Cʌntisa chaꞌan oración
2
Jini muꞌ bʌ quej c subeñet jiñʌch más ñuc bʌ i cꞌʌjnibal bʌ mandar. Mic xiqꞌuetla chaꞌan laꞌ cꞌajtibenla Dios chaꞌan tiꞌ tyojlel pejtyel quixtyañu chaꞌan laꞌ chaꞌlen oración. Pejcʌbenla Dios chaꞌan chʌ bʌ jach yom i chaꞌañob. Subenla Dios wocox i yʌlʌ chaꞌan pejtyel quixtyañujob. 2 Yom mi laꞌ chaꞌlen oración chaꞌan ti pejtyel ñuc bʌ yumʌlob yicꞌot pejtyel añoꞌ bʌ yeꞌtyel chaꞌan xucꞌul mi la cajñel, chaꞌan ñʌchꞌʌl añonla chaꞌan mi la cʌcꞌ lac bʌ ti Dios chaꞌan ajniconla ti wen chaꞌan utsꞌat miꞌ qꞌuelonla.
3 Como jiñʌch wen. Jiñʌch bajcheꞌ yom Dios Ajcotyaya lac chaꞌan cheꞌ mi lac tyajob ti oración.
4 Como Dios yom mi luꞌ tyajob i cotyʌntyel. Dios yom miꞌ luꞌ cʌmbeñob i sujmlel.
5 An juntiquil jach Dios. An jeꞌel juntiquil jach chꞌujbi bʌ i pʌy tyʌlel quixtyañujob chaꞌan i yajñel yicꞌot Dios. Jiñʌch juntiquil winic Jesucristo bʌ i cꞌabaꞌ.
6 Jesucristo ti yʌcꞌʌ i bʌ ti sajtyel chaꞌan i xotꞌben i mul chaꞌan mi cotyʌntyelob pejtyel xmulilob. Jiñʌch ti ajqꞌui ti cʌjñel ti yorojlel wʌ yajcʌbil i chaꞌan Dios.
7 Ti otsʌntiyon ti ajpuctꞌan yicꞌot ti yajcʌbil bʌ ajsubtꞌan ñumel chaꞌan mij cʌntisan i chꞌujbiñob Dios ti wen ili melel bʌ tꞌan pejtyel quixtyañu machꞌʌ israelobic. Mux c chꞌujbin Dios. Jin chaꞌan melelʌch c tꞌan. Machꞌan mucꞌon ti lot.
8 Jin chaꞌan com miꞌ chaꞌleñob oración winicob baꞌical ti pejtyel pañimil. Pero yom cheꞌ sʌc i pusicꞌal. Mach yom i chaꞌlen michꞌlel mi periyalic.
9 Cheꞌ jeꞌel xꞌixicob yom weñʌch miꞌ xojob i pislel. Mach yom ñoj wen chꞌʌlʌl. I pꞌisol jach yom i chꞌʌjlib i pislel. Mach yom ñoj wen melel i jol. Mach yom i xoj ñoj cabʌl oro, mi tyunic lets bʌ i tyojol chaꞌan i chꞌʌjlib. Mach yom i lʌp cheꞌ ñoj lets bʌ i tyojol i pislel.
10 Pero yom i chꞌʌlob i bʌ yubil chaꞌan ti wen bʌ i melbal. Jiñʌch bajcheꞌ yom i chaꞌleñob xꞌixicob tsaꞌ bʌ i chꞌujbiyob Dios.
11 Xꞌixicob yom i ñʌchꞌtyan i cʌntisʌntyel ti ñʌchꞌal. Yom ajnic ti pecꞌ.
12 Joñon machꞌan mi cʌqꞌueñob i cʌntisʌntyel winicob ti xꞌixicob. Machꞌan mi cʌqꞌueñob i yumiñob xꞌixicob. Ñʌchꞌʌl yom mi yajñelob.
13 Como Dios ñaxan ti yʌcꞌʌ Adán. Cheꞌ jini wiꞌil ti yʌcꞌʌ Eva.
14 Mach jinic ti loꞌlonti Adán, pero jini ti loꞌlonti ꞌixic. Cheꞌ jini ti yotsʌ i mul.
15 I chaꞌañʌch i cosan i yalobil xꞌixicob, chaꞌan i cʌntisañob ti chʌ bʌ wen. Mi cotyʌntyel mi chʌncol i chʌc chꞌujbin Dios, mi chʌncol i chʌc chaꞌlen pꞌuntyaya, mi chʌncol i chʌc ajñel ti wen yicꞌot ti wen bʌ i ñaꞌtyʌbal.