Yom cꞌajacña laꞌ woj chaꞌan ti laꞌ chꞌujbi lac Yum
4
Pꞌuntyʌbilet bʌ la hermañujob, wersa com c chaꞌ qꞌueletla. Cꞌajacña coj chaꞌan ti jatyetla. Cheꞌ bajcheꞌ Dios ti yʌqꞌueyon ti pejtyeletla chaꞌan c majtyan yubil como ti laꞌ chꞌujbi Dios cheꞌ ñac tic subetla i tꞌan. Chʌc xucꞌchocon laꞌ pusicꞌal ti lac Yum. Mic pꞌuntyañetla. 2 Ti wocol tꞌan mic subeñet Evodia yicꞌot Síntique chaꞌan yom junlajal laꞌ pensal como lajal hermana xꞌixiquet bʌ la ti lac Yum.
3 Cheꞌ jeꞌel mij cꞌajtibeñet xucꞌulet bʌ c piꞌʌl ti toñel i chaꞌan bʌ lac Yum, chaꞌan maꞌ cotyañob jini xꞌixicob tsaꞌ bʌ i chaꞌle toñel quicꞌot tiꞌ pucol jini wen tꞌan chaꞌan laj cotyʌntyel. Tiꞌ cotyʌyoñob yicꞌot Clemente bʌ i cꞌabaꞌ bʌ winic yicꞌot yañoꞌ bʌ tsaꞌ bʌ i cotyʌyon ti toñel jeꞌel. Tsꞌijbubilix i cꞌabaꞌob ti jun yaꞌ baꞌ mi yochel i cꞌabaꞌ ti pejtyelel jini añoꞌ bʌ i cuxtyʌlel machꞌʌ yujil jilel.
4 Yom cꞌajacña laꞌ woj ti lac Yum ti beleꞌ qꞌuin. Mic chaꞌ subeñetla: Tijicnisan laꞌ bʌ.
5 Beleꞌ pʌsʌ laꞌ bʌ ti uts tiꞌ tyojlel pejtyelel quixtyañu. Lʌcꞌʌlix i yorojlel mi chaꞌ tyʌlel lac Yum.
6 Maꞌ mi laꞌ chaꞌlen pensal chaꞌan chʌ bʌ jach yes. Luꞌ subenla Dios ti oración. Cꞌajtibenla chʌ bʌ jach yom laꞌ chaꞌan. Subenla wocox i yʌlʌ jeꞌel.
7 Cheꞌ jini Dios mi quej i ñʌchꞌtyʌsʌbeñetla laꞌ pusicꞌal. Quixtyañu mach chꞌujbi i saj chꞌʌmꞌen isujm bajcheꞌ an ili i ñʌchꞌtyʌsʌntyel laꞌ pusicꞌal tyʌlem bʌ ti Dios. Pero Dios mi quej i cʌñʌtyʌbeñetla laꞌ pusicꞌal yicꞌot laꞌ pensal ti Cristo Jesús.
Pensalinla jini wen bʌ
8 Wale, hermañujob, jiñʌch jini cojix bʌ tꞌan com bʌ c subeñetla. Pensalinla pejtyel chʌ bʌ jach yes isujm, yicꞌot ti pejtyelel chʌ bʌ yes yom qꞌuejlel ti ñuc ti quixtyañu, yicꞌot ti pejtyelel chʌ bʌ yes tyoj, yicꞌot ti pejtyelel chʌ bʌ yes sʌc, yicꞌot ti pejtyelel chʌ bʌ yes wen, yicꞌot ti pejtyelel muꞌ bʌ i sujbel ti wen. Pensalinla ti pejtyelel chʌ bʌ yes jachix wen yicꞌot ti pejtyelel yom bʌ i sujbel ti ñuc.
9 Chaꞌlenla pejtyelel jini tsaꞌ bʌ j cʌntisʌyetla, tsaꞌ bʌ c xiqꞌueyetla laꞌ chaꞌlen, pejtyelel jini tsaꞌ bʌ laꞌ wubi tic subetla, yicꞌot tsaꞌ bʌ laꞌ qꞌuele tic chaꞌle. Chʌꞌʌch yom mi laꞌ chaꞌlen. Cheꞌ jini, Dios muꞌ bʌ i yʌqꞌueñonla i ñʌchꞌtyʌlel lac pusicꞌal mux i yajñel laꞌ wicꞌot.
Ti yʌqꞌue Pablo i yofrenda jini am bʌ ti Filipos
10 Wen cꞌajacña j coj ti lac Yum chaꞌan wale ti laꞌ chaꞌ cꞌajtisʌyon chaꞌan chʌ bʌ yom c chaꞌan. Machꞌan mi cʌleꞌ chaꞌan ti laꞌ ñajatisʌyon. Jin jach machꞌan bajcheꞌ chꞌujbi laꞌ tyaj laꞌ cotyañon cheꞌ ñajt añon.
11 Machꞌan chʌncol cʌleꞌ mi an chʌ bʌ yom c chaꞌan. Como tsaꞌix cʌñʌ cajñel ti ñʌchꞌʌl yicꞌot chʌ bʌ jach an c chaꞌan.
12 Cujil ajñel cheꞌ maꞌan chʌ bʌ an c chaꞌan. Cujil ajñel cheꞌ an cabʌl chʌ bʌ an c chaꞌan. Cujil ajñel ti ñʌchꞌʌl chʌ bʌ jachix mi yujtyel mi cheꞌ ñajon, mi cheꞌ anix c wiꞌñal, mi an i sobrajlel chʌ bʌ an c chaꞌan, mi machꞌan chʌ bʌ an c chaꞌan.
13 Ti Cristo muꞌ bʌ i pꞌʌtyʌlisañon chꞌujbi c chaꞌlen pejtyelel chʌ bʌ jach i cꞌʌjnibal bʌ mic chaꞌlen.
14 Pero aunque chʌꞌʌch cujil ajñel, weñʌch ti laꞌ chaꞌle cheꞌ ñac ti laꞌ cotyʌyon tic wocol.
15 Pero jatyetla yaꞌ ti Filipos laꞌ wujil isujm jeꞌel cheꞌ ñac ti ñaxan quejiyon c subeꞌ jini wen tꞌan chaꞌan laj cotyʌntyel, cheꞌ ñac ti loqꞌuiyon majlel ti colem pañimil Macedonia bʌ i cꞌabaꞌ machꞌan yambʌ ochemoꞌ bʌ tiꞌ tꞌan Dios tsaꞌ bʌ i yʌqꞌueyoñob chʌ bʌ cꞌʌjnibal c chaꞌan. Pero jatyetla chaꞌan cꞌajacña laꞌ woj ti laꞌ wubi chaꞌan jini wen tꞌan tsaꞌ bʌ j cʌntisʌyetla, ti laꞌ wʌqꞌueyon c majtyan tyac.
16 Cheꞌ ñac yaꞌ tyo añon yaꞌ ti Tesalónica chaꞌyajlel ti laꞌ chocbeyon majlel ofrenda chaꞌan chʌ bʌ cꞌʌjnibal c chaꞌan.
17 Mach chaꞌanic jach com c tyajeꞌ c majtyan tyac, pero com mi yocꞌan wen bʌ laꞌ chaꞌlibal tiꞌ tyojlel Dios chaꞌan Dios mi más aqꞌueñetla laꞌ tyojol yubil.
18 Tsaꞌix aqꞌuentiyon pejtyelel chʌ bʌ i cꞌʌjnibal c chaꞌan. An i colojbal. Yicꞌot jini tsaꞌ bʌ laꞌ choco tyʌlel tiꞌ cꞌʌb Epafrodito, an más i yonlel cheꞌ bajcheꞌ yom c chaꞌan. Jini tsaꞌ bʌ laꞌ chocbeyon tyʌlel cheꞌ bajcheꞌ yowocña bʌ pom mi yubin Dios. Cheꞌ bajcheꞌ pulem bʌ i majtyan Dios muꞌ bʌ i mulan i qꞌueleꞌ yubil.
19 Lac Dios mi quej i yʌqꞌueñetla pejtyelel chʌ bʌ cꞌʌjnibal laꞌ chaꞌan cheꞌ jini. Cheꞌ bajcheꞌ an ñoj wen bʌ i ricojlel Dios ti Cristo Jesús, chʌꞌʌch mi quej i yʌqꞌueñetla.
20 Laꞌ sujbic i ñuclel Dios lac Tyat ti beleꞌ qꞌuin. Amén.
Cojachix bʌ saludos
21 Tiꞌ cꞌabaꞌ Jesucristo, aqꞌueñob c saludos pejtyelel ochemoꞌ bʌ tiꞌ tꞌan Dios. Jini hermañujob wʌꞌ añob quicꞌot miꞌ chocbeñetla tyʌlel saludos.
22 Pejtyelel ochemoꞌ bʌ tiꞌ tꞌan Dios wʌꞌwʌꞌi miꞌ chocbeñetla tyʌlel saludos, yicꞌot jeꞌel jini ochemoꞌ bʌ tiꞌ tꞌan Dios wʌꞌ ti yotyot ñoj ñuc bʌ yumʌl i chaꞌan bʌ romanojob miꞌ chocbeñetla tyʌlel saludos.
23 Laꞌ ajniquetla ti laꞌ pejtyelel ti yutslel i pusicꞌal lac Yum Jesucristo. Amén.