2 Cʌñʌtyan laꞌ bʌ chaꞌan jini muꞌ bʌ i lolon jopꞌ i jisʌben i toñel Dios. Muꞌ bʌ i jopꞌ i lotiñetla, muꞌ bʌ i lolon xiqꞌuetla laꞌ chꞌʌm tsep pʌchʌlel.

3 Jini tsaꞌix bʌ yoque chꞌʌmʌ tsep pʌchʌlel yubil jiñʌch joñonla cheꞌ ti jumpꞌej jach lac pusicꞌal ochemonla tiꞌ tꞌan Dios. Mi lac chꞌujutisan Dios ti Chꞌujul bʌ i Chꞌujlel. Cꞌajacña la coj chaꞌan i chaꞌañonla Cristo Jesús. Maꞌan mi lac lolon qꞌuel lac bʌ ti wen chaꞌan ti tsepbentiyonla lac pʌchʌlel.

4 Joñon jeꞌel an chʌ bʌ och chꞌujbi j qꞌuel c bʌ ti wen yubil chaꞌan tic chꞌʌmʌ tsep pʌchʌlel. Mi anic juntiquil chꞌujbi i qꞌuel i bʌ ti wen chaꞌan i bajñel i wenlel i bʌcꞌtyal joñon más an i wenlel c bʌcꞌtyal lolon yubil cheꞌ bajcheꞌ yañoꞌ bʌ.

5 Como cheꞌ an jach tyo ocho qꞌuin ti chꞌocʌyon ti aqꞌuentiyon tsep pʌchʌlel cheꞌ bajcheꞌ i tyʌlel miꞌ chaꞌlen jini lojon c piꞌʌlob. Loqꞌuemon tiꞌ jiñʌjlel Israel. Loqꞌuemon tiꞌ jiñʌjlel Benjamín. Yoque hebreojon como hebreojob c tyat yicꞌot c ñaꞌ jeꞌel. Fariseojon chaꞌan bajcheꞌ tic chꞌujbi tsꞌijbubil bʌ i mandar Moisés.

6 Chaꞌan wen chꞌejlon chaꞌan bajcheꞌ tic chꞌujbi i tsꞌijbuya Moisés tic wen tyʌcꞌlʌyob jini ochemoꞌ bʌ tiꞌ tꞌan Dios. Pero chaꞌan ti jumpꞌej jach c pusicꞌal tic chꞌujbi i tsꞌijbuya Moisés maꞌan majch chꞌujbi i yʌleꞌ mi an c mul.

7 Pero pejtyelel c melbal tsaꞌ bʌ c lolon chaꞌle chaꞌan mic tyaj j cotyʌntyel, wale tsaꞌix c luꞌ cʌyʌ cheꞌ ñac tic chꞌʌmʌ isujm chaꞌan ti Cristo jach an laj cotyʌntyel.

8 Mach jinic jach c melbal pero pejtyelel chʌ bʌ jach tic ñaꞌtyʌ, chʌ bʌ jach tic chaꞌle ti yambʌ ora tsaꞌix c luꞌ cʌyʌ. Ti jumpꞌej jach c pusicꞌal mic más cʌn Cristo Jesús lac Yum. Chaꞌan ti caj Cristo, pejtyelel tsaꞌ bʌj qꞌuele ti ñuc ti wajali wale tsaꞌix c luꞌ cʌyʌ. Wale mij qꞌueleꞌ cheꞌ bajcheꞌ basura jachix chaꞌan mi yajñel Cristo tic pusicꞌal.

9 Wale iliyi mi cajñel quicꞌot Cristo. Mach chaꞌanic tic chꞌujbibe i tsꞌijbuya Moisés tic tyaja tyoj bʌ c pusicꞌal pero chaꞌan tic chꞌujbi Cristo tic pusicꞌal chʌncol i qꞌuelon ti wen Dios como Dios miꞌ qꞌuel ti wen jini muꞌ bʌ i chꞌujbin.

10 Jiñʌch bajcheꞌ com chaꞌan mic más cʌñeꞌ Cristo. Com an quicꞌot i pꞌʌtyʌlel tsaꞌ bʌ i cꞌʌñʌ cheꞌ ñac ti tyejchi loqꞌuel baꞌan sajtyemoꞌ bʌ. Com cubin wocol jeꞌel jintyo mi cubin bajcheꞌ ti yubi wocol tyac Cristo, jintyo mic sʌt tic pusicꞌal pejtyel muꞌ bʌ c bajñel mulan.

11 Mi chꞌujbiyʌch, com cajñel ti xucꞌul chaꞌan joñon jeꞌel mic tyejchel loqꞌuel baꞌan sajtyemoꞌ bʌ.

12 Pero machꞌan mic lolon aleꞌ chaꞌan tsaꞌix c luꞌ tyaja pejtyelel jini com bʌ c tyaj. Max tyo baꞌan tsꞌʌcʌl c wenlel. Pero mic bej chaꞌlen wersa chaꞌan c tyajeꞌ c wenlel ti Cristo Jesús como tsaꞌix i yotsʌyon tiꞌ yalobil.

13 Hermañujob, machꞌan mic lolon c bajnel ñaꞌtyan chaꞌan tsꞌʌcʌl tic tyaja jini yom bʌ i yʌqꞌueñon Cristo, pero ti junsujm jach c pensal chʌncol c ñajatisan tic pusicꞌal jini tsaꞌ bʌ ujti ti yambʌ ora. Cheꞌ jach mic chaꞌlen wersa chaꞌan mic tyajeꞌ jini muꞌ tyo bʌ quej i yujtyel.

14 Jin chaꞌan mic chʌc chaꞌlen wersa chaꞌan mic ganarin jini muꞌ bʌ la cʌqꞌuentyel. Jini wersa com bʌ muꞌ bʌ la cʌqꞌuentyel jiñʌch chaꞌan Dios miꞌ pʌyon letsel ti panchan chaꞌan an j cotyʌntyel ti Cristo Jesús.

15 Chʌꞌʌch yom mi lac bej pensalin ti lac pejtyelel xucꞌulon bʌ la ti Cristo. Mi max chꞌujbi junsujm laꞌ pensal, Dios mi quej i pʌsꞌeñetla jeꞌel jini.

16 Pero yom bej ajniconla ti xucꞌul ti pejtyel jini tsaꞌ bʌ aqꞌuentiyonla chaꞌan lac chꞌujbin. Yom junsujm jach lac pensal.

17 Hermañujob, chaꞌlenla cheꞌ bajcheꞌ ti laꞌ qꞌuele tic chaꞌle. Qꞌuelela jeꞌel bajcheꞌ mi yajñelob jini muꞌ bʌ i chaꞌlen bajcheꞌ ti lojon c pʌsꞌetla.

18 An cabʌlob i contra Cristo muꞌ bʌ i lolon ajñelob cheꞌ bajcheꞌ machꞌan ti sajti Cristo ti cruz chaꞌan i cotyañonla. Chʌꞌʌch tic subetla ti yambʌ ora. Wale an i yaꞌlel c wut chaꞌan i chꞌʌjyemlel c pusicꞌal mic chaꞌ subeñetla.

19 Jiñob mi quej i majlelob ti xotꞌmulil como mucꞌ jach i chʌc pensalin cheꞌ bajcheꞌ i diosʌch jini muꞌ bʌ i cꞌuxob, muꞌ bʌ i japob. Miꞌ lolon qꞌuelob i bʌ ti wen cheꞌ miꞌ chaꞌleñob yoque quisintic bʌ bajcheꞌ miꞌ chaꞌleñob. Ti junsujm jach i pusicꞌal miꞌ pensalin jini machꞌʌ wen i chaꞌan jach bʌ mulawil.

20 Pero mero lac lumalʌch yaꞌ ti panchan. Chʌncol lac pijtyan chaꞌan jubic tyʌlel ti panchan Ajcotyayaj lac chaꞌan, jiñʌch lac Yum Jesucristo.

21 Cristo mi quej i qꞌuextyʌbeñonla lac bʌcꞌtyal yujil bʌ sajtyel chaꞌan mi yʌqꞌueñonla tsijiꞌ bʌ lac bʌcꞌtyal lajal bajcheꞌ i chaꞌan muꞌ bʌ i yajñel ti panchan. Chʌꞌʌch mi quej i chaꞌlen chaꞌan tiꞌ pꞌʌtyʌlel muꞌ bʌ i cꞌʌn chaꞌan mi yotsan tiꞌ wenta pejtyelel chʌ bʌ jach an.