2 Mi quej i bajñel ñaꞌtyañob i ñuclel jini quixtyañujob. Mi quej i wen mulañob tyaqꞌuin. Mi quej i qꞌuel i bʌ ti ñoj wen. Mi quej i más ñuc isañob i bʌ tiꞌ tꞌan. Mi quej i contrajiñob Dios tiꞌ tꞌan. Machꞌan mi quej i jacꞌben i tꞌan i tyat i ñaꞌ. Maꞌix mi yʌqꞌueñob wocox yʌlʌ. Machꞌan miꞌ qꞌuel ti ñuc i chꞌujbintyel Dios.

3 Machꞌan mi quej i chaꞌleñob pꞌuntyaya. Mach chaꞌ utsꞌayob cheꞌ michꞌob. Miꞌ chaꞌleñob jopꞌtꞌan. Mach chꞌujbiyic i bajñel ticꞌob i pusicꞌal. Simaroñob. Miꞌ contrajiñob pejtyel wen bʌ.

4 Mi quej i yʌcꞌob i piꞌʌlob tiꞌ cꞌʌb i contra. Ñoj bʌbʌqꞌuen tyac i chaꞌlibalob. Ñoj ñuc miꞌ pʌsob i bʌ. Mucꞌ jach i niqꞌui chaꞌleñob chʌ bʌ miꞌ mulan i bajñel i pusicꞌal, mach jinic yom bʌ Dios.

5 Miꞌ lolon melob cheꞌ bajcheꞌ chʌncol i wen chꞌujbin Dios pero machꞌan i pꞌʌtyʌlel Dios yicꞌotyob. Mach a piꞌlen ti tꞌan jini quixtyañujob muꞌ bʌ i chaꞌlen cheꞌ bajcheꞌ jini.

6 Como an muꞌ bʌ i yochel ti otyot tyac chaꞌan i loꞌlon xꞌixicob tiꞌ cʌntisa. Cʌchʌlob ti mulil jini xꞌixicob. Miꞌ waꞌ chꞌujbin i lotintyel. Chʌncol jach i niqꞌui chaꞌlen chʌ bʌ jach yom i bajñel pusicꞌal jini xꞌixicob.

7 Chʌncol jach i lolon cʌñeꞌ majlel chʌ bʌ tyac jach yes pero jini i sujmlel bʌ mach chꞌujbi i cʌñob.

8 Chʌꞌʌch bajcheꞌ jini wujtyob Janes yitꞌot Jambres bʌ i cꞌabaꞌob tiꞌ contrajiyob Moisés ti ñoj oniyix. Chʌꞌʌch jeꞌel ili quixtyañujob miꞌ chʌc contrajiñob jini melel bʌ tꞌan. Mʌctyʌbilix i cʌñob i sujmlel yubil jini quixtyañujob. Maꞌix mi yoque acꞌ tiꞌ pusicꞌal i tꞌan Dios.

9 Pero machꞌanix mi quej i bej ganarin ti cʌntisa como ti pejtyelelob mi quejel i cʌñob mach wen bajcheꞌ miꞌ ñaꞌtyañob. Chʌꞌʌch ti ujti jini chaꞌtiquil tsaꞌ bʌ i contrajiyob Moisés.

10 Pero jatyet chʌncolʌch a wen chꞌujbibeñon jini j cʌntisa. Tsaꞌix a cʌñʌ bajcheꞌ ti ajniyon. Tsaꞌix a ñaꞌtyʌ bajcheꞌ tic pensali c meleꞌ chʌ bʌ wen yicꞌot bajcheꞌ tic chꞌujbi. Tsaꞌix a wubi bajcheꞌ weñʌch tic ñusʌ i tꞌañob. Tsaꞌix a qꞌuele bajcheꞌ tic pꞌuntyʌyob yicꞌot bajcheꞌ tic ñusʌ wocol.

11 Tsaꞌix a qꞌuele bajcheꞌ tiꞌ tyʌcꞌlʌyoñob, bajcheꞌ ti quilʌ wocol. Luꞌ cʌñʌl a chaꞌan pejtyel bajcheꞌ ti ujtiyon yaꞌ ti lum tyac Antioquía, Iconio yicꞌot Listra bʌ i cꞌabaꞌ tyac. Cʌñʌl a chaꞌan bajcheꞌ tic ñusʌ wocol tic tyʌcꞌlʌntyel. Pero lac Yum tiꞌ cotyʌyon ti pejtyel jini.

12 Melelʌch pejtyel yom bʌ i wen acꞌ i bʌ ti Cristo Jesús mi quej i tyʌcꞌlʌntyel.

13 Pero jini simaroñoꞌ bʌ yicꞌot jini xlotyob muꞌ bʌ i lolon lotiñob chaꞌan jach yomob ganar mi quej i más chaꞌleñob jini machꞌʌ wen. Miꞌ lotiñob. Mi lotintyelob jeꞌel.

14 Pero jatyet chʌc tsʌclen jini tsaꞌ bʌ a cʌñʌ, jini tsaꞌ bʌ a chꞌujbi chaꞌan yoque melelʌch. Chʌncox a wen ñaꞌtyan jini tsaꞌ bʌ i cʌntisʌyet.

15 Cꞌʌlʌ cheꞌ ñac alʌlet tyo ti a cʌñʌ i sujmlel jini Tsꞌijbubil bʌ i Tꞌan Dios chꞌujbi bʌ i cʌntisañet. Chꞌujbi a cotyʌntyel cheꞌ maꞌ chꞌujbin Cristo Jesús ti a pusicꞌal.

16 Pejtyel Tsꞌijbubil bʌ i Tꞌan Dios ti xijqꞌui ti tsꞌijbuntyel ti Dios. An i cꞌʌjnibal chaꞌan cʌntisa, chaꞌan lac ticꞌol chaꞌan lac tyoj isʌntyel chaꞌan laj cʌntisʌntyel chaꞌan weñʌch mi la cajñel.

17 An i cꞌʌjnibal jini Tsꞌijbubil bʌ i Tꞌan Dios chaꞌan jujuntiquil quixtyañu i chaꞌan bʌ Dios chaꞌan miꞌ tyajeꞌ i ñaꞌtyʌbal chaꞌan i chajpʌben i pusicꞌal chaꞌan i mel pejtyel chʌ bʌ wen.