2 Mi cheꞌʌch añetla, tsꞌʌctisʌbeñon i tijicñʌyel c pusicꞌal chaꞌan chʌncox laꞌ wajñel ti ñʌchꞌʌl, chaꞌan chʌncox laꞌ pꞌuntyan laꞌ bʌ ti jumpꞌej jach laꞌ pusicꞌal yicꞌot an junlajal bʌ laꞌ pensal, junlajal laꞌ tꞌan.

3 Mach yom chʌ bʌ mi laꞌ saj chaꞌlen chʌ bʌ jach bajñel yom bʌ laꞌ pusicꞌal, mi chaꞌan jach laꞌ wom laꞌ chan isan laꞌ bʌ. Pero peqꞌuisan laꞌ bʌ. Yom más ñuc mi laꞌ qꞌuel laꞌ piꞌʌlob cheꞌ bajcheꞌ mi laꞌ bajñel qꞌuel laꞌ bʌ.

4 Mach jinic jach yom mi laꞌ bajñel pensalin laꞌ bajñel laꞌ wenlel, pero yom mi laꞌ pensalin i wenlel laꞌ piꞌʌlob jeꞌel.

5 Yom junlajal laꞌ pensal cheꞌ bajcheꞌ miꞌ pensalin Cristo Jesús.

6 Aunque junlajal Jesús yicꞌot Dios pero maꞌan tiꞌ poj wersa ajni ti junlajal yicꞌot Dios.

7 Pero tiꞌ poj cʌyʌ lajal bʌ i ñuclel yicꞌot Dios. Ti wen peqꞌuisʌ i bʌ. Ti ajni cheꞌ bajcheꞌ ajtoñel jach. Ti chꞌocʌ wʌꞌ ti mulawil cheꞌ bajcheꞌ quixtyañu jach.

8 Cheꞌ chʌncol i yajñel cheꞌ bajcheꞌ mi quixtyañu jach tiꞌ wen peqꞌuisʌ i bʌ. Ti yʌcꞌʌ i bʌ ti sajtyel ti cruz, aunque jiñʌch jini más quisintic bʌ bajcheꞌ mi tsʌnsʌntyelob.

9 Jin chaꞌan Dios ti yʌqꞌue ñoj cabʌl i ñuclel yicꞌot ñoj ñuc bʌ i cꞌabaꞌ. Machꞌan más ñuc bʌ cꞌabʌjlel bajcheꞌ i cꞌabaꞌ Jesús.

10 Jin chaꞌan, cheꞌ mi yubiñob i cꞌabaꞌ Jesús mi quej i ñocchocoñob i bʌ pejtyelelob yaꞌ ti panchan, yicꞌot wʌꞌ ti mulawil yicꞌot xiba yicꞌot yajtoñelob xiba yicꞌot pejtyelelob añoꞌ bʌ ti xotꞌmulil.

11 Ti pejtyelelob mi quej i yʌlob chaꞌan i yumobʌch Jesucristo chaꞌan qꞌuejlic ti ñuc Dios lac Tyat.

12 Jin chaꞌan, pꞌuntyʌbilet bʌ quermañujob, cheꞌ bajcheꞌ ti laꞌ beleꞌ chꞌujbibeyon c tꞌan cheꞌ ñac yaꞌ tyo añon laꞌ wicꞌot, yom tyo mi laꞌ más chꞌujbibeñon c tꞌan cheꞌ ñajt añon. Ti laꞌ pecꞌlel cheꞌ chʌncol laꞌ qꞌuel ti ñuc Dios, bej chaꞌlenla wersa chaꞌan mi tsictiyel laꞌ cotyʌntyel chaꞌan ti laꞌ chaꞌlibal. Mach yom mi laꞌ saj chaꞌlen jini machꞌʌ baꞌan miꞌ mulan i qꞌueleꞌ Dios.

13 Como jiñʌch Dios muꞌ bʌ ti toñel ti laꞌ pusicꞌal i yʌqꞌueñetla laꞌ mulan laꞌ chaꞌlen chʌ bʌ wen. Jini mi yʌqꞌueñet laꞌ chaꞌlen cheꞌ bajcheꞌ yoque yom i pusicꞌal Dios.

14 Ti chʌ bʌ tyac jach mi laꞌ chaꞌlen mach yom mi laꞌ chaꞌlen ti michꞌicniyel, mi ti periyalic bʌ tꞌan,

15 chaꞌan maꞌan majch chꞌujbi i tyajetla ti tꞌan, chaꞌan maꞌix laꞌ mul. Chʌꞌʌch yom laꞌ pʌs laꞌ bʌ cheꞌ bajcheꞌ jini como i yalobiletla Dios machꞌʌ baꞌan laꞌ mul. Yom mi laꞌ pʌs laꞌ bʌ cheꞌ bajcheꞌ mi tsꞌʌjyel ecꞌ chaꞌan tsiquil i chaꞌañetla Cristo aunque mi laꞌ wajñel baꞌan simaroñoꞌ bʌ quixtyañujob machꞌʌ wen miꞌ chaꞌleñob.

16 Ti laꞌ melbal mi laꞌ pʌsꞌeñob chaꞌan ti tsijibtisʌyetla jini tꞌan muꞌ bʌ laꞌ sub. Cheꞌ jini, cheꞌ mi chaꞌ tyʌlel Cristo cꞌajacña coj mi quej cubin chaꞌañetla. Cheꞌ mic ñaꞌtyan mach lolomic jach tic subetla i tꞌan Dios, mach lolomic jach tic chaꞌle wersa chaꞌan laꞌ chꞌujbin.

17 Chaꞌan ti laꞌ wen chꞌujbi, chaꞌan ti laꞌ wen acꞌʌ laꞌ bʌ ti Dios, cheꞌ bajcheꞌ ti laꞌ wʌqꞌue i majtyan Dios. Aunque mi ti tsʌnsʌntiyon chaꞌan tsʌnsʌbil bʌ i majtyan Dios yubil, chaꞌan i tsꞌʌctisʌntyel i majtyan Dios muꞌ bʌ laꞌ wʌqꞌuen, cꞌajacña coj mi quej cubin. Yom cꞌajacña laꞌ woj quicꞌotyetla.

18 Tijicnisan laꞌ bʌ jeꞌel. Yom tyem tijicñayetla quicꞌot.

19 Mi chʌꞌʌch yom lac Yum Jesús, mach jalic com choqueꞌ majlel Timoteo yaꞌ baꞌ añetla chaꞌan i julaꞌ añetla chaꞌan i ñuc isʌbeñon c pusicꞌal jeꞌel cheꞌ mi cubin bajcheꞌ añetla.

20 Como maꞌan wʌꞌan yambʌ quicꞌot lajal bʌ i pensal cheꞌ bajcheꞌon, muꞌ bʌ i pensalin laꞌ wenlel ti jumpꞌej i pusicꞌal cheꞌ bajcheꞌ Timoteo.

21 Pejtyelel yañoꞌ bʌ miꞌ pensalin i bajñel i wenlel. Maꞌan miꞌ pensaliñob i chaꞌan bʌ Cristo Jesús.

22 Pero jatyetla laꞌ wujil isujm bajcheꞌ xucꞌul mi yajñel Timoteo. Cheꞌ bajcheꞌ miꞌ piꞌlen ti toñel i tyat alob, chʌꞌʌch tiꞌ chaꞌle toñel Timoteo quicꞌot tiꞌ pucol ili tꞌan chaꞌan laj cotyʌntyel.

23 Seb jach com c choqueꞌ majlel Timoteo i julaꞌ añetla cheꞌ mi cubin bajcheꞌ mi quej cujtyel.

24 Mi cʌl mux i cotyañon lac Yum. Mi cʌl maꞌix jal mi quej c tyʌlel c julaꞌ añetla jeꞌel.

25 Pero mic pensalin jeꞌel cꞌʌjnibal mic choqueꞌ majlel lac hermano Epafrodito yaꞌ baꞌ añetla. Jini tiꞌ wen chaꞌle toñel quicꞌot tiꞌ pucol i tꞌan Dios. Lajal ti lojon cubi lojon c tsꞌaꞌlentyel chaꞌan ti caj jini wen tꞌan. Jatyetla ti laꞌ choco tyʌlel Epafrodito chaꞌan miꞌ cotyañon ti chʌ bʌ i cꞌʌjnibal c chaꞌan.

26 Epafrodito wersa yom i chaꞌ qꞌueletla ti laꞌ pejtyelel. Wen muꞌ ti pensal jeꞌel chaꞌan ti laꞌ wubi tiꞌ cꞌamꞌʌ.

27 Melel tiꞌ wen cꞌamꞌʌ. Colel i sajtyel. Pero Dios tiꞌ cotyʌ. Mach jinic jach tiꞌ cotyʌ Epafrodito pero Dios tiꞌ cotyʌyon jeꞌel chaꞌan machꞌan mi más ocꞌan i chꞌʌjyemlel c pusicꞌal chaꞌan ti caj i cꞌamꞌan.

28 Jin chaꞌan más com tyo c choqueꞌ tyʌlel yaꞌ baꞌ añetla chaꞌan i ñuc isʌntyel laꞌ pusicꞌal cheꞌ mi laꞌ chaꞌ qꞌueleꞌ i ñiꞌ i wut. Yicꞌot chaꞌan mi lajmel c chꞌʌjyemlel jeꞌel.

29 Ti tijicñʌyel laꞌ pusicꞌal pʌyʌla ochel Epafrodito baꞌ añetla como jini miꞌ chaꞌliben i toñel lac Yum jeꞌel. Yom mi laꞌ qꞌuel ti ñuc jini muꞌ bʌ i yajñel cheꞌ bajcheꞌ jini Epafrodito.

30 Como colel i sajtyel chaꞌan tiꞌ chaꞌlibe i toñel Cristo. Maꞌan tiꞌ pensali i bajñel i cuxtyʌlel. Ti yʌcꞌʌ i bʌ baꞌ bʌbʌqꞌuen mi sajtyel chaꞌan miꞌ wen cotyañon ti pejtyelel jini baꞌ mach chꞌujbi laꞌ cotyañon chaꞌan ñajt añetla.