Pejcʌbeñon lojon lac Yum
3
Wale hermañujob, mic subeñetla pejcʌbeñon lojon lac Yum chaꞌan machic baꞌan jal mi cꞌotyel i tꞌan lac Yum baꞌical yicꞌot chaꞌan miꞌ wen chꞌujbiñob cheꞌ bajcheꞌ ti laꞌ chꞌujbi.2 Pejcʌbeñon lojon lac Yum chaꞌan i cotyañon lojon cheꞌ miꞌ tyʌcꞌlañon lojon wen simaron bʌ quixtyañujob. Como machꞌan miꞌ luꞌ chꞌujbiñob.
3 Pero xucꞌulʌch lac Yum. Miꞌ xucꞌchocobeñetla laꞌ pusicꞌal. Mi quej i cʌñʌtyañetla ti simaronlel.
4 Cujilʌch isujm chaꞌan ti lac Yum mi laꞌ chꞌujbin. Mi quej tyo laꞌ chʌc chaꞌlen jini chʌncol bʌ c xiqꞌuetla laꞌ chaꞌlen.
5 Laꞌ i yʌqꞌueñetla ti laꞌ pusicꞌal lac Yum chaꞌan laꞌ ñaꞌtyan chʌncol i pꞌuntyañetla Dios chaꞌan laꞌ chaꞌlen pꞌuntyaya jeꞌel. Laꞌ i yʌqꞌueñetla laꞌ ñaꞌtyan laꞌ cuch pejtyel wocol ti utsꞌat bajcheꞌ tiꞌ ñusʌ Cristo jeꞌel.
Yom mi lac chaꞌlen toñel
6 Hermañujob, añʌch chaꞌan c xiqꞌuetla chaꞌan ti lac Yum Jesucristo chaꞌan maꞌ mi laꞌ piꞌlen ti tꞌan baꞌical bʌ hermañu machꞌʌ yom toñel, machꞌʌ yom ajñel bajcheꞌ tij cʌntisʌyetla.
7 Como jatyetla laꞌ wujil bajcheꞌ yom ajniquetla chaꞌan mi laꞌ meleꞌ bajcheꞌ ti lojon c pʌsꞌeyetla. Ti lojon c chaꞌle toñel cheꞌ yaꞌ añon lojon quicꞌotyetla.
8 Machꞌan ti lojon c chaꞌle uchꞌel cheꞌ machꞌan ti lojon c tyojo. Pero ti lojon c chaꞌle toñel ti lojon j cꞌʌb. Ti lojon c chaꞌle wersa ti qꞌuinil ti acꞌbʌlel chaꞌan machꞌan añon lojon ti laꞌ wenta mi juntiquileticla.
9 Cheꞌ comiqui chꞌujbic j cꞌajtibeñetla chaꞌan mi laꞌ cotyañon lojon cheꞌ yaꞌ añon baꞌ añetla pero ti lojon c chaꞌle toñel chaꞌan c pʌsꞌeñetla bajcheꞌ yom mi laꞌ wajñel.
10 Como cheꞌ yaꞌ tyo añon lojon baꞌ añetla ti lojon c subetla ili tꞌan: Jini machꞌʌ yom toñel mach yom mi yuchꞌejel jeꞌel. Chʌꞌʌch ti lojon c subetla.
11 Como mi cubin lojon chaꞌtiquil uxtiquiletla machꞌan mi laꞌ saj chaꞌlen toñel. Julaꞌ jach muqꞌuetla ti otyotyel. Yaꞌi mi laꞌ wubin chʌ bʌ mi yʌjlel. Mi laꞌ chaꞌ majlel laꞌ wʌleꞌ machꞌʌ laꞌ wentajic laꞌ chaꞌ aleꞌ.
12 Cheꞌet bʌ la bajcheꞌ jini mic xiqꞌuetla. Mic suben ti wocol tꞌan chaꞌan ti lac Yum Jesucristo chaꞌan mi laꞌ chaꞌlen toñel. Ñʌchꞌʌletla yom mi laꞌ chaꞌlen toñel chaꞌan laꞌ mʌcꞌlan laꞌ bʌ.
13 Hermañujob mach yom lujbꞌaquetla laꞌ meleꞌ chʌ bʌ wen.
14 Mi anqui majch machꞌʌ yom i jacꞌ jini tꞌan am bʌ ti ili jun, qꞌuelela majchqui. Cheꞌ jini maꞌ mi laꞌ piꞌlen ti tꞌan chaꞌan miꞌ quisnin.
15 Pero maꞌ mi laꞌ michꞌqꞌueleꞌ. Yom jach laꞌ tyumbin bajcheꞌ juntiquil hermañu bʌ.
Chaꞌan i yutslel i pusicꞌal Jesucristo
16 Laꞌ ajnic ti ñʌchꞌʌl laꞌ pusicꞌal muꞌ bʌ i yʌqꞌueñonla lac Yum am bʌ i ñʌchꞌtyʌlel ti beleꞌ ora ti pejtyel chʌ bʌ tyac mi yujtyel. Laꞌ ajnic laꞌ wicꞌot lac Yum ti pejtyeleletla.
17 Pablojon mic tsꞌijbubeñetla ili saludo tij cꞌʌb. Chʌꞌʌch mic tsꞌijbun.
18 Laꞌ ajniquetla ti yutslel i pusicꞌal lac Yum Jesucristo ti laꞌ pejtyelel. Amén.