2 Mic tsꞌijbubeñet ili jun Timoteo, cheꞌ bajcheꞌ yoque calobilet chaꞌan ti jini muꞌ bʌ lac chꞌujbin. Com ajniquet ti yutslel i pusicꞌal Dios yicꞌot tiꞌ pꞌuntyaya yicꞌot tiꞌ ñʌchꞌtyʌlel tyʌlem bʌ ti Dios lac Tyat yicꞌot ti lac Yum Cristo Jesús.

3 Tij cꞌajtibeyet ti wocol tꞌan chaꞌan cʌylequet yaꞌ ti lum Efeso bʌ i cꞌabaꞌ cheꞌ ñac tsajniyon ti lum tyac yaꞌ ti pañimil Macedonia bʌ i cꞌabaꞌ. Tic xiqꞌuiyet a ticꞌob chaꞌtiquil uxtiquil chaꞌan mach i pʌsob mach bʌ wen bʌ cʌntisa.

4 Mach yom i chʌc ñaꞌtyañob jini mach bʌ melel oñoꞌtꞌanix bʌ tꞌan. Mach yom i chʌc cꞌajtisan i cꞌabaꞌ tyac ti jujuntiquil i yumob ti ñoj oniyix. Machꞌʌ baꞌan i yujtibal jini tꞌan tyac yubil. Jini tꞌan mucꞌ jach i tyecheꞌ machꞌʌ wen bʌ tꞌan. Machꞌan miꞌ cotyañonla lac chꞌujbin tsaꞌ bʌ i yʌqꞌueyonla ti lac wenta Dios.

5 Mic xicꞌob chaꞌan yom i cꞌuxbiñob i bʌ. Chʌncol lac yoque chaꞌlen pꞌuntyaya cheꞌ sʌc lac pusicꞌal cheꞌ maꞌix bajcheꞌ yʌlʌ lac pusicꞌal cheꞌ mi lac yoque chꞌujbin Dios.

6 An jini tsaꞌ bʌ i cʌ chꞌujbi. Pero tsaꞌix i chaꞌ cʌyʌyob. Ti queji i tyechob yambʌ tꞌan machꞌʌ baꞌan i cꞌʌjnibal.

7 Yomob i lolon otsan i bʌ ti ajcʌntisajob ti i mandar Dios pero machꞌan miꞌ isujmben mi jinic yujil bajcheꞌ chʌncol ti cʌntisa. Miꞌ lolon ñaꞌtyan jini jach yujilob isujm.

8 La cujil isujm cꞌʌjnibalʌch i mandar Dios cheꞌ mi chꞌujbintyel cheꞌ bajcheꞌ yom Dios.

9 Ñaꞌtyʌbil lac chaꞌan machꞌan mandar chaꞌan jini wen bʌ miꞌ chaꞌlen. Pero an jach mandar chaꞌan jini machꞌʌ wen miꞌ chaꞌleñob. I chaꞌan jini machꞌʌ baꞌan miꞌ chꞌujbiben i mandar Dios. I chaꞌan jini ñuntꞌañoꞌ bʌ. Jini mandar i chaꞌan jini machꞌʌ baꞌan miꞌ chꞌujutisan Dios. I chaꞌan xmuliloꞌ bʌ yicꞌot i chaꞌan jini machꞌʌ baꞌan miꞌ qꞌuelob ti ñuc Dios yicꞌot machꞌʌ yom i qꞌuel i chꞌujbintyel Dios. Jini mandar i chaꞌan jini muꞌ bʌ i tsʌnsan i tyat i ñaꞌ. I chaꞌañʌch pejtyel ajtsʌnsajob.

10 Jini mandar i chaꞌan jini am bʌ tꞌan yicꞌot yambʌ xꞌixic yambʌ winic, cheꞌ alob an tꞌan yicꞌot xcꞌalʌl cheꞌ mach i ñoxiꞌalic mi yijñamic. I chaꞌan jini winicob muꞌ bʌ i laja pejcañob i bʌ. I chaꞌan jini muꞌ bʌ i xujchꞌiñob majlel quixtyañu. I chaꞌan jini xlotyob. I chaꞌan jini muꞌ bʌ i lolon al melelʌch qꞌuelon Dios, cheꞌob. Jini mandar i chaꞌan jeꞌel pejtyel am bʌ tiꞌ contra jini wen bʌ cʌntisa.

11 Ili wen bʌ cʌntisa junlajal yicꞌot jini ñoj wen bʌ tꞌan chaꞌan laj cotyʌntyel tyʌlem ti ñoj ñuc bʌ Dios. Ili wen bʌ cʌntisa ti aqꞌuentiyon tic wenta.

12 Mic suben lac Yum Jesucristo wocox i yʌlʌ chaꞌan jini ti yʌqꞌueyon c pꞌʌtyʌlel ti subtꞌan ñumel. Tiꞌ qꞌueleyon ti xucꞌul. Jin chaꞌan ti yʌcꞌon c toñel.

13 Tsaꞌix i yajcʌyon aunque ti ñaxan tij contraji tic tꞌan. Tic wajle. Tic tyʌcꞌla jini chʌncol bʌ i chꞌujbin Dios. Pero Dios tiꞌ pꞌuntyʌyon cheꞌ ñac max tyo baꞌan tic chꞌujbi cheꞌ ñac max tyo baꞌan tic ñaꞌtyʌ chʌ bʌ tic chaꞌle.

14 Jin chaꞌan ñoj cabʌl ti ajni i yutslel lac Yum quicꞌot. Ti queji c chꞌujbin Dios. Ti queji c pꞌuntyañob cheꞌ bajcheꞌ mi la cʌqꞌuentyel lac chaꞌlen cheꞌ mi laj cajñel ti Cristo Jesús.

15 Jiñʌch yoque isujm bʌ ili tꞌan. Ti pejtyel yom i luꞌ chꞌujbin chaꞌan ti tyʌli Cristo Jesús wʌꞌ ti mulawil chaꞌan i cotyan xmulilob. Joñon jini más simaroñon bʌ mi cubin bajcheꞌ pejtyel yañoꞌ bʌ.

16 Jin chaꞌan tiꞌ pꞌuntyʌyon Dios chaꞌan mi ñaxan tisctiyel ñoj ñuc bʌ lac pꞌuntyʌntyel ti joñon cheꞌ jal tiꞌ cuchu c mul Jesucristo. Chaꞌan majchical jach aunque ñuc bʌ xmulil mi yʌqꞌuentyel i cuxtyʌlel machꞌʌ yujil jilel cheꞌ miꞌ chꞌujbin.

17 Jin chaꞌan laꞌ laj qꞌuel ti ñuc. Laꞌ tsictiyic i ñuclel ti beleꞌ ora jini Yumʌl machꞌʌ baꞌan miꞌ cʌy i chaꞌlen yumʌl, machꞌʌ baꞌan mi sajtyel. Mach chꞌujbi la quilan jini cojach bʌ Dios am bʌ cabʌl i ñaꞌtyʌbal. Amén.

18 Calobil Timoteo, mic xiqꞌuet a chaꞌlen wersa ti i toñel Dios cheꞌ chʌncol a wen chꞌujbin Dios cheꞌ maꞌix bajcheꞌ yʌlʌ a pusicꞌal. Cheꞌ bajcheꞌ ti wʌ alʌyob cheꞌ ñac tiꞌ tyajayetyob ti tꞌan jini la quermañujob chaꞌan cheꞌ yom Dios.

19 An jini tsaꞌix bʌ i chaꞌ sʌtyʌyob i bʌ chaꞌan ti caj tiꞌ ñusʌyob wen bʌ i ticꞌol i pusicꞌal.

20 Cheꞌ ti ujtiyob jini Himeneo yicꞌot Alejandro. Ti cʌcꞌʌyob tiꞌ wenta Satanás chaꞌan miꞌ cʌyob i contrajin Dios tiꞌ tꞌañob.