2 Mic tsꞌijbubeñet ili jun Timoteo cheꞌ bajcheꞌ pꞌuntyʌbilet bʌ calobilet yubil. Laꞌ ajniquet ti yutslel i pusicꞌal Dios yicꞌot tiꞌ pꞌuntyaya yicꞌot tiꞌ ñʌchꞌtyʌlel tyʌlem bʌ ti Dios lac Tyat yicꞌot ti lac Yum Jesucristo.

3 Ti beleꞌ ora ti qꞌuinil ti acꞌbʌlel cheꞌ mic ñaꞌtyañet ti oración mic suben Dios wocox i yʌlʌ chaꞌañet. Chʌꞌʌch bajcheꞌ jeꞌel tiꞌ chaꞌleyob jini c yumob ti ñoj oniyix, mic chaꞌliben i toñel Dios ti ñʌchꞌtyʌlel c pusicꞌal chaꞌan sʌc.

4 Mic chʌc cꞌajtisan i yaꞌlel a wut cheꞌ ñac ti majliyon. Com c chaꞌ qꞌuelet chaꞌan más cꞌajacña coj mi cubin.

5 Cheꞌ jeꞌel, mic chaꞌ cꞌajtisan bajcheꞌ maꞌ wen chꞌujbin ti a pusicꞌal. Ñaxan tiꞌ chꞌujbiyob a coꞌ Loida bʌ i cꞌabaꞌ yicꞌot a ñaꞌ Eunice bʌ i cꞌabaꞌ. Mic ñaꞌtyan jatyet jeꞌel maꞌ chꞌujbin.

6 Jin chaꞌan, mic subeñet a chꞌejlisan a bʌ ti a majtyan tiꞌ toñel Dios tsaꞌ bʌ i yʌqꞌueyet Dios cheꞌ ñac ti cʌcꞌʌ j cꞌʌb ti a jol.

7 Como Dios machꞌan ti yʌqꞌueyonla lac bʌqꞌuen. Pero ti yʌqꞌueyonla i pꞌʌtyʌlel lac pusicꞌal. Ti yʌqꞌueyonla jeꞌel lac pꞌuntyan lac bʌ. Ti yʌqꞌueyonla wen bʌ lac ñaꞌtyʌbal.

8 Mach a quisnin a sub i tꞌan lac Yum. Mach a quisniñon cheꞌ cʌchʌlon chaꞌan ti caj mic sub i tꞌan. Pero mach a bʌcꞌñan a ñusan wocol jeꞌel chaꞌan ti caj jini tꞌan chaꞌan laj cotyʌntyel. Como mux i yʌqꞌueñonla jeꞌel i pꞌʌtyʌlel lac ñusan wocol.

9 Dios tiꞌ cotyʌyonla. Tiꞌ pʌyʌyonla chaꞌan mi la cʌqꞌuen lac bʌ ti Dios. Mach chaꞌanic wen bʌ lac chaꞌlibal tiꞌ pʌyʌyonla pero chaꞌan chʌꞌʌch tiꞌ ñaꞌtyʌ yicꞌot chaꞌan tiꞌ pꞌuntyʌyonla chaꞌan añonla ti Cristo Jesús. Tsaꞌix aqꞌuentiyonla lac pꞌuntyʌntyel ti Dios cheꞌ max tyo baꞌan mulawil.

10 Wale tsaꞌix tsictiyi ili pꞌuntyaya cheꞌ ñac ti tyʌli Jesucristo Ajcotyaya lac chaꞌan. Jini tiꞌ jisʌ i pꞌʌtyʌlel sajtyel. Tiꞌ tsictisʌ laj cuxtyʌlel machꞌʌ chꞌujbi i jisʌntyel chaꞌan ti jini tꞌan chaꞌan laj cotyʌntyel.

11 Dios ti yajcʌyon chaꞌan mic sub ili tꞌan chaꞌan laj cotyʌntyel. Tiꞌ chocoyon majlel chaꞌan yajcʌbilon bʌ ajsubtꞌan ñumel chaꞌan mij cʌntisañob jini mach bʌ israelob.

12 Jin chaꞌan mi quilan pejtyel ili wocol. Pero machꞌan mij quisnin. Como cʌñʌl c chaꞌan jini muꞌ bʌ c chꞌujbin. Cujil isujm añʌch i pꞌʌtyʌlel chaꞌan i cʌñʌtyʌbeñon jini tsaꞌ bʌ cotsʌbe tiꞌ wenta cꞌʌlʌ jintyo ti qꞌuinilel cheꞌ Dios miꞌ chaꞌlen melojel.

13 Chʌc tsʌclen jini wen bʌ cʌntisa tsaꞌ bʌ c subeyet. Chꞌujbin. Pꞌuntyañob cheꞌ bajcheꞌ mi la cʌqꞌuentyel cheꞌ mi la cajñel ti Cristo Jesús.

14 Cʌñʌtyan jini tꞌan tsaꞌ bʌ i yaqꞌueyet Dios ti a wenta. Cʌñʌtyan chaꞌan ti Chꞌujul bʌ i Chꞌujlel Dios am bʌ la quicꞌot.

15 Como ñaꞌtyʌbil a chaꞌan pejtyel añoꞌ bʌ ti pañimil Asia bʌ i cꞌabaꞌ tiꞌ cʌyʌyoñob. Cheꞌ jeꞌel jini Figelo yicꞌot Hermógenes i cꞌabaꞌ bʌ winicob.

16 Laꞌ i pꞌuntyan Dios jini añoꞌ bʌ ti yotyot Onesíforo como cabʌl tiꞌ cotyʌyon. Machꞌan tiꞌ quisniyon cheꞌ ñac cʌchʌlon.

17 Pero cheꞌ tsajni ti lum Roma bʌ i cꞌabaꞌ machꞌan tiꞌ cʌyʌ i sʌclañon cꞌʌlʌ jintyo tiꞌ tyajayon.

18 Laꞌ tyo i yʌqꞌuen i tyaj i pꞌuntyʌntyel ti lac Yum jini Onesíforo ti qꞌuinilel mi quej i chaꞌlen melojel Dios. Wen a wujilʌch bajcheꞌ tiꞌ cotyʌyonla yaꞌ ti lum Efeso bʌ i cꞌabaꞌ.