2 Aunque tsaꞌix wajlentiyon lojon, aunque ti tyʌcꞌlʌntiyon lojon yaꞌ ti lum Filipos bʌ i cꞌabaꞌ cheꞌ max tyo ajñon lojon yaꞌ baꞌ añetla pero laꞌ wujilʌch isujm Dios tiꞌ cotyʌyon c subeñetla tꞌan chaꞌan laj cotyʌntyel. Aunque an cabʌl lojon contrajintyel pero chꞌejlon lojon tic subetla.

3 Machꞌan lojon c ñajayel ti jini muꞌ bʌ c subeꞌ lojon. Machꞌan ti lojon c chʌquibeyet chʌ bʌ an laꞌ chaꞌan cheꞌ ti lojon c chaꞌle cʌntisa. Machꞌan ti lojon c pensali c lotiñetla pero com lojon j cʌntisañetla ti jini melel bʌ tꞌan.

4 Pero Dios tiꞌ qꞌuele mi wen ti lojon c chaꞌle. Ti yʌcꞌon lojon tic wenta ili tꞌan chaꞌan laj cotyʌntyel. Jin chaꞌan chʌꞌʌch mucꞌon lojon ti tꞌan. Machꞌan mic jopꞌ lojon cʌleꞌ muꞌ bʌ i mulan quixtyañujob, pero mi lojon cʌleꞌ jini muꞌ bʌ i mulan Dios.

5 Laꞌ wujilʌch isujm machꞌan baꞌ bʌ ora tsaꞌ jach poj c ñuc isʌ lojon laꞌ pusicꞌal chaꞌan ti cꞌotyajax bʌ tꞌan. Mach comic jach lolon utsbiñetla chaꞌan com ganarin lojon c tyaqꞌuin. Dios tsaꞌix i luꞌ yilʌ bajcheꞌ ti lojon c chaꞌle.

6 Machꞌan baꞌ bʌ ora ti lojon c sʌclʌ c ñuclel ti quixtyañu, mi jinic baꞌ añetla mi jinic baꞌan yañoꞌ bʌ. Aunque an lojon c pꞌʌtyʌlel yubil como chocolon lojon majlel i chaꞌan Dios pero machꞌan tic xiqꞌuiyetla a qꞌuelon lojon ti ñuc.

7 Pero ti ajniyon lojon ti uts cheꞌ bajcheꞌ juntiquil ñaꞌʌl muꞌ bʌ i cosan muꞌ bʌ i wen cʌñʌtyan yalobilob.

8 Tic wen pꞌuntyʌyetla. Mach jinic jach chajpʌbilon lojon c subeñetla i tꞌan Dios pero chajpʌbilon lojon jeꞌel cʌcꞌ lojon c bʌ chaꞌan laꞌ wenlel ti pejtyel lojon c pusicꞌal como mic wen pꞌuntyañetla.

9 Hermañujob, cꞌajal laꞌ chaꞌan bajcheꞌ ti lojon c chaꞌle toñel, bajcheꞌ tic chaꞌle wersa chaꞌan c mʌcꞌlan lojon c bʌ. Machꞌan majch añon lojon tiꞌ wenta mi junticlec chaꞌan chʌ bʌ yes yom lojon c chaꞌan pero ti lojon c chaꞌle toñel ti qꞌuinil ti acꞌbʌlel cheꞌ ñac tic subeyetla i tꞌan Dios.

10 Jatyetla ti laꞌ wilʌ. Tsaꞌix i yilʌ Dios jeꞌel bajcheꞌ ti ajniyon lojon ti sʌc, ti tyoj, ti laꞌ tyojlel muꞌ bʌ laꞌ chꞌujbin Dios ti laꞌ pusicꞌal. Machꞌan majch chꞌujbi i tyajon lojon ti tꞌan.

11 Laꞌ wujil isujm jeꞌel bajcheꞌ tic xiqꞌuiyet laꞌ wen chꞌujbin yicꞌot jeꞌel bajcheꞌ ti lojon c ñuc isʌbeyet laꞌ pusicꞌal bajcheꞌ miꞌ chaꞌlen juntiquil tyatyʌl cheꞌ yicꞌot yalobilob.

12 Tic xiqꞌuiyetla ajñel bajcheꞌ yom ajñel i chaꞌañoꞌ bʌ Dios. Jini miꞌ pʌyetla chaꞌan mi laꞌ wajñel ti i yumintyel jeꞌel. Mi quej i yʌqꞌueñonla lac ñuclel bajcheꞌ i chaꞌan.

13 Jin chaꞌan mi lojon c chʌc suben wocox i yʌlʌ Dios. Como cheꞌ ñac ti laꞌ wubibe i tꞌan Dios tsaꞌ bʌ c subet lojon ti laꞌ chꞌujbi. Maꞌan ti laꞌ chꞌujbi cheꞌ bajcheꞌ mi i tꞌan jach quixtyañu pero ti laꞌ chꞌujbi cheꞌ bajcheꞌ yoque i tꞌañʌch Dios. Melel i tꞌañʌch Dios muꞌ bʌ i chʌc qꞌuextyʌbeñetla laꞌ pusicꞌal ochemet bʌ la tiꞌ tꞌan Dios.

14 Hermañujob, cheꞌ ñac ti laꞌ ñusʌ laꞌ tyʌcꞌlʌntyel ti laꞌ piꞌʌlob, chʌꞌʌch ti laꞌ ñusʌ jeꞌel bajcheꞌ tiꞌ ñusʌyob tiꞌ piꞌʌlob jeꞌel jini israelob ochemoꞌ bʌ tiꞌ tꞌan Dios muꞌ bʌ i muchꞌquiñob i bʌ i chaꞌañoꞌ bʌ Cristo Jesús yaꞌ ti Judea.

15 Jini israelob tiꞌ tsʌnsʌyob lac Yum Jesús cheꞌ bajcheꞌ tiꞌ ñaxan tsʌnsʌyob i piꞌʌlob jeꞌel tsaꞌ bʌ i xiqꞌui i yʌleꞌ Dios. Tiꞌ chocoyon lojon loqꞌuel. Machꞌan miꞌ mulañob chʌ bʌ yom Dios. Chʌncox i tsꞌaꞌqꞌuelob pejtyel quixtyañu.

16 Cheꞌ com lojon c pejcan jini mach bʌ israelobic chaꞌan i tyaj i cotyʌntyel, machꞌan mi yʌqꞌueñon lojon c pejcañob. Cheꞌ jini mi más ocꞌañob i mul. Jin chaꞌan wale iliyi michꞌ Dios. Tsaꞌix aqꞌuentiyob i xotꞌob i mul.

17 Hermañujob, aunque mach yaꞌañon quicꞌotyetla pero beleꞌ cꞌajalet lojon c chaꞌan como tic wersa poj cʌyʌyetla. Pero wersa com lojon c chaꞌ tyʌlel j qꞌueletla.

18 Com lojon c chaꞌ tyʌlel baꞌ añetla. Joñon Pablojon chaꞌyajlel uxyajlel tic jopꞌo c tyʌlel pero Satanás tiꞌ mʌctyʌbeyon lojon c tyʌlel.

19 Cheꞌ jini, chʌncol lojon c pijtyan i tsictiyel laꞌ wenlel yaꞌ bʌ mi tyʌlel lac Yum Jesucristo. Ñuc lojon c pusicꞌal chaꞌan ti jatyetla. Cꞌajacña lojon coj mij cꞌotyel lojon tiꞌ tyojlel lac Yum. Como chaꞌan ti jatyetla mi tsictiyel mi weñʌch ti lojon c chaꞌle toñel.

20 Melelʌch añʌch lojon c ñuclel chaꞌan ti jatyetla. Cꞌajacña lojon coj chaꞌañetla.