Bajcheꞌ yom ajñel ajcʌñʌtyajob
3
Melelʌch ili tꞌan: Mi an majch yom i cʌñʌtyan jini ochemoꞌ bʌ tiꞌ tꞌan Dios yom i chaꞌlen wen bʌ toñel. 2 Jin chaꞌan jini am bʌ yeꞌtyel ti anciano muꞌ bʌ i cʌñʌtyan ochemoꞌ bʌ tiꞌ tꞌan Dios mach yom i yotsan i mul chaꞌan machꞌan bajcheꞌ miꞌ tyajob ti tꞌan. Jiñʌch yom juntiquil jach bʌ yijñam. Yom i bajñel wen ticꞌ i pusicꞌal. Yom i yajñel ti wen bʌ i ñaꞌtyʌbal. Yom i meleꞌ chʌ bʌ wen. Yom juntiquil muꞌ bʌ i mulan i yotsan i julaꞌ ti yotyot. Yom juntiquil wen yujil bʌ cʌntisa muꞌ bʌ quej i yochel ti anciano.
3 Yom juntiquil muꞌ bʌ yochel ti yeꞌtyel ti anciano machꞌʌ yujil qꞌuixnijel, machꞌʌ baꞌan miꞌ tyecheꞌ periyal. Yom juntiquil machꞌʌ baꞌan miꞌ mulan i ganar tyaqꞌuin ti chʌ bʌ jach machꞌʌ wen. Pero yom uts bʌ i pusicꞌal. Ñʌchꞌʌlix. Machꞌan miꞌ tyecheꞌ periyal. Machꞌan miꞌ wen mulan tyaqꞌuin.
4 Yom ochic ti anciano juntiquil yujil bʌ wen bʌ xicꞌojel chaꞌan jini añoꞌ bʌ ti yotyot. Yom chꞌujbibentic i tꞌan ti i yalobilob. Yom mi qꞌuejlel ti ñuc ti yalobilob.
5 Mi mach mej i xiqꞌueꞌ jini añoꞌ bʌ ti yotyot mach mej i qꞌuel i chaꞌañoꞌ bʌ Dios muꞌ bʌ i muchꞌquiñob i bʌ .
6 Mach yom ochic chaꞌan ajcʌñʌtya ochemoꞌ bʌ tiꞌ tꞌan Dios tsijib ochem bʌ tiꞌ tꞌan Dios ame i chan isan i bʌ ame mi yotsan i mul cheꞌ bajcheꞌ ti yotsʌ i mul xiba.
7 Cheꞌ jeꞌel yom juntiquil muꞌ bʌ i qꞌuelob ti ñuc jini machꞌʌ baꞌan ochem tiꞌ tꞌan Dios chaꞌan mach yʌcꞌ i bʌ ti quisnil, ame yajlic ti yac xiba.
Bajcheꞌ yom ajñel diáconojob
8 Cheꞌ jeꞌel yom ochic ti diácono winicob muꞌ bʌ i qꞌuejlel ti wen. Yom i tsꞌʌctisan i tꞌan. Mach yom jini muꞌ bʌ ti qꞌuixnijel, mi jinic muꞌ bʌ i mulan tyaqꞌuin mi chʌ bʌ yes mach bʌ wen ti ganar.
9 Yom i wen cʌñeꞌ bajcheꞌ miꞌ wen chꞌujbin Dios. Yom maꞌix bajcheꞌ yʌlʌ i pusicꞌal chaꞌan sʌc.
10 Yom wen qꞌuelelix bʌ. Mi weñʌch i melbal yom ochic ti diácono.
11 Chʌꞌʌch xꞌixicob jeꞌel, yom mi yajñel ti wen. Mach yom i chaꞌlen jopꞌtꞌan. Yom i bajñel wen ticꞌob i pusicꞌal. Yom mi yajñel ti xucꞌul ti pejtyel muꞌ bʌ i meleꞌ.
12 Jini diácono yom juntiquil jach bʌ yijñam. Yom juntiquil yujil bʌ i xiqꞌueꞌ ti wen yalobilob yicꞌot pejtyel añoꞌ bʌ ti yotyot.
13 Como jini diáconojob wen bʌ miꞌ chaꞌlen i toñel, mi qꞌuejlel ti ñuc. Mi quej i más tyajeꞌ i chꞌejlel chaꞌan mi yʌleꞌ bajcheꞌ miꞌ chꞌujbin Cristo Jesús.
Jini muꞌ bʌ lac chꞌujbin max tyo bʌ tsictiyem ti yambʌ ora
14 Com tyʌlel ti julaꞌ ti seb baꞌañet pero chʌncol tyo c tsꞌijbubeñet ili jun
15 ame anic chʌ bʌ miꞌ jalitisañon j cꞌotyel baꞌañet. Mic tsꞌijbun iliyi chaꞌan a ñaꞌtyan bajcheꞌ maꞌ wajñel a wicꞌot i chaꞌañoꞌ bʌ jini cuxul bʌ Dios. Jini ochemeꞌ bʌ mu bʌ i muchꞌquiñob i bʌ jiñʌch baꞌ chucul, baꞌ cʌñʌtyʌbil yubil jini melel bʌ tꞌan.
16 Melelʌch ñoj ñuc i sujmlel bajcheꞌ mi lac chꞌujbin Dios:
Dios tiꞌ pʌsʌ i bʌ tiꞌ bʌcꞌtyal.
Tiꞌ sube tyojʌch chaꞌan ti Chꞌujul bʌ i Chꞌujlel.
Ajtroñelob i chaꞌan Dios chꞌoyoloꞌ bʌ ti panchan tiꞌ qꞌueleyob.
Tiꞌ sujbi baꞌan quixtyañujob.
Ti chꞌujbibenti ti pejtyel mulawil.
Ti pʌjyi letsel ti panchan.