2 Wen laꞌ wujilʌch isujm mi quej i chaꞌ tyʌlel lac Yum cheꞌ machꞌan miꞌ ñaꞌtyañob. Mi quej i tyʌlel cheꞌ bajcheꞌ mi tyʌlel ajxujchꞌ ti acꞌbʌlel.

3 Baꞌ bʌ ora mi yʌlob quixtyañu: Ñʌchꞌʌlix pejtyel mulawil. Machꞌan chʌ bʌ mi lac bʌcꞌñan, cheꞌob, cheꞌ jini mi quej i tyʌlel i jisʌntyel. Ti saj ora jach mi quejel cheꞌ bajcheꞌ i bajqꞌuel xꞌixic cheꞌ mi quej i chꞌoc an yalobil. Mach mej ti putsꞌel.

4 Pero jatyetla, hermañujob, mach añeticla ti icꞌtꞌojñal. Mach tyoj bʌcꞌñʌjeletla mi quej laꞌ wubin cheꞌ mi tyʌlel lac Yum cheꞌ bajcheꞌ tyoj bʌcꞌñʌjeletla mi cꞌotyel ajxujchꞌ.

5 Como pejtyeletla i chaꞌañetla sʌclel. I chaꞌañetla qꞌuinil. Mach i chaꞌañeticla acꞌbʌlel. Mach i chaꞌañeticla icꞌtꞌojñal.

6 Jin chaꞌan mach yom wʌyʌlonla cheꞌ bajcheꞌ yañoꞌ bʌ. Pero yom pꞌixilonla yubil. Yom mi lac wen ñaꞌtyan.

7 Jini mucꞌoꞌ ti wʌyel wʌyʌlob ti acꞌbʌlel. Jini mucꞌoꞌ bʌ ti qꞌuixnijel mi qꞌuixñañob ti acꞌbʌlel.

8 Pero joñonla i chaꞌañon bʌ la qꞌuinil. Yom la cajñel ti wen bʌ lac ñaꞌtyʌbal. Añʌch laj cʌñʌtyʌntyel cheꞌ mi lac wen chꞌujbin cheꞌ mi lac wen chaꞌlen pꞌuntyaya cheꞌ bajcheꞌ an i cʌñʌtyʌntyel soldado chaꞌan tiꞌ mʌctyʌjib i tajn. Maꞌix mi lac chaꞌlen bʌqꞌuen como mi lac pijtyan laj cotyʌntyel. Jiñʌch cheꞌ bajcheꞌ maꞌix i bʌqꞌuen soldado am bʌ i mʌctyʌjib i jol ti tsucu tyaqꞌuin bʌ i pixol.

9 Como Dios ti yajcʌyonla chaꞌan lac tyaj laj cotyʌntyel chaꞌan ti lac Yum Jesucristo mach chaꞌanic majliconla ti xotꞌmulil.

10 Jesucristo ti sajti chaꞌañonla chaꞌan ajniconla la quicꞌot. Mi cuxulon tyo la mi sajtyemonixla mi quej la cajñel la quicꞌot.

11 Jin chaꞌan ñuc isan laꞌ bʌ laꞌ pusicꞌal. Xucꞌchocon laꞌ bʌ cheꞌ bajcheꞌ chʌncol laꞌ chaꞌlen.

12 Hermañujob, mic subeñet lojon ti wocol tꞌan chaꞌan laꞌ qꞌuel ti ñuc jini muꞌ bʌ ti toñel baꞌ añetla. Lac Yum ti yajcʌyob chaꞌan i tyumbiñetla chaꞌan i cʌntisañetla.

13 Yom mi laꞌ qꞌuel ti ñuc. Yom mi laꞌ wen pꞌuntyañob chaꞌan jini toñel muꞌ bʌ i chaꞌleñob. Ajñenla ti ñʌchꞌʌl ti jujuntiquiletla.

14 Mic xiqꞌuetla hermañujob chaꞌan yom laꞌ ticꞌob jini machꞌʌ yomob toñel. Yom laꞌ ñuc isʌbeñob i pusicꞌal jini chꞌʌjyemoꞌ bʌ. Yom laꞌ cotyañob jini cꞌuñoꞌ bʌ. Yom mi laꞌ cuchben i tꞌan yañoꞌ bʌ.

15 Cʌñʌtyan laꞌ bʌ chaꞌan machꞌan mi laꞌ qꞌuextyʌben i simaronlel. Pero jopꞌox laꞌ chʌc melben laꞌ bʌ chʌ bʌ wen yicꞌot pejtyel yañoꞌ bʌ jeꞌel.

16 Beleꞌ yom tijicñayetla.

17 Beleꞌ chaꞌlenla oración.

18 Subenla Dios wocox i yʌlʌ chaꞌan pejtyel chʌ bʌ tyac jach mi yujtyel. Como chʌꞌʌch yometla Dios cheꞌ mi laꞌ suben wocox i yʌlʌ como añetla ti Cristo Jesús.

19 Maꞌ mi laꞌ mʌctyʌben jini Chꞌujul bʌ i Chꞌujlel Dios am bʌ ti laꞌ pusicꞌal.

20 Mach yom mi laꞌ pꞌajeꞌ jini tꞌan muꞌ bʌ i yʌleꞌ jini tsaꞌ bʌ i xiqꞌui i yʌleꞌ Dios.

21 Yom xucꞌuletla chaꞌan mi laꞌ wen ñaꞌtyan chʌ bʌ wen. Chꞌujbinla jini wen bʌ.

22 Mach laꞌ wotsan laꞌ bʌ laꞌ wicꞌot machꞌʌ wen.

23 Laꞌix i wen sʌc isañetla Dios. Jiñʌch Dios muꞌ bʌ i yʌqꞌueñonla i ñʌchꞌtyʌlel lac pusicꞌal. Laꞌ i luꞌ cʌñʌtyʌbeñetla laꞌ chꞌujlel, laꞌ pusicꞌal, laꞌ bʌcꞌtyal chaꞌan maꞌix saj pʌjqꞌuemetla cheꞌ mi tyʌlel lac Yum Jesucristo.

24 Xucꞌulʌch jini tsaꞌ bʌ i pʌyʌyetla. Mux i luꞌ tsꞌʌctiyel pejtyel tyac ili.

25 Hermañujob, pejcʌbeñon lojon Dios ti oración.

26 Luꞌ aqꞌueñob saludos la quermañujob chaꞌan mi tsictiyel tyem añonla la quicꞌotyob.

27 Mic xiqꞌuetla tiꞌ pꞌʌtyʌlel lac Yum chaꞌan laꞌ qꞌuelbeñob ili jun pejtyel la quermañujob.

28 Laꞌ ajniquetla ti yutslel i pusicꞌal lac Yum Jesucristo. Amén.