4
Chʌncol i qꞌuelonla Dios yicꞌot lac Yum Jesucristo muꞌ bʌ quej i mel jini cuxuloꞌ bʌ yicꞌot jini tsaꞌix bʌ sajtiyob cheꞌ mi tyʌlel. Mi quej i chaꞌlen yumʌl. Jin chaꞌan mic xiqꞌuet chaꞌan maꞌ sub i tꞌan Dios.2 Subeñob i tꞌan Dios. Yom chajpʌbilet a chʌc subeñob baꞌical bʌ ora cheꞌ yom i yubiñob cheꞌ mach yom i yubiñob. Yom a tsictisʌbeñob i mul. Yom a ticꞌob. Yom a ñuc isʌbeñob i pusicꞌal ti cʌntisa. Yom maꞌ ñusan wocol ti utsꞌat.
3 Como tyal i yorojlel mach yomob i yubiñob ili wen bʌ cʌntisa. Mi quej i sʌclan cabʌl ajcʌntisajob muꞌ bʌ i cʌntisañob chʌ bʌ yom i yubiñob chaꞌan cheꞌ yom i bajñel i pusicꞌalob.
4 Mach yom i chʌc ubin jini melel bʌ tꞌan. Mi quej i chꞌujbiñob chʌ bʌ tyac jachix bʌ tꞌan.
5 Pero jatyet, chʌc tsʌclen wen bʌ a ñaꞌtyʌbal. Ñusan wocol ti utsꞌat. Chʌc acꞌʌ a bʌ ti subol jini tꞌan chaꞌan laj cotyʌntyel. Luꞌ tsꞌʌctisan ti wen a toñel i chaꞌan bʌ Dios.
6 Joñon chʌncox cʌjqꞌuel cheꞌ bajcheꞌ i majtyan Dios yubil. Chʌncolix i lʌcꞌ i yorojlel c sajtyel.
7 Tic chaꞌle wersa ti jini muꞌ bʌ lac chꞌujbin. Wale cꞌotyemonix baꞌ jaxʌl mi quej c sajtyel. Tij cꞌʌlʌ wen chꞌujbi.
8 Wale chʌncox c pijtyan c majtyan muꞌ bʌ i yʌqꞌuentyel jini muꞌ bʌ i yajñel ti tyoj. Mi quej i yʌqꞌueñon lac Yum tiꞌ qꞌuinilel melojel. Mach jinic jach joñon mi yʌqꞌueñon pero mi yʌqꞌuentyel jeꞌel ti pejtyelelob majchical jachix yoma jax bʌ chaꞌan chaꞌ tyʌlic lac Yum. Jiñʌch wen bʌ juez lac Yum.
Tꞌan chaꞌan chʌ bʌ yom i chaꞌlen Timoteo
9 Chaꞌlen wersa chaꞌan mach jalic tyʌliquet a julaꞌañon.
10 Como jini Demas tsaꞌix i cʌyʌyon. Como más tiꞌ mulʌ chʌ bʌ yes an ti mulawil. Tsaꞌix majli ti lum Tesalónica bʌ i cꞌabaꞌ. Pero Crescente ti majli ti pañimil Galacia bʌ i cꞌabaꞌ. Tito ti majli ti pañimil Dalmacia bʌ i cꞌabaꞌ.
11 Jini jach Lucas wʌꞌan quicꞌot. Yom a sʌclan jini Marcos. Pʌyʌ tyʌlel a wicꞌot. Como i cꞌʌjnibal c chaꞌan chaꞌan i cotyañon.
12 Tic choco majlel Tíquico bʌ i cꞌabaꞌ ti lum Efeso.
13 Yaꞌ bʌ maꞌ tyʌlel, chꞌʌmꞌeñon tyʌlel jini c tsuts bujc tsaꞌ bʌ j cʌyʌ yaꞌ ti yotyot Carpo yaꞌ ti lum Troas bʌ i cꞌabaꞌ. Maꞌ chꞌʌmꞌeñon tyʌlel jeꞌel cun tyac. Jini más com jini cun tyac muꞌ bʌ j cꞌʌn ti tsꞌijb.
14 Cabʌl tiꞌ contrajiyon jini Alejandro muꞌ bʌ ti toñel ti tsucu tyaqꞌuin. Pero lac Yum tyo mi quej i tyojben jiñʌch bajcheꞌ tiꞌ chaꞌle.
15 Cʌñʌtyan a bʌ como cabʌl miꞌ contrajin Alejandro i tꞌan Dios muꞌ bʌ lac sub.
16 Machꞌan majch tiꞌ cotyʌyon cheꞌ ñac tic ñaxan mele c bʌ baꞌan am bʌ yeꞌtyel. Pejtyelelob tiꞌ cʌyʌyoñob. Laꞌ ñusʌbenticob i mul.
17 Pero lac Yum an quicꞌot. Tiꞌ cotyʌyon. Ti yʌqꞌueyon c pꞌʌtyʌlel. Ti mejlic jolontisan jini subtꞌan i chaꞌan bʌ laj cotyʌntyel. Tic subeyob chaꞌan ubintic pejtyel machꞌʌ israelobic. Cheꞌ tiꞌ locꞌsʌyon lac Yum ti bʌbʌqꞌuen tyac bʌ cheꞌ bajcheꞌ ti tiꞌ colem bajlʌm yubil.
18 Mi quej i colon loqꞌuel ti pejtyelel machꞌʌ wen. Mux i cʌñʌtyañon lac Yum chaꞌan cꞌoticon baꞌ miꞌ chaꞌlen yumintyel ti panchan. Laꞌ tsictiyic i ñuclel lac Yum ti beleꞌ ora. Amén.
Cojachix bʌ saludos yicꞌot tꞌan chaꞌan i yutslel Dios
19 Aqꞌuen saludos jini Prisca yicꞌot Aquila yicꞌot añoꞌ bʌ ti yotyot Onesíforo.
20 Ti cʌyle ti lum Corinto bʌ i cꞌabaꞌ jini Erasto. Cꞌam tij cʌyʌ Trófimo yaꞌ ti lum Mileto bʌ i cꞌabaꞌ.
21 Jopꞌox a tyʌlel cheꞌ max tyo yorojlel tsʌñal. Miꞌ chocbeñetyob tyʌlel saludos jini Eubulo, Pudente, Lino, yicꞌot Claudia bʌ i cꞌabaꞌob yicꞌot pejtyel la quermañujob.
22 Laꞌ ajnic a wicꞌot lac Yum Jesucristo. Laꞌ ajnic laꞌ wicꞌot ti laꞌ pejtyel i yutslel i pusicꞌal Dios. Amén.