2 Laꞌ ajniquetla ti yutslel i pusicꞌal yicꞌot i ñʌchꞌtyʌlel Dios lac Tyat yicꞌot lac Yum Jesucristo.

3 Laꞌ sujbic i ñuclel Dios jiñʌch i Tyat lac Yum Jesucristo. Chaꞌan añonla ti Cristo, Dios ti yʌqꞌueyonla chaꞌan ti Chꞌujul bʌ i Chꞌujlel pejtyelel wen tyac bʌ yom bʌ i yʌqꞌueñonla chaꞌan lac pusicꞌal. Chʌꞌʌch ti yʌqꞌueyonla cheꞌ bajcheꞌ yaꞌix añonla quicꞌot yaꞌ ti panchan yubil.

4 Cheꞌ ñac max tyo tiꞌ mele Dios ili mulawil tiꞌ wʌ yajcʌyonla chaꞌan mi la cajñel ti Cristo, chaꞌan mi la cʌcꞌ lac bʌ ti Dios, chaꞌan maꞌix lac mul tiꞌ wut.

5 Chaꞌan tiꞌ wen pꞌuntyʌyonla Dios ti wʌ yajcʌyonla cꞌʌlʌ ti ñoj oniyix chaꞌan mi la cajñel tiꞌ yalobilob chaꞌan ti Jesucristo. Chʌꞌʌch tiꞌ chaꞌle Dios chaꞌan chʌꞌʌch yom i pusicꞌal.

6 Jin chaꞌan mi lac bej sub i ñuclel Dios chaꞌan ñoj ñuc bʌ i yutslel i pusicꞌal tsaꞌ bʌ i yʌqꞌueyonla ti yonlel Dios chaꞌan añonla ti jini pꞌuntyʌbil bʌ i Yalobil.

7 Chaꞌan tiꞌ wen pꞌuntyʌyonla Dios, tiꞌ beque i chꞌichꞌel i Yalobil chaꞌan miꞌ cotyañonla chaꞌan miꞌ ñusʌbeñonla lac mul.

8 Ñoj cabʌl tiꞌ pʌsꞌeyonla i pꞌuntyaya Dios. Ti yʌqꞌueyonla pejtyelel lac ñaꞌtyʌbal yicꞌot tyoj bʌ lac pensal,

9 chaꞌan i tsictisʌbeñonla chʌ bʌ yom i pusicꞌal Dios machꞌʌ baꞌan tsictiyem ti yambʌ ora. Jiñʌch bajcheꞌ tiꞌ wʌ ñaꞌtyʌ mi quej i chaꞌlen Dios.

10 Cheꞌ mi cꞌotyel i yorojlel Dios mi quej i chaꞌlen bajcheꞌ ti wʌ alʌ. Mi quej i luꞌ aqꞌuen tiꞌ wenta Cristo pejtyel chʌ bʌ jach yes an yaꞌ ti panchan yicꞌot chʌ bʌ yes an wʌꞌ ti mulawil.

11 Chaꞌan añonla ti Cristo, Dios ti wʌ yajcʌyonla chaꞌan mi la cʌqꞌuentyel jini muꞌ bʌ i yʌqꞌueñonla. Chʌꞌʌch mi quej i yujtyel como chʌꞌʌch tiꞌ wʌ ñaꞌtyʌ Dios. Mux i bej chaꞌlen Dios bajcheꞌ wen mi yubin.

12 Chʌꞌʌch ti wʌ yajcʌntiyon lojon chaꞌan mi lojon cajñel cheꞌ bajcheꞌ yom chaꞌan mi sujbel i ñuclel Dios chaꞌan ti joñon lojon tsaꞌ bʌ lojon c ñaxan pijtyʌ Cristo.

13 Jatyetla jeꞌel cheꞌ ñac ti laꞌ wubi jini melel bʌ tꞌan, jiñʌch jini wen bʌ tꞌan chaꞌan laj cotyʌntyel, ti ochiyetla ti Cristo cheꞌ ti laꞌ chꞌujbi Cristo ti laꞌ pusicꞌal. Cheꞌ jini, Dios ti yʌqꞌuetla Chꞌujul bʌ i Chꞌujlel ti laꞌ pusicꞌal cheꞌ bajcheꞌ ti wʌ alʌ. Cheꞌ bajcheꞌ laꞌ marcajlel jini Chꞌujul bʌ i Chꞌujlel chaꞌan tsiquil i chaꞌañetla Dios.

14 Dios ti yʌqꞌueyonla jini Chꞌujul bʌ i Chꞌujlel chaꞌan mi lac ñaꞌtyan yoque melelʌch mi quej i yʌqꞌueñonla pejtyelel tsaꞌ bʌ i wʌ alʌ mi quej la cʌqꞌuentyel cheꞌ tsaꞌix i tsꞌʌctisʌ laj cotyʌntyel. Chʌꞌʌch tiꞌ chaꞌle Dios chaꞌan mi sujbel i ñuclel.

15 Joñon ti cubi ti laꞌ chꞌujbi lac Yum Jesús yicꞌot chʌncol laꞌ pꞌuntyan pejtyelel i chaꞌañoꞌ bʌ Dios.

16 Jin chaꞌan maꞌan mi cʌctyan c suben Dios wocox i yʌlʌ chaꞌañetla cheꞌ mij cꞌajtisañetla ti oración.

17 Mij cꞌajtiben i Dios lac Yum Jesucristo jiñʌch i Tyat am bʌ i ñuclel, chaꞌan mi yʌqꞌueñetla laꞌ ñaꞌtyʌbal tyʌlem bʌ ti Chꞌujul bʌ i Chꞌujlel yicꞌot chaꞌan mi laꞌ más chꞌʌmꞌen isujm jini muꞌ bʌ i tsictisʌbeñonla chaꞌan mi laꞌ más cʌñeꞌ Dios.

18 Mij cꞌajtiben Dios chaꞌan mi yʌqꞌueñetla laꞌ wen ñaꞌtyan chʌ bʌ yes chʌncol bʌ i pijtyañob jini tsaꞌ bʌ pʌjyiyob chaꞌan i chꞌujbiñob Dios. Yicꞌot chaꞌan mi laꞌ ñaꞌtyan yoque ñuc, yoque cꞌotyajax jini muꞌ bʌ i yʌqꞌuen Dios jini i chaꞌañoꞌ bʌ yaꞌ ti panchan yicꞌot.

19-20 Mij cꞌajtiben Dios jeꞌel chaꞌan mi yʌqꞌueñetla laꞌ ñaꞌtyan ñoj ñuc i pꞌʌtyʌlel Dios. Mach i sajlic jach an i pꞌʌtyʌlel Dios muꞌ bʌ ti toñel ti lac pusicꞌal joñon bʌ la chʌncol bʌ lac chꞌujbin. Como jiñʌch ñoj ñuc bʌ i pꞌʌtyʌlel Dios tsaꞌ bʌ i pʌsʌ cheꞌ ñac tiꞌ tyeche loqꞌuel Cristo baꞌan sajtyemoꞌ bʌ. Ti yʌcꞌʌ ti buchtyʌl yaꞌ tiꞌ ñoj Dios yaꞌ ti panchan chaꞌan tsiquil añʌch i ñuclel Jesús.

21 Ti aqꞌuenti más ñuc bʌ i pꞌʌtyʌlel Jesús cheꞌ bajcheꞌ i chaꞌan bʌ pejtyelel yumʌlob wʌꞌ bʌ añob ti mulawil mi ajtroñelob i chaꞌan bʌ Dios yaꞌ ti panchan, mi xibajob yicꞌot ajtroñelob i chaꞌan bʌ xiba. Más ñuc Cristo cheꞌ bajcheꞌ majchical bʌ yumʌlob. Mach jinic jach ti ili ora pero an ñoj ñuc bʌ i pꞌʌtyʌlel Cristo ti tyal tyo bʌ ora jeꞌel.

22 Dios ti yotsʌbe tiꞌ wenta Cristo ti pejtyelel chʌ bʌ an tyac. Ti yʌqꞌue pejtyelel ochemoꞌ bʌ tiꞌ tꞌan Dios chaꞌan i luꞌ yumiñob Cristo.

23 Ochemoꞌ bʌ tiꞌ tꞌan Dios cheꞌ bajcheꞌ i bʌcꞌtyalʌch Cristo yubil. Cristo i jolʌch yubil. Tsꞌʌcʌlob cheꞌ añob ti Cristo. Cristo miꞌ tsꞌʌctisan baꞌ jaxʌl yom pejtyʌlel chʌ bʌ an tyac como an ti pejtyelel baꞌical jach an.