2-3 Cheꞌ jeꞌel cheꞌ wʌꞌ tyo añonla ti ili lac bʌcꞌtyal chꞌʌjyem mi la cubin como wersa la com la cʌqꞌuentyel jini muꞌ bʌ quejel laj cꞌʌn ti ajñel yaꞌ ti panchan chaꞌan añʌch i yajnib lac chꞌujlel ti beleꞌ ora.

4 Cheꞌ wʌꞌ tyo añonla ti ili lac bʌcꞌtyal chꞌʌjyemonla cheꞌ mi laj cꞌajtisan jini muꞌ tyo bʌ quejel la cʌqꞌuentyel. Mach chaꞌanic jach la com laj cʌyeꞌ ili tsucul bʌ lac bʌcꞌtyal pero la com la cajñel ti jini tsijiꞌ bʌ lac bʌcꞌtyal chaꞌan mi qꞌuextyʌyel ili laj cuxtyʌlel yujil jilel ti jini machꞌʌ yujil jilel.

5 Dios tiꞌ chajpʌbeyonla lac pusicꞌal chaꞌan lac tyajeꞌ jini tsijiꞌ bʌ lac bʌcꞌtyal. Tsaꞌix i wʌ aqꞌueyonla Chꞌujul bʌ i Chꞌujlel Dios chaꞌan mi tsictiyel an tyo yambʌ muꞌ tyo bʌ quejel la cʌqꞌuentyel.

6 Jin chaꞌan bej ñuc lojon c pusicꞌal. Lojon cujil isujm cheꞌ max tyo mi lojon cajñel ti jini tsijiꞌ bʌ c bʌcꞌtyal muꞌ bʌ quejel la cʌqꞌuentyel max tyo cꞌotyemonla baꞌan lac Yum.

7 Xucꞌul mi lojon cajñel chaꞌan ti jini muꞌ bʌ lac chꞌujbin mach chaꞌanic ti jini muꞌ bʌ laj qꞌueleꞌ wʌꞌ ti mulawil.

8 Pero ñuc lojon c pusicꞌal. Más com lojon j cʌyeꞌ ili lojon c bʌcꞌtyal chaꞌan mi lojon cajñel yaꞌ baꞌan lac Yum.

9 Jin chaꞌan cheꞌ añon tyo lojon ti ili c bʌcꞌtyal o mi mach añon lojon ti ili lojon c bʌcꞌtyal pero mi lojon c jopꞌ c bej chaꞌlen jini muꞌ bʌ i mulan lac Yum.

10 Como ti pejtyelelonla wersa mi quejel laj cꞌotyel yaꞌ baꞌ mi quejel lac mel lac bʌ tiꞌ tyojlel Cristo chaꞌan mi la cʌqꞌuentyel lac tyojol ti jujuntiquilonla cheꞌ bajcheꞌ ti lac chaꞌle mi wen o mi mach wen ti lac chaꞌle cheꞌ wʌꞌ tyo añonla ti ili lac bʌcꞌtyal.

11 Mi lojon c jopꞌ c suben quixtyañujob chaꞌan i chꞌujbin Dios chaꞌan mi cotyʌntyel como mi lojon c bʌcꞌñan lac Yum. Como cujil lojon tyal i yorojlel melojel. Yujil isujm Dios bajcheꞌ añon lojon. Mi cʌl mi laꞌ ñaꞌtyan ti laꞌ pusicꞌal chaꞌan ti pejtyel lojon c pusicꞌal mi lojon c chaꞌliben i troñel Dios.

12 Maꞌix mi lojon c chaꞌ tyaj c bʌ ti wen bʌ tꞌan chaꞌan com jach lojon c chan isan c bʌ. Pero chʌncol cʌqꞌueñetla laꞌ wubin cꞌajacña bʌ laꞌ woj chaꞌan ti joñon lojon. Chaꞌan jeꞌel chꞌujbi laꞌ tyajon lojon ti wen bʌ tꞌan tiꞌ tyojlel jini muꞌ bʌ i lolon pʌsob i bʌ ti más ñucob chaꞌan bajcheꞌ yilal miꞌ chaꞌleñob. Pero maꞌix xucꞌulob ti i pusicꞌal.

13 Miꞌ lolon qꞌuelon lojon cheꞌ bajcheꞌ mi locojon jini yañoꞌ bʌ chaꞌan chʌncol lojon c wen chaꞌliben i troñel Dios. Mach locojonic lojon como jiñʌch chaꞌan laꞌ wenlel.

14 I pꞌuntyaya Cristo miꞌ nijcʌbeñon lojon c pusicꞌal chaꞌan c chaꞌliben lojon i troñel. Como cujil lojon isujm ti sajti juntiquil chaꞌan pejtyelel quixtyañujob. Cheꞌ jini cheꞌ bajcheꞌ tsaꞌix luꞌ sajtiyob ti pejtyelelob yubil.

15 Cristo ti sajti chaꞌan pejtyelel quixtyañujob. Mach yom i yajñel chaꞌan i bajñel yom jach i wenlel jini tsaꞌ bʌ i tyajayob i cuxtyʌlel. Yom i yajñel chaꞌan miꞌ tsictisʌben i ñuclel Cristo tsaꞌ bʌ sajti, tsaꞌ bʌ chaꞌ tyejchi loqꞌuel baꞌan sajtyemoꞌ bʌ chaꞌañob.

16 Jin chaꞌan maꞌix mi lojon c bej pensalin bajcheꞌ an i ñuclel quixtyañu ti tyojlel Dios chaꞌan jach ti caj i ñuclel wʌꞌ ti mulawil. Aunque maꞌan i ñuclel Cristo ti lojon c lolon pensali ti yambʌ ora pero wale iliyi mach cheꞌic mi lojon c bej pensalin chaꞌan Cristo.

17 Jin chaꞌan majchical jach ochem ti i tꞌan Cristo tsijib melelix bʌ quixtyañu yubil. Tsaꞌix i luꞌ cʌyʌ i chaꞌlen jini machꞌʌ wen bʌ tsaꞌ bʌ i chaꞌle wajali. Luꞌ tsijibix mi majlel ti pejtyelel i chaꞌlibal yicꞌot i pensal.

18 Luꞌ i melbalʌch Dios cheꞌ miꞌ tsijibtisʌbeñonla lac pusicꞌal. Dios ti yʌqꞌueyonla la cajñel ti uts la quicꞌot Dios chaꞌan ti Cristo. Ti yʌqꞌueyon lojon tic wenta chaꞌan mic subeꞌ i tꞌan chaꞌan i luꞌ tyajob i ñʌchꞌtyʌlel i pusicꞌal yicꞌot Dios.

19 Dios an ti Cristo cheꞌ ti yuts isʌbe i pusicꞌal quixtyañujob cheꞌ tiꞌ qꞌuele ti tyoj. Dios ti yʌqꞌueyon lojon tic wenta chaꞌan mi lojon c subeꞌ jini tꞌan chaꞌan mi yuts an i pusicꞌal quixtyañu yicꞌot Dios.

20 I qꞌuexolonla Cristo. Cheꞌ bajcheꞌ Dios i bajñel chʌncol i subeñetla ti wocol tꞌan cheꞌ miꞌ cꞌʌmbeñon lojon c tiꞌ. Jin chaꞌan mi lojon c subeñetla ti wocol tꞌan chaꞌan chʌꞌʌch yom Cristo: Laꞌ uts isʌbentiquetla laꞌ pusicꞌal ti Dios, choꞌon lojon, cheꞌ yom i subeñetla Dios.

21 Cristo machꞌan ti saj chaꞌle mulil. Pero chaꞌan ti caj lac mul cheꞌ bajcheꞌ xmulil tiꞌ qꞌuele Dios Cristo. Chaꞌan mi lac tyem ajñel la quicꞌot Cristo Dios miꞌ qꞌuelonla ti tyoj chaꞌan cheꞌ yom i pusicꞌal Dios.