2 Maꞌix mi lojon c saj chaꞌlen jini quisintic bʌ ti melol muꞌ bʌ i chaꞌlen ti mucul yañoꞌ bʌ. Maꞌix mi lojon c jopꞌ c lotin quixtyañu. Maꞌix mi lojon c xʌcꞌtyun i tꞌan Dios ti yambʌ machꞌʌ wen bʌ tꞌan. Pero jini jach mi lojon c subeꞌ jini melel bʌ tꞌan. Dios yujil isujm chaꞌan pejtyelel quixtyañu chꞌujbi i yʌleꞌ tiꞌ pusicꞌal weñʌch mi lojon c chaꞌlen.

3 Pero mi mach tsiquilic i sujmlel jini tꞌan chaꞌan laj cotyʌntyel chʌncol bʌ lojon c subeꞌ, mucul jach chaꞌan jini muꞌ bʌ quejel i majlel i ñusan wocol chaꞌan ti caj i mul.

4 Como i dios jini i chaꞌañoꞌ bʌ mulawil, jini xiba, miꞌ mutsꞌeñob i wut yubil jini mach bʌ baꞌan miꞌ chꞌujbiñob Dios cheꞌ miꞌ mʌctyʌbeñob i chꞌʌmꞌeñob isujm. Maꞌix miꞌ qꞌuelbeñob i ñuclel Cristo muꞌ bʌ i tsictiyel tiꞌ tꞌan. Cristo jiñʌch Dios ti i bʌcꞌtyal.

5 Mach joñonic mic tyaj c bʌ ti tꞌan cheꞌ mucꞌon lojon ti subtꞌan. Pero mi lojon c subeꞌ lac Yumʌch Jesucristo. Mucꞌ jach lojon c sub lojon c bʌ ti ajtroñelon lojon laꞌ chaꞌan chaꞌan tiꞌ pꞌuntyʌyonla Jesús.

6 Como jini jach bʌ Dios tsaꞌ bʌ yʌcꞌʌ ti tsꞌʌjyel qꞌuin ti icꞌjowan bʌ mulawil ti ñoj oniyix ti yʌcꞌʌ ti tsictiyel i sʌclel ti lac pusicꞌal chaꞌan lac ñaꞌtyan i ñuclel Dios tsiquil bʌ ti Jesucristo.

7 Dios ti yʌqꞌueyon lojon tic wenta jini ñuc bʌ troñel chaꞌan c subeꞌ i tꞌan. Lac bʌcꞌtyal cheꞌ bajcheꞌ pꞌejt melel jach bʌ ti lum. Cheꞌ lumon jachla tsiquil cheꞌ jini tyʌlem ti Dios jini ñoj ñuc bʌ i pꞌʌtyʌlel muꞌ bʌ i tsictiyel cheꞌ mucꞌon lojon ti troñel. Mach lojon c bajñel c pꞌʌtyʌlel como i pꞌʌtyʌlel Dios mij cʌmben como lumon jachla yubil.

8 Aunque joy corrajlibilon lojon yubil ti cabʌl wocol pero bej añʌch bajcheꞌ mi lojon c loqꞌuel. Aunque maꞌix mi lojon c ñaꞌtyan bajcheꞌ mi quejel yujtyel pero xucꞌul lojon c pusicꞌal.

9 Aunque miꞌ tyʌcꞌlañon lojon pero maꞌix miꞌ cʌyon lojon Dios. Aunque mi lojon cajtsꞌel ti lojon j contra pero maꞌix mi lojon c sajtyel.

10 Baꞌical jach mi lojon c majlel bʌbʌqꞌuen an majch i tsʌnsañon lojon cheꞌ bajcheꞌ tiꞌ ñusʌ wocol tiꞌ bʌcꞌtyal lac Yum Jesús jeꞌel. Chʌꞌʌch mi yujtyel chaꞌan mi tsictiyel an i pꞌʌtyʌlel Jesús lojon quicꞌot chaꞌan miꞌ bej cʌñʌtyañon lojon.

11 Ti beleꞌ ora chʌncol lojon cʌcꞌ c bʌ ti sajtyel yubil chaꞌan ti caj Jesús chaꞌan mi tsictiyel i pꞌʌtyʌlel Jesús cheꞌ miꞌ bej cotyañon lojon.

12 Cheꞌ chʌncol lojon c subeꞌ i tꞌan Dios chʌncol lojon c bej cʌjqꞌuel ti sajtyel yubil chaꞌan ti lojon c tyʌcꞌlʌntyel. Pero mi loqꞌuel ti laꞌ wenlel como tsaꞌix laꞌ tyaja laꞌ cuxtyʌlel machꞌʌ yujil jilel tiꞌ caj.

13 Mi lojon c chꞌujbin cheꞌ bajcheꞌ mi yʌl jini Tsꞌijbubil bʌ i Tꞌan Dios baꞌ mi yʌleꞌ: Tic chꞌujbi. Jin chaꞌan tic chaꞌle tꞌan, cheꞌen. Chʌꞌʌch joñon lojon jeꞌel. Mi lojon c chꞌujbin, mi lojon c chaꞌlen tꞌan jeꞌel.

14 Como la cujil isujm Dios tsaꞌ bʌ i tyeche loqꞌuel lac Yum Jesús baꞌan sajtyemoꞌ bʌ cheꞌ yicꞌot Jesús mi quej i tyejch isañonla loqꞌuel yaꞌ baꞌan sajtyemoꞌ bʌ jeꞌel cheꞌ bajcheꞌ ti tyejchi loqꞌuel Jesús. Mi quejel i motin pʌyonla majlel ti i tyojlel.

15 Pejtyelel ili wocol tyac tsaꞌ bʌ c ñusʌ tic ñusʌ chaꞌan laꞌ wenlel. Chaꞌan cabʌlob mi yʌqꞌuentyel i yutslel Dios, cabʌlob miꞌ tyajob i cuxtyʌlel. Cabʌlob jeꞌel mi quejel i subeñob Dios wocox i yʌlʌ chaꞌan mi tsictiyel i ñuclel Dios.

16 Jin chaꞌan maꞌix baꞌ bʌ ora mi lojon c lujbꞌan ti i troñel Dios. Aunque chʌncox i jilel majlel i pꞌʌtyʌlel lojon c bʌcꞌtyal pero lojon c pusicꞌal miꞌ bej chꞌejlꞌan ti jujumpꞌej qꞌuin.

17 Como maꞌix ñoj wocol lac wocol yubil chʌncol bʌ lac ñusan wale iliyi. Como ñumel jach mucꞌ ili wocol wale iliyi. Miꞌ cotyañonla lac tyajeꞌ ñoj cabʌl bʌ lac ñuclel muꞌ bʌ la cʌqꞌuentyel mach bʌ baꞌan mi saj jilel.

18 Pero maꞌix mi lojon c bej pensalin jini wocol wʌꞌ ti mulawil. Mi lojon c ñaꞌtyan jini cꞌotyajax bʌ muꞌ tyo bʌ quejel laj qꞌueleꞌ yaꞌ baꞌan Dios. Como jini chʌncol bʌ laj qꞌueleꞌ wʌꞌ ti mulawil mi quejel i jilel. Pero jini muꞌ tyo bʌ quejel laj qꞌueleꞌ yaꞌ baꞌan Dios maꞌix mi quejel i jilel. Mi jalejel ti beleꞌ ora.