʌ trato bʌ tꞌan. Cheꞌ bajcheꞌ tiꞌ moso i ñiꞌ i wut Moisés ti ñoj oniyix, mosol tyo i niꞌ i wut israelob yubil cꞌʌlʌ wale iliyi. Como max tyo baꞌan miꞌ chꞌʌmꞌeñob isujm chaꞌan jilemix i ñuclel jini oniyix bʌ mandar. Chaꞌan jach ti Cristo chꞌujbi i chꞌʌmbeñob isujm chaꞌan tsaꞌix jili i cꞌʌjnibal oniyix bʌ mandar.

15 Cꞌʌlʌ wale iliyi cheꞌ miꞌ qꞌuelob jini tꞌan tsꞌijbubil bʌ chaꞌan Moisés, jini israelob maꞌix miꞌ chꞌʌmꞌeñob isujm. Cheꞌ bajcheꞌ bej mʌcʌl tyo i pusicꞌal yubil.

16 Pero cheꞌ an majch miꞌ chꞌujbin Cristo mi quejel i chꞌʌmꞌeñob isujm. Mi locꞌsʌntyel i mʌjquil i pusicꞌal yubil.

17 Lac Yum jiñʌch jini Chꞌujul bʌ i Chꞌujlel Dios. Baꞌical jach an Chꞌujul bʌ i Chꞌujlel lac Yum tsaꞌix cojliyob.

18 Jin chaꞌan joñonla chaꞌan maꞌix i mosil i niꞌ lac wut cheꞌ bajcheꞌ espejojonla yubil muꞌ bʌ i choqueꞌ majlel i yʌxñal i ñuclel lac Yum. Cheꞌ jini más añonla cheꞌ bajcheꞌ Cristo como jujunyaj cheꞌ miꞌ nijcʌbeñonla lac pusicꞌal mi lac bej qꞌuextyʌyel majlel. Miꞌ bej más aqꞌueñonla i ñuclel Cristo. Chʌꞌʌch miꞌ yʌqꞌueñonla la cajñel lac Yum. Jiñʌch jini Chꞌujul bʌ i Chꞌujlel Dios.