2 Joñon quicꞌot hermano Timoteo mic tsꞌijbubeñetla ili jun pejtyelelet bʌ la i chaꞌañet bʌ la Dios muꞌ bʌ laꞌ chꞌujbin Cristo yaꞌ ti Colosas bʌ i cꞌabaꞌ bʌ lum. Laꞌ ajniquetla ti yutslel i pusicꞌal yicꞌot i ñʌchꞌtyʌlel Dios lac Tyat.

3 Ti beleꞌ qꞌuin cheꞌ mi lojon c tyajetla ti oración mi lojon c suben wocox i yʌlʌ Dios i Tyat lac Yum Jesucristo.

4 Como tsaꞌix c lojon cubi chaꞌan ti laꞌ chꞌujbi Cristo Jesús. Ti lojon cubi jeꞌel bajcheꞌ chʌncol laꞌ pꞌuntyan pejtyelel i chaꞌañoꞌ bʌ Dios.

5 Como chʌncol laꞌ pijtyan yaꞌ bʌ lotbebiletla ti panchan. Como ti yambʌ ora cheꞌ ñac ti laꞌ ñaxan ubi jini melel bʌ tꞌan chaꞌan laj cotyʌntyel ti laꞌ wubi an chʌ bʌ yes miꞌ pijtyañetla yaꞌ ti panchan.

6 Como jini wen tꞌan tsaꞌ bʌ subentiyetla chʌncol i cꞌotyel ti pejtyelel mulawil. Chʌncox i chꞌujbiñob yañoꞌ bʌ jeꞌel cheꞌ bajcheꞌ ti laꞌ chꞌujbi cꞌʌlʌl ti jim bʌ qꞌuin cheꞌ ñac ti laꞌ ñaxan ubi chaꞌan i pꞌuntyaya Dios cheꞌ ñac ti laꞌ chꞌʌmbe isujm chaꞌan yoque melelʌch i pꞌuntyaya Dios.

7 Chʌꞌʌch tiꞌ cʌntisʌyetla jini pꞌuntyʌbil bʌ lojon c piꞌʌl ti toñel Epafras bʌ i cꞌabaꞌ. Xucꞌul bʌ ajtroñel i chaꞌan Cristo chaꞌañetla.

8 Tsaꞌix i chꞌʌmbeyon lojon tyʌlel tꞌan chaꞌan bajcheꞌ añetla yicꞌot bajcheꞌ mi laꞌ pꞌuntyañon lojon tiꞌ pꞌuntyaya tyʌlem bʌ ti Chꞌujul bʌ i Chꞌujlel Dios am bʌ ti laꞌ pusicꞌal.

9 Jin chaꞌan cꞌʌlʌ ti jim bʌ qꞌuin cheꞌ ñac ti lojon c ñaxan ubi bajcheꞌ añetla, maꞌan ti lojon cʌctyʌ tyajetla ti oración. Mi lojon j cꞌajtiben Dios chaꞌan mi laꞌ wen ñaꞌtyan bajcheꞌ yom i yʌqꞌueñetla laꞌ chaꞌlen Dios yicꞌot chaꞌan Dios mi yʌqꞌueñetla pejtyelel laꞌ ñaꞌtyʌbal tyʌlem bʌ tiꞌ Chꞌujul bʌ i Chꞌujlel Dios.

10 Mi lojon c suben Dios chaꞌan mi laꞌ wajñel ti wen cheꞌ bajcheꞌ yom ajnicob jini i chaꞌañoꞌ bʌ lac Yum chaꞌan mi laꞌ chʌc chaꞌlen bajcheꞌ miꞌ mulan lac Yum Dios yicꞌot chaꞌan mi yocꞌan jini wen bʌ laꞌ chaꞌlibal yicꞌot mi laꞌ más bej cʌñeꞌ Dios.

11 Mi lojon c suben Dios chaꞌan jini miꞌ luꞌ xucꞌchocobeñetla laꞌ pusicꞌal ti ñoj ñuc bʌ i pꞌʌtyʌlel chaꞌan mi laꞌ cucheꞌ ti wen yicꞌot ti tijicñiyel laꞌ pusicꞌal chʌ bʌ jach mi laꞌ ñusan.

12 Mi lojon c suben wocox i yʌlʌ Dios lac Tyat como jini tiꞌ chajpʌbeyonla chaꞌan mi quej lac motin cʌqꞌuentyel chʌ bʌ mi yʌqꞌuentyelob jini i chaꞌañoꞌ bʌ Dios yaꞌ añoꞌ bʌ ti sʌclel yicꞌot.

13 Dios tiꞌ locꞌsʌyonla tiꞌ pꞌʌtyʌlel xiba yaꞌ baꞌ icꞌtꞌojñal bʌ pañimil yubil. Tsaꞌix i yʌqꞌueyonla lac yumin pꞌuntyʌbil bʌ i Yalobil Dios.

14 Tiꞌ cotyʌyonla cheꞌ ti yʌcꞌʌ i bʌ ti sajtyel. Chʌꞌʌch tiꞌ ñusʌbeyonla lac mul.

15 Mach chꞌujbi laj qꞌueleꞌ Dios pero tiꞌ Yalobil ti tsictiyi tiꞌ bʌcꞌtyal Dios. I tyʌlelʌch cꞌʌlʌl an i Yalobil Dios cheꞌ max tyo baꞌan chʌ bʌ tiꞌ mele Dios.

16 Chaꞌan ti Cristo, Dios tiꞌ mele pejtyelel chʌ bʌ jach an, mi yaꞌan ti panchan mi wʌꞌ an ti mulawil, mi tsiquil ti lac wut, mi maꞌan tsiquil ti lac wut. Tiꞌ mele pejtyelel ajtroñelob i chaꞌan Dios am bʌ ti panchan yicꞌot. Tiꞌ mele jeꞌel xiba yicꞌot jini xibajob muꞌ bʌ i chaꞌliben i toñel xiba. Ti pejtyelel chʌ bʌ jach an melel tiꞌ pꞌʌtyʌlel Cristo chaꞌan i ñuc isʌntyel.

17 An Cristo cꞌʌlʌ cheꞌ max tyo baꞌan chʌ bʌ an tyac. Chaꞌan ti Cristo mi xucꞌtyʌl bajcheꞌ yom xucꞌlec pejtyelel chʌ bʌ an tyac como jini tiꞌ chajpʌ bajcheꞌ mi yajñel.

18 Cheꞌ jeꞌel, i jolʌch Cristo yubil jini ochemoꞌ bʌ tiꞌ tꞌan Dios. I bʌcꞌtyal Cristo yubil ochemoꞌ bʌ tiꞌ tꞌan Dios. Jini tsaꞌ bʌ ñaxan tyejchi loqꞌuel baꞌan sajtyemoꞌ bʌ jiñʌch jini Cristo muꞌ bʌ i yʌqꞌueñonla laj cuxtyʌlel. Jin chaꞌan, más an i ñuclel Cristo cheꞌ bajcheꞌ pejtyelel chʌ bʌ an tyac.

19 Como Dios ti yajcʌ i yotsan ti pejtyelel i bajñel i ñuclel yicꞌot i pꞌʌtyʌlel ti Cristo Jesús.

20 Dios ti yajcʌ i cꞌʌñeꞌ Cristo chaꞌan miꞌ qꞌuel ti uts pejtyelel chʌ bʌ an tyac mi jini am bʌ ti mulawil, mi jini am bʌ ti panchan. Chaꞌan ti beque i chꞌichꞌel cheꞌ ñac ti sajti Cristo ti cruz, Dios tiꞌ ñʌchꞌchoco pejtyelel chʌ bʌ jach an tyac.

21-22 Jatyetla ti yambʌ ora mach i chaꞌañeticla Dios. Ti laꞌ contraji Dios ti laꞌ pusicꞌal chaꞌan ti mach bʌ wen bʌ laꞌ chaꞌlibal. Pero wale Dios tiꞌ ñʌchꞌchocobeyetla laꞌ pusicꞌal yicꞌot chaꞌan ti sajti Cristo. Chʌꞌʌch tiꞌ chaꞌle chaꞌan i yotsañetla tiꞌ tyojlel cheꞌ junyajlel i chaꞌanix laꞌ pusicꞌal, cheꞌ maꞌix laꞌ tsuculel, maꞌix laꞌ mul.

23 Pero chaꞌan chʌꞌʌch mi yujtyel yom chʌc xucꞌuletla ti jini tsaꞌ bʌ laꞌ chꞌujbi, maꞌix mi laꞌ ñajatisan jini laj cotyʌntyel chʌncol bʌ laꞌ pijtyan. Como tsaꞌix laꞌ wubi jini wen tꞌan. Tsaꞌix sujbi ti pejtyelel mulawil ili tꞌan. Joñon Pablojon ti otsʌntiyon ti ajsubtꞌan jeꞌel.

24 Wale, cꞌajacña coj mi cubin chaꞌan chʌncol c ñusan wocol chaꞌañetla. Como chaꞌan ti jini wocol chʌncol bʌ c ñusan cheꞌ bajcheꞌ mi Cristo i bajñel muꞌ tyo i ñusan wocol yubil como jini ochemoꞌ bʌ tiꞌ tꞌan Dios i bʌcꞌtyalʌch Cristo yubil.

25 Dios ti yotsʌyon ti ajsubtꞌan chaꞌan laꞌ wenlel ti laꞌ pejtyʌlel chaꞌan luꞌ tsꞌʌcʌl mic subeñetla i tꞌan Dios.

26 Machꞌan ñoj tsiquil i sujmlel jini tꞌan cꞌʌlʌl ti yoque ñoj oniyix cꞌʌlʌl ti pejtyelel lac yumob ti ñoj oniyix. Pero wale Dios chʌncox i yʌqꞌuen i chꞌʌmꞌeñob i sujmlel i chaꞌañoꞌ bʌ.

27 Dios ti yajcʌ i tsictisʌbeñob i chaꞌañoꞌ bʌ ñoj ñuc bʌ i sujmlel machꞌʌ baꞌan tsictiyem ti yambʌ ora. Jiñʌch Cristo mi quej yajñel jeꞌel ti laꞌ pusicꞌal jatyetla mach bʌ israeletic la. Cheꞌ jini, chaꞌan an Cristo ti laꞌ pusicꞌal mi quej laꞌ wʌqꞌuentyel jeꞌel i ñuclel Dios.

28 Mi lojon c subeꞌ i tꞌan Cristo. Mi lojon tyumbiñob pejtyelel quixtyañujob. Ti pejtyelel lojon c ñaꞌtyʌbal mi lojon cʌntisañob tiꞌ tꞌan Dios chaꞌan miꞌ wen chꞌujbiñob i tꞌan Dios, chaꞌan mi xucꞌtyʌlob ti Cristo jujuntiquil.

29 Chaꞌan chʌꞌʌch mi yujtyel mic wen chaꞌlen toñel. Mic wersa cꞌʌñeꞌ pejtyelel c pꞌʌtyʌlel muꞌ bʌ i yʌqꞌueñon Cristo.