ÑAXAN BɅ JUN TSAꞌ BɅ I TSꞌIJBU PABLO CHAꞌAN JINI AÑOꞌ BɅ TI TESALÓNICA
Pablo yicꞌot i piꞌʌlob miꞌ tsꞌijbubeñob jini ochemoꞌ bʌ tiꞌ Tꞌan Dios
1
Joñon Pablojon. Quicꞌot Silvano quicꞌot Timoteo mic tsꞌijbubeñet lojon ili jun ochemet bʌ la tiꞌ tꞌan Dios muꞌ bʌ laꞌ muchꞌquin laꞌ bʌ yaꞌ ti lum Tesalónica bʌ i cꞌabaꞌ. Chʌncol laꞌ tyem ajñel laꞌ wicꞌot Dios lac Tyat yicot lac Yum Jesucristo. Laꞌ ajniquetla ti yutslel i pusicꞌal yicꞌot i ñʌchꞌtyʌlel Dios lac Tyat yicꞌot lac Yum Jesucristo. Ajpʌsoñelob jini yaꞌ bʌ añoꞌ bʌ ti Tesalónica chaꞌan bajcheꞌ yom mi lac chꞌujbin
2 Mic chʌc suben lojon wocox i yʌlʌ Dios chaꞌan pejtyeleletla. Mic chʌc cꞌajtisañetla ti lojon coración.
3 Mij cꞌajtisañet lojon tiꞌ tyojlel Dios lac Tyat bajcheꞌ ti laꞌ chaꞌle toñel chaꞌan ti laꞌ wen chꞌujbi Dios. Mij cꞌajtisan bajcheꞌ ti laꞌ wen cotyʌyob chaꞌan ti laꞌ wen pꞌuntyʌyob yicꞌot mij cꞌajtisan bajcheꞌ chʌncol laꞌ wen pijtyan lac Yum Jesucristo.
4 Hermañujob, Dios miꞌ pꞌuntyañetla. La cujil isujm tsaꞌix i yajcʌyetla.
5 Cheꞌ ñac ti lojon c subetla jini tꞌan chaꞌan laj cotyʌntyel mach tic tꞌanic jach pero chaꞌan tiꞌ pꞌʌtyʌlel Chꞌujul bʌ i Chꞌujlel Dios tic subetla. Tic subetla jeꞌel chaꞌan ti lojon c ñaꞌtyʌ ñoj melelʌch ili tꞌan. Laꞌ wujilʌch isujm bajcheꞌ ti ajniyon lojon yaꞌ baꞌ añetla chaꞌan laꞌ wenlel.
6 Ti queji laꞌ tsʌclebeyon lojon bajcheꞌ mi lojon c chaꞌlen. Ti laꞌ tsʌclʌ bajcheꞌ tiꞌ chaꞌle lac Yum jeꞌel. Aunque ti laꞌ wen ñusʌ wocol pero tijicñayetla ti laꞌ chꞌujbi jini tꞌan. Jini Chꞌujul bʌ i Chꞌujlel Dios ti yʌqꞌuet laꞌ tijicñʌyel.
7 Cheꞌ jini ti queji i tsʌcleñob bajcheꞌ mi laꞌ chaꞌlen jeꞌel pejtyel chʌncol bʌ i chꞌujbiñob Dios yaꞌ ti pañimil Macedonia yicꞌot Acaya bʌ i cꞌabaꞌ tyac.
8 Cheꞌ jini, ti laꞌ wʌcꞌʌ ti cʌjñel i tꞌan lac Yum. Mach yaꞌic jach ti Macedonia yicꞌot ti Acaya pero ti laꞌ wʌcꞌʌ ti cʌjñel ti yan tyac bʌ pañimil jeꞌel. Tsaꞌix yubiyob bajcheꞌ chʌncol laꞌ wen chꞌujbin Dios. Wale cheꞌ jini mach cꞌʌñʌlix lojon c subeñob.
9 Pero jiñob mi chaꞌ alob bajcheꞌ ti laꞌ wotsʌyon lojon ti utsꞌat yaꞌ baꞌ añetla cheꞌ ñac ti cꞌotiyon lojon ti julaꞌ. Mi chaꞌ alob bajcheꞌ ti laꞌ cʌyʌ laꞌ chꞌujutisan jini melel jach bʌ dios tyac chaꞌan laꞌ tsʌclen Dios. Mi yʌlob bajcheꞌ ti queji laꞌ yumin jini yoque cuxul bʌ Dios.
10 Mi yʌlob jeꞌel bajcheꞌ chʌncol laꞌ pijtyan i chaꞌ tyʌlel Jesús ti panchan. I yalobilʌch Dios jini Jesús. Dios ti chaꞌ tyeche loqꞌuel Jesús baꞌan sajtyemoꞌ bʌ. Jesús miꞌ cotyañonla loqꞌuel tiꞌ michꞌlel Dios muꞌ bʌ quej i tyʌlel.