2 Mic subeñetla ti wocol tꞌan chaꞌan mach laꞌ waꞌ qꞌuex laꞌ pensal. Mach yom mi laꞌ chaꞌlen bʌqꞌuen chaꞌan jini muꞌ bʌ i lolon al chꞌoyol i cʌntisa tiꞌ Chꞌujul bʌ i Chꞌujlel Dios. Mach laꞌ chꞌujbin cheꞌ mi laꞌ wubin subtꞌan mi cheꞌ mi laꞌ qꞌueleꞌ jun muꞌ bʌ i lolon aleꞌ c tsꞌijbubalʌch lojon muꞌ bʌ i yʌleꞌ yorojlelix wale iliyi i tyʌlel lac Yum.

3 Mach laꞌ saj acꞌ laꞌ bʌ ti lotintyel chaꞌan i qꞌuinilel lac Yum. Ñaxan tyo mi quej i contrajintyel Dios ti quixtyañu cheꞌ max tyo tyal lac Yum. Yicꞌot mi tyʌlel jini winic machꞌʌ baꞌan miꞌ saj chꞌujbin tꞌan. Mi quej i yʌqꞌuentyel i xotꞌ i mul.

4 Jini mi quej i contrajin Dios yicꞌot pejtyel muꞌ bʌ i chꞌujutisʌntyel. Jinic tyo mi quej ti buchtyʌl ti ñuc bʌ templo i chaꞌan bʌ Dios cheꞌ bajcheꞌ mi Diosʌch. Mi quej i lolon cuy i bʌ ti Dios.

5 ¿Machꞌa baꞌan cꞌajal laꞌ chaꞌan tic subeyetla cheꞌ ñac yaꞌ tyo añon quicꞌotyetla chaꞌan chʌꞌʌch mi quej yujtyel jini winic machꞌʌ baꞌan miꞌ saj chꞌujbin tꞌan?

6 Wale laꞌ wujil isujm an chʌ bʌ yes chʌncox bʌ i mʌctyʌben chaꞌan max tyo tyʌlic jini yoque simaron bʌ winic cheꞌ max tyo i yorojlel wʌ ñaꞌtyʌbil i chaꞌan Dios.

7 Pero wale chʌncox ti mucu toñel muꞌ bʌ i contrajin i mandar Dios. Pero mʌctyʌbil tyo i toñel jintyo mi locꞌsʌntyel jini chʌncol tyo bʌ i mʌctyʌben i simaronlel.

8 Cheꞌ jini mi quej i tsictiyel jini yoque simaron bʌ winic. Pero lac Yum Jesús ti yiqꞌuel jach i tiꞌ mi quej i tsʌnsan. Chaꞌan tiꞌ pꞌʌtyʌlel Jesús cheꞌ lemlaw mi tyʌlel mi quej i jisʌntyel.

9 Mi quej i tyʌlel jini yoque simaron bʌ winic tiꞌ pꞌʌtyʌlel Satanás. Mi quej i tsictisan cabʌl i pꞌʌtyʌlel. Mi quej i lotiñob ti ñuc tyac bʌ i pꞌʌtyʌlel quixtyañujob.

10 Mi quej i cꞌʌn chʌ bʌ jach yes machꞌʌ wen tyac chaꞌan i lotiñob muꞌ bʌ quej i sʌt i bʌ. Como mach yom i chꞌujbiñob jini melel bʌ tꞌan chaꞌan mi cotyʌntyelob.

11 Jin chaꞌan Dios mi quej i yʌqꞌuen i lotintyel. Mi quej i yʌqꞌuen i chꞌujbin jini machꞌʌ melel bʌ tꞌan

12 chaꞌan mi yʌqꞌuentyel i xotꞌ i mul pejtyel machꞌʌ yom i chꞌujbin tiꞌ pusicꞌal jini melelʌch bʌ tꞌan. Como miꞌ más mulan jini machꞌʌ wen.

13 Pero wersa yom mic chʌc suben Dios wocox i yʌlʌ chaꞌan jatyetla pꞌuntyʌbilet bʌ la hermañujob ti lac Yum. Como Dios ti yajcʌyetla cꞌʌlʌ ti tyejchibal chaꞌan mi laꞌ cotyʌntyel. Mi laꞌ cotyʌntyel chaꞌan ti jini melel bʌ tꞌan cheꞌ mi laꞌ chꞌujbin yicꞌot chaꞌan miꞌ cotyañetla Chꞌujul bʌ i Chꞌujlel chaꞌan la cʌcꞌ lac bʌ ti Dios.

14 Jin chaꞌan tiꞌ pʌyʌyetla Dios chaꞌan ti jini tꞌan chaꞌan laj cotyʌntyel muꞌ bʌ lojon c sub chaꞌan mi quej laꞌ wajñel yicꞌot lac Yum Jesucristo tiꞌ ñuclel.

15 Jin chaꞌan hermañujob, bej xucꞌuletla yom. Mach yom miꞌ ñajayel laꞌ chaꞌan jini tsaꞌ bʌ j cʌntisʌyet lojon mi chaꞌan ti lojon c tꞌan mi chaꞌan ti lojon cun.

16 Lac Yum Jesucristo yicꞌot Dios lac Tyat tsaꞌ bʌ i pꞌuntyʌyonla miꞌ ñuc isʌbeñonla lac pusicꞌal ti beleꞌ ora. Mi yʌqꞌueñonla lac pijtyan chʌ bʌ wen chaꞌan ti yutslel.

17 Laꞌ i ñuc isʌbeñetla laꞌ pusicꞌal. Laꞌ i xucꞌchocobeñetla chaꞌan laꞌ wʌleꞌ chaꞌan laꞌ meleꞌ pejtyel chʌ bʌ wen tyac.