2 chaꞌan chojquic majlel la quermañu Timoteo i julaꞌ añetla. Como ajtroñelʌch i chaꞌan Dios jeꞌel tsaꞌ bʌ i cotyʌyon lojon c subeꞌ jini tꞌan chaꞌan laj cotyʌntyel chaꞌan ti Cristo. Chꞌujbi i subeñetla chaꞌan xucꞌlequetla chaꞌan ñuc isʌbentiquetla laꞌ pusicꞌal chaꞌan muꞌ tyo laꞌ más chꞌujbin.

3 Chaꞌan machꞌan majch mi juntiquileticla mi quejel laꞌ nijcʌntyel chaꞌan ti caj laꞌ wocol. Como laꞌ wujilʌch isujm wersa mi quej la quilan wocol.

4 Como cheꞌ ñac yaꞌ tyo añon lojon a wicꞌotyon lojon tic wʌ subeyetla: Wersa mi quej laꞌ ñusan wocol, choꞌon. Como laꞌ wujilʌch chʌꞌʌch ti ujti.

5 Jin chaꞌan cheꞌ machꞌan ti mejli c chʌc cucheꞌ cheꞌ machꞌan mi cubin bajcheꞌ añetla tic choco majlel i cꞌajtibeñetla mi chʌncol laꞌ yoque chꞌujbin. Como tic bʌcꞌñʌ ame i yotsʌbeñetla laꞌ mul xiba ame lolomic jach bʌ toñel ti lojon c chaꞌle.

6 Pero wale iliyi tsajnix Timoteo yaꞌ ti Tesalónica. Tiꞌ chꞌʌmon lojon tyʌlel wen bʌ tꞌan chaꞌan chʌncolʌch laꞌ wen chꞌujbin. Chʌncol tyo laꞌ wen chaꞌlen pꞌuntyaya. Mi yʌleꞌ chʌncolʌch laꞌ wen cꞌajtisañon lojon ti pꞌuntyaya. Wersa laꞌ wom laꞌ chaꞌ qꞌuelon lojon, mi yʌl. Chʌꞌʌch bajcheꞌ joñon lojon jeꞌel, com lojon c chaꞌ qꞌueletla.

7 Jin chaꞌan hermañujob aunque cabʌlʌch lojon c wocol yicꞌot c tyʌcꞌlʌntyel ti ñuc isʌbentiyon lojon c pusicꞌal chaꞌan ti cubi xucꞌulʌch chʌncol laꞌ chʌc chꞌujbin.

8 Yoque cꞌajacñajax lojon coj chaꞌan ti lojon cubi xucꞌulʌch añetla ti lac Yum.

9 ¿Bajcheꞌqui mi jastiyel lojon c suben Dios wocox i yʌlʌ? Mach jasʌl bajcheꞌ chꞌujbi c suben Dios wocox i yʌlʌ chaꞌan ñoj cꞌajacña lojon coj ti Dios chaꞌañetla.

10 Ti qꞌuinil ti acꞌbʌlel mij cꞌajtiben lojon Dios chaꞌan mi yʌqꞌueñon lojon c chaꞌ qꞌueletla chaꞌan mi lojon j cotyañetla laꞌ más chꞌujbin.

11 Com lojon miꞌ cotyañon lojon Dios lac Tyat yicꞌot lac Yum Jesucristo chaꞌan chꞌujbi tyʌlicon lojon j qꞌueletla.

12 Com miꞌ cotyañetla lac Yum chaꞌan mi laꞌ xucꞌtyʌl, chaꞌan más cabʌl mi laꞌ pꞌuntyan laꞌ bʌ yicꞌot pejtyelelob yañoꞌ bʌ jeꞌel cheꞌ bajcheꞌ mi lojon c pꞌuntyañetla.

13 Laꞌ xucꞌchocobentiquet laꞌ pusicꞌal chaꞌan machꞌan mi laꞌ tyajtyʌl ti tꞌan tiꞌ tyojlel Dios chaꞌan machꞌan laꞌ mul tiꞌ tyojlel Dios lac Tyat cheꞌ mi tyʌlel lac Yum Jesucristo yicꞌot pejtyel i chaꞌañoꞌ bʌ.