2 Jini tsaꞌ bʌ a wubi tsaꞌ bʌ j cʌntisa tiꞌ tyojel cabʌlob chaꞌ aqꞌuen tiꞌ wenta xucꞌuloꞌ bʌ chꞌujbi bʌ i chaꞌ cʌntisañob yañoꞌ bʌ jeꞌel.

3 Ñusan wocol cheꞌ bajcheꞌ wen bʌ soldadojet i chaꞌan bʌ Jesucristo.

4 Machꞌan winic am bʌ yeꞌtyel ti soldado muꞌ bʌ i chaꞌlen i bajñel toñel como miꞌ meleꞌ ti jumpꞌej i pusicꞌal chʌ bʌ yes jach yom i yum soldado tsaꞌ bʌ i yotsʌ ti soldado.

5 Cheꞌ jeꞌel mi maꞌix miꞌ chaꞌlen alas ti wen jini xꞌalas bajcheꞌ mi subentyel maꞌix mi ganarin.

6 Jini xpacꞌ tsaꞌ bʌ i chaꞌle tsʌts bʌ toñel ñaxan miꞌ cꞌuxeꞌ jini muꞌ bʌ i cꞌajeꞌ.

7 Ñaꞌtyan chʌ bʌ mi cʌleꞌ. Dios mi quej i yʌqꞌueñet a luꞌ ñaꞌtyan.

8 Chʌc ñaꞌtyan Jesucristo tsaꞌ bʌ tyejchi loqꞌuel baꞌan sajtyemoꞌ bʌ. Jiñʌch i jiñʌjlel jini yumʌl David bʌ i cꞌabaꞌ. Jiñʌch i tꞌan muꞌ bʌ c sub chaꞌan laj cotyʌntyel.

9 Mi quilan wocol chaꞌan ti caj ili tꞌan. Jinic tyo ti cʌjchiyon cheꞌ bajcheꞌ ajtsʌnsajon, pero i tꞌan Dios machꞌan cʌchʌl.

10 Jin chaꞌan mic ñusan wocol chaꞌan com mi cotyʌntyel pejtyel tsaꞌ bʌ i yajcʌ Dios. Jiñʌch ñoj ñuc bʌ laj cotyʌntyel machꞌʌ yujil jilel. Jiñʌch mi la cʌqꞌuentyel cheꞌ añonla ti Cristo Jesús.

11 Melelʌch ili tꞌan:

14 Ñaꞌtyʌbeñob iliyi: Chʌncox i qꞌuelonla lac Yum. Aqꞌuen tiꞌ wenta hermañujob chaꞌan machꞌan miꞌ lolon lajeꞌ i sujmlel cabʌl tꞌan tyac. Como maꞌix i cꞌʌjnibal cabʌl tꞌan tyac. Mucꞌ jach i lolon tyechben yambʌ pensal jini muꞌ bʌ i ñʌchꞌtyan.

15 Laꞌ tsictiyic wen bʌ ajtroñelet i chaꞌan Dios chaꞌan ti pejtyel wen bʌ muꞌ bʌ mejlel a mel. Yom ajtroñelet machꞌʌ baꞌan chʌ bʌ miꞌ quisnin muꞌ bʌ i cʌntisan ti wen jini melel bʌ tꞌan.

16 Mach a ñʌchꞌtyʌben i tꞌan jini machꞌʌ wen i chaꞌan jach bʌ mulawil. Mi yʌleꞌ machꞌʌ baꞌan i cꞌʌjnibal. Ti jujunyajlel cheꞌ mi yʌlob mi yocꞌan i simaronlel.

17 Ili lolom jach bʌ cʌntisa cheꞌ bajcheꞌ bʌbʌqꞌuen bʌ cꞌamꞌan cáncer bʌ i cꞌabaꞌ muꞌ bʌ i luꞌ pasel majlel ti lac bʌcꞌtyal. Chʌꞌʌch ti ujti yicꞌot jini Himeneo yicꞌot Fileto bʌ i cꞌabaꞌob.

18 Jiñob ti ñajatisʌyob jini melel bʌ tꞌan. Ti yʌlʌyob chaꞌan ujtyemix cheꞌ mi tyechelob loqꞌuel baꞌan sajtyemoꞌ bʌ. Chʌꞌʌch chʌncol i yʌsañob bajcheꞌ miꞌ chꞌujbiñob chaꞌtiquil uxtiquilob.

19 I tꞌan Dios tsʌts an. Maꞌix chʌ bʌ chꞌujbi i nijcan. Ti Tsꞌijbubil bʌ i Tꞌan Dios mi yʌleꞌ: Lac Yum miꞌ cʌñeꞌ jini i chaꞌañoꞌ bʌ. Mi yʌl jeꞌel: Pejtyel i chaꞌañoꞌ bʌ Cristo yom i cʌyob i simaronlel. Chʌꞌʌch mi yʌl tiꞌ tꞌan Dios.

20 Ti jumpꞌej colem otyot an chꞌejew melel tyac bʌ ti oro yicꞌot ti plata. Añʌch jeꞌel chꞌejew tyac melel bʌ ti tyeꞌ yicꞌot ti lum. An jini ñuc tyac bʌ i cꞌʌjnibal. An yambʌ machꞌʌ baꞌan ñoj ñuc i cꞌʌjnibal.

21 Chaꞌan lac tyaj ñuc bʌ laj cꞌʌjnibal yom mi la cʌqꞌuen lac bʌ lac Yum chaꞌan cꞌʌjnibalonla i chaꞌan. Yom mi la cajñel ti sʌc. Cheꞌ jini añʌch ñoj ñuc bʌ laj cꞌʌjnibal chaꞌan pejtyel chʌ bʌ wen.

22 Putsꞌtyan cheꞌ jini ti pejtyel i tsuculel muꞌ bʌ i chaꞌleñob alobob tyo bʌ. Tsʌclen jini tyoj bʌ. Wen chꞌujbin Dios. Chaꞌlen pꞌuntyaya. Ajñen ti ñʌchꞌʌl. Chʌꞌʌch yom a wajñel bajcheꞌ jini muꞌ bʌ i pejcan lac Yum tiꞌ sʌclel i pusicꞌal.

23 Mach a ñʌchꞌtyan i tꞌan jini muꞌ jach bʌ i tyecheꞌ machꞌʌ baꞌan i sujmlel bʌ tꞌan. Machꞌan i cꞌʌjnibal. Ñaꞌtyʌbilix a chaꞌan mucꞌ jach i tyech periyal jini tꞌan tyac.

24 I yajtroñel lac Yum mach yom i chaꞌlen periyal. Pero yom i yajñel ti wen yicꞌotyob ti pejtyelelob. Jini ajtoñel yom wen miꞌ chaꞌlen cʌntisa. Yom i ñusan wocol ti utsꞌat cheꞌ miꞌ contrajiñob tiꞌ tꞌan.

25 Yom i tyoj isan jini simaroñoꞌ bʌ ti yutslel i pusicꞌal. Cꞌoꞌojlʌch muꞌ tyo quej i nijcʌben i pusicꞌal Dios chaꞌan i cʌy i mul chaꞌan mi cʌjñel i sujmlel

26 chaꞌan mi quej i ñaꞌtyan. Chaꞌan i putsꞌtyan i yac xiba baꞌ chucul yubil cheꞌ miꞌ melob chʌ bʌ yom xiba.