2 Joñon quicꞌot ti pejtyelel hermañujob wʌꞌ bʌ añob quicꞌot mi lojon c tsꞌijbun jun chaꞌan ochemet bʌ la tiꞌ tꞌan Dios muꞌ bʌ laꞌ muchꞌquin laꞌ bʌ yaꞌ ti pañimil Galacia bʌ i cꞌabaꞌ.

3 Com mi laꞌ chꞌʌm i yutslel Dios yicꞌot i ñʌchꞌtyʌlel laꞌ pusicꞌal tyʌlem bʌ ti Dios lac Tyat yicꞌot ti lac Yum Jesucristo.

4 Jini ti yʌcꞌʌ i bʌ ti sajtyel chaꞌan ti caj lac mul chaꞌan i cotyañonla loqꞌuel tiꞌ pꞌʌtyʌlel i simaronlel am bʌ ti ili mulawil chaꞌan cheꞌ yom Dios lac Tyat am bʌ ti panchan.

5 Laꞌ sujbic i ñuclel Dios ti beleꞌ ora. Amén.

6 Tyoj bʌcꞌñʌjelon mi cubin cheꞌ ti saj ora jach laꞌ wom laꞌ chaꞌ cʌyeꞌ Dios. Jiñʌch Dios tsaꞌ bʌ i pʌyʌyetla laꞌ chꞌujbin chaꞌan ajcotyayajʌch laꞌ chaꞌan Cristo, chaꞌan tiꞌ pꞌuntyʌyonla. Chʌncolix laꞌ lolon qꞌuel ti ñuc yambʌ tꞌan chaꞌan mi laꞌ ñaꞌtyan mi quejel laꞌ tyaj laꞌ cotyʌntyel mi laꞌ lolon al.

7 Maꞌix yambʌ wen bʌ tꞌan chaꞌan laj cotyʌntyel. Pero an jini chʌncol bʌ i sʌtbeñetla laꞌ pensal. Yom i qꞌuexob jini wen bʌ tꞌan chaꞌan laj cotyʌntyel.

8 Pero mi an majch miꞌ subeñetla yambʌ tꞌan chaꞌan laj cotyʌntyel mach bʌ baꞌan ti lojon c subeyetla, laꞌ chojquic ti Dios. Mi joñoñic o mi ajtroñelic i chaꞌan Dios chꞌoyol bʌ ti panchan mi tiꞌ subu yambʌ tꞌan chaꞌan laj cotyʌntyel, laꞌ chojquic ti Dios.

9 Tsaꞌix c subeyetla ti yambʌ ora pero mic chaꞌ subeñetla: Mi an majch miꞌ lolon subeñetla yambʌ tꞌan chaꞌan laj cotyʌntyel machꞌʌ baꞌan tic subetla, laꞌ choquic ti Dios jini quixtyañu.

10 Tsiquil cheꞌ mi cʌl cheꞌ bajcheꞌ ujtel cʌleꞌ chaꞌan machꞌan mi cʌqꞌuen i qꞌuelon ti wen quixtyañu pero mi cʌqꞌuen i qꞌuelon ti wen Dios. Muqꞌuic c sajcan c wenlel ti quixtyañujob, mach ajtroñelon i chaꞌan Dios, cheꞌ jini.

11 Pero laꞌ wujil isujm hermañujob mach i bajñel pensal quixtyañu ili wen bʌ tꞌan chaꞌan laj cotyʌntyel muꞌ bʌ c sub.

12 Machꞌan ti subentiyon jini wen tꞌan chaꞌan ti quixtyañu. Machꞌan majch tiꞌ cʌntisʌyon ti jini tꞌan. Pero i bajñel Jesucristo ti yʌqꞌueyon j cʌñeꞌ i sujmlel.

13 Tsaꞌix laꞌ wubi bajcheꞌ ti ajniyon ti ñaxan cheꞌ ñac tic chꞌujbi jini muꞌ bʌ i chꞌujbin lojon c piꞌʌlob jini israelob. Laꞌ wujil bajcheꞌ tic wersa tyʌcꞌlʌyob jini ochemoꞌ bʌ tiꞌ tꞌan Dios. Tic jopo quisañob.

14 Más cʌjqꞌuemon ti jini tꞌan tsaꞌ bʌ lojon c chꞌujbi bajcheꞌ cabʌl c piꞌʌlob ti colel israelon bʌ lojon, como más tsꞌʌcʌl tic jacꞌʌ i costumbre lojon c yumob ti ñoj oniyi.

15-16 Pero Dios ti yajcʌyon cheꞌ max tyo ti chꞌocʌyon. Chaꞌan tiꞌ wen pꞌuntyʌyon tiꞌ pʌyʌyon chaꞌan c chꞌujbin ajcotyayajʌch c chaꞌan Cristo. Cheꞌ jini chaꞌan cheꞌ yom i pusicꞌal Dios ti yʌqꞌueyon j cʌñeꞌ i Yalobil chaꞌan mic subeꞌ majlel i tꞌan chaꞌan i Yalobil baꞌan jini mach bʌ c piꞌʌlob jini mach bʌ israelob. Cheꞌ ñac ti yʌqꞌueyon j cʌñeꞌ i Yalobil machꞌan baꞌ saj tsajniyon j cꞌajtiben i sujmlel jini tꞌan.

17 Machꞌan ti majliyon ti Jerusalén chaꞌan mic tyaj j cʌntisʌntyel ti jini ñaxan bʌ yajcʌbiloꞌ bʌ ajsubtꞌañob ñumel. Pero ora jach ti majliyon ti pañimil Arabia bʌ i cꞌabaꞌ chaꞌan mi cajñel tic bajñel. Ti wiꞌil tyo ti chaꞌ cꞌotiyon ti Damasco.

18 Maꞌan poj chaꞌ tsajniyon ti Jerusalén cꞌʌlʌ uxpꞌej jab. Cheꞌ ñac chaꞌ tsajniyon yaꞌ tij cʌñʌ Pedro. Yaꞌi tic ñusʌ quince días quicꞌot.

19 Pero maꞌan tij cʌñʌ yambʌ yajcʌbiloꞌ bʌ ajsubtꞌañob ñumel ti jim bʌ ora. Jini jach tyo tij cʌñʌ yambʌ juntiquil yajcʌbil bʌ ajsubtꞌan ñumel Jacobo i yijtsꞌin bʌ lac Yum.

20 Mic subeñetla cheꞌ Dios miꞌ qꞌuelonla chaꞌan melelʌch jini chʌncol bʌ c tsꞌijbubeñetla.

21 Ti wiꞌil tsajniyon ti pañimil tyac Siria yicꞌot Cilicia bʌ i cꞌabaꞌ tyac.

22 La quermañujob muꞌ bʌ i muchꞌquiñob i bʌ i chaꞌan Cristo yaꞌ bʌ añob ti pañimil Judea bʌ i cꞌabaꞌ machꞌan tiꞌ cʌñʌyoñob.

23 Jini jach ti yubiyob ti alol: Jini tsaꞌ bʌ i ñaxan tyʌcꞌlʌyonla wale chʌncol i sub ñumel jini tꞌan yom bʌ mi lac chꞌujbin chaꞌan ajcotyayajʌch lac chaꞌan Cristo. Ti yambʌ ora yom i jisan jini tꞌan, cheꞌob.

24 Tiꞌ subeyob Dios wocolix i yʌlʌ chaꞌañon chaꞌan wale chʌncol c chꞌujbin jeꞌel.