PABLO TIꞌ TSꞌIJBU JUN CHAꞌAN JINI AÑOꞌ BɅ TI FILIPOS
An ti cʌchol Pablo miꞌ tsꞌijbubeñob jun ochemoꞌ bʌ tiꞌ tꞌan Dios yaꞌ ti Filipos
1
Joñon Pablojon quicꞌot Timoteo ajtroñelon lojon i chaꞌan Jesucristo. Mi lojon c tsꞌijbubeñetla ili jun pejtyelel ochemet bʌ la tiꞌ tꞌan Dios yicꞌot ajcʌñʌtya ochemoꞌ bʌ tiꞌ tꞌan Dios yicꞌot diáconojob yaꞌ ti lum Filipos bʌ i cꞌabaꞌ. I chaꞌañet bʌ la Dios. Mi laꞌ tyem ajñel yicꞌot Cristo Jesús.2 Laꞌ ajniquetla ti yutslel i pusicꞌal Dios yicꞌot i ñʌchꞌtyʌlel tyʌlem ti Dios lac Tyat yicꞌot lac Yum Jesucristo.
I yoración Pablo chaꞌan ochemoꞌ bʌ tiꞌ tꞌan Dios
3 Ti jujunyajlel cheꞌ mij cꞌajtisañetla, mic suben Dios wocox i yʌlʌ chaꞌañetla.
4 Cheꞌ mic chaꞌlen oración ti cꞌajacña bʌ coj mic beleꞌ pejcʌbeñetla Dios ti laꞌ pejtyelel.
5 Como cꞌʌlʌ wajali cheꞌ ñac ti laꞌ ñaxan ubi i tꞌan Dios cꞌʌlʌ wale iliyi ti laꞌ wen cotyʌyon tiꞌ pucol jini wen tꞌan.
6 Cujil isujm chaꞌan Dios tsaꞌ bʌ queji i chaꞌlen wen bʌ toñel ti laꞌ pusicꞌal mi quej i tsꞌʌctisan majlel jini toñel cꞌʌlʌ jintyo yaꞌ bʌ mi chaꞌ tyʌlel Jesucristo.
7 Chʌꞌʌch yom mic bej cꞌajtisʌbeñetla cheꞌ bajcheꞌ jini como mic wen pꞌuntyañetla. Como chʌncol lac motin ubin i yutslel i pusicꞌal Dios mi wʌꞌ añon ti cʌchol o mi mach wʌ añon ti cʌchʌl chaꞌan mic wen tsictisʌbeñob i tꞌan Dios chaꞌan mic subeñob yoque melelʌch.
8 Como Dios yujil isujm bajcheꞌ i yonlel mic pꞌuntyañetla ti laꞌ pejtyelel. Mic pꞌuntyañetla cheꞌ bajcheꞌ miꞌ wen pꞌuntyañonla Jesucristo.
9 Mij cꞌajtiben Dios chaꞌan mi más ocꞌan laꞌ pꞌuntyaya yicꞌot chaꞌan mi ocꞌan cabʌl laꞌ ñaꞌtyʌbal yicꞌot chaꞌan mi laꞌ más ñaꞌtyan bajcheꞌ yom ajniquetla.
10 Mij cꞌajtiben Dios chaꞌan mi laꞌ ñaꞌtyan bajcheꞌ yom mi laꞌ beleꞌ yajcan jini más wen bʌ laꞌ pensal. Cheꞌ jini chꞌujbiyix ajniquetla ti tyoj. Maꞌan majch chꞌujbi i tyajetla ti tꞌan cheꞌ mi chaꞌ tyʌlel Cristo.
11 Cheꞌ jini Jesucristo mi yʌqꞌueñetla laꞌ chaꞌlen wen bʌ laꞌ chaꞌlibal. Cheꞌ jini, ti laꞌ chaꞌlibal chʌncol laꞌ wʌcꞌ ti qꞌuelol yicꞌot tiꞌ subol i ñuclel Dios.
Cheꞌ cuxulon tyo mic chʌc chaꞌliben i toñel Cristo
12 Hermañujob, com mi laꞌ chꞌʌmꞌen isujm chaꞌan pejtyelel jini wocol tsaꞌ bʌ c ñusʌ ti yʌcꞌʌ ti utsi pujquel jini wen bʌ tꞌan chaꞌan laj cotyʌntyel.
13 Cheꞌ jini, pejtyelel soldadojob muꞌ bʌ i cʌñʌtyan i yotyot ñuc bʌ i yeꞌtyel yicꞌot pejtyelel yañoꞌ bʌ, miꞌ luꞌ ñaꞌtyañob cʌchʌlon chaꞌan ti caj mic chꞌujbin Cristo tic pusicꞌal.
14 Chaꞌan ti yubiyob cʌchʌlon lʌcꞌʌl ti pejtyelel hermañujob ti xucꞌleyob i pusicꞌal ti lac Yum. Más chꞌejlob wale iliyi chʌncol i subob majlel i tꞌan Dios. Machꞌañobix i bʌqꞌuen.
15 Melel an jini muꞌ bʌ i subeꞌ i tꞌan Cristo chaꞌan bajñel michꞌob tiꞌ pusicꞌal cheꞌ miꞌ qꞌuelob bajcheꞌ miꞌ cꞌʌñon Dios. Yom jach i tyechob periyal. Pero an yañoꞌ bʌ miꞌ subeꞌ majlel chaꞌan miꞌ mulan i yʌcꞌ ti ubintyel i tꞌan Dios.
16 An chaꞌtiquil uxtiquil miꞌ subob i tꞌan Cristo chaꞌan jach yom i chan isañob i bʌ. Chaꞌchajp i pensal. Yom jach i yʌqꞌueñon c más ñusan wocol wale cheꞌ cʌchʌlon.
17 Pero yañoꞌ bʌ miꞌ subeꞌ i tꞌan Cristo chaꞌan miꞌ pꞌuntyañon. Yujilob isujm wʌꞌ añon ti cʌchol chaꞌan ti caj mic subeꞌ yoque melelʌch jini wen bʌ tꞌan chaꞌan laj cotyʌntyel.
18 Pero maꞌan chʌ bʌ miꞌ chaꞌlen mi ti jumpꞌej i pusicꞌal miꞌ subob, mi ti chaꞌchajp i pusicꞌal miꞌ subob Cristo. Cꞌajacña coj cheꞌ chʌncol i sujbel Cristo. Más cꞌajacña tyo coj mi quej cubin.
19 Cujil isujm weñʌch mi quej i yujtyel quicꞌot chaꞌan ti caj laꞌ woración yicꞌot chaꞌan ti Chꞌujul bʌ i Chꞌujlel Jesucristo chʌncol bʌ i cotyañon tic wocol.
20 Pero jini com bʌ ti pejtyelel c pusicꞌal jiñʌch chaꞌan maꞌan mi quej c quisnin pero chaꞌan wen chꞌejl mic subeꞌ i tꞌan Dios wale iliyi yicꞌot ti beleꞌ qꞌuin. Machꞌan chʌ bʌ miꞌ chaꞌlen mi cuxulon mi sajtyemon. Jini jach com mi más ajqꞌuel ti ñuc Cristo chaꞌan ti caj joñon.
21 Mi cuxulon mic chʌc chaꞌliben i toñel Cristo. Mi ti sajtiyon más cꞌotyajax cheꞌ jini como mic majlel tiꞌ tyojlel Cristo.
22 Pero mi más jal tyo cuxulon más jal tyo mic chaꞌliben i toñel lac Yum. Mach cujila baqui bʌ yom mic yajcan.
23 Wocol mic ñaꞌtyan mi yom mic yajcan sajtyel, o yom mic yajcan chaꞌan bej cuxul mi cajñel. Cheꞌ bajcheꞌ chaꞌchajp c pensal mi cubin. Com c sajtyel chaꞌan mic majlel tiꞌ tyojlel Cristo como jiñʌch más wen bʌ mi cubin.
24 Pero chaꞌan laꞌ wenlel más yom cheꞌ cuxulon tyo chaꞌan mic bej cotyañetla.
25 Cujil isujm chaꞌan más wen chaꞌañetla cheꞌ cuxulon tyo chaꞌan mi laꞌ más xucꞌchocon laꞌ bʌ ti lac Yum, chaꞌan miꞌ más ocꞌan cꞌajacña bʌ laꞌ woj chaꞌan ti laꞌ chꞌujbi Jesús. Jin chaꞌan cujil isujm jal tyo bej cuxulon.
26 Cheꞌ mic chaꞌ cꞌotyel yaꞌ baꞌ añetla más tijicña mi quej laꞌ wubin ti Cristo Jesús. Mi quej laꞌ suben wocox i yʌlʌ Dios chaꞌan Dios tiꞌ locꞌsʌyon ti cʌchol.
27 Pero maꞌan chʌ bʌ miꞌ chaꞌlen mi an chʌ bʌ mic tyumbentyel. Yom jach ajniquetla ti tyoj cheꞌ bajcheꞌ yom cheꞌ ochemonla tiꞌ tꞌan Cristo. Cheꞌ jini mi ti tyʌliyon j qꞌueletla, mi maꞌan ti tyʌliyon, pero com cubin chaꞌan xucꞌuletla ti lac Yum. Ti jumpꞌej laꞌ pusicꞌal mi laꞌ motin chaꞌlen wersa chaꞌan mi laꞌ yoque chꞌujbin jini tꞌan chaꞌan laj cotyʌntyel.
28 Mach yom mi laꞌ bʌcꞌñan jini muꞌ bʌ i contrajiñetla. Cheꞌ jini yoque tsiquil mi quej i yubiñob chaꞌan machꞌañobix i cotyʌntyel ti Cristo. Mi quej i majlelob ti xotꞌmulil. Pero cheꞌ maꞌan mi laꞌ bʌcꞌñañob, tsiquilʌch jeꞌel añʌch laꞌ cotyʌntyel tyʌlem ti Dios.
29 Pero chaꞌan tiꞌ ñusʌ wocol Cristo chaꞌañetla tsaꞌix aqꞌuentiyetla mach jinic jach chaꞌan mi laꞌ chꞌujbin Cristo, pero chaꞌan mi laꞌ ñusan wocol chaꞌan tiꞌ caj jeꞌel.
30 Wale lajal añʌch lac wocol. Tsaꞌix laꞌ wilʌ bajcheꞌ tic ñusʌ wocol ti yambʌ ora. Chʌncox laꞌ wubin bajcheꞌ chʌncol tyo c ñusan cꞌʌlʌ wale iliyi.