CHAꞌQꞌUEJLEL BɅ JUN TSAꞌ BɅ I TSꞌIJBU PABLO CHAꞌAN JINI AÑOꞌ BɅ TI TESALÓNICA
Pablo yicꞌot i piꞌʌlob ti toñel miꞌ tsꞌijbubeñob jini ochemoꞌ bʌ tiꞌ tꞌan Dios
1
Joñon Pablojon quicꞌot Silvano quicꞌot Timoteo. Mic tsꞌijbubeñet lojon ili jun hermañujet bʌ la muꞌ bʌ laꞌ muchꞌquin laꞌ bʌ yaꞌ ti lum Tesalónica bʌ i cꞌabaꞌ chʌncol bʌ laꞌ tyem ajñel laꞌ wicꞌot Dios lac Tyat yicꞌot lac Yum Jesucristo.2 Laꞌ ajniquetla ti yutslel i pusicꞌal yicꞌot i ñʌchꞌtyʌlel Dios lac Tyat yicꞌot lac Yum Jesucristo.
Dios mi quej i yʌcꞌ ti melojel xmulilob cheꞌ mi tyʌlel Cristo
3 Hermañujob, añʌch chaꞌan mic chʌc suben lojon Dios wocox i yʌlʌ chaꞌañetla como chʌꞌʌch yom. Chʌncol tyo laꞌ más chꞌujbin. Chʌncol laꞌ más pꞌuntyan laꞌ bʌ.
4 Aunque cabʌlʌch ti laꞌ ñusʌ laꞌ tyʌcꞌlʌntyel yicꞌot cabʌl ti laꞌ ñusʌ wocol pero ti tsictiyi ti laꞌ ñusʌ wocol ti utsꞌat. Ti laꞌ wen chꞌujbi. Jin chaꞌan ñuc lojon c pusicꞌal mic tyajet lojon ti tꞌan baꞌ muchꞌquibilob ochemoꞌ bʌ tiꞌ tꞌan Dios.
5 Cheꞌ chʌncol tyo laꞌ wen chꞌujbin, cheꞌ mi laꞌ cuch wocol mi tsictiyel tyojʌch miꞌ chaꞌlen melojel Dios. Como mi tsictiyel weñetla chaꞌan ochiquetla yaꞌ baꞌ miꞌ chaꞌlen yumʌl Dios. Como jin chaꞌan mi laꞌ cucheꞌ wocol.
6 Jini muꞌ bʌ i yʌqꞌueñetla a ñusan wocol weñʌch mi yʌqꞌuen i ñusan wocol Dios jeꞌel.
7 Mi quej i yujtyel laꞌ ñusan wocol chʌncol bʌ laꞌ ñusan wocol ti jim bʌ qꞌuin cheꞌ mi tsictiyel lac Yum Jesús. Chʌꞌʌch joñon lojon jeꞌel cheꞌ mi tyʌlel Jesús ti panchan joyol bʌ ti lemlemña bʌ cꞌajc. Mi tyʌlel yicꞌot ajtroñelob i chaꞌan Dios chꞌoyoloꞌ bʌ ti panchan muꞌ bʌ i tsictisan i pꞌʌtyʌlel.
8 Mi quej i tyʌlel chaꞌan i yʌqꞌuen i xotꞌ i mul jini machꞌʌ yom i chꞌujbiñob Dios, machꞌʌ baꞌan tiꞌ jacꞌʌ jini tꞌan chaꞌan laj cotyʌntyel i chaꞌan bʌ lac Yum Jesucristo.
9 Jiñob mi quej i yʌjqꞌuel ti xotꞌmulil ti junyajlel. Mi quej i yʌjqꞌuel ti ñajt tiꞌ tyojlel Dios lac Yum yicꞌot tiꞌ tyojlel i cꞌotyajlel yicꞌot i pꞌʌtyʌlel.
10 I chaꞌañoꞌ bʌ lac Yum mi quej i qꞌuelob i ñuclel ti jim bʌ qꞌuin cheꞌ mi chaꞌ tyʌlel. Mi quej i qꞌuelob ti ñuc lac Yum pejtyel jini tsaꞌ bʌ i chꞌujbiyob. Jatyetla tsaꞌix laꞌ chꞌujbi jini tꞌan tsaꞌ bʌ c subeyetla.
11 Jin chaꞌan chʌncol c beleꞌ tyajetla ti oración. Chʌncol j cꞌajtiben lojon Dios chaꞌan mi laꞌ wajñel ti utsꞌat. Como tiꞌ pʌyʌyetla Dios. Cheꞌ jeꞌel mij cꞌajtiben lojon Dios chaꞌan mi yʌqꞌueñetla i pꞌʌtyʌlel chaꞌan laꞌ tsꞌʌctisan jini wen bʌ muꞌ bʌ laꞌ pensalin laꞌ chaꞌlen yicꞌot jini toñel muꞌ bʌ laꞌ chaꞌlen chaꞌan chʌncol laꞌ wen chꞌujbin.
12 Cheꞌ jini mi qꞌuejlel ti ñuc lac Yum Jesucristo chaꞌan ti jatyetla. Mi quej laꞌ qꞌuejlel ti ñuc chaꞌan ti yutslel i pusicꞌal Dios yicꞌot lac Yum Jesucristo.